Read Coatzospan Hechos 9 Bible Online

Hechos 9 - Coatzospan bible

Hechos 9

¹Da nɨɨ kākudiin dukuan Saúlū ne, kainchuꞌvi ñá ña kuíntiꞌxe i Tóꞌo ko Jēsuu, ncho kaꞌní ña ña. Dukuān ne, kuéꞌen ña, kūkoto ñá tóꞌō dutu.

²Íkan ña tūtú é kuēꞌé ña un ntɨꞌɨ dūtu úkun ñūú Damascu é nīꞌi ña itsi é tɨ̄ɨn ña ña é kuíntiꞌxe i Jesuu, te tíi te ñadɨ̄ꞌɨ, é kɨ̄ꞌɨn niꞌi ña ña viꞌi utun ñuú Jerusaleen.

³Ntá tsi da xee étsin ña diñɨ ñuú Damascú ne, koó dā kúduꞌva ña dá xiꞌí nuu ñuꞌu é vēꞌxi e dukún kān.

⁴Nantúve Saúlu ñuꞌu kān ne, kidáā téku ña uun tatsin é kākaꞌan ni ña: —Saúlū, ¿nté kui kanantōꞌon ntun ko? —kaꞌan tátsín san.

⁵Kidáa ne, tsixeꞌē Saúlū: —¿Xoó ntu ñaꞌa nto? —kaꞌan ña. Ne, kakaꞌan tátsín san: —Xuꞌu é Jesuu. Dɨvī ú e dóo kanantōꞌon ko. ¿Nté kui kantukun kuīꞌin míin ntun kúñu ō? —kaꞌan ñá nī Saúlū san.

⁶Saúlū ne, koó da kānɨ́ꞌɨ kanteɨ ña, kakaꞌan ña: —Tōꞌo, ¿neé ntu ntio nto é vīí u? —kaꞌan ña. Ne, kakaꞌan Jésuu ni ña: —Nakuntítsin, kuēꞌén ñuú Damascú ne, ikan kāꞌan ñá nee iña é vīin —kaꞌan ña.

⁷Ñatīi, ña ntaíka dadɨɨ nī Saúlū né, dōo úꞌvī ña, tsí téku ña tatsín san, ntá tsi nté uun xoxo ni iní ña.

⁸Kidáā ne, nákuntītsí Saúlū é tūví ña ñuꞌu kān. Ntá tsi dā nákaán ña ntuxnúu ña ne, ñá ni xīꞌí kueꞌen tsi. Kañūꞌu ña ntaꞌa ña, kueꞌen níꞌi ña ña ñuú Damascu.

⁹Ikān katúvi ña uni ntúvi ne, ñá ni xīꞌí nuu ña; ntē ña ni eꞌxí ña ne, nté ntūte ña ni xiꞌi ñá dɨ.

¹⁰Ñuú Damascú san tuví uun ñaꞌa ña kuíntiꞌxe i Jesuu, ñá nani Anānia. Kakaꞌan Tóꞌo ko ni ñā, vata tsi tē ntitsí ña nuu ña, kakaꞌan ñá ni ñā: —¡Ō né, Anania! —kaꞌan ña. —Iꞌa tuví u —kaꞌan ña.

¹¹Kidáā ne, kakaꞌan Tóꞌo ko ni ñā: —Nakuntítsin ne, kuēꞌén itsi é nani Ītsi Ntaa. Ne, ikan kuēꞌén, tsixeꞌēn nú viꞌi Júda te tuví uun ñatīi, ñá nanī Saúlū, ñá vēꞌxi ñuú Tarsu. Tsí vevií ne, ikān tuví ña, kakaꞌan ntâꞌví ña.

¹²Ne, é xéꞌe ú é kinī ñá tsí uun ñatīi, ñá nani Anānia, ntitsí ña nuu ña, kúkɨ̄ꞌví ña iní viꞌi ña kān né, xntekū ñá ntaꞌa ña dɨkɨ ñá vata koo é nāxiꞌí ntuxnúu ña —kaꞌan Tóꞌo ko ni Anāniá san.

¹³Ananiá ne, ntíko koō ñá, kakaꞌan ña: —Ini ntó, Tóꞌō, tsí é dóo ntákaꞌan ñaꞌa iña ñá sāꞌa. Ntákaꞌan ñá tsi dóo kini idé ña ni ña kuíntiꞌxe i nto, ña ntoo ñuú Jerusaleen.

¹⁴Vevií ne, xee ña iꞌa, niꞌi ña tutú é xeꞌe tóꞌō dutú san é tɨ̄ɨn ña un ntɨɨ́ ntɨ̄ɨ́ ñaꞌa, ña é ntákaku niꞌi dɨvī nto —kaꞌan Ánania.

¹⁵Ntá tsi kakaꞌan Tóꞌo ko ni ñā: —Ña té īni. Kueꞌēn kán, tsi é nakaxnúu ú ñatīí saꞌa é kāꞌan ña kuenta iñá ko ni ūn ntɨɨ́ ntɨ̄ɨ́ ñaꞌa, ña túku ñuú, ni ña odo nūu íña ñá ne, nī ña Israeé san dɨ.

