Read Coatzospan San Lucas 23 Bible Online

San Lucas 23 - Coatzospan bible

San Lucas 23

¹Kidáā ne, un ntɨɨ́ ntɨɨ̄ ñá nakuntáñɨ̄ ñá ne, dā kueꞌen niꞌi ña Jésuu ntáꞌa Pilatu.

²Ikān éni ntuꞌu ñā daꞌví ña ña dovete, ntákaꞌan ña: —E níꞌī ntɨ́ ñatīi saꞌa é kanatɨvī ñá ñuú ntɨ. Kakaꞌan ñá tsí ña váꞌa ō e ntáꞌvi ntɨ́ diuꞌun xôo íña ñuú Romá san. Kakaꞌan ñá dɨ tsí dɨvi ñā é Cristu ñá, dɨvi ñā é kuvi ña reí dɨ —kaꞌan ña.

³Kidáa ne, tsixeꞌe Pīlatú san Jesuu: —¿Vá dɨvin ntūn é kūvin Rei iña ñá Israeé san? —kaꞌan ña. —Mii xnto kākaꞌan nto —kaꞌan Jésuu.

⁴Kidáā ne, kakaꞌan Pílatu ni tóꞌō dutu ní ñaꞌa san: —Ñá kānaniꞌí ko kuétsi ñatīí saꞌa —kaꞌan ña.

⁵Dā dií dií ka xío ntii ñāꞌa san, ntákaꞌan ña: —Véꞌxi ña, kanakutsuꞌun ña ñāꞌa san nchúꞌun é kanañēꞌe ñá kanɨɨ ñūú Judeá ne, nté ñūú Galileá ne, un tsi nte íꞌa dɨ —kaꞌan ña. Dā intítsi mēꞌñú Jesuu nuu Heródē

⁶Dā téku Pilatu sáꞌa ne, tsixeꞌe ña te ñatīí saꞌá ne, ña ñuú Galilea ña.

⁷Dá kakāꞌan ña tsí dɨvi ñūu ñá ne, taxnūu ña ña ntaꞌa Heródē, ña tsiñu naꞌnu i ñuú Galilea, tsí tuví ña ñuú Jerusaleen ntúvi tsikan.

⁸Dā íni Heródē san Jésuú ne, dōo diní ña tsí e tɨ́tɨn ntuvi é ntio ña é kinī ñá ña, tsi téku ña e ntákaꞌan ñáꞌa san íña ña. Ntio ña é kinī ña é vīí ña nuu i e dóo kaꞌnu.

⁹Dōo tsíxeꞌe ña ñā, ntá tsi ña ni káꞌan kueꞌen tsí Jesuu.

¹⁰Ikān ntâñɨ tóꞌō dutú san nī mastrú leí san, e dóo ntátsiꞌi kuetsi ña ña.

¹¹Kidáā ne, Heródē san ni sntadun ñá ne, dē xení ña ni Jēsuu. Nārkɨ́nteē ñá ña ne, naxnūu ña ña duꞌnu e dóo vaꞌa vata kaa é kainúu rei. Kidáā né, nataxnūu xtuku Heródē san ña ntaꞌa Pilatú san.

¹²Ntuvi tsikán ne, dōo váꞌā o tiin Pilatú san ni Hēródē sán, kuān te ntuvi díꞌna ne, dōo ínchuꞌvi taꞌan ña. Dā ntúvi kuenta Jésuu é kuvī ña (Mt. 27:15‑26; Mr. 15:6‑15; Jn. 18:39‑19:16)

¹³Kidáā ne, Pilatú san ne, nātaká nuu ña nī tóꞌō dutú san, nī ña tsiñu i, ni ñāꞌa sán ne,

¹⁴dá kakāꞌan ñá ni ñā: —Dɨvi ntō é vēxníꞌi nto ñatīí saꞌá ntaꞌa kó ne, ntákaꞌan nto tsí kanatɨvī ñá ñaꞌa san, ntá tsi xuꞌú ne, tsixeꞌē ú ña nuu ntó ne, ñá ni nanīꞌí ntɨ kuétsi ñā nté uun nuu i vatā o ntákaꞌan nto.

