Read Coatecas Altas Zapotec Hechos 2 Bible Online

Hechos 2 - Coatecas Altas Zapotec bible

Hechos 2

¹Or mizhin ngol lani Pask, tutsa junt nzhin rë men che'n Jesukrist le'n tu yo',

²no di repent, ngurezh tu rruid naye kwa'n nzë lo yibë', nela tu mbi naye dox ga', nguioi dub le'n yo' plo nzhin bixa'.

³Orze' al ya yek kad bixa', nguluxo'b tuga' bël kwa'n nak nela luzh men ga'.

⁴Orze' nguio Sprit che'n Dios laxto' rë bixa', no nguzublo kidi'zh bixa' rë lo widi'zh, nela xmod nzhakla Sprit che'n Dios, di'zh bixa'.

⁵No le'n rë ngubizh ze', yezh Jerusalén nzhin nayax men Israel, rë xa' kwa'n nzhon widi'zh che'n Muisés; rë plo nguro' bixa' par nzë bixa' lani Pask yezh Jerusalén.

⁶Or mbin men rruid ro re', migan rë nak bixa' ze'; no xe kiwi' bixa', mbaino net bixa' chon, porke kad bixa' kiyon kidi'zh rë men che'n Jesukrist widi'zh kwa'n ngolnu bixa'.

⁷No por net bixa' kwan le' bixa' por kwa'n kiyak re', orze' kidi'zh bixa': ―Per rë men re' nzë lazh men Galilea.

⁸Mbaino, ¿chon ska kiyon be kidi'zh bixa' widi'zh kwa'n ngolnu kad be?,

⁹porke re' nzhin rë men nzë lazh men Partia, no xa' nzë lazh men Media, no xa' nzë lazh men Elam, mbaino xa' nzë lazh men Mesopotamia, no xa' nzë lazh men Judea, mbaino xa' nzë lazh men Capadocia, no xa' nzë lazh men Ponto, no rë men xa' nzë lazh men Asia;

¹⁰no xa' nzë lazh men Frigia, no xa' nzë lazh men Panfilia, mbaino xa' nzë lazh men Egipto, no xa' nzë lazh men Libia kwa'n nzhin gax lazh men Cirene, kwa'n ña'n lo yuo che'n men Africa; no rë men yezh Roma, rë xa' kwa'n nzho re'. No nzho bixa' kwa'n gat lë't men Israel per nzhon bixa' widi'zh che'n Muisés, kun rë xa' dizde ngol, nak men Israel.

¹¹No nzho xa' nzë lazh men Creta, mbaino xa' nzë lo yuo Arabia; mbin no kidi'zh bixa' yalnazhon che'n Dios kun widi'zh kwa'n nidi'zh kad no.

¹²No rë bixa' net bixa' kwan le' bixa' xigab, orze' kinabdi'zh tuga' bixa' lo wech bixa', nzhab bixa': ―¿Kwan kure' nal?

¹³Per nzho men kixizhnu rë men che'n Jesukrist, nzhab bixa': ―Ka nizuzh rë xa' ba'. Midi'zh Per lo rë men

¹⁴Orze' ngwatso Per kun za chi' bitub men che'n Jesukrist, par midi'zh Per naye, nzhab Per: ―Biwi' go men Judea, no rë xa' nzho yezh Jerusalén; bin go widi'zh kwa'n ganin lo go nal re'.

¹⁵Gat nizuzht rë xa' re', nela xmod nile' go xigab ga', porke garzi'l nal, laore las nueve,

¹⁶sino ke rë kwa'n kiyak re', lë'i midi'zh la profet Joel, or midi'zh xa' se' por Dios:

¹⁷Rë zhë lult, se' gak, nzhab Dios,lë'da xë'l Sprit da, par yo laxto' rë lo men,no xga'n xa' kun xcha'p xa', lë'da le di'zh bixa', rë kwa'n nagat gak.Mbaino len, rë xa' xi kwa'n nzho xid bixa', lë' bixa' ne rë kwa'n,no rë men ngol, lë' bixa' cha' laxto'.

¹⁸No xëla Sprit da yo laxto' rë men da;miyi'y no una'i,no di'zh bixa' por na.

¹⁹Al ya lo yibë' ne go, gak rë kwa'n ya'n xe men tuli,no lo yizhyuo ne go rë señ, no ren, no bël, mbaino zhen.

²⁰No gak nakao lo ngubizh; no lo mbëo' lë'i lu' nela ren ga'.Naki'n rë kure' gak antis di ke zhin zhë che'n Señor,or lu' Me biani che'n Me kwa'n maska ña'zbël,no gab Me xmod gak kun kad men,zhë kwa'n ne men, lalta' rë kwa'n nagat ne men.

²¹No rë xa' nibezh lë Dios or nina'b bixa' lo Dios,lë' Dios kubchi rë kwa'n nzë'b xki bixa'.

²²No nu nzhab Per: ―Rë go, men Israel; bin go widi'zh kwa'n nin re'. Lë' Dios milu' la lo go, cho nak Jesús kwa'n nzë Nazaret, por rë zhi'n nazhon kwa'n mile' Jesús, zhi'n kwa'n mile' mia'n go xe; no por rë señ nazhon kwa'n mile' Jesús lo go. Lë' Dios miza' poder ka' Jesús, mbaino mis go une la rë kure'.

²³Per lë' miyi' re', por rë xigab che'n Dios, no por rë kwa'n nzhakla Dios gak, nguzen go miyi', no mikë' go xa' lo krus, mbit rë men mal xa'.

