Read Coatecas Altas Zapotec San Marcos 4 Bible Online

San Marcos 4 - Coatecas Altas Zapotec bible

San Marcos 4

¹Xtu wëlt nguzublo kilu' Jesús widi'zh che'n Dios lo rë men, ro' lagún kwa'n ña'n lazh men Galilea. Ze' dox men migan plo nzo Jesús, orze' nkë Me le'n tu bark par ña Me xche'p al le'n nits. Orze' nguzob Me, no lë' rë men nzhin ro' nits.

²Orze' nguzublo Jesús, milu' Me nayax kwa'n lo bixa' kun pura kwent. Kuze' miza' Me kwent re', nzhab Me:

³―Bin go kure'. Nguro' tu xa' nzhaya'n lazh triu nzhache'ch xa'i.

⁴Or ngo'n xa'i, che'pe ngob le'n nez, ngula miyin loi ndao mai.

⁵No xche'pe ngob lo yuo ke, no por niyen be's yuo ze', lwega' ngulene.

⁶Per or ngulen ngubizh, migo'le; no por gat kinui be's luch, mibizhe.

⁷No xche'pe ngob xid ya yich; no or miro'b rë ya yich re', nangala't rë kure' ngaro'be, kuze' nangaza'te.

⁸Per máse ngob lo yuo wen, miro'be no miaxe; orze' dox miza'i. Nzhoi miza' gal bichi' lazhe, nzhoi miza' chon gal lazhe; mbaino nzhoi miza' haxta tu gayo' lazhe.

⁹Orze' nzhab Jesús: ―Go kinu nzha par gone, bin goi. ¿Chon midi'zh Jesús kure'?

¹⁰Or mia'n nab Jesús, rë xa' nzhin naka'n lo Me, kun za tu dusen men che'n Me xa' más nile' mandad, mina'bdi'zh bixa' lo Me, nzhab bixa': —¿Kwan gab kwent kwa'n midi'zh go ba'?

¹¹Orze' nzhab Jesús: ―Lo go nin rë kwa'n naga'ch che'n Dios kwa'n kinu Me plo nile' Me mandad; per lo rë xa' nzo al tich, kun pura kwent nilune lo bixa',

¹²porke,Ter une bixa'i, per yent cho xigab ngale' bixa' por lë'i;no ter mbin bixa'i, per nangazobyekt bixa'i.Kuze' nangala't bixa' rë kwa'n gat lë' nak bixa',mbaino nangache't Dios rë kwa'n nzë'b xki bixa' lo Me. Jesús midi'zh xmod nak kwent che'n men nzha'n triu

¹³Orze' nzhab Jesús: ―¿Chi lë' go nangazob yekt kwent re'? Orze', ¿xmod zob yek go más kwa'n?

¹⁴Men xa' nzha'n ze' nak xa' nidi'zh widi'zh che'n Dios.

¹⁵No yuo le'n nez nak xa' mbin widi'zh che'n Dios, per por nangayilat xa'i, orze' lwega' ngwa Mizhab, mizubchi widi'zh che'n Dios kwa'n nzho laxto' xa'.

¹⁶No yuo ke nak xa' mbin widi'zh che'n Dios, dub nizak laxto' xa',

¹⁷per por gat ña laxto' xa' kun rë che'n Dios, kuze' or nizak xa' tu kwa'n, o nidi'zh men tich xa' por widi'zh che'n Dios, orze' nila' xa' Dios.

¹⁸No yuo plo nzhi'b ya yich nak xa' nzhon widi'zh che'n Dios,

¹⁹per por dox nile' xa' xigab por kwa'n naki'n xa', no por niwix xa' gap xa' máse, mbaino por más rë kwa'n nizë'bla xa'; kuze' yent cho kwent nak xa' men che'n Dios.

²⁰Per yuo wen nak xa' nzhon widi'zh che'n Dios, no nile' xa' kwa'n nzhab Dios; no por mod niban xa', nak xa' nela yuo kwa'n miza' tu yalgo'n ro, nzhoi miza' gal bichi'y, nzhoi miza' chon gale, mbaino nzhoi miza' haxta tu gayo' lazhe. Kwent che'n tu ki

²¹Nu nzhab Jesús: ―Yent cho tu men tsinki tu biani, orze' zob xa'i xan tu kaj o xan tu lo'n. Gat lë' xa' zobe al ya par ziniy dub le'n yo',

²²porke rë kwa'n naga'ch nilun lo go, lë'i xo'bdi'zh go lo men.

