Read Coatzospan San Lucas 1 Bible Online

San Lucas 1 - Coatzospan bible

San Lucas 1

¹Ñá tē nté kaa ñāꞌa ncho kada váꞌa ña tutú nté ō kúvi nuu i é īta ntíꞌxin iña ko.

²Vata tsī o nañéꞌē ñá kō, ña é īni nté ō kúvi, ña ntáduku ntée é kāꞌan ntódō túꞌūn sán un tsi nte dá iñɨ ntuꞌu ne,

³kuan kōo ncho xntée nāꞌá u dɨ, e dóo nántukū u nté ō kúvi ntiꞌxe un tsi nte dá iñɨ ntuꞌu. Vata te vāꞌá ō é kāda váꞌā ú tutú saꞌá iña nto, Teófilu, e dóo kaiko ñuꞌū ú nto, vata koo é ntāa ú ni ntō un ntɨꞌɨ nūu i é vatā o kúvi,

⁴vata koo é kīní vaꞌā ntó nee iña é nuu é ntaā i é nāñéꞌe ñá nto. Uun ánje kākaꞌan ña é kaku Juaan Bautista

⁵Ntuvi dá idé Heródē rei iña ñuú Judeá ne, ítūví uun dutu íña ñá Israee, ñá nani Zacāria, ña é ūve taꞌan dutu tatá viꞌi ñá nani Ābia. Ñadɨꞌɨ̄ ñá ne, Isabee nani ña. Dɨvī ká tatá viꞌi dutu Ároon ña.

⁶Zacariá san ni ñadɨꞌɨ̄ ñá Isabeé ne, ntuvi ña e dóo vaꞌá ña nuu Xuva ko; dōo dé ntaa ñá lei Xúva kō. Ntē ña tuvi neé nuu i é kaꞌan ntée ñaꞌa san ña, nté uun ña.

⁷Ntá tsi ña ni xío iꞌxá ña, tsí Isabeé san ne, ña ni kúvi kōo íꞌxá ña; ntuvi ñá ne, é dōo áta ñā dɨ.

⁸Uun ntuvi ne, dúku ntēé dutu, ñá ntoo niꞌi Zacāria, é kāda tsiñu ña ini ukún Xuva kō.

⁹Vata xkoó ini dutú san ne, váꞌā ntuvi Zacariá san é dūku ntée ña é kɨ̄ꞌví ña ini ukún kaꞌnu Xuva kō é kíkaꞌmí ña kútū.

¹⁰Da nɨɨ̄ kaiꞌxi kútū sán ne, un ntɨɨ́ ntɨ̄ɨ́ ñaꞌa san ntáñɨ̄ ña, ntákaꞌan ntâꞌví ña kíꞌi kān.

¹¹Kidáā ne, xée ūun ánje Xuva kō mí tuví Zacaria. Ntitsi ánjē san diñɨ kuaꞌa nú tēu mí kaiꞌxi kútū.

¹²Dā íni Zacariá san ánjē sán ne, un tsi kúduꞌva iní ña nee é viī ña; ñá tē nté kaa uꞌví ña.

¹³Da kidáa kakāꞌan ánjē san ni ña: —Ō Zácaria, ñá ku uꞌvī o, tsí Xuva kō né, tēkú ña é kākaꞌan ntaꞌvin. Tsí viꞌi a vé ne, koo iꞌxá ña dɨꞌɨ̄ ó Isabeé ne, Juaan kunáni.

¹⁴Ñá te da dīi ñaꞌa san dóo dini ña te káku iꞌxá san. Dɨvīn dɨ, dóo kaꞌnu kuinī ó te káku īꞌxá ñadɨ̄ꞌɨ ó dɨ.

¹⁵Tsí iꞌxá o ne, dōó kaꞌnu ñaꞌa kúvi nuu Xuva ko. Ntē ña koꞌo iꞌxá san vinu, nté ntute kini kaa. Kunuu tsitū Espíritū Sántū nima í nté dīꞌna dá káku.

