Read Cibverano Cipsa Cisena Cidziwiso 19 Bible Online

Cidziwiso 19 - Cibverano Cipsa Cisena bible

Cidziwiso 19

¹Pakumala pinthu penepyo, ndabva ninga kutitimira kukulu kudzulu kwa mwinji wa anthu, mbakhakhuwa tenepa: “Aleluya! Kupulumuswa, mbiri, na mphambvu mphya Mulungu wathu,

²thangwi kutonga kwace ndi kwa ndimo mwene pontho ndi kwakulungama. Iye athabusa nkazi wa lukwali ikulu akhanyengerera dziko na pya ulukwali pyace. Iye amulongosa ciropa cidagwisa iye na manja ace kuna anyabasa ace.”

³Mbumba yathimiza pontho kukhuwa tenepa: “Aleluya! Uchi unabuluka kuna iye, unakwira kwenda na kwenda.”

⁴Akulu-akulu makumawiri na anai, na pinthu pinai pya m'maso, agwa pantsi mbalambira Mulungu akhakhala pa mpando wa umambo, mbakhuwa tenepa: “Ameni, Aleluya!”

⁵Pa mpando wa umambo pabuluka fala ikhalonga tenepa: “Kuzani Mulungu wathu imwe anyabasa ace onsene, imwe munan'gopa, akulu na ang'ono!”

⁶Na tenepo, ndabva pinthu pyakulandana ninga kutitimira kwa mwinji ukulu wa anthu, ninga kutitimira kwa madzi makulu na kulira kukulu kwa njazi, mbikhalonga tenepa: “Aleluya! Thangwi anatonga ndi Mbuya Mulungu wathu, ana mphambvu zonsene.

⁷Mbatitsandzayeni! Tendeni tisekere, pontho mbatimpasa mbiri! Thangwi wakwana n'dzidzi wa kuti Mwana Bira acite banja, pontho mwali wankazi amala sasanyira.

⁸Iye apaswa nguwo zakucena mbiziyetimira toera abvale.” Nguwo zenezi zakucena mbiziyetimira, ndi mabasa akulungama a mbumba ya Mulungu.

⁹Anju andipanga tenepa: “Lemba kuti: Mbatsandzaye adacemerwa ku phwandu ya banja ya Mwana Bira!” Mbathimiza pontho kulonga kuti: “Awa ndi mafala a ndimo mwene a Mulungu.”

¹⁰Na tenepo, ndagwa pa myendo pace toera ndimulambire, mbwenye iye andipanga tenepa: “Leka cita penepi! Ndine nyabasa ninga iwe, pontho ninga abale ako anakoya umboni wa Yezu. Lambira Mulungu! Thangwi umboni wa Yezu ndi nzimu wa ciporofeta.[29]”

¹¹Ndaona thambo yafunguka, pontho patsogolo panga pakhali na kavalo ibodzi yakucena, nyakuipakira asacemerwa Wakunyindirika na wa Ndimo Mwene. Iye asatonga mbacita nkhondo mwakulungama.

¹²Maso ace ndi ninga malirimi a moto, mu nsolo mwace muna nthimba[30] zizinji, pontho Iye alembwa dzina ibodzi kuti nkhabe unango anaidziwa, anaidziwa ndiye basi.

¹³Abvala nkumi wakumala kukhwazwa na ciropa, pontho dzina yace ndi Fala ya Mulungu.

¹⁴Anyankhondo azinji a kudzulu akhantowera. Akhadabvala nguwo za linyu zakucena kakamwe, mbakhafamba na makavalo akucena.

¹⁵N'kanwa mwace, musabuluka tarasada yakunozwa inafuna kuthabusa na iye madziko. “Iye anaatonga na mpsimbo ya utale’’ pontho anaponda mu mbuto yakukamulirwa vinyu ya kuipirwa kukulu kwa Mulungu wa mphambvu zonsene.

¹⁶Pa nguwo yace ya nkumi, n'khundu mwa nchafu, palembwa dzina iyi: MAMBO WA AMAMBO NA MBUYA WA AMBUYA.

¹⁷Ndaona anju m'bodzi ali dzololo pa dzuwa, mbakhakhuwa kuna mbalame zonsene zikhamburuka kudzulu kakamwe kuti: “Bwerani, gumanyikanani mudze ku phwandu ikulu ya Mulungu,

¹⁸toera mudze kadya nyama ya amambo, ya akulu aanyankhondo na ya anyamphambvu, nyama ya makavalo na ya anyamakavalo ace, nyama za onsene - adzakazi na atumbe, akulu na ang'ono.”

¹⁹Pontho, ndaona cinyama cire cakugopsa na amambo a padziko, na anyankhondo awo amala gumanyikana toera acite nkhondo na ule adapakira pa kavalo, na anyankhondo ace.

²⁰Mbwenye cinyama cakugopsa camangwa, pabodzi na mporofeta wa uthambi akhadacita pirengo na dzina yace, pikhanyengeza na iye ale akhadatambira cidzindikiro ca cinyama cakugopsa pontho mbalambira dzimunthu yace. Mu uwiri mwawo aponyiwa a m'maso n'thawala ya moto unagaka na inxofiri.

²¹Adasala aphiwa na tarasada ikhabuluka pa mulomo wa ule adapakira pa kavalo, mbalame zonsene mbizikhuta na nyama za anthu adafa.