Read Coatecas Altas Zapotec San Lucas 12 Bible Online

San Lucas 12 - Coatecas Altas Zapotec bible

San Lucas 12

¹No or migan nayax dox men, plo nzo Jesús, por mil bixa', haxta kigotip bixa' wech bixa', orze' nguzublo Jesús galo laka midi'zh Me lo rë men che'n Me, nzhab Me: ―Bikina go go lo rë men fariseo, napa' nu go ye'd xmod nak bixa'; porke nak bixa' chigab men walika nzhon ro' Dios,

²porke yent ni tu kwa'n naga'ch midizha lo go nagon men; mbaino yent ni tu kwa'n xla'n milun lo go naded nagon mene.

³No rë nak kwa'n nidi'zh go lo nakao, zhë laka gon mene; no rë kwa'n nidi'zh go xla'n le'n yo', lë' xtu men kuzhyëi dizde yek yo' al ya. Cho lo naki'n zheb men

⁴No nzhab Jesús: ―Kinin lo go, rë go xa' nichëla; nazhebt go ne go xa' nzhut men, porke nab tsa kuba' gak le' xa'.

⁵Per na ni cho lo más ñal zheb go: Lo Dios bizheb go, porke lë' Dios, dispwés di gat men, Dios gak le' mandad, yo men le'n bël. Nab tsa lo Dios bizheb go.

⁶’Nane ka go, dox che'p tsak rë miyin ye'n or nido bine', per nikë ka laxto' Dios bine'.

⁷No chi lë' Dios nikë laxto' miyin ye'n, ¿chi nanet go, más nazhi' Dios go?, porke haxta rë yich yek go nane Dios pla. Kuze' nazhebt go, porke lo rë miyin, go más tsak. Xa' kwa'n nzhab lo rë men, nak xa' tu men che'n Jesukrist

⁸’Kidizha lo rë go, xa' kwa'n xë'lro' lo rë men: “Na men che'n Jesús”, nu ska da, xa' nak Xga'n Dios nu nak da tu men yizhyuo, gapa lo rë ganj che'n Dios: “Lë' xa' ba' nak tu men da”,

⁹per xa' naxë'lro' lo rë men, nak xa' tu men da, orze', nu ska da gap lo rë ganj che'n Dios: “Gat lë'ta' men da xa' ba'.”

¹⁰’No chi di'zh men tu kwa'n gat lë' por da, mbaino na nak Xga'n Dios nu nak da tu men yizhyuo, per Dios che' kwa'n nzë'b xki xa' re' por kure'; per tu xa' di'zh kwa'n gat lë' por Sprit che'n Dios, nayotra' zhe' kwa'n nzë'b xki xa' por kure'.

¹¹’No or chi men go lo rë xa' kwa'n nile' mandad le'n rë yo' plo nitse'd men widi'zh che'n Dios, o lo rë xa' nak nela rey ga', o lo rë xa' nak nela gobiernador ga', o lo rë gustis xa' más nile' mandad; per le't go xigab xmod kab go lo bixa', o kwan di'zh go lo bixa',

¹²porke or di'zh go lo bixa', lë' Sprit che'n Dios ne lo go xmod di'zh go lo bixa'. Rik nazhab

¹³No xid rë men nayax ze', nguro' tu xa' nzhab lo Jesús: ―Maestr, guzh lo wecha, ne' tlë' yuo kwa'n mila' xuza par gal da.

¹⁴Per nzhab Jesús: ―Lë' you, yent cho mizo da xid go, par kobe'n o par ki'za kwa'n xid go.

¹⁵Nu nzhab Jesús: ―Bikina go go, nawixt go gap go más kwa'n di lo rë kwa'n naki'n go, lo yizhyuo re', porke gat lë'ta' ba' nzë yalnaban par men.

¹⁶Orze' miza' Jesús kwent re' lo bixa', nzhab Me: ―Nguio tu men rrik, mbaino rë yuo che'n xa' nded miza'i,

¹⁷orze' mile' xa' rrik re' xigab: “¡Neta kwan len, porke gat kinuta' plo kucha̱u̱ rë yalgo'n re'!”

¹⁸Guzhë la ze' mile' xa' xigab: “¡Neka kwan len! Lë'da chil lizha par cha̱u̱ tu kwa'n más kwa'ro, par kucha̱u̱ rë yalgo'n re', mbaino rë kwa'n kinun.”