¹⁶Ña sāꞌá ne, vií ña é ñā te da díi ña ñuú Israee nakuntíkɨ̄n ñá Xuva kō.

¹⁷Diꞌna ña xee ña dá xēe Tóꞌo kō. Dadɨɨ tsi iō ñá é viī ñá vatā o idé profeta Élia, ña é kaꞌán naa Xuva ko kídaā; dadɨɨ tsi nima ñá ni ñā. Vií ña é na nākaꞌan váꞌa iꞌxá san ni ūva i. Vii ña é na ntūváꞌa nima ñá xení i san vata koo é na viī ña é vāꞌa; vií ña é na kōo tûꞌvé ñaꞌa sán tē xee Tóꞌo kō —kaꞌan ánjē san ni ña.

¹⁸Tsixeꞌe Zacāriá san ánjē san: —¿Nté koo kutuní ko te nuu é ntaā i sáꞌā? Tsí xuꞌú ne, dōo átā ú; ñadɨ̄ꞌɨ́ ko dɨ —kaꞌan Zácaria.

¹⁹Kidáā ne, kakaꞌan ánjē san: —Grabiee nání u. Xuꞌu é vēꞌxi u é vāta kaa e táxnuu Xuva kō ko é kāꞌán u ni o tūꞌun e dóo vaꞌa.

²⁰Viꞌi a vé ne, tsí ña ni kuintíꞌxe o é kākaꞌán u nī ó ne, kuñɨꞌɨn vē. Ña kúvī ká kāꞌan un tsi da nte te xee táꞌan ntuvi é kāku iꞌxá o, vatā ó kakaꞌán u nī o —kaꞌan ánjē san ni ña.

²¹Nɨɨ dukuān ntantétu ñaꞌa san Zacariá san nu kíꞌi kān. Kidáa ne, tsixeꞌe taꞌan ña, ntákaꞌan ña: —¿Nté kuān nté kakukuií ntu Zacariá san ini ukún kān? —kaꞌan ña.

²²Dā ntíi Zacariá san ma ukún kān ne, é ña ni kúvī ká kaꞌan ña. Kidáā né, kūtuni ñáꞌa san é īo é īni ña ini ukún kān. Koó da ntāꞌa ña kakuvi é kākaꞌan ña, tsí kúñɨꞌɨ ñā.

²³Dā inú kava tsiñu é kade Zacariá san ne, kúnūꞌú ña nú viꞌi ña kān.

²⁴Rkontûví ne, ñadɨꞌɨ̄ ñá, Isabeé ne, ñúꞌū iꞌxá ña. Uꞌun xóō é ntē ña vádā mí ni ñēꞌe ña é dé kuení ña:

²⁵“Dóo váꞌā o dé Xuva ko nī kó vevii e táꞌxi ña é kōo iꞌxá ko vata koo é ña nantii níꞌnī ká ñaꞌa sán ko”, kaꞌan ña. Kakaꞌan ánjē tsí kaku Jesuu

²⁶Dā kúvi iñu xoó ne, Xuva kō né, taxnūu ña uun ánjē, ñá nani Grābiee é kɨ̄ꞌɨn ña uun ñuu é nani Nazāree, é kāduku ntée ñuú Galilea,

²⁷é kīkoto níꞌni ña uun ñadɨ̄ꞌɨ kuétsi, ñá nani Māria. Dɨvi ñā ne, e tuví ntetu ña é kani víꞌi ña ni uun ñatīi, ñá nani Jōsee, tatá viꞌi rei Davii.

²⁸Kúkɨ̄ꞌvi ánjē san mí tuví ñadɨ̄ꞌɨ́ san ne, kakaꞌan ñá ni ñā: —¡Ntiusi o! Dɨvīn é nakaxnúu Xuva ko ō é naxnuu viko ña o. Dɨvīn ne, dóo nuu méꞌñu Xuva ko ō —kaꞌan ña.

