Read Clementine Vulgate Sirach 13 Bible Online

Sirach 13 - Clementine Vulgate bible

Sirach 13

¹Qui tetigerit picem inquinabitur ab ea? et qui communicaverit superbo induet superbiam.

²Pondus super se tollat qui honestiori se communicat, et ditiori te ne socius fueris.

³Quid communicabit cacabus ad ollam? quando enim se colliserint, confringetur.

⁴Dives injuste egit, et fremet? pauper autem læsus tacebit.

⁵Si largitus fueris, assumet te? et si non habueris, derelinquet te.

⁶Si habes, convivet tecum, et evacuabit te? et ipse non dolebit super te.

⁷Si necessarius illi fueris, supplantabit te, et subridens spem dabit, narrans tibi bona, et dicet? Quid opus est tibi?

⁸Et confundet te in cibis suis, donec te exinaniat bis et ter? et in novissimo deridebit te, et postea videns derelinquet te, et caput suum movebit ad te.

⁹Humiliare Deo, et exspecta manus ejus.

¹⁰Attende ne seductus in stultitiam humilieris.

¹¹Noli esse humilis in sapientia tua, ne humiliatus in stultitiam seducaris.

¹²Advocatus a potentiore, discede? ex hoc enim magis te advocabit.

¹³Ne improbus sis, ne impingaris? et ne longe sis ab eo, ne eas in oblivionem.

¹⁴Ne retineas ex æquo loqui cum illo, nec credas multis verbis illius? ex multa enim loquela tentabit te, et subridens interrogabit te de absconditis tuis.

¹⁵Immitis animus illius conservabit verba tua? et non parcet de malitia, et de vinculis.

¹⁶Cave tibi, et attende diligenter auditui tuo, quoniam cum subversione tua ambulas?

¹⁷audiens vero illa, quasi in somnis vide, et vigilabis.

¹⁸Omni vita tua dilige Deum, et invoca illum in salute tua.

¹⁹Omne animal diligit simile sibi, sic et omnis homo proximum sibi.

²⁰Omnis caro ad similem sibi conjungetur, et omnis homo simili sui sociabitur.

²¹Si communicabit lupus agno aliquando, sic peccator justo.

²²Quæ communicatio sancto homini ad canem? aut quæ pars diviti ad pauperem?

²³Venatio leonis onager in eremo? sic et pascua divitum sunt pauperes.

²⁴Et sicut abominatio est superbo humilitas, sic et execratio divitis pauper.

²⁵Dives commotus confirmatur ab amicis suis? humilis autem cum ceciderit, expelletur et a notis.

²⁶Diviti decepto multi recuperatores? locutus est superbia, et justificaverunt illum.

²⁷Humilis deceptus est, insuper et arguitur? locutus est sensate, et non est datus ei locus.

²⁸Dives locutus est, et omnes tacuerunt, et verbum illius usque ad nubes perducent.

²⁹Pauper locutus est, et dicunt? Quis est hic? et si offenderit, subvertent illum.

³⁰Bona est substantia cui non est peccatum in conscientia? et nequissima paupertas in ore impii.

³¹Cor hominis immutat faciem illius, sive in bona, sive in mala.

³²Vestigium cordis boni et faciem bonam difficile invenies, et cum labore.