¹⁹Orze' mile' xa' xigab: “Nalse nzho kwa'n ga̱u̱wa̱ nayax li'n; xchë nakëtra' zhi'n; ga̱u̱ mbaino go'n, nazhon nzhan.”

²⁰Per nzhab Dios lo xa': “¿Chi miao' yekal kwan kile'l? Nanetal, nal yë'l re', lë'l gat, no rë kwa'n kinuchao'wal ba', ¿par choi?”

²¹Sa' nizak men nitsiyar yalrrik yizhyuo re', per lo Dios, yent kwan kinu xa'. Dios nikina men che'n Me

²²Orze' nzhab Jesús lo rë men che'n Me: ―Kuze' nin lo go, le't go xigab por kwa'n gao go par ban go, no ni por xab go kwa'n gak go,

²³porke más tsak bid che'n go lo kwa'n gao go; no más tsak kwerp che'n go lo xab go.

²⁴Biwi' go lo rë nga, gat nzha'nt ma mbaino gat nikant ma yalgo'n, per lë' Dios niza' kwa'n nzhao ma; mbaino go, ¡más tsak go ke rë miyin!

²⁵O, ¿cho tu go por dox nile' go xigab, gak ro'b go zigarol metr dimás?

²⁶No chi ni tu kwa'n win nagakt le' go, orze', ¿chon nile' go xigab por rë kwa'n nagan, rë kwa'n nagakt le' go?

²⁷’Biwi' go xmod niro'b ye', nabe nilu'i nabé, nela tu men or nzhak xa' tu lar chul ga'; no nin lo go, ni rey Salomón, nangabet xa' nela xmod nabé nilu' tu ye' ga'.

²⁸No chi lë' Dios nile', chul nilu' rë ye' che'n rë yix dan, kwa'n nixek tutsa ngubizh, orze' nibizhe, orze' nikan mene par yëke, or nichao' bixa' pan par nzhao bixa', pwes Dios más gak libe' go ke nela xmod nilu' tu ye' ga'. ¿Chon gat ñilat go be's, lë' Dios ne' kwa'n gak go?

²⁹Nin lo go, nale't go xigab por kwa'n gao go, no ni por kwa'n go go,

³⁰porke rë men yizhyuo, dox nile' bixa' xigab por rë kure'; per go kinu Xuz go, Me kwa'n nane la, lë' go naki'n rë kure'.

³¹Mejor bile' go xigab, kwa'n go, galo laka rë kwa'n nazhon che'n Dios, orze' Dios zilazh rë kwa'n naki'n go yizhyuo re'. Xmod gap men kwa'n dox tsak lo yibë'

³²’Rë go, xa' dox nazhi' da, nale't go be's xigab, porke lë' Xuz be Dios ne' rë kwa'n naki'n be.

³³Kuze' bito go rë kwa'n kinu go yizhyuo re', par za' goi ka' rë men gat kinui, nes par gap go yalnaza'k kwa'n nayot lox lo yibë', porke ba', yent cho liwa'ne, mbaino ni nagao mbëze,

³⁴porke plo kinu go kwa'n tsak, ze' nzo xigab chego. Zo be list

³⁵’Guzo go list, nala't go yal biani che'n go, nela xmod nile' rë mos, xa' kimbëz yë'd miyi' xa' gak jwandang che'n, nes par or zhin xa' re', lwega' xa'l rë mos ro' pwert.

³⁶

³⁷Wen nzha rë mos xa' nzo list kikina, or yë'd xa' kwa'n nile' mandad bixa'. Walika nin lo go, lë' xa' le' zob rë mos lo mes, no mis xa' nile' mandad re', ki'z kwa'n gao rë xa' re' lo mes.

³⁸Wanei, ter garol yë'l yë'd xa' re', o garzi'l lakai, per yazhël xa' rë mos kikina ka bixa', orze' nazhon nzha rë mos re'.

³⁹Bin go kure': Chi tu xa' nak lizh tu yo', nzhon la cho or yo wa'n lizh xa', sigurka nala't xa' yo wa'n lizh xa'.

