Read Cibverano Cipsa Cisena Cidziwiso 7 Bible Online

Cidziwiso 7 - Cibverano Cipsa Cisena bible

Cidziwiso 7

¹Pakumala penepyo, ndaona anju zinai ziri dzololo mu nkhomu zinai za dziko, mbiziphata mphepo zinai za dziko, toera kupingiza kuti ikhonde oneka mphepo ibodzi ya kupepesa pa dziko, m'bara peno kupepesa miti inango.

²Na tenepo, ndaona anju unango mbakhakwira kumabulukira dzuwa na cidhindo m'manja ca Mulungu wa m'maso. Iye akhuwa pikulu kakamwe kuna anju zinai zire zikhadapaswa mphambvu za kufudza dziko na bara,

³mbazipanga tenepa: “Lekani kufudza dziko, peno bara, peno miti, mpaka panamala ife kudhinda nkhope za anyabasa a Mulungu wathu.”

⁴Na tenepo, ndabva kulengeswa kwa ale adadhindwa. Akhali pikwi dzana na makumanai na pinai pya anthu a madzindza onsene a ana a Izarayeli.

⁵Dzindza ya Djudaa, adadhindwa ndi pikwi khumi na piwiri. Dzindza ya Rubheni, pikwi khumi na piwiri. Dzindza ya Gadhi, pikwi khumi na piwiri.

⁶Dzindza ya Aseri, pikwi khumi na piwiri. Dzindza ya Nafitali, pikwi khumi na piwiri. Dzindza ya Manase, pikwi khumi na piwiri.

⁷Dzindza ya Simiyau, pikwi khumi na piwiri. Dzindza ya Levi, pikwi khumi na piwiri. Dzindza ya Isakari, pikwi khumi na piwiri.

⁸Dzindza ya Zebhuloni, pikwi khumi na piwiri. Dzindza ya Zuze, pikwi khumi na piwiri. Dzindza ya Bhenjamini, pikwi khumi na piwiri.

⁹Pakumala penepyo ndalang'ana, mbandiona patsogolo panga mwinji wa anthu a madziko onsene, a madzindza onsene, a mbumba zonsene na a malongero onsene, kuti nkhabe munthu akhakwanisa kualengesa. Akhadalimira patsogolo pa mpando wa umambo, na patsogolo pa Mwana Bira. Iwo akhadabvala nguwo zakucena zakulapha, mbaphata micindu m'manja mwawo.

¹⁰Iwo akhakhuwa pikulu kakamwe mbalonga tenepa: “Upulumuki ndi wa Mulungu wathu adakhala pa mpando wa umambo, pontho ndi wa Mwana Bira.”

¹¹Anju zonsene zikhadalimira mbazizungulira mpando wa umambo, akulu-akulu, na pinthu pinai pya m'maso. Izo zagodama patsogolo pa mpando wa umambo, mbizigwa pantsi na nkhope, mbizilambira Mulungu,

¹²mbizilonga tenepa: “Ameni! Kukuzwa, mbiri, udziwisi, kupereka takhuta, kulemebza, utongi na mphambvu mbapikhale na Mulungu wathu kwenda na kwenda. Ameni!”

¹³Na tenepo, m'bodzi wa akulu-akulu andibvundza tenepa: “Mbani awa adabvala nguwo zakucena zakulapha, pontho abuluka kupi?”

¹⁴Ine ndatawira tenepa: Mbuya, imwe ndimwe munaadziwa. Iye alonga tenepa: “Awa ndiwo adabuluka ku nyatwa ikulu, afula nguwo zawo zakulapha mbazicenesa mu ciropa ca Mwana Bira.

¹⁵Na thangwi eneyo, “iwo ali patsogolo pa mpando wa umambo wa Mulungu, mbam'phatira basa masiku na masikati mu nyumba yace ya ntsembe. Pontho ule adakhala pa mpando wa umambo anaakoya mu khumbi yace ya ntsembe.

¹⁶Cipo anadza kabva pontho njala, cipo anadza kabva pontho nyota. Dzuwa, na kupisa, nkhabe kudza kaathabusa,

¹⁷thangwi Mwana Bira ali pakati pa mpando wa umambo, anadza kakhala nkumbidzi wawo. Iye anadza kaakumbiza mbaenda na iwo kuna mphuno za madzi a upulumuki. Pontho Mulungu anaapukuta misozi yonsene iri m'maso mwawo.”