Read Coatecas Altas Zapotec San Marcos 14 Bible Online

San Marcos 14 - Coatecas Altas Zapotec bible

San Marcos 14

¹Nzhak jwalt xchop ngubizh par gal lani Pask, zhë nzhao men pan kwa'n yent levadur. Lë' rë ngulëi' ro kun rë xa' nilu' ley, kikwa'n bixa' mod zen bixa' Jesús xla'n, par gut bixa' Me,

²mbaino kidi'zh bixa': ―Nale't bei zhë lani, par nayent kwan le' rë men. Tu una' michob aseit nax yek Jesús

³No or nzo Jesús yezh Betania, ngwatao Me lizh Simón xa' lë “Lepros”. Or nzob Jesús lo mes, mizhin tu una' kun tu bot win kwa'n nakxao' kun ke ónice, dox tsake; viv aseit nardo nzho le'ne. Orze' ngulë' una' kwa'n nzho aseit re', michob una'i yek Jesús.

⁴Per pla xa' nzhin ze', nangayot laxto' bixa'i, nzhab bixa' lo wech bixa': —¿Chon mitsinu una' re' aseit ba'?

⁵Ngak ngado aseit ba' kwa'n tsak chi' mbëo' kë men zhi'n che'n men, par ngaga'z dimi ze', ngaka' rë men yent kwan nzhap. Kuze', ndil bixa' una' ze'.

⁶Orze' nzhab Jesús: ―La' go, nadilt go una' re'; ¿chon kikixian go xa'?, porke dox wen tu kwa'n mile' xa' por da;

⁷rë men prob, zilita' yo bixa' xid go, gak gaknu go bixa' or nzhakla go; per na gat lë'ta' dubta' zon kun go.

⁸Mbaino una' re', mile' kwa'n ngok mile' xa'; michob xa' aseit nax da, nes par or ga'ch da mile' la xa'i.

⁹No walika kwa'n nin; rë plo re'ch widi'zh nazhon che'n Dios, nu ka kwa'n mile' una' re' yët, par tsila bixa' una'. Judas mito Jesús

¹⁰Orze', lë' Judas Iscariote, xa' nzho xid za tu dusen men che'n Jesús, ngwa xa' lo rë ngulëi' ro, par chi xa' Jesús lo rë xa' re'.

¹¹Or mbin bixa' kure', dox nizak laxto' bixa', no nzhab bixa', za' bixa' dimi ka' Judas. No dizde orze', nguzublo kikwa'n Judas mod, kiwi' xa' cho or za'i, par gak chi xa' Jesús. Lult yë'l kwa'n ndao Jesús kun rë men che'n Me

¹²Mer ngubizh galo che'n lani pask, or nzhao men Israel pan kwa'n niyent levadur, zhë ze' niza' men Israel tu gon lo Dios, or nzhut bixa' tu mbëkxi'l. Orze' mina'bdi'zh rë men che'n Jesús, nzhab bixa': ―¿Plo nzhakla go yachao' no kwa'n gao be nal yë'l re', lani Pask re'?

¹³Orze' mixë'l Me chop men che'n Me, nzhab Me: ―Wa go le'n yezh; ba' ne go tu miyi' ñanu tu re' nits, no wakë go tich xa'.

¹⁴Mbaino plo zhin xa', guzh go lo xa' nak lizhe ze': “Lë' Maestr ne lol: ¿Plo nak yo' kwa'n ne'l, par ga̱o̱ kun rë men da, lani Pask re'?”

¹⁵Orze' lë' xa' lu' tu yo' nzob yek al ya, naxene, no nazuxkwa' la le'ne; ze' bizuxkwa' go kwa'n gao be.

¹⁶Orze' nzha rop men che'n Jesús par yezh; no rëi ngok nela xmod nzhab ka Jesús lo bixa'; ze' michao' bixa' kwa'n gao bixa' lani Pask.

¹⁷No or ngula yë'l, mizhin Jesús ze', kun dub tu dusen men che'n Me.

¹⁸No dub kiyao bixa' lo mes, nzhab Jesús: ―Walika kwa'n nin, mis tu rë go kiyao kuda re', chi da lo rë men par gut bixa' da.

¹⁹No rë bixa' miwin laxto', orze' nguzublo minabdi'zh tuga' bixa' lo Jesús, nzhab bixa': ―¿Taxa le' go xigab nai?

²⁰Orze' nzhab Jesús lo bixa': ―Mis tu rë xa' nzho xid tu dusen goi, xa' kwa'n kigazh pan le'n plat dai.

²¹Na Xga'n Dios no nu tu men yizhyuo da; lë'da zak rë kwa'n nzobni' lo Yech che'n Dios, ¡per nazhe'b nalats nzha miyi' xa' chi da lo rë men! Más wen nangayot ngal xa' re'.

²²No dub kiyao bixa', nguzen Me pan, miza' Me xkix lo Dios, no michix Mei, miza' Mei ka' rë men che'n Me, orze' nzhab Me: ―Mbai go, kure' nak kwerp da.

