Read Coatzospan San Marcos 2 Bible Online

San Marcos 2 - Coatzospan bible

San Marcos 2

¹Dā kútɨtɨ́n ntuvi ne, nāxee Jésuu ñuu é nani Capērnau. Ura tsí i kútuni ñáꞌa san é tuví ña uun viꞌi.

²Ñá tē nté kaa ñaꞌa nátaká nuu ña; ntē ña ni xee táꞌan viꞌi san é kuntōo ña má viꞌi kān é kīni ña é kākaꞌan ña.

³Kidáā ne, xée kɨ̄mi ñaꞌa, odo ña uun ñaꞌa, ña xiꞌi kúñu ī.

⁴Ñá nī kúvi kuīta ntíꞌxin ña má viꞌī mí tuví Jesuu, tsí ña te nté kaa ñaꞌa ntáñɨ̄ ña. Dukuān ne, kúxēe ña dɨkɨ viꞌi kan né, nākaán ña un siin dɨkɨ̄ viꞌí san mí tuví Jesuu. Mí kantīí ne, nákīí ña chidō é nuu ña xiꞌi kúñu ī san iní viꞌi kān.

⁵Dā íni Jesuu tsí ña odō ña xiꞌi kúñu ī sán ne, nɨɨ̄ kuéꞌen ini ña ntákuintiꞌxe ña ne, kakaꞌan ñá nī ña nchokuví san: —É ntōo kuétsi o vē, daꞌ —kaꞌan ña.

⁶Īó mastrú lei Xúva kō é ntoo ña ne, ntádē kuení ña:

⁷“¿Nté kui kuān ó kakaꞌan ntú ña sāꞌa? ¿Ña kaíko ñuꞌu ntu ña Xuva kō? Tsí xoxó ñaꞌa ñuxiví sa é kūvi nakate ña kuétsi kō. Da mii tsi Xuva kō é kūvi vií ña”, dé kuení ña.

⁸Kūtuni Jésuu nté ō ntádē kuení ña ne, kakaꞌan ñá ni ñā: —¿Nté kui kuān ó ntádē kuení nto?

⁹¿Neé ntu e dií ka ña víꞌxin kaa é kāꞌán u ni ña sāꞌá, te kuinī nto? ¿Ō kaꞌán ntu u: “É ntōo kuétsi o”, ō kaꞌán ntu u: “Nakuntítsin, kuniꞌin chido ō, kunúꞌūn nú viꞌi o kān”, koo kaꞌán u?

¹⁰Ntio ko é na kūtuni nto tsí xuꞌu é vēxkúvi ú ñatīí ne, kuvi nakate u kuétsi ntō ñuxiví sa —kaꞌan Jésuu ni mastrú leí san. Kidáā ne, kakaꞌan ñá nī ña xiꞌi kúñu ī san:

¹¹—Dɨvīn é kākaꞌán u ni ō ne, nakuntítsin, kuniꞌin chido ō, kunúꞌūn nú viꞌi o kān —kaꞌan Jésuu ni ña.

¹²Ura tsí i nakuntítsi ña, nákiꞌi ña chido ñā ne, kúnūꞌú ña nú viꞌi ña kān. Koó dā kúduꞌva ñaꞌa san ne, nánūꞌu ñá iní ña Xuva kō, ntákaꞌan ña: —Váta ūun ito kini o é kuān ó kakuvi, é kāntuváꞌa ñaꞌa san —kaꞌan ña. Kāna Jesuu Lévii (Mt. 9:9‑13; Lc. 5:27‑32)

¹³Kidáā ne, kuéꞌen xtūku Jesuu diñɨ míni Galilea. Dōo xee ñáꞌa san mí tuví ña ne, nakuáꞌa ña ñaꞌa san.

¹⁴Kuéꞌēn ká Jesuu ítsi kān né, ikān nániꞌi ña uun ñaꞌa, ñá nani Lēvii, iꞌxá Alfeu. Tuví Levii nú viꞌī mí kaido ña diuꞌun xôo iña ñuú Roma. Kakaꞌan Jésuu ni ña: —Kuntīkɨ́n ko —kaꞌan ña. Nákuntītsí Levií ne, kuéꞌen ña ni Jēsuu.

¹⁵Uun ntuvi ne, tuví Jesuu nú viꞌi Lēvii, ntaéꞌxi ña. Ñá te da dīi ña ntaído diuꞌun xôó san ntoo ña nú mesa, ni ñá iō kuetsí i. Ikān tuví Jesuu ni ña ntɨníꞌi ñā. Tsí ña te da díi ñaꞌa san ntántīkɨn ñá Jesuu.

