Read Cibverano Cipsa Cisena Cidziwiso 14 Bible Online

Cidziwiso 14 - Cibverano Cipsa Cisena bible

Cidziwiso 14

¹Na tenepo, ndalang'ana, mbandiona patsogolo panga pakhali na Mwana Bira akhadalimira pa phiri ya Siyau, pabodzi na anthu akukwana pikwi dzana na makumanai na pinai, akhadamala kulembwa pa nkhope dzina yace na dzina ya Baba wace.

²Ndabva kutitimira kudzulu ninga kutitimira kwa madzi makulu, pontho ninga kulira kukulu kwa njazi. Dungu idabva ine ikhali ninga ya anyabhangwe mbakhaimba mabhangwe awo.

³Iwo akhaimba nyimbo ipsa patsogolo pa mpando wa umambo, na pa pinyama pinai pya m'maso, na pa akulu-akulu. Nkhabe m'bodzi akhakwanisa kuiyimba nyimbo eneyi. Akhaikwanisa kuiyimba ndi pikwi dzana na makumanai na pinai basi pya anthu ale akhadaguliwa pa dziko.

⁴Awa ndiwo ale anthu adathunda pyalukwali, thangwi cipo adzati pita m'mabonde, pontho asatowera Mwana Bira monsene munaenda Iye. Aguliwa pa nsoka wa anthu ninga ntsembe yakutoma kuna Mulungu na kuna Mwana Bira.

⁵Nkhabe uthambi ubodzi udabuluka pa mulomo pawo, ndi anthu akulungama.

⁶Na tenepo, ndaona anju unango mbakhamburuka kudzulu kakamwe. Iye akhali na Mphangwa Zadidi za kwenda na kwenda toera azimwaze kuna anthu a pantsi pano, kuna dziko yonsene, madzindza onsene, malongero na mbumba yonsene.

⁷Anju alonga na mphambvu kuti: “Gopani Mulungu pontho mumpase mbiri, thangwi wafika n'dzidzi wa kutonga kwace. Lambirani ule adacita kudzulu na pantsi, na bara, pontho na mphuno za madzi.”

⁸Anju waciwiri antowera mbalonga tenepa: “Agwa! Agwa Bhabhilonya wankulu, adamwesa madziko onsene vinyu ya ulukwali wace ukulu!”

⁹Anju wacitatu aatowererambo mbalonga na kugaluza kuti: “Ule analambira cinyama cakugopsa na dzimunthu yace, pontho mbaikhwa cidzindikiro cace m'manja peno pa nkhope,

¹⁰unowu anamwambo vinyu ya kuipirwa kwa Mulungu, idakhutulwa n'ndiko mwace ya kuipirwa mbikhonda kubvungazwa. Pontho anadza kathabuswa na moto wa inxofiri, pamaso pa anju a Mulungu na pamaso pa Mwana Bira.

¹¹Pontho uchi wa nyatwa za anthu enewa, unakwira kwenda na kwenda. Kuna onsene analambira cinyama cakugopsa na dzimunthu yace, na kuna ule adatambira cidzindikiro ca dzina yace, masiku na masikati nkhabe kupuma.”

¹²Ndi n'dzidzi wa phinga ya mbumba ya Mulungu inabvera matongero a Mulungu, pontho mbikhala yakunyindira Yezu.

¹³Na tenepo, ndabva fala ya kudzulu mbilonga tenepa: “Lemba: Mbatsandzaye anyakufa, anafa muna Mbuya kutomera cincino kwenda kutsogolo.” Nzimu Wakucena walonga kuti: “Ande, iwo anadza kapuma kuneta kwawo, thangwi mabasa awo anaatowera.”

¹⁴Ndalang'ana, mbandiona patsogolo panga pakhali na khole yakucena, padzulu pa khole pakhali na munthu nawa “wakulandana na mwana wa munthu.” Iye akhali na nthimba ibodzi ya oro mu nsolo, na sekeya yakunozwa m'manja.

¹⁵Na tenepo, anju unango abuluka mu Nyumba ya Mulungu mbakhuwa na mphambvu kuna ule akhali padzulu pa khole kuti: “Kwata sekeya yako ubvune, thangwi n'dzidzi wa kubvuna wakwana, pontho phoso yatokota pa dziko.”

¹⁶Na tenepo, ule akhakhala padzulu pa khole atoma kuceka na sekeya yace, pantsi pano mbapabvuniwa.

¹⁷Anju unango abuluka mu Nyumba ya Mulungu ya kudzulu. Iye akhakhalambo na sekeya ibodzi yakunozwa.

¹⁸Abulukira pontho pa guwa ya ntsembe anju unango akhali na mphambvu za kutonga moto, mbakhuwa na mphambvu khuwira ule akhali na sekeya yakunozwa, mbalonga tenepa: “Kwata sekeya yako yakunozwa ugwande ngala za mauva a miti yonsene ya mauva a pantsi pano, thangwi mauva awo amala tokota.”

¹⁹Anju akhali na sekeya yakunozwa, atoma kubvuna na sekeya yace pantsi pano, agumanya mauva mbaaponya mu mbuto ikulu yakukamulira mauva a kuipirwa kwa Mulungu.

²⁰Mauva akamulwa mu mbuto yakukamulirwa mauva kunja kwa nzinda, mwenemu mbumubuluka ciropa mpaka kufika pa mulomo wa kavalo, pa nsindzo wakukwana madzana matatu, anacemerwa makilometuru[23] ncizungu.