Read Coatzospan San Lucas 4 Bible Online

San Lucas 4 - Coatzospan bible

San Lucas 4

¹Jesuú ne, nuu tsitu Espíritū Sántū sán nima ñá, ntiko koō ña é ñeꞌē ña nú ntute kaꞌnu é nani Jōrdaan. Kueꞌen níꞌi Espíritū Sántū san ña, kuéꞌen ña ñūu îtsí kān mí xoxó ñaꞌa.

²Ikān itúvi ña uvi díko ntuvi ne, ntá tsi tóꞌō e ña váꞌā san ne, īto nteé ña. Ñá ni ēꞌxí kueꞌen ña ntuvi é itúvi ña ikān. Dā rkontûví ne, kākɨn ña.

³Kidáā né, kakaꞌan tóꞌō e ña váꞌā san ni ña: —Tē nuu é ntaā i é iꞌxá Xuva ko ō né, viin é nantūvi xuu sáꞌa tañúꞌū —kaꞌan tóꞌō e ña váꞌā san ni ña.

⁴Kidáā ne, nantíko kōó Jesuu, kakáꞌan ña: —Tūꞌún Xuva kō ne, kakaꞌan: “Ñá te da mii tsi tāñúꞌū san kantío ñaꞌa san, tsí kantio ña un ntɨꞌɨ̄ túꞌūn é kākaꞌan Xúva kō”, kaꞌan —kaꞌan ñá ni ī.

⁵Kidáā ne, kúxee niꞌi tóꞌō e ña váꞌā san ña uun itsi mi dóo dūkun. Uun daꞌna tsi nañéꞌē ña un ntɨɨ́ ntɨ̄ɨ́ ñuu é īó da kanɨɨ ñūxiví ne,

⁶kakaꞌan ni Jésuú san: —Xuꞌú taꞌxi u é kadā kûꞌven dá kanɨɨ ñūxiví san. Taꞌxi u é un ntɨꞌɨ̄ e dóo vaꞌá san é kūví iña o. Tsí xuꞌú ne, é ntūvi kuenta ntáꞌa ko é un ntɨꞌɨ̄ sáꞌā ne, kuéꞌē ú da xōó ka tsi é ntio ko.

⁷Te nakūnchɨ́tɨn nūú ko ne, te kunūu ini ó ko ne, é un ntɨꞌɨ kūvi iña o —kaꞌan ni Jésuu.

⁸Kidáā ne, nantíko kōó Jesuu, kakáꞌan ñá ni ī: —Tūꞌún Xuva ko ne, kākaꞌan: “Kunūu ini o Tóꞌo o Xuva ō. Da mii tsi ñā é kuīntiꞌxe o ña”, kaꞌan —kaꞌan ñá nī tóꞌō e ña váꞌā san.

⁹Kidáā ne, kueꞌen níꞌi tóꞌō e ña váꞌā san ña ñuú Jerusaleen. Nakáa ñā dɨkɨ xúkun kaꞌnu míꞌī e dií dií ka dukún ne, dá kakāꞌan ni ña: —Tē nuu é ntaā i é dɨvīn é Iꞌxá Xuva kō ne, nakōꞌxón nuun kúñu ō un tsi nte íꞌa.

¹⁰Tsí kakaꞌan túꞌun Xuva kō:Tsí taxnūu ña ánje ñā é viī ñá o kuenta,é kūnuu méꞌñu kūnuu dava ña o.

¹¹Kūrkaa ánjē san o,vata koo é ña nákɨꞌɨn nté uun xuu, kaꞌan —kaꞌan tóꞌō e ña váꞌā san ni Jésuu.

¹²Ne, nántiko kōó Jesuu, kakáꞌan ñá ni ī: —Duꞌvā ó kakaꞌan túꞌun Xuva kō dɨ: “Ñá ku ntē dúkuan kōto nteen Tóꞌo o Xuva ō”, kaꞌan —kaꞌan ñá nī é ña váꞌā san.

¹³Dā ña ni kuvi vii tóꞌō e ña váꞌā san nté koo vii é kōꞌxó ntēé Jesuú ne, kīi nteé xio, kueꞌen. Dā éni ntuꞌu Jēsuu dé tsiñu ña ñuú Galilea (Mt. 4:12‑17; Mr. 1:14‑15)

¹⁴Nāxee Jésuu ñuú Galilea, nuu tsitu nima ñá Espíritū Sántū san é viī ñá tsiñu ña. É da míꞌī ká ñuú ntákaꞌan ñáꞌa san íña Jésuu.

¹⁵Nakuáꞌa ña ñāꞌa san taꞌán ñuu taꞌán ñuu má viꞌī mi ntánataká nuu ña Israee. Un ntɨɨ́ ntɨ̄ɨ́ ñaꞌa san ntákaꞌan ñá e dóo vaꞌá Jesuu. Dā itúvi Jesuu ñuú Nazaree (Mt. 13:53‑58; Mr. 6:1‑6)

¹⁶Kidáā né, nāxee Jésuu ñuú Nazaree, mí éꞌnu ña. Ntuvi dá iō dáꞌna ne, kuéꞌen ñā má viꞌī mí nataká nuu ña Israee váta xkoó ini ña. Nákuntītsí ña é nakuāꞌa ña túꞌun Xuva kō.

