Read Clementine Vulgate Sirach 21 Bible Online

Sirach 21 - Clementine Vulgate bible

Sirach 21

¹Fili, peccasti, non adjicias iterum? sed et de pristinis deprecare, ut tibi dimittantur.

²Quasi a facie colubri fuge peccata? et si accesseris ad illa, suscipient te.

³Dentes leonis dentes ejus, interficientes animas hominum.

⁴Quasi rhomphæa bis acuta omnis iniquitas? plagæ illius non est sanitas.

⁵Objurgatio et injuriæ annullabunt substantiam, et domus quæ nimis locuples est annullabitur superbia? sic substantia superbi eradicabitur.

⁶Deprecatio pauperis ex ore usque ad aures ejus perveniet, et judicium festinato adveniet illi.

⁷Qui odit correptionem vestigium est peccatoris, et qui timet Deum convertetur ad cor suum.

⁸Notus a longe potens lingua audaci, et sensatus scit labi se ab ipso.

⁹Qui ædificat domum suam impendiis alienis, quasi qui colligat lapides suos in hieme.

¹⁰Stupa collecta synagoga peccantium, et consummatio illorum flamma ignis.

¹¹Via peccatorum complanata lapidibus? et in fine illorum inferi, et tenebræ, et pœnæ.

¹²Qui custodit justitiam, continebit sensum ejus.

¹³Consummatio timoris Dei, sapientia et sensus.

¹⁴Non erudietur qui non est sapiens in bono.

¹⁵Est autem sapientia quæ abundat in malo, et non est sensus ubi est amaritudo.

¹⁶Scientia sapientis tamquam inundatio abundabit, et consilium illius sicut fons vitæ permanet.

¹⁷Cor fatui quasi vas confractum, et omnem sapientiam non tenebit.

¹⁸Verbum sapiens quodcumque audierit scius, laudabit, et ad se adjiciet? audivit luxuriosus, et displicebit illi, et projiciet illud post dorsum suum.

¹⁹Narratio fatui quasi sarcina in via? nam in labiis sensati invenietur gratia.

²⁰Os prudentis quæritur in ecclesia, et verba illius cogitabunt in cordibus suis.

²¹Tamquam domus exterminata, sic fatuo sapientia? et scientia insensati inenarrabilia verba.

²²Compedes in pedibus, stulto doctrina? et quasi vincula manuum super manum dextram.

²³Fatuus in risu exaltat vocem suam? vir autem sapiens vix tacite ridebit.

²⁴Ornamentum aureum prudenti doctrina, et quasi brachiale in brachio dextro.

²⁵Pes fatui facilis in domum proximi? et homo peritus confundetur a persona potentis.

²⁶Stultus a fenestra respiciet in domum? vir autem eruditus foris stabit.

²⁷Stultitia hominis auscultare per ostium? et prudens gravabitur contumelia.

²⁸Labia imprudentium stulta narrabunt ; verba autem prudentium statera ponderabuntur.

²⁹In ore fatuorum cor illorum, et in corde sapientium os illorum.

³⁰Dum maledicit impius diabolum, maledicit ipse animam suam.

³¹Susurro coinquinabit animam suam, et in omnibus odietur, et qui cum eo manserit odiosus erit? tacitus et sensatus honorabitur.