Read Coatzospan Hebreos 8 Bible Online

Hebreos 8 - Coatzospan bible

Hebreos 8

¹Váꞌa ō ve. Dií ka ntio ko é kūtuni nto sáꞌā: Īó dutu ñá odo nūu iña ko é vāꞌá kueꞌen ña, tsi tuví ña e dukún kān ne, kadē kûꞌvé dadɨɨ ña ni Xuva kō, ña dóo ntii inī í san.

²Kade ña dutu ódo nūu má viꞌī kuikó ntiꞌxe san é tuví e dukún kān. Mii Xuva kō xntítsī ñá viꞌi sāꞌá; ña te ñáꞌa ni xntitsī ña.

³Un ntɨɨ́ ntɨ̄ɨ́ dutu ñá odo nūú san ne, dɨvi tsīñu ña é kuēꞌé ña doméni ntaꞌa Xuva kō, é kāꞌmi ña kɨtɨ san iña Xuva ko, kɨtɨ e ntaxéꞌe ñaꞌa san iña kuétsi ñā. Dukuān ne, kantio é kōo é kuēꞌé Jesuu ntaꞌa Xúva kō dɨ.

⁴Tē dɨ́ katuvi dukuan ña ñuxiví a ne, ñá viī ñá dutu, tsi dóo īó dutu táta Levii e ntaxéꞌe ña doméni vatā ó kakaꞌán lei Muísee.

⁵Ntá tsi da mii tsī da ntántaváꞌa naa ña nuu i é īó e dukún kan, vatā o dé Muisee da xntítsī ñá viꞌi Xuva kō ne, kakaꞌan Xúva ko ni ñā: “Kuenta vií nto é ntāváꞌa naa nto vatā o nañéꞌe ú nto rkɨ uku Sínaií kān”, kaꞌan ña.

⁶Ntá tsi Cristú ne, níꞌi ña tsīñu e dií ka kaꞌnu é nīꞌi dútu, ñá tsīkan, tsí kade kúꞌvē ñá iña túꞌūn e dií ka vaꞌá san. Dií ka vaꞌa túꞌūn san tsi táꞌxi Xuva ko xuꞌu ña ni ko uun nuu i e dií ka vaꞌa.

⁷Tē dɨ́ ni īdiáꞌvi kueꞌen túꞌūn é ītúvi diꞌna ne, ñā dɨ́ ni ntīo é kōo tuku túꞌun vē.

⁸Ntá tsi ña ni xkúntee iní Xuva kō nté ō dé ñaꞌa san kuenta iña túꞌun āta sán ne, uve naꞌa mí kakāꞌan ñá ni ñā:Xuꞌu é Xuva ntō ne, kakaꞌán u ni ntō:Koto nto tsí xee ntúvi vedá kāꞌan xtúku ú nī ña Israeé nī ña Judaa nté koo vií ña.

⁹É tūku kakaꞌán u ni ña vatā ó kakaꞌán u ni ñata ñantūvi dá irkáa ú ntaꞌa ña e nátāvá u ña ñuú Egítō;tsi ñá ni de ntāa ña é kākaꞌán u ni ñā.Dukuān ne, ña ni íde ú ña kuenta, kaꞌan Xúva kō.

¹⁰Kakaꞌan xtúku Xuva kō:Túꞌūn saꞌá kaꞌán u nī ña Israee dá xee ntúvi tsīkan.Tsuꞌun u túꞌūn ko ini dɨkɨ ña.Xnteé naꞌá u túꞌūn kó nima ña.Kidáā ne, vií u Xuva ñā ne,vií ña ñaꞌa ko.

¹¹Ñá kantīo é xe un xé un ña nakuāꞌa ñataꞌan ña ni ñaviꞌi ña xoo e Xuva ña,tsí un ntɨɨ́ ntɨɨ̄ ñá ne, é īni ñá ko,nté īꞌxá e dií ka lúꞌntī un tsi nté ñatā, ña e dií ka atā.

¹²Kada kaꞌnu iní u ni ña kuētsí ña ne,nté uun ito ká ña nakáꞌān ko nuu i é kīni kaa é idé ña, kaꞌan Xúva kō.

¹³Dá kakāꞌan Xúva ko īña túꞌūn xeé san ne, ncho kaꞌan ñá tsi e kuáta tūꞌun é tuví diꞌna. Da nēé ka nuu i é kuatā, é ña kaidiáꞌvi ká i ne, ña náꞌā ká kutūvi.