¹⁵Nte Heródē ña ni naníꞌi ña kuétsi ñā. Dukuān é nataxnūu xtuku ña ña ntaꞌa ko. Koto nto tsí ña té neé ni īde kueꞌen tsí ña é kuvī ña.

¹⁶Nantoꞌo ú ña ne, dá nakāka xaa ú ña —kaꞌan Pílatú san.

¹⁷Tsi dá kakūvi viko sá ne, da miī é nakāka xaa Pilatú san uun ñaꞌa, ña ñuꞌu kutu, xoó ñaꞌa é ntio ñaꞌa san é ntīi ña.

¹⁸Ntá tsi kuédadɨɨ tsī éni ntuꞌu ñā ntákachuꞌu ña: —¡Kaꞌní nto ña sāꞌá ne, nakāka xaa nto Barabaá san! —kaꞌan ña.

¹⁹Barabaá san ne, nuu kutu ñā, tsí idé ña duꞌxen nī ña ñuu í ne, ēꞌní ña ñaꞌa.

²⁰Pilatú san ne, ntīo ña é nakāka xaa ña Jesuú ne, kakaꞌan xtúku ña ni ñāꞌa san.

²¹Ntá tsi dií dií ka ntii káchuꞌu xtúku ña: —¡Na xnteē ntó ña ntiká krusi kan! ¡Na xnteē ntó ña ntiká krusi kan! —kaꞌan ña.

²²É kuvi ūni íto kākaꞌan xtúku Pilatú san: —¿Nee iñá ntu é kīni kaa idé ña? Tsí ña kánaniꞌí ko kuétsi ñā é kuētsi é kuvī ña. Nantoꞌo ú ña ne, dá nakāka xaa ú ña —kaꞌan ña.

²³Ntá tsi ñaꞌa sán ne, ntaxío ntii ña ntákaꞌan ña tsí da miī é na nākuntée ña ntīká krusí san. Un tsi vāntiñɨ ña ntákaꞌan ña. Kūvi idé ña niꞌi ña é ntio ña.

²⁴Pilatú san ne, íde ña vatā o ntákaꞌan ñáꞌa san.

²⁵Nakáka xaa ña ñatīi, ña nuu kutu viutun san kuenta iña i é idé ña duꞌxen nī e éꞌní ña ñaꞌa sán dɨ, ntá tsi ntāda ña kuenta Jésuú san ntaꞌa ñaꞌa san vata koo é viī ñá ni ñā nee é ntio ña. Dā intée Jesuu ntíkā krusi (Mt. 27:32‑44; Mr. 15:21‑32; Jn. 19:17‑27)

²⁶Dā kueꞌen niꞌi ña Jesuu é na xnteē ñá ña ntiká krusí ne, tɨɨn ña uun ñatīi, ña ñuú Cirene, ñá nani Sīmuun, ñá véꞌxi uun rantsu. Kuétsī é īdé ñaꞌa san ña é kunīꞌi ña krusí san é kuntīkɨn ñá ata Jésuú san.

²⁷Ñá tē nté kaa ñaꞌa ntántīkɨn ñá ña ne, ñá te da dīi ñádɨ̄ꞌɨ́ san dóo uꞌvi ntákuvi ña, ntaéku ña kuenta iña Jésuu.

²⁸Dā íto Jesuú san ñadɨ̄ꞌɨ́ san ne, kakaꞌan ña: —Ntoꞌó, ñadɨ̄ꞌɨ́ Jerusaleen, ñá ku ntē dúkuan ēku nto kuenta iñá ko, ntá tsi kueku nto kuenta iña mii nto ni iꞌxá nto.