²⁹Koó dā kúduꞌva ña é kākaꞌan ánjē san ni ña. Da dé kuení mii ñā: “¿Nté kui kuān ó kakaꞌan ñá sāꞌá nī ko?”, kaꞌan ña.

³⁰Kidáā ne, kakaꞌan ánjē san ni ña: —Ñá ku uꞌvī ó, Maria, tsí niꞌi o é vāꞌá ntaꞌa Xuva kō.

³¹Viꞌi a vé ne, kuꞌun iꞌxá o. Koo uun iꞌxá o, iꞌxá tii é kunani Jēsuu.

³²Dɨvī né, dōó kaꞌnu ñaꞌa kúvi. Kunani īꞌxá Xuva kō, ña e dóo kaꞌnu kueꞌen. Xéꞌe Xuva kō é kuvi ña rei, vata kaa uvata ika ña, rei Dāvii,

³³é kodo nuū ñá iña tatá viꞌi ñá Israeé san ntii dañu ntūvi, é ntē ña ntɨ́ꞌɨ —kaꞌan ánjē san ni ña.

³⁴Kidáā ne, katsixeꞌe Mariá san ánjē san: —¿Nté ntu koo kuvi sáꞌā? Tsí xuꞌú ne, ñá te tūvi níꞌi ú ñatīi —kaꞌan Máriá san.

³⁵Kidáa kākaꞌan ánjē san ni ña: —Kiꞌxi Espíritū Sántū méꞌñu ō. Xuva kō e dóo kaꞌnu ñaꞌa ña ne, kūnuu méꞌñu kunuu dava ña o. Dāꞌví nuu ña o ntatɨ ñā vata kaa viko san. Dukuān ne, iꞌxa é kaku sán ne, dóo vaꞌa kúvi. Kunani iꞌxá Xuva kō.

³⁶Viꞌi a vé ne, ñaviꞌi o Isabeé ne, koo iꞌxá ña dɨ, kuān te dóo ata ñā. Dɨvi ñā e ntákaꞌan ñaꞌa san é ña kuvi koo iꞌxá ña ne, é kīꞌi iñu xoo é ñuꞌu iꞌxá ña vevii.

³⁷Tsí Xuva kō ne, ña túvī nee iña é ña kuvi vií ña —kaꞌan ánjē san ni ña.

³⁸Kidáā ne, kakaꞌan Mária: —Xuꞌú ne, ña kade tsiñu iña Xuva ko kúvi u. Na vīi Xúva ko nī kó vatā ó kakaꞌan ntó nī ko —kaꞌan ña. Da kidáā ne, kuéꞌēn ánjē san. Dā kueꞌen María kukoto níꞌni ña Isabee

³⁹Ntuvi tsikán ne, kantɨ́ꞌɨ tsi kueꞌen María, kúntāa ña ñuú mí kaduku ntée Judea.

⁴⁰Kidáā ne, xée ñā nú viꞌi Zacāriá ne, kakaꞌan ñá ni Isābeé ntiusi.

⁴¹Dā téku Isabeé san ntiusi ñá ne, kāntá nuu iꞌxá san ini iꞌxí ña kān. Isabeé san ne, nuu tsitu Espíritū Sántū san nima ña.

⁴²Kidáā ne, un nɨɨ kuéꞌen ini ña kakaꞌan ñá: —¡Dɨvīn e dií dií ka naxnuu víko Xuva ko ō é un ntɨɨ́ ntɨ̄ɨ́ ñadɨ̄ꞌɨ́ san! ¡É nāxnuu viko ña iꞌxá o é nuu ini iꞌxí o kān dɨ!

⁴³¿Xoó ntu ñaꞌa kúvi u é vēꞌxí dɨꞌɨ̄ Tóꞌō kó, vexkoto niꞌni ña ko?

⁴⁴Tsí ura tsí i da téku ko ntiusi ó ne, iꞌxá ko ne, kāntá nuu ini iꞌxí ko kān e dóo diní i.

