Read Cibverano Cipsa Cisena 1 Juwau 1 Bible Online

1 Juwau 1 - Cibverano Cipsa Cisena bible

1 Juwau 1

¹Pire pikhalipo kutomera pakutoma, pire pidabva ife, pire pidaona ife na maso athu, pire pidadinkhisa ife pontho manja athu mbapiphata, ipi tisapilonga pa thangwi ya Fala ya upulumuki.

²Upulumuki unowu wapangizika. Ife tauona, pontho ndi unowu unacitira ife umboni, mbatikupangani upulumuki wakukhonda kumala ukhali na Baba, pontho mbupangizika kuna ife.

³Ife tisakupangani pire pidaona ife na pidabva ife, toera muphatanembo na ife. Kuphatana kwathu ndi na Mulungu Baba, pontho na Mwana wace Yezu Kirixtu.[1]

⁴Pontho tisakulemberani pinthu ipi toera kutsandzaya kwathu[2] kudzadziswe.

⁵Apo mphangwa zidabva ife kuna Kirixtu zinakupangani ife ndi izi: Mulungu ndi cieza. Muna Iye nkhabemo cidima na pang'ono pene.

⁶Na tenepo, tingalonga kuti taphatana na Mulungu khundu inango mbatifamba n'cidima, dziwani kuti tiri kulonga uthambi mbatikhonda kucita pya ndimo mwene.

⁷Mbwenye tingafamba mu cieza, ninga Iye ali mu cieza, ife tonsene taphatana m'bodzi na m'bodzi, pontho ciropa ca Yezu Mwana wa Mulungu, cinatitsuka kudawa konsene.[3]

⁸Tingalonga kuti ife nkhabe kudawa, tiri kunyengezana tekha ene, pontho muna ife nkhabemo pya ndimo mwene.

⁹Mbwenye tingadambula madawi athu kuna Mulungu, Iye ndi wakunyindirika na wakulungama, toera kulekerera madawi athu, na kutitsuka kuipa konsene.

¹⁰Tingalonga kuti cipo tidzati kudawa, tisalonga kuti Mulungu ndi nyauthambi, pontho mafala ace nkhabemo muna ife.