¹⁷Xéꞌe ña ña tūtu é de váꞌa ña kaꞌán naa Xuva ko, ñá nani Isāia. Nākaán ña ne, nāniꞌi ña mí duꞌvā ó kakaꞌan:

¹⁸Espíritu Xuva kō ne, nuu méꞌñu nuu dava ña ko,tsí dɨvi ñā teé tsiñu ña koé kāꞌán u túꞌūn é vāꞌá ni ña ntāꞌvi.Dɨvi ñā táxnūu ña koé kāꞌán u ni ña ñuꞌu kutū nté koo nakáku ña,nī é nākaán u ntuxnúu ña kuāa,nī é nakākú u ña ntáde xení ñaꞌa ni ī,

¹⁹nī é kāꞌán u tsi é xee ntúvi e dóo vaꞌá koo vií Xuva ko ni ñāꞌa. Kuān ó kakaꞌan túꞌūn é nakuāꞌa ña.

²⁰Kidáā ne, naxtínuu Jesuu tútú san ne, dā nakuéꞌe ña ña kaxntiī nú viꞌī mi ntánataká nuu ña ne, nákutūví xtuku ña. Un ntɨɨ́ ntɨ̄ɨ́ ña ntoo sán ne, ntaíto ña ña.

²¹Kidáā ne, éni ntuꞌu Jēsuu kakáꞌan ñá ni ñā: —Tūꞌún saꞌá ne, é vevii é kākuntaa vata kaa e téku nto dá kanakuāꞌa ú nto —kaꞌan Jésuu.

²²Un ntɨɨ́ ntɨ̄ɨ́ ñaꞌa sán ne, váꞌā ó ntákaꞌan ñá iña Jésuu. Da kúduꞌva ña é kuān nte váꞌā ó kakaꞌan ña. Ntatíin mii ñā, ntákaꞌan ña: —¿Ñā ntu te iꞌxá Josee ñá sāꞌa? —kaꞌan ñáꞌa san.

²³Dá kakāꞌan Jésuu ni ña: —Ncho kaꞌan ntó nī kó vatā ó ntákaꞌan ñáꞌa san: “Tē nuu é ntaā i é medíku ntō ne, ntaváꞌa mii ntō kúñu ntō.” O ncho kaꞌan ntó nī ko: “Vatā o téku ntɨ́ nēe é idé nto ñuú Capernaú ne, kuān koo vií nto iꞌa dɨ, ñuú mii ntō”, te kuan kōo é ncho kaꞌan nto.

²⁴ʼNuu é ntaā i é kākaꞌán u tsi nté uun ñaꞌa ña kaꞌán naa Xuva ko ne, ñá ntīo ñaꞌa san, ña ñuú mii ñā, é kīni ña túꞌūn é kākaꞌan ña.

²⁵Nuu é ntaā i é kākaꞌán u tsi ñá te da dīi ñadɨꞌɨ́ kií san ntoo ña ñuú Israee ntuvi da itúvi Elia. Dā kidáā ne, ña ni kɨ́ɨn kuēꞌen tsi davi uni kuia nte dáva ne, dōo kútama ñaꞌa san da kanɨɨ ñūú san.

²⁶Ntá tsi ña ni taxnúu Xuva kō Eliá san e kixntíi ña ñadɨ̄ꞌɨ kii, ña ñuú Israee, tsi táxnūu ña ña é kixntíi ña uun ñadɨ̄ꞌɨ kii, ña ñuú Sareta, ñuu é tuvi étsin Siduun.

²⁷Ñá te da dīi ña ntákuvi kuiꞌi é kānakoꞌxo kúñu ī ntóo ña ñuú Israee ntuvi da katúvi ña kaꞌán naa Xuva ko, ñá nani Elīseu, ntá tsi nté uun ñaꞌa, ña ntánchokuvi, ña ni ntuváꞌa ña. Tsí mii tsi Nāmaan, ña ñuú Siria, ntuváꞌa ña —kaꞌan Jésuu.

²⁸Ntá tsi ña ntoo iní viꞌi mí nataká nuu ña Israeé ne, un váꞌa tsi kúdiin ña dā téku ña é kuān ó kakaꞌan ña.

²⁹Nákuntāñɨ́ ñaꞌa sán ne, nakunu ña Jesuu ñuú ña. Kueꞌen níꞌi ña ñā rkɨ uku é nakōꞌxó nuu ñá ña.

³⁰Ntá tsi kíi niꞌni Jēsuu méꞌñū ñaꞌa san, kuéꞌen ñā. Ñatīi, ña é nuu é ña váꞌā nima i (Mr. 1:21‑28)

³¹Jesuú ne, kuéꞌen ña ñūú Capernau é tuví ñuú Galileá ne, ikan kanakuāꞌa ña ñáꞌa san ntúvi dá iō dáꞌna.

