Read Coatecas Altas Zapotec Apocalipsis 12 Bible Online

Apocalipsis 12 - Coatecas Altas Zapotec bible

Apocalipsis 12

¹Orze' nguruxo'b tu señ ro lo yibë': Unen tu una' nak tu vestid nela ngubizh ga', mbaino xan ni' una' nak nela mbëo' ga', ñë'd yek xa' nzob tu koron kwa'n nakxao' kun tu dusen mbël lo yibë'.

²Nak xin una' re', no nibizhyë una' lo yalne par gal xin una', dox kizakzi yalne re' una'.

³Orze' nguruxo'b xtu señ lo yibë': nguro' tu ma ro lë dragón mbaino naxne ma, kinu ma gazh yek ma, chi' xkach ma, no kad yek ma nzob tu koron.

⁴No kun xkol ma migab ma lo yizhyuo, tu part mbël kwa'n nzhi'b lo yibë', mia'n xchoptsa part mbël lo yibë'. No nguzo ma lo una' gal xin re', par gao ma xmë'd una' dike or gal më'd.

⁵Orze' ngol xin una' tu më'd miyi', no dox gak më'd tu men nzhak par le' mandad lo rë men yizhyuo, no nalast laxto' xa' lo'x xa' rë men nikwa'n dil kun lë' xa'; per lwega' nguiubchi xga'n una' yizhyuo, ña xga'n una' lo yibë', plo nile' Dios mandad,

⁶orze' mikë' una' karre le'n yuo bizh, tu plo mizuxkwa' Dios kwëz una', plo nzho xa' miza' kwa'n ndao una', dub tu mil nzho chop gayo' nzho chon gal ngubizh.

⁷Orze' nguio tu yër lo yibë'; tu rë ganj che'n Dios xa' lë Miguel, no kun rë ganj che'n ganj re', ndil bixa' kun ma lë dragón re'. Lë' ma lë dragón kun rë ganj che'n ma, ngokla ma ngale' ma gan lo Miguel kun rë ganj che'n,

⁸per nangale't ma gan, no nangayotra' plo yo ma lo yibë' kun rë ganj che'n ma.

⁹Sa' ngurotin ma lë dragón, ma kwa'n nak mbë'l tiemp, xa' lë Mizhab no Satanás; no nikide ma rë men yizhyuo, lë' ma no rë ganj che'n ma nguiubi ma yizhyuo.

¹⁰Orze' mbina tu widi'zh lo yibë' kwa'n nzhab:Lë' or mizhin la,par ko' Dios rë men che'n Me lo rë kwa'n nazhe'b kwa'n kizak bixa',mbaino par lu' Me, tugaka Me nile' mandad,no nu par le' Me nak Krist Me nile' mandad dub yizhyuo,porke ngurutin la xa' nikë' kixu' rë wech be lo Dios, zhëy-yë'le.

¹¹Por ren che'n Mbëkxi'l che'n Dios,mile' rë wech be gan lo Mizhab,mbaino por se'gaka ñila bixa' widi'zh che'n Dios.Nangazhebt bixa' ter ngat bixa' por ñila bixa' widi'zh re',

¹²kuze', ¡bizak laxto' go!, rë go xa' nzho lo yibë'.Per, ¡zhe'b nalats nzha rë go,xa' nzhin lo yizhyuo no nu lo nitsdo'!,porke lë' Mizhab ngula yizhyuo dub xian xa',porke nane xa', ka xche'p zakzi xa' go.

¹³Or une ma re', lë' rë ganj che'n Dios ngulubi ma lo yizhyuo, orze' nguro'kë ma tich una' ngop më'd miyi' ze',

¹⁴orze' miza' Dios chop xi'l ro una' ze', nela xi'l mitsi ga', par gak pep una', no zhin una' le'n yuo bizh, plo ya'n zit lo ma xu' nazhe'b kwa'n nak nela tu mbë'l ga', no plo nzho xa' za' kwa'n gao una' dub chon li'n garol,

¹⁵orze' nayax nits ngulo' mbë'l ro' ma, nela tu you' ga' mixo mai tich una', par wei'ye una',

¹⁶per ngoknu yuo una', porke ngu' yuo rë nits kwa'n nguro' ro' ma re' nela tu you' ga' tich una',

¹⁷orze' dox miyi'xian ma re' kun lë' una', no ngwatil ma kun rë xa' mia'n, xa' nzë ben che'n una' re', rë xa' nzhon ro' Dios no nilu' bixa' widi'zh che'n Jesukrist lo más rë men.