Read Coatecas Altas Zapotec San Mateo 3 Bible Online

San Mateo 3 - Coatecas Altas Zapotec bible

San Mateo 3

¹Le'n rë ngubizh ze', Juan xa' nililëi' men le'n nits, nguio xa' le'n yuo bizh kwa'n ña'n lo yuo che'n men Judea, kidi'zh xa' lo rë men,

²nzhab xa': ―Bila' go rë kwa'n gat lë' nak go; lë' zhë nzhazhin la, ne go xmod ban go kun Dios.

³No Juan re' mize't Isaías, tu xa' midi'zh por Dios chi tiemp or nzhab xa':Dizde le'n yuo bizh, naye kibizhyë tu xa', kidi'zh:“Bizuxkwa' go laxto' go par Dios;bila' go rë kwa'n gat lë' kwa'n nak go.”

⁴Nakxao' xab Juan kun yich che'n kamey, no nazi' tu sint yid laxto' xa'; kwa'n nzhao Juan nak nab tsa xanch kun mizhin che'n rë mbëz dan.

⁵Rë men re' ñayon kwa'n nidi'zh Juan: rë men yezh Jerusalén kun rë men xa' nzho lazh men Judea, mbaino rë men xa' nzho naka'n ro' you' Jordán.

⁶Or nixo'bdol bixa' lo Juan, nili'lëi' Juan bixa' le'n you' Jordán.

⁷No or une Juan, nayax rë men fariseo kun nayax men saduceo, nzë bixa' par lilëi' Juan bixa', orze' nzhab Juan: ―¡Rë go, men nakap, xa' nak nela mbë'l nayi' ga'! ¿Cho ne lo go, nab por gaklëi' go, le' go gan lo kwa'n nazhe'b kwa'n xë'l Dios par rë men kwa'n nzë'b xki lo Me?

⁸Nal bilu' go, walika mila' go rë kwa'n gat lë' nak go,

⁹mbaino nagabt go, yent kwa'n le' Dios kun go por nzë go ben che'n Abraham, porke nin lo go, haxta kun rë ke re', gak le' Dios, gake rë men xa' nzë ben che'n Abraham,

¹⁰no lë' yi'b ya nzo la xan rë ya, par cho'i rë ya kwa'n gat niza' xlë wen, orze' yole.

¹¹Walika, nab tsa nililë̱i'ña̱ men le'n nits or walika nila' bixa' rë kwa'n gat lë' nak bixa' lo Dios. Per nzho xtu xa', xa' nzadkë ticha, xa' re' nililëi' men kun Sprit che'n Dios, no más tsak xa' lon. Per ni gat ñal lan yalyid che'n xa' ni' xa'.

¹²No nzen la xa' pal par tsumbe xa' triu, no tu lad ko' xa' yix. Or lox tsumbe xa'i, orze' kan xa' triu par kichao' xa'i, per lë' yix zë'k xa' plo gat ñalt bël. Ngoklëi' Jesús you' Jordán

¹³Nalse nzha Jesús plo nzo Juan par lilëi' Juan Me le'n nits; dizde lazh men Galilea nguro' Me par mizhin Me ro' you' Jordán plo nzo Juan.

¹⁴Or galo laka nanet Juan lilëi' Juan Jesús, nzhab Juan: ―¿Taxa na lilë̱i̱ña̱l? ¡Maska lu lilëi' da!

¹⁵Per nzhab Jesús: ―Por nal, la' be gake se', par le' be rë kwa'n nzhakla Dios gak. Orze' mililëi' Juan Jesús.

¹⁶No or milox ngoklëi' Jesús, tuli nguro' Me le'n nits, lë'chi mixa'l lo yibë', une Jesús ngulayët Sprit che'n Dios yek Me, nela tu palom ga',

¹⁷lë'chi mien tu widi'zh dizde lo yibë' kwa'n nzhab: ―Xa' re' Xga'na xa' nazhi' da; dox nizak laxto'n por xa' re'.