Read Clementine Vulgate Sirach 14 Bible Online

Sirach 14 - Clementine Vulgate bible

Sirach 14

¹Beatus vir qui non est lapsus verbo ex ore suo, et non est stimulatus in tristitia delicti.

²Felix qui non habuit animi sui tristitiam, et non excidit a spe sua.

³Viro cupido et tenaci sine ratione est substantia? et homini livido ad quid aurum?

⁴Qui acervat ex animo suo injuste, aliis congregat, et in bonis illius alius luxuriabitur.

⁵Qui sibi nequam est, cui alii bonus erit? et non jucundabitur in bonis suis.

⁶Qui sibi invidet, nihil est illo nequius? et hæc redditio est malitiæ illius.

⁷Et si bene fecerit, ignoranter et non volens facit? et in novissimo manifestat malitiam suam.

⁸Nequam est oculus lividi? et avertens faciem suam, et despiciens animam suam.

⁹Insatiabilis oculus cupidi in parte iniquitatis? non satiabitur donec consumat arefaciens animam suam.

¹⁰Oculus malus ad mala, et non saturabitur pane, sed indigens et in tristitia erit super mensam suam.

¹¹Fili, si habes, benefac tecum, et Deo dignas oblationes offer.

¹²Memor esto quoniam mors non tardat, et testamentum inferorum, quia demonstratum est tibi? testamentum enim hujus mundi morte morietur.

¹³Ante mortem benefac amico tuo, et secundum vires tuas exporrigens da pauperi.

¹⁴Non defrauderis a die bono, et particula boni doni non te prætereat.

¹⁵Nonne aliis relinques dolores et labores tuos in divisione sortis?

¹⁶Da et accipe, et justifica animam tuam.

¹⁷Ante obitum tuum operare justitiam, quoniam non est apud inferos invenire cibum.

¹⁸Omnis caro sicut fœnum veterascet, et sicut folium fructificans in arbore viridi.

¹⁹Alia generantur, et alia dejiciuntur? sic generatio carnis et sanguinis, alia finitur, et alia nascitur.

²⁰Omne opus corruptibile in fine deficiet, et qui illud operatur ibit cum illo.

²¹Et omne opus electum justificabitur, et qui operatur illud honorabitur in illo.

²²Beatus vir qui in sapientia morabitur, et qui in justitia sua meditabitur, et in sensu cogitabit circumspectionem Dei?

²³qui excogitat vias illius in corde suo, et in absconditis suis intelligens, vadens post illam quasi investigator, et in viis illius consistens?

²⁴qui respicit per fenestras illius, et in januis illius audiens?

²⁵qui requiescit juxta domum illius, et in parietibus illius figens palum, statuet casulam suam ad manus illius, et requiescent in casula illius bona per ævum.

²⁶Statuet filios suos sub tegmine illius, et sub ramis ejus morabitur.

²⁷Protegetur sub tegmine illius a fervore, et in gloria ejus requiescet.