Read Coatecas Altas Zapotec Apocalipsis 18 Bible Online

Apocalipsis 18 - Coatecas Altas Zapotec bible

Apocalipsis 18

¹Or milox unen una' nzob tich ma ro naxne ze', unen xtu ganj ngula dizde lo yibë', haxta dub yizhyuo ngwani por biani che'n ganj re', no dox nile' ganj re' mandad.

²Naye nguruzhië ganj re', nzhab ganj:¡Milox la yezh ro Babilonia, lë'i milox la!Mizhin ngoke lizh rë lo mbi kwa'n nile' gat nambet men.Mbaino lizh rë lo mbi mal;no le'ne, dox miar yo che'n rë lo miyin gat nambet,no che'n rë lo miyin kwa'n nayi' gao men.

³Minu rë men xa' nzë kwansa plo,por mitse'd bixa' kwa'n nak una' re',mbaino por kwa'n mike'd una' re' rë men,rë rey ngwachibyek lo kwa'n gat lë',no rë xa' nile' xbi'.Ngok rrik bixa' por nguzi' una' le'n kai (kwa' gal) re' rë kwa'n ngokla una',par mile' una' dike kwa'n ngokla kwerp che'n una'.

⁴Orze' mbina xtu widi'zh kwa'n nzë lo yibë':Guro' go yezh ba', rë go xa' nak men da,par nazë'bxki go por rë kwa'n nak rë xa' nzho ba',no par nagal go, rë yalzi nazhe'b kwa'n zak bixa'.

⁵Rë kwa'n gat lë' kile' bixa' dox nzhayare,nila' zhine haxta lo yibë',kuze', naya'lt laxto' Dios rë kwa'n nak bixa'.

⁶Bile' go kun lë' una' nela xmod mile' una' kun rë men che'n Dios.Bile' go haxta chop wëlt kix una' rë kwa'n gat lë' mile' una'.Biza' go kwa'n go una',chop tant más nayi' lo kwa'n miza' una', go xtu men.

⁷Nela xmod mile' una' le'n kai (kwa' gal) ba' haxta plo ngokla kwerp che'n xa',mile' xa' kwa'n yizhyuo re'.Se'ska bizakzi go xa' haxta plo nagakra'i.No por mis lë' xa', midi'zh dox tsak xa',no mizi xa' marian.Mile' xa' xigab, le'n laxto' xa':“Na, nzo'b nela tu rey ga',nayot gak da tu una' ngut xmiyi',mbaino nayot zakzi da.”

⁸Kuze', tutsa ngubizh zhin rë yalzi lo una':zhin yalgut,no yalnawin,mbaino yalnila'n.No haxta lo ki lo'x Dios una',porke tugaka Dios nazhon,Dios Me kobe' (wi') xmod gak kun lë' una'.

⁹No rë rey yizhyuo mia'n bixa' gat lë' lo Dios por una' re', lë' bixa' go'n, mbaino win laxto' bixa' or ne bixa', zhen kwa'n zë'k Dios una'.

¹⁰Zit ya'n nzo bixa' por zhe'b, por yalne kwa'n kine una', orze' naye gab bixa':¡Tatu nalats kizakal!, lu nak yezh ro Babilonia,yezh kwa'n más tsak;porke nayen laka, ¡di!, mizhin yalzi lol.

¹¹No rë xa' nile' xbi' yizhyuo re', lë' bixa' go'n, mbaino win laxto' bixa' por lë'i, porke yentra' plo to bixa':

¹²kwa'n or, kwa'n plat, kun rë ke dox chul, kun rë perla, no rë lar kwa'n lë lino fino, no kun rë lar sed, no rë kwa'n kulor morad naxne, no nu rë ya nix nixla, kun rë kwa'n nzhakxao' kun marfil, mbaino rë yi'b kwa'n brons, kun más rë yi'b, no kun mármol;

¹³no nu kanel kun más rë lo kwa'n nile' nix nidao' kwa'n nzhao men; no ya'l mbaino mirra, no kun más rë nits nax kwa'n nix nixla; no kun vin, kun aseit, no harin wen kun triu; no nu rë ma kwa'n nzhuwei' kwa'n, kun rë mbëkxi'l no rë kabai kun dub karret ma; no nu haxta rë men mido nela tu ma ga'.