²³No nguzen Me tu vas nits gub, miza' Me xkix lo Dios, orze' miza' Mei ka' rë men che'n Me, rë bixa' ngu'y,

²⁴mbaino nzhab Me: ―Kure' nak ren da kwa'n xon, par ya'n nayax men nambe lo Dios.

²⁵Walika kwa'n nin, nago'tra' nits gub yizhyuo re'. Or go'ne xtu wëlt plo nile' Dios mandad, xa'la mode. Nzhab Jesús, lë' Per gab, gat nili'be't Per Me

²⁶No or milox mikë' bixa' tu kant lo Dios, nguro' bixa' nzha bixa' yek lom kwa'n lë Olivos,

²⁷orze' nzhab Me lo bixa': ―Rë go la' nzë'b da, porke se' nzobni' lo Yech che'n Dios: “Lë'da gut miyi' nikina mbëkxi'l, orze' lë' rë ma re'ch.”

²⁸Per or ruban da, lazh men Galilea kwëza yi'd go.

²⁹Orze' nzhab Per: ―Ter rë xa' re' la' nzë'b go; per na, nalat go.

³⁰Per nzhab Jesús: ―Walika kwa'n nin, nal yë'l re', ni naga kë' nguid gai kant chop wëlt, lë'l gab chon wëlt gat nili'be'tal da.

³¹Per garga'l nzhab Per: ―¡Per na nalat go ter nu da gat kun go! No se'ska nzhab rë bixa'. Jesús mina'b lo Dios, plo lë Getsemaní

³²Orze' ngwa bixa' tu plo lë Getsemaní, ze' nzhab Jesús lo rë men che'n Me: ―Riga guzob go, lë'da nzhana'b lo Dios.

³³Orze' nzhanu Me Per, no Jakob, mbaino Juan; orze' nguzublo niyentra' jwers Me por tanta nizheb Me, haxta netra' Me kwan le' Me,

³⁴no orze' nzhab Me lo yon xa' re': ―Nzho tu yalnawin dox laxto'n, ya naxektra' da; biya'n go re' no bikina go; naga't go.

³⁵Orze' nguzë Jesús xche'p dilant; ze' ngo't kuslo Me lo yuo, no mina'b Me lo Dios, chi lë'i gak le' Dios, nazhint rë kwa'n zak Me orze'.

³⁶Or kina'b Me lo Dios, nzhab Me: ―Payë', par go, rëi gak le' go. ¿Chi zak kubchi go da lo rë kwa'n nzë par da? Per gat lë't kwa'n nin, kuze' gak; sino kwa'n ne goi.

³⁷Orze' miëk Me plo nzhin yon men che'n Me ze'; no mizhin Me, lë' yon xa' nax la. Orze' nzhab Me lo Per: ―Simón, ¿chi naxnal? Nangaxektal ni tu or, ngakinal.

³⁸Bikina go no guna'b go lo Dios, par nayachin go lo che'n Mizhab. Le'n laxto' go nzhakla ka go che'n Dios, per kwerp che'n go gat nzhaklat che'n Dios.

³⁹Orze' ngwa Jesús xtu wëlt, par ngwana'b Me lo Xuz Me Dios, mis kwa'n nzhab la Me.

⁴⁰Or miëk Me xtu wëlt, lë' bixa' nax la, porke dox nzë mika'l lo bixa'; orze' net bixa' xmod kab bixa' lo Jesús.

⁴¹No wëlt mion nzhab Me: ―¿Stubi nax go, kile' go diskans? Porke xa' chi da, ngox la nka'. Biwi' go, lë' or mizhin la, lë' Xga'n Dios Me nu nak tu men yizhyuo, yo ya' rë xa' nzë'b xki lo Dios.

⁴²Waxche go, cha'o, ro' be re'; biwi' go, lë' xa' chi da nzë la ba'. Ngwaga' Jesús

⁴³Mis orze', stubi kidi'zh Jesús; lë'chi mizhin Judas, mis tu xa' nak tu dusen men che'n Me, kun tu bëd men, nzho bixa' nzen spad mbaino yarrot. Rë xa' re' mixë'l rë ngulëi' ro, kun rë xa' nilu' ley, mbaino rë men Israel xa' nak zhi'n.

⁴⁴No xa' le' entreg Jesús, nzhab xa' tu señ le' xa': “Xa' kwa'n chiro'n ta' kwats, xa' ze' guzen go no bi'y go xa'; no neo, nale' xa' gan.”

⁴⁵Or mizhin Judas lo Jesús, lwega' nguzubi xa', nzhab xa': ―¿Ma go Maestr? Orze' michiro' xa' ta' kwats Jesús,

⁴⁶mbaino nguzubi rë men par nguzen bixa' Jesús.

⁴⁷Orze' xtu rë xa' nzo ze', kun spad micho' xa' tu nzha mos che'n ngulëi' ro,

⁴⁸orze' midi'zh Jesús lo rë men ze': ―¿Chon nzë go kun spad mbaino kun yarrot? ¿Chigab tu men wa'n nzatsen go?

⁴⁹Zilita' nguzon xid go le'n yado', plo nidi'zha widi'zh che'n Dios; no nangazent go da. Per rë kure' nzhak par gak rë kwa'n nzobni' lo Yech che'n Dios.