²⁴Per mile' Dios nguruban xa', ngulo' Dios xa' ya' la mwert, porke nangakt ngakwë'z la mwert xa' re' par dubta',

²⁵porke Dabi midi'zh la kwent che'n Jesús, or nzhab Dabi:Zilita' unen nzol dilant lon, Señor,porke Lu nzo lad direch da, par niyent kwan zheb da.

²⁶Kuze', nizak laxto'n, mbaino ro'n nikë' kant dub nizak laxto'n,porke lu le', ruban da or gat da.

²⁷No nala'tal ya'n da le'n ba',no ni nala'l yëb kwerp da,por nak da tu xpenal kwa'n más nzhon ro'l.

²⁸Milu'l xmod ban da par dubta', no nile'l, nizak laxto'n, or nzol kuda.

²⁹No nzhab Per: ―Lë' go wech, walika kwa'n nin; nzhala ngut rey Dabi, mbaino miga'ch xa', no ba' che'n xa' nane be plo nax, haxta zhë nalzhë.

³⁰Dabi ngok profet, midi'zh xa' por Dios, mbaino nane Dabi, lë' Dios mila' di'zh lo xa', lë' Dios le' rey lo mis tu rë xa' nzë ben che'n xa' kwa'n ngurulë Krist, par zob xlugar xa'.

³¹Milu' Dios rë kure' lo rey Dabi, kuze' nzhab xa', lë' Krist ruban, no ni nala' Dios ya'n alm che'n Krist le'n ba', no ni nala' Dios, yëb kwerp che'n Krist.

³²Kuze' mile' Dios, nguruban Jesukrist; no nak no men che'n Me kwa'n une ngut Me, no une no nguruban Me.

³³Ngurezh Dios Jesukrist, ña Me lo yibë'. No ba' nzob Jesukrist lad direch che'n Dios, plo nile' Me mandad. No miza' Dios Sprit che'n Dios nka' Jesukrist par rë men che'n Me, porke se' mila' Dios di'zh par Jesukrist. No nal, Jesukrist mixë'l Sprit che'n Dios par nguio laxto' no, lë'i rë kwa'n une go, no rë kwa'n mbin go nal re'.

³⁴No Dabi, nangakilit lo yibë', per lë' Dabi nzhab por Dios:Nzhab Dios lo Señor da:“Guzob lad direch da,

³⁵haxta zhin zhë len, che'ptsa (bi'ch laka) gak rë men dilant lol,rë xa' kwa'n nidilal kun lë'.”

³⁶Orze' nzhab Per: ―Bin goi, men Israel, lë' go rë xa' kwa'n mikë' Jesukrist lo krus. Lë' Dios mizo Jesukrist lo be, par gak Me Señor che'n be, mbaino Krist; Me kwa'n mixë'l Dios.

³⁷Or mbin bixa' kure', orze' dox mizi bixa' nzë'b xki bixa' lo Dios, orze' nzhab bixa' lo Per, no lo zipla apost: ―¡Lë'o wech!, ¿kwan naki'n le' no nal?

³⁸Orze' nzhab Per: ―Bila' go rë kwa'n nakap nile' go lo Dios, no nu goklëi' go le'n nits nela xmod mile' ka Jesukrist mandad, no che' Dios rë kwa'n nzë'b xki go, no ne' Dios Sprit che'n Dios yo laxto' go,

³⁹porke par go mila' Dios di'zh kure', no par rë xmë'd go, mbaino par xtu ben rë men zit, haxta par rë xa' kwezh Dios par gak men che'n Dios.

⁴⁰No se' midi'zh Per, no kun más rë widi'zh, par miza' Per kunsej, nzhab Per: ―Guro' go xid rë men nakap kwa'n nzho nalre', par nagal go yalzi kwa'n zak bixa'.

⁴¹No rë xa' ngwayila widi'zh che'n Dios kwa'n midi'zh Per, ngoklëi' bixa'. Zhë ze', migan pas chon mil men, par nguio bixa' xid más rë men che'n Jesukrist.

⁴²No dubta', nikizë rë xa' re', nela xmod mitse'd rë apost bixa', no nguzhin bixa' wen, no nu nzhao bixa' lizh kad wech bixa', mbaino junt nina'b bixa' lo Dios. Xmod miban rë xa' galo laka kwa'n ngok men che'n Jesukrist

⁴³No por rë señ nazhon kwa'n nile' Dios por rë apost, rë men nizheb lo Dios, no wen nidi'zh bixa' por Dios.

⁴⁴No rë xa' kwa'n ngwayila widi'zh che'n Dios por Jesukrist, tutsa nzhin bixa', no tutsa kinu bixa' rë kwa'n.

⁴⁵No mito bixa' rë kwa'n nak che'n bixa', par ndi'z bixa' dimi, ka' rë xa' kwa'n naki'ne, rë xa' kwa'n nzho xid bixa'.

⁴⁶No zilita' nigan bixa' le'n yado', no tutsa xigab nile' bixa'. No nigan bixa' lizh kad wech bixa' par nzhao bixa' junt, mbaino nizak laxto' bixa', nile' bixa'i.

⁴⁷No nidi'zh bixa' dox nazhon Dios, no wen nidi'zh rë men tich bixa', por Jesukrist. No kad zhë nile' Señor ñar men yado', rë xa' kwa'n kibezh Dios par chë' Dios xmod naban bixa', mbaino za' Dios kwa'n nazhon ka' bixa'.