¹⁶Nañēꞌé u ña é ña te nté kaa īó é ntōꞌo ña kuenta iñá ko —kaꞌan Tóꞌo ko ni Anāniá san.

¹⁷Kidáā ne, kuéꞌen Anānia nú viꞌī mí tuví Saúlū. Kúkɨ̄ꞌví ña ne, xntekū ñá ntaꞌa ña dɨkɨ ña, kakáꞌan ña: —Ení ko, Saúlū, ña ini nto tsí Tóꞌo ko Jēsuú ne, dɨvi ñā é ntii dítō ña míꞌi ītsi véꞌxi nto ne, dɨvi ñā táxnūu ña ko é vēꞌxi ú vata koo é na nāxiꞌí xtuku ntuxnūú nto ne, vata koo é kunūu Espíritū Sántū san nima nto —kaꞌan Ánaniá san.

¹⁸Ura dúꞌva tsi i ntíi ntee vata kaa diden é nuu ntiꞌu ntuxnúu ña ne, nākiní xtuku ña. Kidáā ne, nákuntītsí Saúlū ne, ura tsí i ítsi ntute ña.

¹⁹Kidáā né, ēꞌxí ña ita ne, nakunúu ntii ñā. Kūkuií ña katúvi ña ni ñā kuíntiꞌxe i, ña ntoo ñuú Damascu. Dá kakāꞌan ntódo Saúlū ñuú Damascu

²⁰Ura tsí i eni ntuꞌū Saúlu kākaꞌan ntódo ña ini ukún ña Israee, kákaꞌan ñá tsí Jesuú ne, dɨvi ñā é Iꞌxá Xuva kō.

²¹Un ntɨɨ́ ntɨ̄ɨ́ ñaꞌa san ne, ntaíni ña Saúlū ne, koó dā kúduꞌva ña da téku ña é kākaꞌan ña. Ntákaꞌan ñáꞌa san: —¿Ñā ntu te ñá sāꞌa e dóo inchuꞌvi ña ña kuíntiꞌxe Jesuu, ñá ntoo ñuú Jerusaleen? ¿Ñā ntu te iꞌa véꞌxi ña, vextɨɨn xtuku ña ñaꞌa é kūnteka ña ña ntaꞌa tóꞌō dutu? —kaꞌan ñáꞌa san, ntátsixeꞌe tāꞌan ña.

²²Ntá tsi Saúlū ne, dií ka xio ntii ña kakaꞌan ntódo ña. Un tsi kúdana iní ña Israee, ñá ntoo ñuú Damascu, tsí Saúlū ne, kanañēꞌe ña ña tsí Jesuú ne, dɨvi ñā é Cristu ñá, dɨvi ñā é intétu o ni ñata kō é kixnakakū ñá kō. Dā nákaku Saúlū é ncho kaꞌní ña Israeé san ña

²³Dā kú tɨtɨ́n ntuvi ne, ña Israeé san natée taꞌan ña xuꞌu ña, ntukū nuu iní ña nté koo kaꞌní ña Saúlū san.

²⁴Ntá tsi kútuní Saúlū é kuān koo vií ña ni ñā. Ntē ntúvi, ntē níñu ntantétu ña ña xiꞌi kan mí kīi ña diñɨ ñuú san, é kaꞌnī ñá ña.

²⁵Ntá tsi ña kuíntiꞌxe i Jesuú san ne, xnūu ña Saúlu īni xika kaꞌnu niñú a ne, nanúu ña ña ntīká ntoꞌo é kāntiꞌu núu diñɨ ñuú san ne, dukuan ō nakáku ña. Dā náxee Saúlu ñūú Jerusaleen

²⁶Dā náxeé Saúlu ñūú Jerusaleén ne, ntio ña é kuntoo dadɨɨ ña nī ña kuíntiꞌxe i san; ntá tsi un ntɨɨ́ ntɨɨ̄ ña úꞌvī ñá ña, tsí ña ni kuintíꞌxe ña te nūu é ntaā i é kuíntiꞌxe Saúlu Jēsuu.

²⁷Ntá tsi uun ñaꞌa, ñá nani Bernābeé ne, intéka ña ña ntaꞌa pustru, kántaa ña nī pustrú san nté ō íni Saúlū Tóꞌo ko Jēsuu ítsi kān ne, nté ō kakaꞌan Tóꞌo ko ni ñā ne, nté ō dé ña da itúvi ña ñuú Damascu, é ntē ña ni uꞌví kueꞌen ña kakaꞌan ntódo ña iña Jésuu.

²⁸Saúlū ne, kátūví ña ñuú Jerusaleen, ika dadɨɨ ña nī pustrú san da míꞌī ká mí ñēꞌe ña.