⁴⁵¡Nché kuān nche váꞌā o é kākuinchiꞌxe o, tsi sáꞌā ne, kuntaa vátā ó kakaꞌan Xúva ko ni ō! —kaꞌan Ísabee ni ña.

⁴⁶Kidáā ne, kakaꞌan Mária:Dōó kaꞌnu kuiní ko kuenta iña Xuva ko.

⁴⁷Nimá ko ne, dōó nuu dîni kuenta iña Xuva ko, ña é nakākú ko.

⁴⁸Tsí Xuva kō né, ntūntaꞌví ini ña ko,xuꞌu é da kade tsiñu ú iña ña.Un tsi nché vevií ne, é nchii dañu ntūví kaꞌan ñáꞌa san tsi dóo váꞌa ntuvi ko.

⁴⁹Tsí Xuva kō né, dōó iō ña é viī ña;dōó kaꞌnu e táxnūu ña iñá ko.¡Dɨvi ñā e dóo vaꞌá ña!

⁵⁰Nguentúvi tsi kantuntaꞌví ini ña ñaꞌa,da xōó ka ñaꞌa, ña é kānuní i ña.

⁵¹E nañéꞌe Xúva kō kó tsi dóo kaꞌnu ña;īde ña é ntɨꞌɨ miī é ncho vií ñaꞌa,ña e dóo naꞌnu ñaꞌa kuiní i;

⁵²naīnu ñá ña é naꞌnu ñaꞌa san,nántaa dūkun ñá ña ntāꞌví san.

⁵³Xéꞌe ña un ntɨꞌɨ̄ é vāꞌa é nchio ñaꞌa,ña é ntátaan núu i.Dá nakūnu ña ña kuiká san, koó da mii ntāꞌa ña.

⁵⁴Xnchii ña ñāꞌa ña, ñá Israee, ña kade tsiñu iña ña;ñá ni kūnáa ini ña é ntuntaꞌví ini ña ña.

⁵⁵Dukuan ō xeꞌé Xuva ko xūꞌu ñá ni ñata kō,ni Ābraan ni iꞌxá ña, nchii dañu ntūvi. Kuan ō kaꞌan Mária.

⁵⁶Kidáā ne, kátūví Maria ni Isábeé te ūni xoo. Rkontûví ne, kúnūꞌún ña nú viꞌi ña kān. Dā káku Juaan Bautista

⁵⁷Dā kúntaa ntúvī é kāku iꞌxá Isabeé ne, xío ūun iꞌxa tii.

⁵⁸Kidáā ne, kuéꞌen ñaviꞌi ña, kūkoto níꞌni ña ña, tsi dóo kaꞌnu kuīni ña e káku iꞌxá Isabee. Ini ña tsí Tóꞌo kō né, dōo váꞌa ntuvi xéꞌe ña iña ña.

⁵⁹Dā kúvi una ntúvi ne, kueꞌen níꞌi ñā iꞌxá san é kāꞌnté nuu ña un siin kúñū é ixi i, vata ō kaꞌan Xúva kō. Ntīo ñaꞌa san é kunani vata nani uva i Zacāriá ne,

⁶⁰ntá tsi dɨꞌɨ ī né, kakaꞌan ña: —Ñáꞌā, tsí Juaan kunáni —kaꞌan Ísabee.

⁶¹Kidáā ne, ntákaꞌan ñáviꞌi ña: —Ntá tsi xoxó ñaviꞌi o, ña é kuan nanī —kaꞌan ñá ni ñā.

⁶²Dukuān ne, koó dā ntaꞌa ña kakuvi é tsixeꞌe ña ūva iꞌxá san vata koo é kūtuni ña nté koo kunani.

⁶³Uva ī ne, íkan ña uun taꞌvi rkunū ne, da kidáā xntée naꞌa ña é Juaan kunáni. Koó dā kúduꞌva ña ntâñɨ́ san é kuān o xntée naꞌa ña.

