Read Coatecas Altas Zapotec San Marcos 11 Bible Online

San Marcos 11 - Coatecas Altas Zapotec bible

San Marcos 11

¹Dub nzhazhin Jesús yezh Jerusalén, nzhaded la Me ro' xchop yezh win kwa'n nzhin ze'; tube lë Betfagé, no xtube lë Betania, gax lom plo lë Olivos; orze' mixë'l Me chop men che'n Me,

²nzhab Me: ―Wa go yezh win kwa'n nilu' ba', lë' go zhin plo nikido' tu burrit kwa'n gat zob ni tu men; bixëk go ma no di'nu go ma,

³no chi cho ne lo go: “¿Plo wei' go burrit ba'?”, orze' gab go: “Lë' Señor naki'n ma, per lwega' yi'dla' no ma.”

⁴Orze' ngwa bixa', no une bixa' burrit nikido' le'n nez ro' tu pwert, no mixëk bixa' ma.

⁵Ze' nzo pla men, xa' nzhab: ―¿Chon kixëk go burrit ba'?

⁶Orze' nzhab rë men che'n Jesús nela xmod nzhab ka Jesús lo bixa', kuze' mila' rë xa' re'.

⁷Orze' ñano bixa' burrit re' lo Jesús, mbaino mixo'b bixa' xab bixa' tich ma no nguzob Jesús ma.

⁸No dox men ndix xab dilant plo ded Jesús, no nzho bixa' ndix rram la kwa'n micho' bixa' dan,

⁹no xa' nzha dilant, no rë xa' nzë tras, naye kibizhië bixa', nzhab bixa':¡Bidi'zh go wen nzha xa' mixë'l Dios!

¹⁰¡Wen nzha xa' nzë ben che'n xuz be Dabi par le' mandad lo be!¡Bidi'zh go nazhon Dios, Me nzho lo yibë'!

¹¹No or nguio Jesús yezh Jerusalén, ngwa Me yado'; no or miwi' Me rë plo, une Me rë kwa'n nzhak ze', orze' nzha Me kun dub tu dusen men che'n Me par yezh Betania, porke ya cho gor la. Jesús mizhi'bde tu ya nzhao' por niyent nzhao' loi

¹²No xtu riyë'l, or nguro' bixa' yezh Betania, orze' mbi'd nila'n Jesús,

¹³no zitra', une Jesús tu ya nzhao' nayë', no ngwatswi' Me, nabei chi nzo nzhao' loi; no or mizhin Me xan ya, yent kwan nak loi, nab lai, porke gat lë't tiemp kwa'n niza'i orze'.

¹⁴Kuze' mizhi'bde Jesús ya nzhao' ze', nzhab Me: ―Ya nayotra' yi'd men, gao men nzhao' che'nal. No kiyon rë men che'n Mei. Jesús ngulo'tin rë xa' kile'xbi' lo luwe che'n yado'

¹⁵Or nguio bixa' yezh Jerusalén, mizhin Jesús lo luwe che'n yado'; orze' nguzublo kigo'tin Me rë xa' kile'xbi' no rë xa' kwa'n kizi' ze', mbaino michixche Me rë mes che'n rë xa' nichi'l dimi che'n men, no plo nito men palom, no michixche Me plo nizob bixa'.

¹⁶No nangala'tra' Jesús ngaded men kun kwa'n lo luwe ze'.

¹⁷Orze' nguzublo kilu' Me lo rë men nzhin ze', nzhab Me: ―¿Chi nanet go, se' nzobni' lo Yech che'n Dios: “Lizha yi'd rë nak men yizhyuo, par yi'di'zh bixa' lon”? ¡Per go kile'i nela plo nibin rë wa'n ga'!

¹⁸No or mbin rë ngulëi' ro kure', kun rë xa' nilu' ley, orze' mikwa'n bixa' mod par gut bixa' Jesús, porke or nilu' Me widi'zh che'n Dios, rë men ña'n xe. Kuze' nizheb bixa' nine bixa' Me.

¹⁹No or nzhala yë'l, nguro' Jesús kun rë men che'n Me, yezh Jerusalén. Ya nzhao' mibizh

²⁰No xtu riyë'l ze', or garzi'l; dub nzha bixa' nez, une bixa', lë' ya nzhao' ze' mibizh la, dub luche.

²¹No Per mitsila or mizhi'bde Jesús ya ze', kuze' nzhab Per: ―Maestr, lë' ya nzhao' kwa'n mizhi'bde go ze', ¡mibizhe biwi'ule!

²²Orze' nkab Jesús: ―Kuze' la nin, wayila go Dios.

²³Walika kwa'n nin, wanei cho men gab lo yi' ba': “Chi ba', bizë le'n nitsdo'”, no nale't xa' chop xigab or gab xa'i, sino yila xa' rë kwa'n gab xa', orze' lë'i gak, lë' Dios le'i.

²⁴Kuze' kinin, rë kwa'n na'b go lo Dios, wayila goi, lë'i gap go; lë'i zhin lo go.

²⁵No or kina'b go lo Dios, biya'l laxto' go rë kwa'n nile' men lo go, nes par lë' Xuz go, Me nzho lo yibë', ya'l laxto' Me rë kwa'n nzë'b xki go lo Me.

²⁶Per chi naya'l laxto' go rë kwa'n nile' men lo go, nu ska Xuz go, Me nzho lo yibë', naya'lt laxto' Me rë kwa'n nzë'b xki go lo Me. Minabdi'zh bixa', cho mile' mandad Jesús

²⁷Orze' nguiubre Jesús xtu wëlt yezh Jerusalén kun rë men che'n Me. No or nzo Me lo luwe che'n yado', lë'chi nguzubi rë ngulëi' ro lo Me, kun rë xa' nilu' ley, mbaino kun rë xa' nak zhi'n yezh,

²⁸par nzhab bixa': ―¿Cho mile' mandadal kile'l rë kure', o cho mixë'lal par le'le?

²⁹Orze' nkab Jesús: ―Nuska da nabdi'zh tu kwa'n lo go; no chi lë' go nei, orze' ganin cho mile' mandad da kilen rë kure'.

³⁰Nal bine go, ¿cho mixë'l Juan, xa' mili'lëi' men le'n nits? ¿Chi Diose, o mene?

³¹Orze' kidi'zh bixa' entre lë' bixa': ―Chi gab be: “Diose”, orze' lë' xa' ne lo be: “¿Chon ska nangayila go xa'?”

³²No por rë men, nazhe'b be par be, kuze' nagakt gab be: “Men mixë'l Juan”. Porke rë men nidi'zh, walika Dios mixë'l Juan,

³³kuze', se' mikab bixa' lo Jesús: ―Nanet no choi. Orze' nzhab ska Jesús: ―Nuska da nanita, cho mixë'l da, kilen rë kure'.