Read Cibverano Cipsa Cisena Djuda 1 Bible Online

Djuda 1 - Cibverano Cipsa Cisena bible

Djuda 1

¹Ndine Djuda, n'dzakazi wa Yezu Kirixtu,[1] m'bale wace Tiyago. Ndisalemba tsamba iyi kuna ale adacemerwa, adafuniwa na Mulungu Baba, mbakoiwa[2] muna Yezu Kirixtu.

²Ntsisi, ntendere na kufunana mbapinjipe kuna imwe.

³Anyakufunika, mukhacita ine mphambvu zonsene toera kukulemberani pa thangwi ya upulumuki wathu uli na ife pabodzi pene, ndanyerezera kuti pikhafunika ndikulembereni cincino toera kukupasani cipapu kuti mugwe nkhondo, kugwera kukhulupira kudanyindirwa mbumba ya Mulungu kabodzi basi.

⁴Thangwi anthu anango akhadamala kulemberwa kale ene kuti akoneswe, apita pakati panu na ucenjeri. Anthu enewa ndi anyakuipa mitima. Iwo aphinduza kukoma ntima kwa Mulungu wathu toera acite pyakuipa pinafuna manungo awo, pontho asakhonda Yezu Kirixtu, Ntongi pontho Mbuya wathu m'bodzi ekha.

⁵Ine ndisadziwa kuti imwe musapidziwa kale pyonsene ipi, mbwenye ndisafuna kukukumbusani kuti Mbuya apulumusa mbumba ibodzi mbaibulusa mu dziko ya Idjipitu. Buluka penepo, apha ale adakhonda kutawira.

⁶Kuna alembo maanju adacimwana kulemedza pidzo pidapaswa iwo, mbwenye mbasiya mbuto yawo, Mulungu ali kuakoya n'cidima, mbaamanga na unyolo kwenda na kwenda, mpaka Ntsiku ikulu ya kutongwa kwawo.

⁷Sawa-sawa na mizinda ya Sodhoma na Gomora, na mizinda ya cifupi na eneyi ikhacita pyalukwali ninga iwo, na pinango pyakuzuda pidakhonda kukhala pyaciunthu, yaoneswa nyatwa ya moto wakukhonda kumala toera kucenjeza anthu.

⁸Sawa-sawambo na iwo, na kunyindira ndoto zawo, asapsipisa manungo awo ene, asakhonda utongi, pontho mbaxola mphambvu za kudzulu.

⁹Mbwenye pa nthonga idacita anju wankulu anacemerwa Migeli na Dyabu, na thangwi ya manungo a Mozesi, iye hadalesera kumulongera mafala akuxola tayu, mbwenye ampanga kuti: “Mulungu mbakusandike!”

¹⁰Mbwenye anthu enewa asaxola pyonsene pire pinakhonda iwo kudziwa. Pontho pinthu pinadziwa iwo na manyerezero akusowa ndzeru ninga pinyama, penepi ndipyo pinaapitisa mu njira yakutaika.

¹¹Ana nyatwa anthu enewa! Thangwi akwata njira ya Kainu. Na kufuna kwawo kobiri, iwo agwera mu njira yakuipa ya Bhalamu, pontho mbafudziwa ninga pa cikuti ca Koraa.[3]

¹²Amuna enewa akhala ninga myala yakugopsa m'bara, pa maphwandu a ciubale anacita imwe, mbadya na imwe pabodzi mwakupasa manyadzo. Ndi akumbidzi anakumbizika okha ene, pontho akhala ninga makole akusoweka madzi, mbagwinyiwa na mphepo. Akhala ninga miti yakusowa misapu pa n'dzidzi wakubala misapu, mbifa kawiri, mbiduliwa na michici ene.

¹³Akhala ninga mabimbi akugopsa a m'bara, anabulusa mapobvu a mabasa awo akupasa manyadzo. Akhala ninga nyenyezi zakutaika, zidakoyerwa cidima cikulu ca kwenda na kwenda.

¹⁴Enoki, munthu wa dzindza yacinomwe kubulukira pa Adhamu, apilonga na ciporofeta pa thangwi yawo kuti: “Lang'anani, Mbuya ali kubwera na pikwi na pikwi pya mbumba yace[4],

¹⁵kudza katonga onsene, mbakonesa anthu[5] onsene, pa thangwi ya mabasa awo akuipa adacita iwo na kuipa kwawo mitima, pontho pa thangwi ya mafala onsene a magwandu akhamulongera anyakudawa akuipa mitima.”

¹⁶Anthu enewa asakhala mbadungunya, mbakhonda kukomerwa na cinthu, mbatowera mafuniro awo akuipa. Ndi anthu analonga mafala akupikuza, mbasimba kwakunyengerera nako anango, toera apaswe pinthu.

¹⁷Mbwenye imwe, anyakufunika, kumbukani mafala akhadalongwa kale ene na apoxtolo a Mbuya wathu Yezu Kirixtu.

¹⁸Iwo akhakupangani kuti: “Pa midzidzi yakumalisa, anaoneka anyakusingirira anadza katoweza mafuniro awo akuipa.”

¹⁹Enewa ndiwo anasosa phambulo pakati panu. Pinafuna iwo mphya nyama, pontho iwo nkhabe Nzimu Wakucena.

²⁰Mbwenye imwe, anyakufunika, pitirizani na kukula pa cikhulupiro canu ca kuceneswa kakamwe, mbamuphembera mu Nzimu Wakucena.

²¹Khalani mwa kufunana kwa Mulungu, pa midzidzi ino inadikhira imwe ntsisi za Mbuya wathu Yezu Kirixtu, kuti zikukwateni kwenda ku upulumuki wakukhonda kumala.

²²Khalani na ntsisi na ale anapenula.

²³Pulumusani anango mbamuabulusa na mphambvu pa moto. Anangombo acitireni ntsisi, mbwenye mucite mphole, pontho mbamuthunda na nguwo zawo zene sidaswipa na macitiro awo a kuipa.

²⁴Mulungu, Ule ana mphambvu za kukukoyani kuti muleke kugwa, na za kukupangisani patsogolo pa mbiri yace ninga anthu akusowa midonthi pontho na kutsandzaya kukulu,

²⁵kuna Iye Mulungu m'bodzi ekha, Mpulumusi wathu, kubulukira muna Yezu Kirixtu, Mbuya wathu, mbapaswe mbiri, cidzo, mphambvu na utongi, kutomera kale na kale mpaka cincino, na kwenda na kwenda, Ameni.