Read Comaltepec Chinantec Juan 14 Bible Online

Juan 14 - Comaltepec Chinantec bible

Juan 14

¹Jo̱ mɨ˜ cangɨ́ˋ e casɨ́ɨngˉ Jesús có̱o̱ꞌ˜ i̱ Tʉ́ˆ Simón do, jo̱baꞌ lalab casɨ́ꞌˉguɨr i̱ dseaˋ quiáꞌrˉ do: —Jaˋ jmáangꞌ˜ yaang˜naꞌ fɨꞌíˆ ꞌnʉ́ꞌˋ, dseaˋ jáꞌˉ nɨcalɨ́ngˉnaꞌ júuˆ quiáꞌˉ Fidiéeˇ, jo̱guɨ jaˋ jmitúngˆ óoˊnaꞌ có̱o̱ꞌ˜ júuˆ quiéˉe, co̱ꞌ ꞌnéˉ e jábꞌˉ nilíingˋnaꞌ cajo̱.

²Co̱ꞌ fɨˊ lɨ˜ guiing˜ Tiquiéˆe fɨˊ ñifɨ́ˉ, fébꞌˋ jóoˋ e quiáꞌˉ nigüeáˋ jaléngꞌˋ dseaˋ quiáꞌrˉ; co̱faꞌ jaˋ lɨ́ɨˊ lajo̱, jo̱baꞌ jaˋ mɨˊ cafɨ́ɨˉɨ ꞌnʉ́ꞌˋ jóng e tɨˊ lɨ˜ ninínꞌˆn e niguiaaˉ guiʉ́ˉ fɨˊ lɨ˜ nigüɨníˋnaꞌ có̱o̱ꞌ˜ jnea˜ fɨˊ lɨ˜ guiing˜ Tiquiéˆe faco̱ꞌ lajo̱.

³Jo̱ mɨ˜ tɨˊ lɨ˜ cangɨ́ˋ e niguiaaˉ guiʉ́ˉ e fɨˊ lɨ˜ nigüɨníˋnaꞌ do, jo̱baꞌ nigáabˊtú̱u̱ caléꞌˋ catú̱ˉ fɨˊ la e laco̱ꞌ nitøøˉ ꞌnʉ́ꞌˋ e nigüɨlíingˋnaꞌ có̱o̱ꞌ˜ jnea˜, jo̱ fɨˊ jo̱b nidsiꞌiéˆeeꞌ co̱lɨɨng˜ có̱o̱ꞌ˜ jnea˜.

⁴Co̱ꞌ nɨñíbˆ ꞌnʉ́ꞌˋ jie˜ fɨˊ lɨ˜ ninínꞌˆn jo̱guɨ nɨcuíiˋbɨꞌ cajo̱ e fɨˊ e dsijéeˊ fɨˊ jo̱.

⁵Jo̱ mɨ˜ cangɨ́ˋ e cajíngꞌˉ Jesús e júuˆ jo̱, jo̱baꞌ jaangˋ lajeeˇ i̱ dseaˋ quiáꞌrˉ do i̱ siiˋ Tomás lalab cañíirˋ quiáꞌˉ dseaˋ do: —Fíiˋi, jaˋ ne˜ jneaꞌˆ jie˜ fɨˊ lɨ˜ niguøngꞌˆ ꞌnʉˋ, jo̱baꞌ ¿jial líˋ e nilɨcuíiˋnaaꞌ jnang˜ e fɨˊ jo̱?

⁶Jo̱baꞌ lalab cañíiˋ Jesús quiáꞌˉ dseaˋ do: —Jneab˜ dseaˋ lɨ́ɨnˊn e fɨˊ e laco̱ꞌ cuǿøngˋ niguilíingˋ dseaˋ fɨˊ ñifɨ́ˉ, jo̱guɨ jneab˜ dseángꞌˉ cuǿøˉø ꞌnʉ́ꞌˋ e lɨñíˆnaꞌ jaléꞌˋ júuˆ quiáꞌˉ Fidiéeˇ, jo̱guɨ jí̱i̱ꞌ˜ jnea˜bɨ cuǿøˉø ꞌnʉ́ꞌˋ cajo̱ e seengˋnaꞌ cøøngˋ có̱o̱ꞌ˜ Fidiéeˇ lata˜. Jo̱ jí̱i̱ꞌ˜ laꞌeáangˊ có̱o̱ꞌ˜ jneab˜ cuǿøngˋ e niguilíingˋ dseaˋ fɨˊ quiniˇ Tiquíˆiiꞌ Fidiéeˇ.