⁴⁰Nuska go, naki'n zo go list; porke na yal, or nale't go xigab. Mos nzhon di'zh mbaino mos yent kwan nzhon

⁴¹Orze' minabdi'zh Per lo Jesús, nzhab xa': ―Señor, ¿chi nab par yek no nzha kuba', o nu par rë men nzhai?

⁴²Orze' nzhab Jesús: ―Mos nzhon di'zh mbaino natsin, xa' re' nizo xa' nile' mandad par kina lizh xa', mbaino rë che'n xa', no par za' mos re', kwa'n gao más tsa' mos xa', or nila'n rë xa' re'.

⁴³Wen nzha mos nzhon di'zh, or yë'd xa' nile' mandad, or ne xa' lë' mos re' kile' ka kwa'n nzhab xa'.

⁴⁴Walika kwa'n nin lo go, lë' xa' nile' mandad re', la' rë nak kwa'n kinu xa', par kina mos kwa'n nzhon di'zh re'.

⁴⁵Per chi lë' mos re' le' xigab: “Lë' xa' nile' mandad yë'd gaat xa' lizh xa'”, orze' zublo kin xa' rë mos miyi' no rë mos una', no gao dox xa' mbaino go xa'i haxta zuzh xa',

⁴⁶orze' lë' xa' nile' mandad re', yë'd or nale't mos re' xigab, orze' chix xa' mos re' tuli, nela nzhak kun rë mos xa' gat nzhon di'zh.

⁴⁷’No mos xa' nane la, kwan nzhakla xa' nile' mandad xa', per gat nile't xa' por le' xa'i, orze' dox kin xa' mos re', haxta plo nagakra'i;

⁴⁸per mos xa' nile' rë kwa'n gat ñal, sin nane mos, chi ñal zakzi mos por lë'i, por kuba' che'ptsa zakzi mos. Xa' kwa'n mila' Dios nayax kwa'n lo, pwes nayax ska kwa'n na'b Dios kwent lo xa' por kure'; mbaino xa' kwa'n mizo Dios par le' mandad, nu ska lo xa' na'b Dios kwent nayax kwa'n. Jesús nile' nilë' men

⁴⁹No nzhab Jesús: ―Na nzhal nela tu men kwa'n tsinki yizhyuo re'; ¡oj zinkigai nzhaklan!

⁵⁰Naki'n de'da lo tu kwa'n nazhe'b, mbaino dox trixt nizi da, haxta or lox de'da lo kwa'n nazhe'b re'.

⁵¹¿Chi nile' go xigab nzhala par len, kwin men wen yizhyuo re'? Per gat lë't sa'i; na nzhal par len lë' men,

⁵²porke re' par dilant, gai' xa' nzho le'n tu yo', lë' bixa' lë'; chon xa' dil kun chop xa', no chop xa' dil kun chon xa'.

⁵³Lë' xuz xa' kun xga'n xa', no lë' xga'n xa' kun xuz xa'; no lë' xna' xa' lë' kun xcha'p xa', no xcha'p xa' lë' kun xna' xa'; lë' xix xa' lë' kun xna'ye' xa', no lë' xnaye' xa' lë' kun xix xa'. Gat nizobyekt men kwa'n nile' Dios

⁵⁴Nu nzhab Jesús lo nayax men: ―Or ne go nzhakxao' xkao al ya, orze' nzhab go: “Lë' yiu la”, mbaino nila ka yiu;

⁵⁵no or nzhakidan mbi dizde al yët, orze' nzhab go: “Lë' nëi' gak”, no sa' ka nzhake.

⁵⁶¡Tatu nazhe'b nak go, chigab walika men wen go! No chi lë' go nilibe' señ lo yibë' no lo yizhyuo; orze', ¿chon gat nizobyek go rë kwa'n nile' Dios nal re'? Chul guzhin go kun rë xa' niyi' nine go

⁵⁷’No, ¿chon nawi' mis go, kwan rë kwa'n ñal le' go?

⁵⁸Chi ne tu xa' nzhap go dol por tu kwa'n mile' go, no wei' xa' go lo gustis por kure', no dub nzha go lo gustis, bikwa'n go mod par tsiyal go laxto' xa', par nachi xa' go lo gustis, porke lë' gustis le' mandad yo go lizhyi'b;

⁵⁹porke sigur ka, naro't go lizhyi'b haxta ke kix go rë kwa'n nzë'b go.