²⁹Tsi véꞌxi ntūvi é kāꞌan nto: “Nté kuān nte vaꞌá ñaꞌa san, ña é ña ni kuvi kóo iꞌxá i, nī ña é ña ni ñúꞌu īꞌxá i íꞌxi i, nī ña é ña ni natsitsi íꞌxá dɨ”, koo kaꞌan nto.

³⁰Kidáā né, kani ntuꞌu ñāꞌa san káꞌan ña é na nūu xuku san mí ntántoo ña, é ntio ña é kutāvi núu ña é kunuu xūꞌu ña.

³¹Ntá tsi te kuan ō ntáde niꞌi ña utun xɨꞌɨ̄ sán ne, ¿ntē ntú koo vií ña ni ūtun itsí san kuan? —kaꞌan Jésuú san.

³²Kueꞌen níꞌi ña ūvi ñaꞌa ña kini ntáa é dādɨɨ kaꞌní ña ña ni Jēsuu.

³³Dā xee ñá xuku é nani Xkɨ̄dɨkɨ Ntɨ́xɨ sán ne, ikān náxnteē ñá Jesuu ntíkā krusi, ní ntuvi ñáꞌa ña kini ntáa san: uun ña ne, diñɨ kuaꞌa Jesuu intée ña; uun ña ne, diñɨ datsin ña intée ña.

³⁴Jesuú ne, kakaꞌan ña: —Ūvá, kada kaꞌnu iní nto ni ñā, tsi ñá ini ñá nee iña ntáde ña —kaꞌan ña. Sntadún san ne, nārkɨ́nteē ñá doo Jésuu xoo é kūvi vií i niꞌi i.

³⁵Ñaꞌa sán ne, ntáñɨ̄ ña, ntaíto ña ne, un tsi nté ña tsiñu i san ntánarkɨ́nteē ñá Jesuu, ntákaꞌan ña: —Ña sāꞌá ne, nakākú ña tuku ñaꞌa. Viꞌi a vé ne, na nakākú mii ñā kúñu ña, tē nuu é ntaā i é Cristu, ña é nakaxnúu Xuva kō —kaꞌan ña.

³⁶Sntadún san ne, nārkɨ́nteē ñá ña. Xée ētsin ña ne, xéꞌe ña ntɨ̄di íā é kōꞌo ña.

³⁷Ntákaꞌan ñá ni ñā: —Te dɨvīn é Rei iña ñá Israeé ne, nakākún miīn kúñu ō —kaꞌan ña.

³⁸Nteé letra dɨ́kɨ krusí san é kākaꞌan túꞌūn griegú, ni tūꞌún latiín, ni tūꞌún hebreu, kakáꞌan: “Ña sāꞌa é Rei iña ñá Israee”, kaꞌan.

³⁹Uun ñaꞌa ñā duꞌú san, ña nteé ntiká krusí san ne, kakaꞌan ña: —¡Tē nuu é ntaā i é Cristún ne, nakākún miīn kúñu ō ne, nakākún ntɨ dɨ! —kaꞌan na.

⁴⁰Ntá tsi ña uun ñaꞌa sán ne, kakaꞌan ñá ni tāꞌan ña: —¿Ña kaúꞌvī ntú o Xuva kō? Tsí dɨvīn né, dɨvi tsi nūu i kantóꞌo o dɨ.

⁴¹Ntá tsi xoꞌō né, iō nuu i e ntántoꞌo kō, tsi ntantáꞌvi o kuētsí kō e ntúku nuu ō. Ntá tsi ña sāꞌá ne, ñá tē neé kueꞌen tsí ni īde ña é kīni kaa —kaꞌan ña.

⁴²Kidáā ne, kakaꞌan ña: —Jesuu, na nakaꞌan ntō kó tē xee nto mí kadā kúꞌvē nto —kaꞌan ña.