⁷Jo̱ song nɨcuíimˋ ꞌnʉ́ꞌˋ guiʉ́ˉ jnea˜ lana, jo̱baꞌ nilɨcuíimˋbaꞌ Tiquiéˆe cajo̱; jo̱ dsʉꞌ latɨˊ lanab nɨnaangˋ cuíingˋnaꞌ dseaˋ do, co̱ꞌ nɨcañíimˊbaꞌre.

⁸Jo̱ mɨ˜ calɨ́ˉ féꞌˋ Jesús e júuˆ na, jo̱baꞌ lalab cañíiˋ jaangˋguɨ dseaˋ quiáꞌrˉ i̱ siiˋ Lii˜ do jo̱ casɨ́ꞌrˉ dseaˋ do: —Fíiˋi, cuǿøꞌ˜ jneaꞌˆ fɨˊ e nineeng˜naaꞌ Tiquíˆiiꞌ dseaˋ guiing˜ ñifɨ́ˉ, jo̱ jí̱i̱ꞌ˜ jo̱baꞌ mɨ́ɨꞌ˜naaꞌ ꞌnʉˋ.

⁹Jo̱baꞌ lalab cañíiˋ Jesús quiáꞌˉ i̱ Lii˜ do jo̱ cajíñꞌˉ: —Lii˜, nɨngóobˊ eáangˊ e seenˉ jee˜ ꞌnʉ́ꞌˋ, jo̱ ¿su jaˋ mɨˊ calɨcuíimˋbɨꞌ jnea˜? Dsʉco̱ꞌ jaléngꞌˋ dseaˋ i̱ níingˉ jnea˜, jo̱baꞌ i̱ dseaˋ íˋ níimˉbre Tiquiéˆe cajo̱; jo̱baꞌ ¿jialɨꞌˊ mɨ́ɨꞌ˜ jnea˜ fɨˊ e laco̱ꞌ nimáang˜naꞌ Tiquíˆiiꞌ?

¹⁰Jo̱ ¿su jaˋ jáꞌˉ lɨ́ɨnꞌˋ ꞌnʉˋ e jnea˜ cøømˋ seengˋ có̱o̱ꞌ˜ Tiquíˆiiꞌ jo̱guɨ e Tiquíˆiiꞌ cøømˋ seeiñˋ có̱o̱ꞌ˜ jnea˜ cajo̱? Co̱ꞌ jaléꞌˋ e fɨ́ɨˉɨ ꞌnʉ́ꞌˋ na jaˋ fáꞌˋa e la tɨɨnˉ ꞌñiáꞌˋa, co̱ꞌ Tiquíˆiiꞌ i̱ seengˋ cøøngˋ có̱o̱ꞌ˜ jnea˜ do, dseaˋ íbˋ i̱ jmóoˋ lají̱i̱ꞌ˜ ta˜ quiáꞌˆ.

¹¹Jo̱ ꞌnéˉ lɨñíˆbaꞌ e jnea˜ cøømˋ seenˉ có̱o̱ꞌ˜ Tiquíˆiiꞌ, jo̱guɨ lajo̱bɨ írˋ seeiñˋ cøøngˋ có̱o̱ꞌ˜ jnea˜ cajo̱, jo̱ song jaˋ jáꞌˉ lɨ́ɨngˋnaꞌ e júuˆ jo̱, jo̱baꞌ lɨco̱ꞌ jáꞌˉ güɨlíingˋnaꞌ júuˆ quiéˉe mɨ˜ móoˉnaꞌ jaléꞌˋ e jmóoˋo.

¹²Jo̱guɨ e labaꞌ jmɨtaaˆ óoˊnaꞌ cajo̱, e doñiˊ i̱i̱ˋ i̱ jáꞌˉ lɨ́ɨngˋ júuˆ quiéˉe, jo̱baꞌ nijméˉbre jaléꞌˋ e quɨ́ɨꞌ˜ jmɨɨ˜ lɨ́ꞌˆ laco̱ꞌguɨ jí̱i̱ꞌ˜ la nɨcajméˉ jnea˜ cajo̱; jo̱ dsʉꞌ seaˋbaꞌ do e nijmérˉ e niguoꞌˆguɨ eáangˊ, co̱ꞌ jnea˜ ninínꞌˆn e nija̱a̱ˆ có̱o̱ꞌ˜ Tiquíˆiiꞌ dseaˋ guiing˜ ñifɨ́ˉ.