²³Cho go nzhakla gon kwa'n nin, bizobyek goi.

²⁴Mbaino nzhab Jesús: ―No bizobyek go kwa'n nin re': Chi lë' go gone, orze' más kwa'n gak zobyek go,

²⁵porke xa' nile' kwa'n nzhapa, ngubizh kun ngubizh más kwa'n zobyek xa'; per xa' gat nile' kwa'n nzhapa, haxta rë kwa'n mbin xa' midizha, yubchi lo xa'. Kwent che'n lazh tu kwa'n nixë'n men

²⁶Mbaino nu nzhab Jesús: ―Plo nile' Dios mandad nak nela tu miyi' kwa'n ngo'n lazh triu lo yuo che'n.

²⁷Ño xa' nzha' xa' no ñaxche xa'; mbaino ngaza't xa' kwent xmod ngulene no miro'b lazh kwa'n mixë'n xa' ze'.

²⁸Lë' yuo nile' nilene, orze' niru'xo'b lai, no niru'xo'b doi, orze' niza'i lazhe.

²⁹Mbaino or ngwagale miza'i lazhe, orze' lë' men ngo'ne, lwega' nilits xa' rë kwa'n miza'i, porke ngol la tiemp yatse. Kwent che'n tu lazh mostás

³⁰Orze' nzhab Jesús: ―¿Kun kwan tutsa nak plo nile' Dios mandad?, o, ¿kun kwan chë'l lal bei, par ne be xmod nake?

³¹Nake nela tu lazh mostás kwa'n mixë'n tu men lo yuo che'n, ter nake tu lazh kwa'n más kwa'n win, lo rë lazh kwa'n nzho yizhyuo.

³²Per or mixë'n xa'i, orze' miro'be, haxta ngoke tu ya más kwa'ro xid rë ya nayë' kwa'n nzhi'b ze', haxta miyin michao' yo che'n lo rë rram che'ne. ¿Chon nilu' Jesús widi'zh che'n Dios kun kwent lo rë men?

³³Kun nayaxra' kwent milu' Jesús widi'zh che'n Dios lo rë men, par ne bixa' xmod nile' Dios kun rë men yizhyuo, haxta plo ngwazha bixa' mbin bixa'i.

³⁴Kun pura kwenttsa nilu' Jesús widi'zh che'n Dios lo rë men, per nab tsa lo rë men che'n Me, nzhab Me kwan nzhab kad kwent. Mikwë'z Jesús tu yiwbi

³⁵No or nzhala la yë'l, nzhab Jesús lo rë men che'n Me: ―Cha' go nzha be xtu ro' nits ba'.

³⁶Orze' mia'n rë men nzhin ze', mbaino lë' rë men che'n Jesús ña bixa' le'n bark plo nzob la Jesús; no nu más rë bark che'n xtu ben men, ñakë tich Jesús.

³⁷Dub nzha bixa' le'n bark, lë'chi tu yiwbi dox nguro'; no por tanta niwin nits, haxta nguioi le'n bark no nzhaya'z yo'i le'n nits.

³⁸No lë' Jesús naxnaa al xan bark, nako' Me lo tu almad. Lë'chi milixche bixa' Me, nzhab bixa': ―¡Maestr! ¿Chi yent kwan ña laxto'l, lë'be gat le'n nits?

³⁹Orze' ngwaxche Jesús, mikwë'z Me mbi, no nzhab Me lo nits: ―¡Nawintra'l! ¡Xe gulëz! Orze' tuli ngulëz mbi, no rëi mia'n xe.

⁴⁰Orze' nzhab Me lo rë men che'n Me: ―¿Chon dox nizheb go? ¿Chon naga yila go Dios?

⁴¹Orze' dox mizheb bixa', no nzhab bixa' lo wech bixa': ―¿Cho xa' re'? ¡Haxta mbi no nits nzhon ro' xa'!