Read Clementine Vulgate Machabaeorum liber II 10 Bible Online

Machabaeorum liber II 10 - Clementine Vulgate bible

Machabaeorum liber II 10

¹Machabæus autem, et qui cum eo erant, Domino se protegente, templum quidem, et civitatem recepit?

²aras autem, quas alienigenæ per plateas exstruxerant, itemque delubra demolitus est?

³et purgato templo, aliud altare fecerunt, et de ignitis lapidibus igne concepto sacrificia obtulerunt post biennium, et incensum, et lucernas, et panes propositionis posuerunt.

⁴Quibus gestis, rogabant Dominum prostrati in terram, ne amplius talibus malis inciderent? sed et, siquando peccassent, ut ab ipso mitius corriperentur, et non barbaris ac blasphemis hominibus traderentur.

⁵Qua die autem templum ab alienigenis pollutum fuerat, contigit eadem die purificationem fieri, vigesima quinta mensis qui fuit Casleu.

⁶Et cum lætitia diebus octo egerunt in modum tabernaculorum, recordantes quod ante modicum temporis diem solemnem tabernaculorum in montibus, et in speluncis more bestiarum egerant.

⁷Propter quod thyrsos, et ramos virides, et palmas præferebant ei, qui prosperavit mundari locum suum.

⁸Et decreverunt communi præcepto, et decreto universæ genti Judæorum omnibus annis agere dies istos.

⁹Et Antiochi quidem, qui appellatus est Nobilis, vitæ excessus ita se habuit.

¹⁰Nunc autem de Eupatore Antiochi impii filio, quæ gesta sunt narrabimus, breviantes mala, quæ in bellis gesta sunt.

¹¹Hic enim suscepto regno, constituit super negotia regni Lysiam quemdam, Phœnicis et Syriæ militiæ principem.

¹²Nam Ptolemæus, qui dicebatur Macer, justi tenax, erga Judæos esse constituit, et præcipue propter iniquitatem, quæ facta erat in eos, et pacifice agere cum eis.

¹³Sed ob hoc accusatus ab amicis apud Eupatorem, cum frequenter proditor audiret, eo quod Cyprum creditam sibi a Philometore deseruisset, et ad Antiochum Nobilem translatus etiam ab eo recessisset, veneno vitam finivit.

¹⁴Gorgias autem, cum esset dux locorum, assumptis advenis, frequenter Judæos debellabat.

¹⁵Judæi vero, qui tenebant opportunas munitiones, fugatos ab Jerosolymis suscipiebant, et bellare tentabant.

¹⁶Hi vero, qui erant cum Machabæo, per orationes Dominum rogantes ut esset sibi adjutor, impetum fecerunt in munitiones Idumæorum?

¹⁷multaque vi insistentes, loca obtinuerunt, occurrentes interemerunt, et omnes simul non minus viginti millibus trucidaverunt.

¹⁸Quidam autem, cum confugissent in duas turres valde munitas omnem apparatum ad repugnandum habentes.

¹⁹Machabæus ad eorum expugnationem, relicto Simone, et Josepho, itemque Zachæo? eisque qui cum ipsis erant satis multis, ipse ad eas, quæ amplius perurgebant, pugnas conversus est.

²⁰Hi vero, qui cum Simone erant, cupiditate ducti, a quibusdam, qui in turribus erant, suasi sunt pecunia? et septuaginta millibus didrachmis acceptis, dimiserunt quosdam effugere.

²¹Cum autem Machabæo nuntiatum esset quod factum est, principibus populi congregatis, accusavit, quod pecunia fratres vendidissent, adversariis eorum dimissis.

²²Hos igitur proditores factos interfecit, et confestim duas turres occupavit.

²³Armis autem ac manibus omnia prospere agendo in duabus munitionibus plus quam viginti millia peremit.

²⁴At Timotheus, qui prius a Judæis fuerat superatus, convocato exercitu peregrinæ multitudinis, et congregato equitatu Asiano, advenit quasi armis Judæam capturus.

²⁵Machabæus autem, et qui cum ipso erant, appropinquante illo, deprecabantur Dominum, caput terra aspergentes, lumbosque ciliciis præcincti,

²⁶ad altaris crepidinem provoluti, ut sibi propitius, inimicis autem eorum esset inimicus, et adversariis adversaretur, sicut lex dicit.

²⁷Et ita post orationem, sumptis armis, longius de civitate procedentes, et proximi hostibus effecti resederunt.

²⁸Primo autem solis ortu utrique commiserunt? isti quidem victoriæ et prosperitatis sponsorem cum virtute Dominum habentes? illi autem ducem belli animum habebant.

²⁹Sed cum vehemens pugna esset, apparuerunt adversariis de cælo viri quinque in equis, frenis aureis decori, ducatum Judæis præstantes?

³⁰ex quibus duo Machabæum medium habentes, armis suis circumseptum incolumem conservabant? in adversarios autem tela et fulmina jaciebant, ex quo et cæcitate confusi, et repleti perturbatione, cadebant.

³¹Interfecti sunt autem viginti millia quingenti, et equites sexcenti.

³²Timotheus vero confugit in Gazaram præsidium munitum, cui præerat Chæreas.

³³Machabæus autem, et qui cum eo erant, lætantes obsederunt præsidium diebus quatuor.

³⁴At hi qui intus erant, loci firmitate confisi, supra modum maledicebant, et sermones nefandos jactabant.

³⁵Sed cum dies quinta illucesceret, viginti juvenes ex his qui cum Machabæo erant, accensi animis propter blasphemiam, viriliter accesserunt ad murum, et feroci animo incedentes ascendebant?

³⁶sed et alii similiter ascendentes, turres portasque succendere aggressi sunt, atque ipsos maledicos vivos concremare.

³⁷Per continuum autem biduum præsidio vastato, Timotheum occultantem se in quodam repertum loco peremerunt? et fratrem illius Chæream et Apollophanem occiderunt.

³⁸Quibus gestis, in hymnis et confessionibus benedicebant Dominum, qui magna fecit in Israël, et victoriam dedit illis.