²⁹Ñá te kauꞌvī ñá kakaꞌan ñá iña Tóꞌo ko Jēsuu, kánantiko koō ñá túꞌūn é ntákaꞌan ña Israee, ñá ntákaꞌan túꞌūn griegu; ntá tsi ña Israeé san ne, dōo ntuku nuu ini ña nté koo kaꞌní ña ña.

³⁰Dā kútuni ña kuíntiꞌxe i sán ne, ntēka ña Saúlu ñūú Cesareá ne, ikān táxnuu tuku ña ña ñūú Tarsu.

³¹Da kidáā ne, kántōo váꞌa un ntɨɨ́ ntɨ̄ɨ́ ña kuíntiꞌxe i da míꞌī ka mí ntoo ña: ō ñuú Judeá ne, ō ñuú Galilea, ō ñuú Samaria. Dōo váꞌa ō intóo ña ne, dōo ntánuu iní ña Tóꞌo ko Jēsuu. Nāxnuu kaꞌnu Espíritū Sántū nima ñá dɨ ne, dōo kútɨtɨ́n ña kídaā. Da ntuváꞌa Enea

³²Da nɨɨ̄ kaika Pedru taꞌán ñuu taꞌán ñuú, kaito níꞌni ña ña kuíntiꞌxe i ne, nakuíta ntíꞌxin ña, íto niꞌni ña ña kuíntiꞌxe i, ña ntoo ñuú Lidá dɨ.

³³Ikān nániꞌi ña uun ñatīi, ñá nani Ēnea. E una kuía ntēkú ña nú ītó ña é natɨ́ɨn ña.

³⁴Pedrú ne, kakaꞌan ñá ni ñā: —Nakuntítsin, Enea, tsí Jesucristú ne, é ntāváꞌa ña o. Naxntītsin íto o vē —kaꞌan ña. Eneá ne, ura dúꞌva tsi i nakuntítsi ña.

³⁵Un ntɨɨ́ ntɨ̄ɨ́ ña ntoo ñuú Lida ni ñá ntoo ñuú Saruún ne, iní ña é nakuntítsi ña. Kidáā né, tsoo mii ñā é ntántīkɨn ña díꞌna ne, eni ntuꞌu ñā intíkɨn ña Tóꞌo ko Jēsuu. Dā ntótō Dórcā é xiꞌi ña

³⁶Xío uun ñadɨ̄ꞌɨ, ña kuíntiꞌxe i, ñá nani Tābita (é ncho kaꞌan Dórcā é tūꞌún griegu), ña tuví ñuú Jope. Ñadɨ̄ꞌɨ́ saꞌá ne, dōo váꞌā o dé ña, dōo xntíi ña ña kataan núu i.

³⁷Ntuvi tsikán ne, iñɨ ntúꞌū nchókuví ña ne, xíꞌi ñā. Dā kúvī ntántoo ña ña ne, xtuvī ñá ña má viꞌī nínu kān, tsí ūvi odo ntiꞌi táꞌan viꞌi ña.

³⁸Tuvi étsin ñuú Jopé san ñuú Lida, mí tuví Pedru. Īní ña kuíntiꞌxe i san tsí ikān tuví ña ne, táxnūu ña uvi ñaꞌa ñátīi é kūkoto ña ña: —Kantɨ́ꞌɨ̄ sá nto kueꞌēn ntó ñuú Jope —kaꞌan ña.

³⁹Kidáā ne, kuéꞌēn Pedru ni ña. Dā xee ñá ne, kueꞌen níꞌi ña ña má viꞌī mí tūví ntāa ñá xiꞌí san. Un ntɨɨ́ ntɨ̄ɨ́ ñadɨ̄ꞌɨ kií ntoo ña, ntaéku nteé ña ña. Náñēꞌe ñá Pedru dáꞌma ni dūꞌnu e dé váꞌa Dórcā dá katúvi ña.

⁴⁰Kidáā né, kīi ñuꞌu Pedru ñá, un ntɨɨ́ ntɨɨ̄ ñá ne, inchɨ́tɨ ña, kakaꞌan ntâꞌví ña. Kidáā ne, kaito ña nuu ñá xiꞌí san, kakaꞌan ña: —¡Tābita! ¡Nakuntítsin! —kaꞌan ña. Ura dúꞌva tsi i nákaán ña nuu ña ne, dā íni ña Pedrú san ne, nákutuvī tɨxɨ ña.

⁴¹Irkāa Pedru ntáꞌa ña, naxntitsī ñá ña. Kidáā ne, kána ña ña kuíntiꞌxe i san ni ñadɨ̄ꞌɨ kií san, náñēꞌe ñá ña tsi e ntóto ña.

⁴²Un ntɨɨ́ ntɨ̄ɨ́ ñaꞌa, ña ntoo ñuú Jopé ne, téku ña é kuan ō kúvi ne, ñá te da dīi ña kuíntiꞌxe ña Tóꞌo ko Jēsuu.

⁴³Pedrú ne, kūkuií ka ña katúvi ña ñuú tsikan nú viꞌi Sīmuun, ña é katsoo itsi ñɨɨ kɨtɨ.