¹³Jo̱ jaléꞌˋ e nimɨ́ɨꞌ˜naꞌ Fidiéeˇ laꞌeáangˊ có̱o̱ꞌ˜ jnea˜, jo̱baꞌ jneab˜ nijmee˜e jaléꞌˋ e jo̱ quíiˉnaꞌ, jo̱ lajo̱baꞌ nijmiféngꞌˊ dseaˋ Tiquiéˆe Fidiéeˇ laꞌeáangˊ có̱o̱ꞌ˜ jaléꞌˋ e jmóoˋ jnea˜ do.

¹⁴Jo̱ doñiˊ eebˋ cuǿøngˋ líˋ jmee˜ jnea˜ song camɨ́ɨꞌ˜naꞌ Fidiéeˇ lajo̱ laꞌeáangˊ có̱o̱ꞌ˜ jnea˜. Mɨ˜ cacuøˊ Jesús júuˆ e nisíngˉ Fidiéeˇ Jmɨguíˋ quiáꞌrˉ

¹⁵’Jo̱ fɨ́ɨˉguɨ́ɨ ꞌnʉ́ꞌˋ e song dseángꞌˉ lajangꞌˆ júuˆ ꞌneáangˋnaꞌ jnea˜, jo̱baꞌ nijméeˆbaꞌ nʉ́ʉꞌ˜naꞌ júuˆ quiéˉe jóng.

¹⁶Jo̱baꞌ jnea˜ nimɨ́ɨꞌ˜ɨ Tiquíˆiiꞌ dseaˋ guiiñ˜ ñifɨ́ˉ e nisíñˉ Jaangˋ i̱ nijmɨcó̱o̱ꞌ˜ ꞌnʉ́ꞌˋ, jo̱ e jo̱b lɨ́ɨˊ Jmɨguíˋ quiáꞌˉ Fidiéeˇ có̱o̱ꞌ˜ e cuøꞌˊ ꞌnʉ́ꞌˋ e lɨñíˆnaꞌ jaléꞌˋ júuˆ quiáꞌˉ Fidiéeˇ. Jo̱ e Jmɨguíˋ do contøømˉ nilɨseengˋ có̱o̱ꞌ˜ ꞌnʉ́ꞌˋ. Jo̱ jaléngꞌˋ dseaˋ i̱ jaˋ mɨˊ caꞌíngꞌˋ jnea˜, jo̱baꞌ jaˋ quɨ́ꞌˉ jmɨɨ˜ faꞌ e niꞌíñꞌˋ e Jmɨguíˋ do, co̱ꞌ jaˋ mɨˊ cangárˉ o̱ꞌguɨ cuíirˋ cajo̱; jo̱ dsʉꞌ ꞌnʉ́ꞌˋguɨ nɨcuíiˋbaꞌ e Jmɨguíˋ do, co̱ꞌ nɨseemˋ có̱o̱ꞌ˜ ꞌnʉ́ꞌˋ lana, jo̱guɨ tɨˊ lɨ˜ nitɨ́ˉ íꞌˋ e nilɨseemˋ fɨˊ áaˊnaꞌ cajo̱.

¹⁷(null)

¹⁸’Jo̱ fɨ́ɨˉguɨ́ɨ ꞌnʉ́ꞌˋ e jaˋ quɨ́ꞌˉ jmɨɨ˜ faꞌ niseáan˜n ꞌnʉ́ꞌˋ e lafaꞌ ꞌnɨ́ɨngˉnaꞌ, co̱ꞌ nigáabˊtú̱u̱ caléꞌˋ catú̱ˉ jo̱ nilɨseemˋtú̱u̱ có̱o̱ꞌ˜ ꞌnʉ́ꞌˋ.

¹⁹Jo̱ lajeeˇ lab, jaléngꞌˋ dseaˋ i̱ jaˋ cuíingˋ jnea˜ joˋ niníingˉguɨr jnea˜; jo̱ dsʉꞌ ꞌnʉ́ꞌˋ nimáam˜tu̱ꞌ jnea˜ jo̱guɨ contøømˉ nilɨseengˋnaꞌ có̱o̱ꞌ˜ jnea˜ cajo̱, co̱ꞌ seemˋ jnea˜ có̱o̱ꞌ˜ ꞌnʉ́ꞌˋ lata˜.