¹⁴Orze' gab rë men lo yezh re':¡Nayotra' gapal rë xlë kwa'n dox ño laxto'l,rë kwa'n nix nzhaowal,haxta micha'l.Mbaino rë kwa'n kinul, maska ña'zbël;no ni nayora' gaple xtu wëlt!

¹⁵No rë xa' mito rë kure', por yezh re' ngok rrik bixa'; per haxta zit ya'n nzo bixa' di zhe'b por yalzi kwa'n zak yezh re', no por lë'i go'n bixa' di yalnawin,

¹⁶orze' se' gab bixa':¡Ay, ay; dox nalats kizak yezh ro ba'!Lë'i nak nela tu una' nabe ga',xa' nak lar tsak dox, lar lino kulor morad naxne,mbaino dub xa' naya' or no kun rë ke dox tsak,mbaino kun rë perla.

¹⁷¡Mbaino tu rratsa milox rë yalrrik kwa'n kinu una'! Rë xa' nile' mandad rë bark, kun rë xa' nitsë' bark, no más rë xa' nikë zhi'n le'n nitsdo', mbaino kun rë xa' nzho le'n bark; haxta zit ya'n nzo bixa';

¹⁸or ne bixa' zhen kwa'n zobyol yezh ze', orze' se' kuzhië bixa', gab bixa': “Yentra' cho xtu yezh ñët nela kure'.”

¹⁹No chob bixa' yuo yek bixa', no go'n bixa' por yalnawin, no se' kuzhië bixa':¡Ay, ay! ¡Dox nalats mia'n yezh ro ba'!,porke por yezh ro ba', ngok rrik rë xa' kinu bark le'n nitsdo',mbaino, ¡tu rratsa miloxe!

²⁰Per yibë', bizak laxto' go por kwa'n nguzak yezh ba';no rë go xa' nzho lo yibë', bizak laxto' go.No nu rë go xa' nak men che'n Dios,no rë go xa' nak apost che'n Dios,mbaino rë go xa' midi'zh por Dios galo laka,porke yalgustis kwa'n mile' Dios yezh ba';por go mile' Diose, por mile'i nguzakzi go.

²¹Orze' tu ganj xa' más nile' mandad, ngulits tu ke kwa'n nak nela tu ke ro kwa'n nikë men zhi'n par ño triu, no ngulubi ganje le'n nitsdo'. Mbaino nzhab ganj:Sa' yubil, yezh ro Babilonia par al yët,mbaino nayotra' ne menal.

²²No le'n rë kai che'nal, Babilonia,nayotra' gon men go'l harp,o kë' men kant,o kwe'zh men bizhi, o trompet.Nayotra' xa' nzhak nikë wanei cho zhi'n,no ni nayora' men gon rruid le'n rë kai che'nal kwa'n nikë men zhi'n lol kun ke ro par ño triu.

²³No nayotra' ne men ni xtu ki lol,mbaino ni nayora' gon men, chi xa' nzhak jwandang che'n, kun una' xa' gak tsa' xa',porke rë men che'nal xa' mile' xbi' lol,ngok rë xa' más tsak dub lo yizhyuo.No kun yalbruj che'nal, mikidel rë men,xa' nzë kwantsa rë lazh men,

²⁴porke le'n rë kai che'nal, michizhël di ren che'n rë xa' midi'zh por Dios,no ren che'n más rë xa' nak men che'n Dios,no haxta ren che'n más rë men yizhyuo xa' mile' men ngut.