⁴³Kidáā ne, kakaꞌan Jésuu: —Nuu é ntaā i é kākaꞌán u ni ō tsí vevií kutūvín dadɨɨn nī ko mí ntántoo ña kuíntiꞌxe i, ña é xiꞌi —kaꞌan ña. Dā xiꞌi Jésuu (Mt. 27:45‑56; Mr. 15:33‑41; Jn. 19:28‑30)

⁴⁴Un tsi nte da káꞌñu ntuvi ne, un tsi nte kaeku uni kuáa ne, kūneé da kanɨɨ ñūxiví sa.

⁴⁵Kūnee ngántií san. Uvi dávā ntíi dôxi é rkāa nuu ini ukún kaꞌnu kān.

⁴⁶Kidáā né, un ntii tsī káchuꞌu ntáa Jesuu, kakáꞌan ña: —¡Ūva, ntada ú kuenta nímá ko ntaꞌa nto ve! —kaꞌan ña. Dā kúvi kāꞌan ña sáꞌa ne, xíꞌi ñā.

⁴⁷Dā íni tóꞌō sntadun ñá ñuú Romá san nté ō kúvi ne, kakaꞌan ña tsi dóo kaꞌnu Xuva kō. Kakaꞌan ña: —Nuu é ntaā i é ñatīí saꞌá ne, dōo vaꞌá ña; ña túvi kuētsí ña —kaꞌan ña.

⁴⁸Un ntɨꞌɨ kueꞌen dúꞌva ña ntaíto neé kuvi ne, kúnūꞌú ña, koó dā ntaxéꞌe ña ntaꞌa ña nima ñá e dóo uꞌvi ntákuvi ña.

⁴⁹Un ntɨɨ́ ntɨ̄ɨ ñá ini Jesuú, ni ñadɨ̄ꞌɨ, ña ntántīkɨn ñá un tsi nte ñúu Galileá ne, intáñɨ ika ñā, ntaíto ña nté ō kúvi. Dā inuu ntúꞌxi Jesuu (Mt. 27:57‑61; Mr. 15:42‑47; Jn. 19:38‑42)

⁵⁰Uun ñatīi, ñá nani Jōsee, ña véꞌxi ñuú Arimatea é kāduku ntée ñuú Judeá ne, dōo vaꞌá ñaꞌa ña. Úvē taꞌan ña ña tsiñu naꞌnu i san iña ñá Israee.

⁵¹Ña sāꞌá ne, kantétu ñā amá xee ntúvi é kadā kûꞌvé Xuva kō. Ñá ni kui dadɨɨ ña ni ña tsiñu i, ña nguiī san.

⁵²Dɨvi ñā ne, kuéꞌen ña, kūkoto ña Pilatú san é ntākan ña kúñu Jēsuu.

⁵³Kidáā ne, nanúu ña ña ntīká krusí san ne, dā náxnuu taꞌán ña ña doo kuiꞌxin e dóo vaꞌá ne, dā kukúꞌxi ña ña iní ñañā mí kāntii iní xuu, mí vāta kunuu ntúꞌxi ñaꞌa.

⁵⁴Ntuvi tsikán ne, ntuvi e ntáxio túꞌve ña é kuiñɨ ntuꞌu ntúvi é iō dáꞌna san.

⁵⁵Ñadɨ̄ꞌɨ́, ña vexníꞌi Jēsuu un tsi nte ñuú Galileá ne, kuéꞌen ñā né, dā íto nuu ña ñañā san, ntaíto ña nté ō kanúu kúñu Jēsuu.

⁵⁶Kidáā ne, kúnūꞌú ñā ne, da de váꞌa ña ntute choꞌo vîdin e dóo vá xkonuu, ni ūꞌxen xukú san dɨ. Kidáā ne, íntoo daꞌna ñadɨ̄ꞌɨ́ san ntuvi dá iō dáꞌna san, vatā ó kakaꞌan túꞌun Xuva kō.