Read Clementine Vulgate Psalmorum 70 Bible Online

Psalmorum 70 - Clementine Vulgate bible

Psalmorum 70

¹Psalmus David, filiorum Jonadab, et priorum captivorum. In te, Domine, speravi ; non confundar in æternum ;

²in justitia tua libera me, et eripe me: inclina ad me aurem tuam, et salva me.

³Esto mihi in Deum protectorem, et in locum munitum, ut salvum me facias: quoniam firmamentum meum et refugium meum es tu.

⁴Deus meus, eripe me de manu peccatoris, et de manu contra legem agentis, et iniqui:

⁵quoniam tu es patientia mea, Domine ; Domine, spes mea a juventute mea.

⁶In te confirmatus sum ex utero ; de ventre matris meæ tu es protector meus ; in te cantatio mea semper.

⁷Tamquam prodigium factus sum multis ; et tu adjutor fortis.

⁸Repleatur os meum laude, ut cantem gloriam tuam, tota die magnitudinem tuam.

⁹Ne projicias me in tempore senectutis ; cum defecerit virtus mea, ne derelinquas me.

¹⁰Quia dixerunt inimici mei mihi: et qui custodiebant animam meam consilium fecerunt in unum ;

¹¹dicentes: Deus dereliquit eum: persequimini et comprehendite eum, quia non est qui eripiat.

¹²Deus, ne elongeris a me ; Deus meus, in auxilium meum respice.

¹³Confundantur et deficiant detrahentes animæ ; operiantur confusione et pudore qui quærunt mala mihi.

¹⁴Ego autem semper sperabo, et adjiciam super omnem laudem tuam.

¹⁵Os meum annuntiabit justitiam tuam, tota die salutare tuum. Quoniam non cognovi litteraturam,

¹⁶introibo in potentias Domini ; Domine, memorabor justitiæ tuæ solius.

¹⁷Deus, docuisti me a juventute mea ; et usque nunc pronuntiabo mirabilia tua.

¹⁸Et usque in senectam et senium, Deus, ne derelinquas me, donec annuntiem brachium tuum generationi omni quæ ventura est, potentiam tuam,

¹⁹et justitiam tuam, Deus, usque in altissima ; quæ fecisti magnalia, Deus: quis similis tibi?

²⁰Quantas ostendisti mihi tribulationes multas et malas ! et conversus vivificasti me, et de abyssis terræ iterum reduxisti me.

²¹Multiplicasti magnificentiam tuam ; et conversus consolatus es me.

²²Nam et ego confitebor tibi in vasis psalmi veritatem tuam, Deus ; psallam tibi in cithara, sanctus Israël.

²³Exsultabunt labia mea cum cantavero tibi ; et anima mea quam redemisti.

²⁴Sed et lingua mea tota die meditabitur justitiam tuam, cum confusi et reveriti fuerint qui quærunt mala mihi.