Read Cibverano Cipsa Cisena Cidziwiso 12 Bible Online

Cidziwiso 12 - Cibverano Cipsa Cisena bible

Cidziwiso 12

¹Caoneka kudzulu cidzindikiro cakudzumisa ninga ici: Nkazi m'bodzi akhadabvala dzuwa, pantsi pa myendo yace pakhali mwezi, munsolo mwace akhadabvala nthimba ya nyenyezi khumi na ziwiri.

²Iye akhali na pathupi, mbakhakhuwa na kubva kupha thangwi akhafuna kubala.

³Na tenepo, caoneka kudzulu cidzindikiro cinango ninga ici: Nyangumi nkulu wakufuira akhali na misolo minomwe na nyanga khumi. Padzulu pa misolo yace pakhakhala na nthimba[18] zinomwe.

⁴Na ncira wace akhakwewa na iwo phindi ibodzi yacitatu ya nyenyezi za kudzulu, mbaziponya pantsi. Nyangumi aenda kakhala patsogolo pa nkazi akhafuna kubala, toera pa n'dzidzi ukhafuna kubala iye, am'mezere mwana wace.

⁵Nkazi abala mwana-mamuna, anafuna kudza katonga madziko onsene na mpsimbo yace ya utale. Mwana wace adza kakwatwa na mwansanga kwenda kuna Mulungu, pa mpando wace wa umambo.

⁶Nkazi athawira n'thando ku mbuto ikhadasasanyirwa iye na Mulungu, kuti mwenemu akwanise kukoyiwa na kudyesiwa, pa ntsiku cikwi na madzana mawiri na makumatanthatu.

⁷Na tenepo, kwaoneka nkhondo kudzulu. Migeli na anju zace amenya nkhondo na nyangumi. Iyembo nyangumi na anju zace, amenyanambo na Migeli.

⁸Mbwenye nyangumi na anju zace zikhali na mphambvu zakukwana tayu. Na tenepo, aluza mbuto yawo kudzulu.

⁹Nyangumi wankulu ataiwa kunja. Iye ndiyo nyoka ya kale inacemerwa Dyabu peno Sathani, inanyengerera dziko yonsene. Iye na anju zace ataiwa pantsi pano.

¹⁰Na tenepo, ndabva fala ikulu ya kudzulu mbikhalonga tenepa: “Cincino wabwera upulumuki, mphambvu na umambo wa Mulungu wathu, pontho na mphambvu za utongi za Kirixtu wace, thangwi ataiwa kunja nyakupambazira abale athu, ule akhaapambazira patsogolo pana Mulungu wathu, masiku na masikati.

¹¹Iwo akunda nyangumi na ciropa ca Mwana Bira pontho na fala ya umboni idacita iwo. Atawira kufa mbakhonda kutsalakana moyo wawo.

¹²Na tenepo, tsandzayani imwe kudzulu na onsene anakhala kweneko! Mbwenye nyatwa ntsanu imwe mataka na bara, thangwi Dyabu achita mpaka kuna imwe! Iye aipirwa pikulu kakamwe, thangwi asadziwa kuti kuna iye zasala ntsiku pang'ono.”

¹³Nyangumi pidaona iye kuti ndaponyiwa pantsi pano, atoma kufambira n'nduli nkazi akhadabala mwana-mamuna.

¹⁴Penepo nkazi apaswa mapapido mawiri a capungu cikulu, toera amburuke na iwo kwenda n'thando, ku mbuto ikhadasasanyirwa iye. Mwenemu ndimo mukhafuna kudyeswa iye pa pyaka pitatu na hafu,[19] kutali na nyoka.[20]

¹⁵Na tenepo, nyoka yabulusa madzi n'kanwa mwace mbaenda n'nduli mwa nkazi ninga nyandza, toera nkazi akwatiwe na ngulula ya madzi.

¹⁶Mbwenye mataka aphedza nkazi, mbafungula mulomo mbameza nyandza ikhadabuluka n'kanwa mwa nyangumi.

¹⁷Nyangumi aipirwa na nkazi, mbabuluka kwenda kamenya nkhondo na adasala a dzindza ya nkazi, ale anabvera matongero a Mulungu, pontho mbakhala dzololo pa umboni wa Yezu.

¹⁸Na tenepo, nyangumi alimira pa checa ya m'bara.[21]