Read Cibverano Cipsa Cisena 1 Pedhru 2 Bible Online

1 Pedhru 2 - Cibverano Cipsa Cisena bible

1 Pedhru 2

¹Na tenepo, bulukani pa uipi onsene pontho na pakunyengererana konsene, pa uthambi, pa mabibvu, pontho na pa mapseda onsene akusiyana-siyana.

²Funani na ntima onsene nkaka wa mu nzimu wakukhonda kubvungazwa na pinango, ninga ana a pabere, toera na nkaka unowu mukule mbamupulumuka,

³thangwi mwadzindikira kale kuti Mbuya ndi udidi.

⁴pakufendedzera kwanu kuna Iye, mwala wa m'maso, udakhondiwa na anthu, mbwenye wasankhulwa na wakufunika na Mulungu.

⁵Imwembo musacitwa ninga myala ya m'maso, pakumangwa nyumba ibodzi ya mu nzimu, toera mukhale anyantsembe akuphatira basa Mulungu, kuti muikhe ntsembe za mu nzimu, zakutawirirwa na Mulungu, na thangwi ya Yezu Kirixtu.

⁶Thangwi Bukhu ya Mulungu isalonga tenepa: “Lang'anani, ndinaikha pa phiri ya Siyau mwala wa pa nkhomu, wakusankhulwa pontho wakufunika kakamwe. Apo ule anaukhulupira nkhabebve kudza kasandikika.”

⁷Na tenepo, kuna imwe anakhulupira, mwala uyu ndi wakufunika kakamwe. Mbwenye kuna ale anakhonda kukhulupira, “mwala udakhondiwa na anyakumanga nyumba, wacitika mwala wa pa nkhomu,”

⁸pontho wacitika “mwala wakugwegwedusa, na mwala ukulu unagwisa.” Iwo asagwegweduka thangwi nkhabe kutawira fala ya Mulungu, thangwi ndi penepi pikhafuna Mulungu kuna iwo.

⁹Mbwenye imwe ndimwe dzindza yakusankhulwa, anyantsembe a Mambo, mbumba yakulungama, mbumba ya Mulungu, toera kumwaza mabasa akudzumisa a Ule adakucemerani n'cidima kwenda ku cieza cace cakudzumisa.

¹⁰Kale ene imwe mukhali mbumba tayu, mbwenye cincino ndimwe mbumba ya Mulungu. Imwe mukhabverwa ntsisi na Iye tayu, mbwenye cincino mwabverwa ntsisi.

¹¹Abale akufunika, imwe ninga anthu akudza, peno anyakutama pa dziko, ndisakuphembani kuti muthunde pinafuna nyama, pinagwa nkhondo na nzimu.

¹²Pangisani makhaliro adidi pakati pa ale anakhonda kutawira Yezu, toera kuti angakupambazirani pyakuipa, aone udidi unacita imwe mbakuza napyo Mulungu ntsiku yakubwera kwace.

¹³Na thangwi ya Mbuya, bverani utongi onsene wa padziko. Peno kuna mambo ninga ntongi wankulu,

¹⁴peno atongi akutumwa na iye toera kuthabusa ale anacita kuipa, na kusimba ale anacita udidi.

¹⁵Thangwi Mulungu asafuna kuti na kucita kwanu udidi, madzemwa anakhonda kudziwa, asowe pyakulonga kuna imwe.

¹⁶Khalani ninga anthu akusudzuka, mbwenye lekani kupambazira kusudzuka kwanu toera muone njira yakucita nayo kuipa. Khalani ninga adzakazi a Mulungu.

¹⁷Lemedzani anthu onsene, funani abale onsene muna Kirixtu, gopani Mulungu, lemedzani mambo.

¹⁸Imwe adzakazi, bverani ambuya anu na kualemedza konsene. Si kuna ale basi adidi na analekerera tayu, mbwenye na kuna alembo akuipa ntima.

¹⁹Thangwi mphyadidi kuna munthu kupirira nyatwa mbasoweka mathangwi, mbadziwa kuti ndi kufuna kwa Mulungu.

²⁰Thangwi ninji cinafuna kuwina munthu angapirira kuthabuswa na thangwi ya kucita pyakuipa? Mbwenye mungapirira na kuona nyatwa na thangwi ya kucita udidi, penepyo mphyakusimbwa patsogolo pa Mulungu.

²¹Penepi ndipyo pidacemererwa imwe, thangwi Kirixtu aonambo nyatwa pa thangwi yanu. Iye acita penepyo toera mumulandire, kuti mulonde manyalo ace.

²²“Iye nkhabe kudawa kubodzi kudacita Iye, pontho nkhabe uthambi ubodzi udalonga Iye na mulomo wace.”

²³Angatikanwa, hakhabwezerambo tayu. Pikhaona Iye nyatwa, hadaathusa tayu, mbwenye akhapereka pyonsene m'manja mwa Ule anatonga mwakulungama.

²⁴Iye ene Kirixtu akwata madawi athu m'manungo mwace mbaenda na iwo pa ntanda, toera tikhale anthu akufa pa madawi, mbatikhala am'maso pa pinthu pyakulungama. Na pironda pyace, imwe mwawangiswa.

²⁵Thangwi imwe mukhakhala ninga mabira akutaika. Mbwenye cincino mwazungunuka kuna Nkumbidzi pontho Muonereri wa mizimu yanu.