¹⁶Ntá tsi mastrú lei ni ñá fariseú san ne, īní ña tsí ntaéꞌxí dadɨɨ Jesuu ni ñá kini ntáa san, nī ña ntaído diuꞌún san ne, ntákaꞌan ñá ni ña ntɨniꞌi Jēsuu: —¿Nté kui ntaéꞌxí dadɨɨ ntu mastru ntó nī ña kini ntáa san, nī ña ntaído diuꞌún san? —kaꞌan ñá, tsixeꞌe ñā.

¹⁷Tēkú Jesuu é ntákaꞌan ñá ne, kakaꞌan ñá ni ñā: —Ñaꞌa é vāꞌá o ni ī ne, ñá vādá ntio ña medíkū; tsí ña nchokuví tsi san é ntio ña medíkū. Xuꞌu é vēxkúvi ú ñatīí ne, ñá tē ña é vāꞌá san kanantukū u, tsí ñá iō kuetsí i san —kaꞌan Jésuu. Kakaꞌan Jésuu iña é kuān xkoó ini ña é kuntoo ixu ñā (Mt. 9:14‑17; Lc. 5:33‑39)

¹⁸Ña ntɨniꞌī Juaan ni ñá ntɨniꞌī ña fariseú san ne, dukuān xkoó ini ña é kuntoo ixu ñā. Xée ñāꞌa san, ntátsixeꞌe ña Jēsuu: —¿Nté kui ña kuan xkoó ini ntú ña ntɨniꞌi ntō é kuntoo ixu ña vatā ó de ña ntɨniꞌī Juaan ni ñá ntɨniꞌī ña fariseú san? —kaꞌan ñá, tsixeꞌe ñā.

¹⁹Jesuú ne, kakaꞌan ña: —¿Vá kuvi ntu kuntoo ixu ñāꞌa, ña ntóo viko mí katántaꞌa ñaꞌa, te tuví dukuan ñatīí, ña tántaꞌa san? Ñáꞌā, tsí kaꞌxí ntɨꞌɨ ña.

²⁰Ntá tsi tē xee úra i é ntaka ña tántaꞌa sán ne, kidáā né, īó ntuvi é kuntoo ixu ñā.

²¹ʼÑá tē doo xée san naxntēé nuu o doo tsude, tsí doo xée sán ne, kanatɨxɨ tē ntóo. Kidáā ne, ntátsin ntɨꞌɨ ne, dií dií ka kini koo kuvi.

²²Tē xnuu váꞌa o ntute tɨntiꞌo xee iní ñɨɨ̄ sán ne, ñá te ñɨɨ ata kūꞌun, tsí ntata té kukāve. Uun ito tsi kunaá ntute tɨntiꞌo san ni ñɨɨ ī sán dɨ. Tsí ntute tɨntiꞌo xeé san ne, kantio é kūꞌun iní ñɨɨ xēe —kaꞌan Jésuu, kánañēꞌe ñá ña. Ntákatsin ña ntɨniꞌi Jēsuu xóko trigu ntúvi dá iō dáꞌna (Mt. 12:1‑8; Lc. 6:1‑5)

²³Ntuvi dá iō dáꞌna ne, kuéꞌen Jēsuu ni ña ntɨníꞌi ñā, ítā ntiꞌxin ña mí kaa trigú san. Ña ntɨniꞌi Jēsuú ne, kātsin ña xoko trigu é kāꞌxí ña.

²⁴Īní ña fariseú san é kuān ó de ña ne, ntákaꞌan ña: —¿Nté kui ntákatsin ntu ña xoko trigú san? Ñá vāꞌá ō é kada tsiñu o ntūvi dá iō dáꞌna, tsi dóo xii kaa é kuān koo vii o —kaꞌan ña.

²⁵Ntá tsi kakaꞌan Jésuu: —¿Ña íni ntú nto nté ō dé uvata ko Dāvii da taan núu ña ni ña ntɨniꞌi ñā da kákɨn ña?

²⁶Tsí kɨꞌví ña iní viꞌi Xuva kō kidáā dá tuví dutu ñá odo nūu, ñá nani Abīata. Davií ne, íkan ña tāñúꞌu kuíko san é kāꞌxi ñá ni ña ntɨniꞌi ña, kuān te dóo xií kaa, tsí da mii tsī dutú san é kūvi kaꞌxí ña tañúꞌū e kúviko san —kaꞌan ña.

²⁷Kakaꞌan Jésuu ni ñá fariseú san: —Tsí Xuva kō ne, ñá te nī de kúꞌvē ñá ñaꞌa vata koo é na kāda kaꞌnu ña ntuvi dá iō dáꞌna, tsí dē kúꞌvē ñá ntuvi dá iō dáꞌna vata koo é na kūntoo daꞌna ñaꞌa san.

²⁸Xuꞌu é vēxkúvi ú ñatīí ne, kuvi kāꞌán u nee iña é vāꞌa é vīi o ntúvi dá iō dáꞌna —kaꞌan Jésuu.