⁶⁴Ura dúꞌva tsi i nákaꞌan Zácariá san. Eni ntuꞌu ña kākaꞌan ña tsi dóo kaꞌnu Xuva kō.

⁶⁵Un ntɨɨ́ ntɨ̄ɨ́ ñaviꞌi ña ne, koó dā kúduꞌva ña. Da kanɨɨ kāꞌnu ñuú Judeá san e dóo ntákaꞌan ñáꞌa san nté ō kúvi.

⁶⁶Un ntɨɨ́ ntɨ̄ɨ́ ña e téku i ne, da dé kuení mii ñā: —¿Neé ntu é vīi iꞌxá san tē kúkaꞌnu? —kaꞌan ña. Tsí kutuní ñaꞌa san tsi dóo nuu méꞌñu Xuva ko ī. É īta Zacaria

⁶⁷Zacaria, úva īꞌxá san ne, nuu tsitu Espíritū Sántū nima ñá, kakaꞌan ñá túꞌūn é xēꞌé Xuva kō é kāꞌan ña:

⁶⁸¡Na kāꞌan un ntɨɨ́ ntɨ̄ɨ́ ñaꞌa tsi dóo kaꞌnu Xuva kō, Tóꞌō ña Israee,tsi véꞌxi ñā, vexnákakū ñá ñaꞌa ña!

⁶⁹Tsi táxnūu ña ña e dóo ntii inī i é nakakū ñá kō,uun iꞌxá ika rei Dāvii, ña é dé tsiñu iña Xuva ko,

⁷⁰vata ō táꞌxi Xuva ko xūꞌu ña nte ntúvi diꞌna,vata ō ntákaꞌan ñá kaꞌán naa ña, ña e dóo vaꞌa:

⁷¹é nantii ña kō míꞌī ntaínchuꞌvi ñáꞌa san ko,nī mí ntáde xení ña ni kō,

⁷²é ntuntaꞌví ini ña ni ñata kō, ña intóo ntuvi diꞌna,é ntē ña kunánī ña é kada ntáa ñanuu i e dóo vaꞌa é kākaꞌan ñá ni ñā kídaā.

⁷³Dɨvi nuū i é kākaꞌan Xúva kō nte ntúvi diꞌnani uva ata ko Ābraantsí nuu é ntaā i é viī ña é kākaꞌan ña:

⁷⁴é nakāku ñá ko ntaꞌa ña ntaínchuꞌvi kovata koo é vīi o nee iña é kākaꞌan ña,é ntē ña uꞌví kō,

⁷⁵vata koo é kuvi kuntoo dadɨɨ o ni ñāé vīi ó nee iña é vāꞌá da kanɨɨ ntuvi kō.

⁷⁶Dɨvin, īꞌxá miī kó,viꞌi a vé ne, káꞌan ntōdon túꞌun Xuva kō,ña é dií ka kaꞌnu,tsí dɨvīn ne, kɨ́ꞌɨn kodōn núun nuu Xuva ko,viin é koo túꞌve ñaꞌa san te xee míi Xuva kō.

⁷⁷Dɨvin kuēꞌen é kūtuni ñáꞌa ñatsí nakate Xuva ko kuētsí ñavata koo é nakáku ña.

⁷⁸Tsí Xuva kō né, dōó kantuntaꞌví ini ña kō né,taxnūu ña iꞌxá ña nte e dukún kānvata kaa ntuve ngántii é kakene tevaá duꞌva tsi,

⁷⁹vata koo é nāxiꞌí nuu ña iña ñá ntoo mi dóo nee,mí katāvi núu ña ntatɨ̄ doxiꞌi.Nañēꞌe ñá ko ītsi mí kaka ōvata koo é kūntoo váꞌa o. Dukuan ō kaꞌan Zacária.

⁸⁰Kūkaꞌnu Juaán san ne, dōo kutúꞌve ña iña Xuva ko. Má kūꞌu kan inúu ña un tsi da nté xee ntúvī é kiī ña é kīní ña Israeé san ña.