Read Cibverano Cipsa Cisena Cidziwiso 17 Bible Online

Cidziwiso 17 - Cibverano Cipsa Cisena bible

Cidziwiso 17

¹Pa anju zinomwe, ibodzi yawo ikhakhala na ndiko zinomwe, yandifendedzera mbandipanga tenepa: “Bwera ndikupangize kuthabuswa kunafuna citwa nkazi wa lukwali ikulu, ule ali nawa padzulu pa madzi mazinji.

²Amambo a pantsi pano acita lukwali na nkazi unowu. Anthu a pantsi pano aledzera na vinyu ya ulukwali yace.”

³Na tenepo, anju andikwata mu Nzimu Wakucena kwenda n'thando. Mwenemu ndaona nkazi m'bodzi adapakira cinyama cakugopsa cakufuyira, mbadzala na kulembwa madzina akuxola. Pontho iye akhali na misolo minomwe na nyanga khumi.

⁴Nkazi akhadabvala nguwo ya bhurumu na ya kufuira, pontho mbabvala pinthu pyakubalikisa pya oro, pya myala yakubalika ya ntengo ukulu, na myala inango inacemerwa perola. M'manja mwace akhali na ndiko ya oro, yakudzala na pinthu pyakunyanyasa na pyakuipa pya lukwali yace.

⁵Pa nkhope pace, pakhadalembwa dzina ibodzi ya misanje inalonga tenepa: BHABHILONYA WA NKULU. MAI WA ANYALUKWALI, NA WA PYAKUNYANYASA PINACITWA PANTSI PANO.

⁶Na tenepo, ndaona nkazi akhadaledzera na ciropa ca mbumba ya Mulungu na ca anthu akhacitira umboni[27] Yezu. Pidamuona ine, ndadzumatirwa pikulu.

⁷Mphapo anju andipanga kuti: “Thangwi yanji iwe usadzumatirwa? Ine ndinati ndikuchululire pinthu pyakubisala pya nkazi uyu, na pya cinyama cakugopsa cidapakira iye, cinamisolo minomwe na nyanga khumi.

⁸Cinyama cakugopsa cidaona iwe, cikhalipo kale ene mbwenye cincino nkhabebve. Ico ciri kufuna buluka n'djenje yakuzika kakamwe kwenda njira yakutaika. Anthu a pantsi pano, adacita kuti cipo madzina awo adzati kulembwa m'Bukhu ya Upulumuki kutomera padacitwa dziko, anadza kadzumatirwa na kuciona cinyama cakugopsa. Thangwi cikhalipo, cincino nkhabebve. Mbwenye cinati cibwere pontho.

⁹“Pano pasafunika ndzeru za udziwisi. Misolo minomwe, nkhulongera pimapiri pinomwe pidakhalira nkazi.

¹⁰Pontho ndi amambo anomwe. Axanu awo amala kugwa. M'bodzi na lero ali m'maso, unango adzati kubulukira. Mbwenye angabulukira, anati akhale ntsiku pang'ono basi.

¹¹Cinyama cakugopsa cire, cikhalipo kale ene mbwenye cincino nkhabebve, ndi mambo wacisere. Pontho ndi m'bodzi wacinomwe, mbwenye ali kwenda kataika.

¹²“Nyanga khumi zidaona iwe, ndi amambo khumi, kuti adzati kutambira umambo. Mbwenye pa n'dzidzi ubodzi,[28] anati atambire mphambvu za utongi ninga amambo, pabodzi na cinyama cakugopsa.

¹³Iwo asanyerezera cibodzi cene, cakubulusa mphambvu za utongi wawo, mbaupasa cinyama cakugopsa.

¹⁴Iwo anati agwe nkhondo na Mwana Bira, mbwenye Mwana Bira anaakunda, thangwi Iye ndi Mbuya wa ambuya, Mambo wa amambo. Pontho pabodzi na Iye, ale adacemerwa, anyakusankhulwa na anyakunyindira, anakundambo.”

¹⁵Na tenepo, anju andipanga pontho mbalonga tenepa: “Madzi adaona iwe, pale padakhala nawa nkazi wa lukwali, nkhulongera mbumba, mwinji wa anthu, madziko na malongero.

¹⁶Cinyama cakugopsa na nyanga khumi zidaona iwe, pyonsene pinati pizonde nkazi wa lukwali. Iwo anati ankwatire pinthu pyonsene mbansiya cipezi-pezi, anadya nyama yace, pontho mbaipisa na moto.

¹⁷Thangwi Mulungu aikha m'mitima mwawo, kufuna kwa kucita pire pinafuna Iye. Mbaakwata kuti iwo atawire kubulusa mphambvu zawo za utongi azipase cinyama cakugopsa, mpaka Mafala a Mulungu asimbiswe.

¹⁸Nkazi adaona iwe, ndi nzinda ukulu unatonga amambo a pantsi pano.”