Read Coatecas Altas Zapotec San Lucas 17 Bible Online

San Lucas 17 - Coatecas Altas Zapotec bible

San Lucas 17

¹No nu nzhab Jesús lo rë men che'n Me: ―Nagakt ka'n men lo kwa'n nile' nzë'b xki men lo Dios, per dox nazhe'b nzha men xa' le', nzë'b xki xtu men lo Dios.

²Mejor wei' Dios xa' re' tuli, ke par le' xa', nzë'b xki xtu men lo Dios, tu xa' laore ngwayila Dios.

³Kuze', biwi' go, chi tu wech go le' tu kwa'n gat lë' lo go, guzh go lo xa' nale'tra' xa'i; no chi mbin xa'i, orze' biya'l laxto' go kwa'n mile' xa' lo go.

⁴No ter gazh wëlt le' xa' kwa'n gat lë' lo go tu ngubizh, per dub gazh wëlt yubre xa' lo go ne xa': “Nale'tra'ne”, orze' biya'l laxto' go kwa'n mile' xa' lo go. Kwan nzhak or ñila men Dios

⁵Orze' nzhab rë apost lo Señor: ―Maestr, goknu go no par más yila no Dios, par le' no rë kwa'n nazhon nela xmod nile' go ga'.

⁶Per nzhab Jesús: ―Ter we'tsa ñila go Dios, nela xmod win lazh tu mostás ga', orze' gak gab go lo tu ya ro ba': “Yubchi ba', bizë le'n nitsdo'”, no lë'i gon kwa'n gab go. Kwan ñal le' tu mos

⁷’Gab be, kinu tu rë go tu mos xa' nzha'n dan, o nikina xa' ma che'n go; no or yë'd mos di dan, nagabt go lo xa': “Guded, guzob gawal”,

⁸sino ke lë' go gab: “Bikë' kwa'n lol, par bichao' kwa'n ga̱u̱, orze' kol kwa'n ga̱u̱ no kwa'n go'n; no lu nalta' gawal no gol.”

⁹No ni xkix naza't go lo mos, por rë mandad kwa'n mile' mos re'.

¹⁰Se'ska go, or lox le' go rë kwa'n mile' Dios mandad go, orze' ñal gab go: “No nak mos xa' niyent kwan zu', porke nab tsa kwa'n ñal le' no, mile' no.” Miliwen Jesús za chi' miyi' xa' nizak lepra

¹¹Or nzha Jesús yezh Jerusalén, nded Me sao' rë yezh kwa'n ña'n lazh men Samaria, mbaino sao' rë yezh kwa'n nzhin lazh men Galilea.

¹²No or nzhazhin Me ro' tu yezh, ngwachë'l lo Me chi' miyi' xa' nizak tu yalyizh kwa'n lë lepra, per haxta zit nzo bixa' lo Jesús,

¹³orze' nguruzhië rë xa' re', nzhab bixa': ―¡Jesús, Maestr, bilats laxto' go no!

¹⁴No or une Jesús bixa', nzhab Jesús: ―Wa go lo rë ngulëi', par rël xa' go. Mbaino di nzha bixa' nez, lë' bixa' ngokwen la lo yalyizh che'n bixa'.

¹⁵Or une tu rë xa' re', lë' xa' miak la; orze' nguiubre xa' lo Jesús, kidi'zh xa' naye, dox nazhon Dios,

¹⁶mbaino ngo't kuslo xa' xan ni' Jesús par miza' xa' xkix lo Me; no xa' re' nzë yezh Samaria.

¹⁷Orze' nzhab Jesús: ―Per, ¿chi gat lë't za chi' go mimbe lo yalyizh che'n go? ¿Ma ska zi yë' bixa'?

¹⁸¿Chi nab tsa miyi' xa' nzë zit re', nguiubre par miza' xkix lo Dios?

¹⁹Orze' nzhab Jesús lo xa' re': ―Watsoli no bizë; lë'l mimbe la por ngwayilal da. Xmod lu' rë zhë or le' Dios mandad

²⁰Orze' minabdi'zh rë men fariseo lo Jesús, xmod lu' rë zhë, or le' Dios mandad lo yizhyuo; orze' nzhab Jesús: ―Or zhin rë zhë le' Dios mandad, gat lë't kwa'n lu' zhine lo rë men,

²¹no ni yent cho gab: “Lë'i re'”, o “Lë'i ba'”, porke lë' Dios kile' la mandad xid rë men nzho nal re'.

²²Orze' nzhab Jesús lo rë men che'n Me: ―Lë' zhë zhin, lë' go gakla ne, ter tutsa ngubizh che'n rë zhë or yala, per nayot ne goi.

²³’No lë' rë men di'zh: “Lë'i re'”, o “Lë'i ba'”, per nayat go, no ni nayakë go tich bixa',

²⁴porke lë' zhë yala lu', nela or nikë tu do'zi' ga', niziniy tu lad no xtu lad lo yibë'.

²⁵Per galo ñal, zakzi dox da, no rë men nal re' le' naya' lon.

²⁶No nela xmod ngok rë zhë che'n Noé, se'ga' gak zhë or yala, na Xga'n Dios no nak da tu men yizhyuo.

²⁷’Le'n rë zhë che'n Noé, ndao men ngu' men, mikwa'n bixa' una', ngok jwandang che'n bixa'; haxta or mizhin zhë nguio Noé le'n yo'ya, une mile' bixa' rë kuba', orze' ngula yiu nazhe'b milo'xe rë bixa'.

²⁸No se'ga' ngok le'n rë zhë kwa'n miban Lot; ndao men ngu' men, nguzi' bixa' mito bixa', ngo'n bixa', no michao' bixa' yo'.

²⁹Per or nguro' Lot yezh Sodoma, ngula bël no kubde ki lo yibë', par milox rë nak men ze'.

³⁰Se'ska gak zhë or ruxoba lo rë men, na Xga'n Dios no nak da tu men yizhyuo.

³¹’Zhë ze', tu xa' nzo yek yo' naza't la xa' par ko' xa' che'n xa' le'n yo'; o tu xa' nzo dan, naza't yëk xa' lizh xa'.

³²Bitsila go kwa'n nguzak una' che'n Lot.

³³Xa' gat nzhaklat gak xa' men da, par le' xa' kwa'n nzhakla xa', orze' mila' xa' kwa'n ban xa' par dubta' lo Dios; per xa' la' kwa'n nzhakla xa' le' xa' por nak xa' men da, orze' lë' xa' ban par dubta' lo Dios.

³⁴’Nin lo go, yë'l ze' or yala, nax chop xa' lo tutsa lo'n, lë' tu xa' bi, no lë' xtu xa' ya'n.

³⁵O chop una' kiyo tutsa; lë' tu una' wë̱i̱, lë' xtu una' ya'n.

³⁶No zhë ze', chop miyi' nzo dan; tu miyi' bi, lë' xtu miyi' ya'n.

³⁷Orze' minabdi'zh bixa' lo Jesús, nzhab bixa': ―Señor, ¿plo gak rë kure'? Orze' nzhab Jesús: ―Rë go nane, plo nidal ngulbech, ze' naxbi ma ngut. Sa' gak or yala: Rë men ne or zhin rë kure'.