⁵⁰Orze', rë men che'n Jesús mikë' karre, mia'n nab tsa Me.

⁵¹Per tu miyi' xi nzhakë tich Jesús, narël xa' nab tsa tu sab, per nu xa' nguzen men,

⁵²per nguro'tin xa' ya' men, mia'ntsa sab che'n xa' ya' rë men ze', kache' xa' mile' xa' gan. Mizhin Jesús lo rë gustis che'n men Israel, xa' más nile' mandad

⁵³Orze' mbi'y bixa' Jesús lo ngulëi' ro; no ze' nzhin más ngulëi' kwa'n nile' mandad lo más ngulëi', kun rë men Israel xa' nak zhi'n, mbaino rë xa' nilu' ley kwa'n mila' Dios lo Muisés.

⁵⁴Per lë' Per ngwakë zit tich Jesús, haxta lo luwe che'n ngulëi' ro mizhin Per. Ze' nguzob Per xid rë xa' nikina yado', kibizh bixa' junt lo ki.

⁵⁵No rë ngulëi' ro, mbaino kun más rë gustis xa' más nile' mandad, kikwa'n bixa' cho men gab, nak Jesús tu kwa'n ñal gat Me, par gut bixa' Jesús; per yent kwan ngane bixa', nak Jesús.

⁵⁶No nayax men midi'zh kwa'n nak Jesús, per pura nikë bixa' di'zh, tu xa' kun xtu xa'.

⁵⁷No nzho xa' mikë' mbël nzhab:

⁵⁸―Mbin no midi'zh xa': “Na chil yado' kwa'n michao' men, mbaino chontsa ngubizh kuxkwa'n xtube, per gat lë't kwa'n nichao' ya' mene.”

⁵⁹Per ni kwa'n nzhab xa' re', gat nakte tutsa kun rë kwa'n nidi'zh más bixa'.

⁶⁰Orze' nguzuli ngulëi' ro, par nguzo xa' sao' rë men ze', orze' minabdi'zh xa' lo Jesús: ―¿Chon nanel kabal? ¿Kwan kine rë xa' re' nakal?

⁶¹Per yent kwan ngakab Jesús. Orze' minabdi'zh ngulëi' ro xtu wëlt, nzhab xa': ―¿Chi lu nak Krist, Xga'n Dios Me nidi'zh rë men nazhon?

⁶²Orze' nzhab Jesús: ―Nai. No rë go ne, lë' Xga'n Dios, Me nu nak tu men yizhyuo; lë' Me zob lad direch che'n Dios Me nile' rëi; no yë'd Me le'n xkao lo yibë'.

⁶³Orze' michëz ngulëi' ro lar kwa'n nzho'b tich xa', nela tu señ ga' ke lë' Jesús midi'zh tu kwa'n gat lë' lo Dios. Orze' nzhab xa': ―¿Kwan ra' gakla be, ne men, xtu kwa'n nak xa' re'?

⁶⁴Rë go mbin, midi'zh xa' di'zh gat lë' lo Dios. ¿Kwan nile'u xigab ñal xa'? No rë bixa', tutsa midi'zh bixa', ke ñal gat Jesús.

⁶⁵No nzho bixa' nguzublo michuk lo Jesús; no mitsao' bixa' lo Jesús kun tu lar, no mikë' bixa' puñet yek Jesús, orze' nzhab bixa': ―¡Bine cho mikë'i yekal! No nu rë xa' nikina yado', mixa't bixa'i ta'ro' Jesús. Lë' Per nzhab: “Gat nili'be'ta' Jesús”

⁶⁶No lë' Per nzob al yët lo luwe, lë'chi mizhin tu una' nikë zhi'n che'n ngulëi' ro,

⁶⁷no or une una' lë' Per kibizh, xe miwi' una', nzhab una': ―Nuka lu, niki'zë kun Jesús Nazareno.

⁶⁸Orze' nzhab Per: ―¡A'a! ¡Ni nanen kwan kidi'zhal! Orze' nguro' Per ro' yo' al tich. (No lwega' mikë' tu nguid gai kant.)

⁶⁹No or une kriad Per xtu wëlt, nguzublo nzhab una' xid rë men nzhin ze': ―¡Nuka xa' re', tu xa' nikizë kun lë' bixa'!

⁷⁰Per xtu wëlt nzhab Per: “Nalibe'ta' xa' ba'”, no uzhëla ze', rë xa' nzhin ze' nzhab bixa' lo Per: ―¡Sigur nukal nikizël kun lë' bixa', porke lu nzë lazh men Galilea!

⁷¹Orze' nguzublo kize't Per Dios, nzhab Per: ―¡Dios zakzi da chi lë'da ka kini rë kure'!

⁷²Lë'chi mis orze', mikë' nguid gai kant xtu wëlt. Orze' mitsila Per kwa'n nzhab Jesús: “Antis di kë' nguid gai kant chop wëlt, lë'l gab chon wëlt: Gat nili'be'ta' xa' ba'.” Orze' dox mbi'n Per.