³²Koó dā kúduꞌva ñaꞌa san túꞌūn é kanakuāꞌa ña ña, tsi dóo ini Jesuu nee é kākaꞌan ña.

³³Má viꞌī mí nataká nuu ña Israeé san ne, tuví uun ñatīi, ña é nuu é ña váꞌā nima í ne, un ntii tsi kākaꞌan:

³⁴—¡Na koo mii ntō ntɨ! ¿Neé ntu viī ntó nī ntɨ́, Jesuu, ña ñuú Nazaree? ¿Vēꞌxí ntu nto é nākunaá nto ntɨ? Xuꞌú ne, iní u nto, tsí dɨvi ntō e dóo vaꞌá nto iña Xuva ko —kaꞌan ni Jésuu.

³⁵Kidáā ne, de tíi Jesuu ni é ña váꞌā san, kakaꞌan ñá ni ī: —¡Diin tsi kutūvin! ¡Ntiin nima ñátīí sāꞌa! —kaꞌan ñá nī e ña váꞌā san. Kidáā né, un ntii tsi nāntava é ña váꞌā san ña ñuꞌu kan, méꞌñū un ntɨɨ́ ntɨ̄ɨ́ ñaꞌa san da ntíi nima ña. Ntē ña ni níꞌi kuiꞌí ña da ntii é ña váꞌā san.

³⁶Dōo uꞌví ñaꞌa san un ntɨɨ́ ntɨɨ̄ ñá da íni ña. Ntátsixeꞌe taꞌan mii ñā: —¿Neē ntú tuꞌun sáꞌā? Ña sāꞌá ne, ¿nté kui dóo iō ña é viī ña? Tsi dá mii tsi kākaꞌan ñá ne, kūvi idé ña nakúnu ña é ña váꞌā san —kaꞌan ña.

³⁷Da míꞌī ká ñuú san ntákaꞌan ñá iña Jésuu. Dā ntaváꞌa Jesuu ñuntɨ́ɨ Sīmuún Pedru (Mt. 8:14‑15; Mr. 1:29‑31)

³⁸Kidáā ne, nákuntītsí Jesuu, ntáka ña viꞌi mi ntánataká nuu ña Israeé san ne, kuéꞌen ñā nú viꞌi Sīmuun Pedru. Ikān tuví ñuntɨ́ɨ ña ne, dōo kaxéꞌe ña kaꞌni. Íkan ña dā xeꞌe ntáꞌa Jesuu é na ntāváꞌa ña ña.

³⁹Nákuntēɨ Jesuu nuu ñadɨꞌɨ́ san mí tuví ntaa ña ne, kakaꞌan ña é na ntīkó kaꞌni san. Ura tsí i nakuntítsi ña, da de váꞌa ña é kāꞌxí Jesuu ni ñáꞌa ña. Dōó tɨtɨ́n ña ntánchokuvi ntaváꞌa Jesuu (Mt. 8:16‑17; Mr. 1:32‑34)

⁴⁰Ura da kaído nuu ngántií san ne, xée ūn ntɨɨ́ ntɨ̄ɨ́ ñaꞌa san, xee níꞌi ña ñaꞌa ña, ña ntánchokuví san, mí tuví Jesuu. Dōó tɨtɨ́n nuu kuíꞌi ntákuvi ña. Tɨɨn ntaꞌa Jēsuu ñáꞌa san xe un xé un ñā, ntaváꞌa ña ña.

⁴¹Ñá te da dīi ña ntánchokuví san ne, ntīi é ña váꞌā sán nima ña. Koó dā ntákachuꞌu ntáa é ña váꞌā san, ntákaꞌan: —¡Dɨvi ntō é Iꞌxá Xuva ko ntō! —kaꞌan. Ntá tsi de tíi Jesuu ni é ña váꞌā san. Ñá ni xēꞌé ña itsi é kāꞌan, tsí ini tsí dɨvi ñā é Cristu ña, ña e táxnuu Xuva kō. Kaika Jesuu kánɨɨ ñūú Galilea, kakaꞌan ntódo ña ni ñāꞌa san (Mr. 1:35‑39)

⁴²Dā tuví ne, kuéꞌen Jēsuu díñɨ ñūú san mí xoxo ntóo i. Ntá tsi ñaꞌa sán ne, dōo nántuku ña ñā. Xée ñāꞌa san mí tuví ña ne, ñá ni nataxā ñá ña, tsí ña ni ntío ñaꞌá san é kɨ̄ꞌɨ́n ka ña.

⁴³Ntá tsi kakaꞌan Jésuu: —Da miī é kɨ̄ꞌɨ́n ka ú xio ñuú san, kikaꞌán u ni ñāꞌa san túꞌūn é vāꞌa iña i mí kadē kûꞌvé Xuva kō, tsí dɨvi tsiñu sāꞌa e táxnuu Xuva kō ko —kaꞌan Jésuu.

⁴⁴Kuéꞌen ñā ne, kukaꞌan ntódo ña ni ñāꞌa má viꞌī mi ntánataká nuu ña Israeé san dá kanɨɨ ñūú Judea.