Read Clementine Vulgate Epistula II ad Thessalonicenses 2 Bible Online

Epistula II ad Thessalonicenses 2 - Clementine Vulgate bible

Epistula II ad Thessalonicenses 2

¹Rogamus autem vos, fratres, per adventum Domini nostri Jesu Christi, et nostræ congregationis in ipsum:

²ut non cito moveamini a vestro sensu, neque terreamini, neque per spiritum, neque per sermonem, neque per epistolam tamquam per nos missam, quasi instet dies Domini.

³Ne quis vos seducat ullo modo: quoniam nisi venerit discessio primum, et revelatus fuerit homo peccati filius perditionis,

⁴qui adversatur, et extollitur supra omne, quod dicitur Deus, aut quod colitur, ita ut in templo Dei sedeat ostendens se tamquam sit Deus.

⁵Non retinetis quod cum adhuc essem apud vos, hæc dicebam vobis?

⁶et nunc quid detineat scitis, ut reveletur in suo tempore.

⁷Nam mysterium jam operatur iniquitatis: tantum ut qui tenet nunc, teneat, donec de medio fiat.

⁸Et tunc revelabitur ille iniquus, quem Dominus Jesus interficiet spiritu oris sui, et destruet illustratione adventus sui eum:

⁹cujus est adventus secundum operationem Satanæ in omni virtute, et signis, et prodigiis mendacibus,

¹⁰et in omni seductione iniquitatis iis qui pereunt: eo quod caritatem veritatis non receperunt ut salvi fierent. Ideo mittet illis Deus operationem erroris ut credant mendacio,

¹¹ut judicentur omnes qui non crediderunt veritati, sed consenserunt iniquitati.

¹²Nos autem debemus gratias agere Deo semper pro vobis, fratres dilecti a Deo, quod elegerit vos Deus primitias in salutem in sanctificatione spiritus, et in fide veritatis:

¹³in qua et vocavit vos per Evangelium nostrum in acquisitionem gloriæ Domini nostri Jesu Christi.

¹⁴Itaque fratres, state: et tenete traditiones, quas didicistis, sive per sermonem, sive per epistolam nostram.

¹⁵Ipse autem Dominus noster Jesus Christus, et Deus et Pater noster, qui dilexit nos, et dedit consolationem æternam, et spem bonam in gratia,

¹⁶exhortetur corda vestra, et confirmet in omni opere et sermone bono.