²⁰Jo̱ ie˜ jo̱b nilɨlíꞌˆnaꞌ e jnea˜ cøømˋ seenˉ có̱o̱ꞌ˜ Tiquiéˆe, jo̱guɨ ꞌnʉ́ꞌˋ cøømˋ seengˋnaꞌ có̱o̱ꞌ˜ jnea˜, jo̱guɨ jnea˜ cøømˋ seenˉ có̱o̱ꞌ˜ ꞌnʉ́ꞌˋ cajo̱.

²¹Jo̱guɨ i̱ dseaˋ i̱ íngꞌˋ júuˆ quiéˉe jo̱guɨ jmóorˋ nʉ́ʉꞌr˜ jaléꞌˋ e júuˆ jo̱, jo̱baꞌ i̱ dseaˋ íˋ cuøˊ li˜ e dseángꞌˉ lajamꞌˆbaꞌ e ꞌneáaiñˋ jnea˜, jo̱ lajo̱b Tiquiéˆe nijmiꞌneáamˋbre i̱ dseaˋ i̱ jmiꞌneáangˋ jnea˜ do, jo̱guɨ jnea˜ nijmiꞌneáamˋbaa i̱ dseaˋ íˋ cajo̱, jo̱guɨ niꞌéeˆbaare jial dseángꞌˉ lɨ́ɨnˊn.

²²Jo̱baꞌ cañíiˋ jaangˋguɨ dseaˋ guitúungˋ quiáꞌˉ Dseaˋ Jmáangˉ i̱ siiˋ Judas, dsʉꞌ o̱ꞌ i̱ Iscariote do, jo̱ casɨ́ꞌrˉ dseaˋ do lala: —Fíiˋi, ¿jialɨꞌˊ e niꞌéengˊ uøꞌˊ fɨˊ quiniˇ jneaꞌˆ jo̱ o̱ꞌ fɨˊ quiniˇ jaléngꞌˋ dseaˋ i̱ jaˋ lɨ́ɨngˊ dseaˋ góoˋnaaꞌ?

²³Jo̱baꞌ cañíiˋ Jesús quiáꞌˉ i̱ Judas do jo̱ cajíñꞌˉ: —Jaléngꞌˋ dseaˋ i̱ jmiꞌneáangˋ jnea˜, jo̱baꞌ jmóoˋbre nʉ́ʉꞌr˜ jaléꞌˋ júuˆ quiéˉe; jo̱ Tiquiéˆe Fidiéeˇ nijmiꞌneáamˋbre i̱ dseaˋ íˋ cajo̱, jo̱ lajo̱b Tiquiéˆe co̱lɨɨng˜guɨ có̱o̱ꞌ˜ jnea˜ cøømˋ nilɨse̱e̱ˉnaaꞌ có̱o̱ꞌ˜ i̱ dseaˋ íˋ.

²⁴Jo̱guɨ i̱ dseaˋ i̱ jaˋ ꞌneáangˋ jnea˜, jo̱baꞌ jaˋ jmóorˋ nʉ́ʉꞌr˜ jaléꞌˋ júuˆ quiéˉe. Jo̱ jalébꞌˋ e júuˆ e fáꞌˋ jnea˜ la, o̱ꞌ dseángꞌˉ júuˆ quiéˉe ꞌñiáꞌˋa co̱ꞌ e quiáꞌˉ Tiquíˆbaaꞌ, jo̱ íbˋ dseaˋ i̱ casíingˋ jnea˜ fɨˊ jmɨgüíˋ la.

²⁵’Jo̱ fɨ́ɨˉɨ ꞌnʉ́ꞌˋ jaléꞌˋ e júuˆ la lajeeˇ e táamˋbɨ́ɨ có̱o̱ꞌ˜ ꞌnʉ́ꞌˋ fɨˊ jmɨgüíˋ la;

²⁶jo̱ dsʉꞌ mɨ˜ ninínꞌˆn fɨˊ ñifɨ́ˉ fɨˊ lɨ˜ guiing˜ Tiquiéˆe, jo̱baꞌ dseaˋ íbˋ i̱ nisíngˉ Jmɨguíˋ quiáꞌrˉ cuaiñ˜ quiéˉe e laco̱ꞌ nijmɨcó̱o̱ꞌ˜ ꞌnʉ́ꞌˋ, jo̱ lajo̱baꞌ niguiéngꞌˊ áaˊnaꞌ jaléꞌˋ e júuˆ e nɨcafɨ́ɨˉɨ ꞌnʉ́ꞌˋ lajeeˇ e nɨcataang˜naaꞌ co̱lɨɨng˜, jo̱guɨ niꞌéꞌˉ ꞌnʉ́ꞌˋ jaléꞌˋ e ꞌnéˉ ñíˆnaꞌ cajo̱.

²⁷’Jo̱ mɨ˜ tɨˊ lɨ˜ nitɨ́ˉ íꞌˋ e ninínꞌˆn, jo̱baꞌ nisée˜e có̱o̱ꞌ˜ ꞌnʉ́ꞌˋ e nilɨseemˋbaꞌ juguiʉ́ˉ có̱o̱ꞌ˜ Fidiéeˇ. Jo̱guɨ nicuǿøˆbaa ꞌnʉ́ꞌˋ laco̱ꞌguɨ la seengˋ jnea˜ juguiʉ́ˉ có̱o̱ꞌ˜ dseaˋ do, jo̱ dsʉꞌ jaˋ nicuøøˉ e jo̱ laco̱ꞌguɨ la cuøˊ dseaˋ i̱ jaˋ cuíingˋ Fidiéeˇ. Jo̱baꞌ fɨ́ɨˉguɨ́ɨ ꞌnʉ́ꞌˋ e jaˋ jmeáangꞌ˜ yaang˜naꞌ fɨꞌíˆ uii˜ quiáꞌˉ jaléꞌˋ e nidsingɨ́ɨngˉnaꞌ, o̱ꞌguɨ fǿøngꞌ˜naꞌ cajo̱ uii˜ quiáꞌˉ jaléꞌˋ e jo̱.

²⁸Jo̱ nɨcanʉ́ʉˉbaꞌ e nɨcafɨ́ɨˉɨ ꞌnʉ́ꞌˋ lamɨ˜ jéengˊguɨ e ninínꞌˆn fɨˊ lɨ˜ guiing˜ Tiquíˆiiꞌ, jo̱ dsʉꞌ nigáabˊtú̱u̱ jo̱ nilɨseemˋtú̱u̱ có̱o̱ꞌ˜ ꞌnʉ́ꞌˋ caléꞌˋ catú̱ˉ. Jo̱ faco̱ꞌ dseángꞌˉ jáꞌˉ e ꞌnʉ́ꞌˋ ꞌneáangˋnaꞌ jnea˜, jo̱baꞌ calɨꞌiáamˋ óoˊnaꞌ jóng mɨ˜ calɨñíˆnaꞌ e ninínꞌˆn fɨˊ lɨ˜ guiing˜ Tiquíˆiiꞌ faco̱ꞌ lajo̱, co̱ꞌ íˋbre dseaˋ niingˉguɨr laco̱ꞌguɨ jnea˜.

²⁹Jo̱ uiing˜ e jo̱baꞌ e fɨ́ɨˉɨ ꞌnʉ́ꞌˋ jaléꞌˋ e la e lɨ́ꞌˆ laco̱ꞌ mɨ˜ nitɨ́ˉ íꞌˋ e nidsijéeˊ jaléꞌˋ e jo̱, jo̱ lajo̱guɨbaꞌ e jáꞌˉ nilíingˋnaꞌ jaléꞌˋ e júuˆ quiéˉe do.

³⁰’Jo̱ lana joˋ ꞌgaꞌˊ lɨ˜ sɨɨng˜guɨ́ɨ có̱o̱ꞌ˜ ꞌnʉ́ꞌˋ, co̱ꞌ nɨjaquiéemˊ i̱ fii˜ i̱ ꞌlɨngꞌˆ i̱ quiʉꞌˊ ta˜ fɨˊ jmɨgüíˋ la, jo̱ dsʉꞌ nañiˊ faꞌ jaˋ bíˋ óoˋ i̱ fii˜ i̱ ꞌlɨngꞌˆ do e niquiʉ́ꞌrˉ jnea˜ ta˜,

³¹dsʉꞌ lajo̱b dseángꞌˉ nɨsɨꞌíˆ e nidsijéeˊ e laco̱ꞌ nilɨñiˊ jaléngꞌˋ dseaˋ jmɨgüíˋ e ꞌneáamˋbaa Tiquíˆiiꞌ jo̱guɨ e jmóoˋo lají̱i̱ꞌ˜ ta˜ e nɨcaquiʉꞌrˊ quiéˉbaa. Jo̱ mɨ˜ catóꞌˊ e féꞌˋ Jesús jaléꞌˋ e júuˆ na, jo̱baꞌ cajíñꞌˉ casɨ́ꞌrˉ i̱ dseaˋ guijángˋ quiáꞌrˉ do lala: —Ráangˉnaꞌ na, jo̱ maꞌuøøˉduuꞌ la.