Read Comaltepec Chinantec Juan 20 Bible Online

Juan 20 - Comaltepec Chinantec bible

Juan 20

¹Jo̱ laꞌuii˜ jmɨɨ˜ quiáꞌˉ e semaan˜ mɨ˜ cangɨ́ˋ e jmɨɨ˜ do, e eeˋbɨ eáangˊ lajeeˇ nʉ́ꞌˉguɨ e nijneáˋ, cangóˉ Yáˆ i̱ seengˋ fɨˊ Magdala fɨˊ lɨ˜ caꞌángˉ Jesús; jo̱ mɨ˜ caguiérˉ fɨˊ jo̱, jo̱baꞌ cangárˉ e nɨsɨjé̱bꞌˆ e cu̱u̱˜ e cajlɨ́ɨˉ e fɨˊ ooˉ tooˋ e lɨ˜ caꞌángˉ dseaˋ do.

²Jo̱ mɨ˜ tɨˊ lɨ˜ calɨlíꞌrˆ e joˋ seengˋ Jesús e fɨˊ dsíiˊ tóˋ é̱e̱ˋ do, jo̱baꞌ caquɨmꞌˉtu̱r güɨꞌíiˊ e fɨˊ lɨ˜ guiing˜ Tʉ́ˆ Simón co̱lɨɨng˜guɨ có̱o̱ꞌ˜ i̱ dseaˋ quiáꞌˉ Jesús i̱ ꞌneáaiñˋ eáangˊ do. Jo̱baꞌ lalab cajíngꞌˉ i̱ Yáˆ i̱ seengˋ fɨˊ Magdala do mɨ˜ caguiéiñꞌˉ jo̱ casɨ́ꞌˉreiñꞌ: —Nɨnicaguíimˋ dseaˋ Fíiˋnaaꞌ e fɨˊ lɨ˜ caꞌáiñˉ do, jo̱ jaˋ ne˜naaꞌ jiéꞌˋ fɨˊ lɨ˜ nɨcangojéeiñˋ.

³Jo̱ mɨ˜ canúuˉ Tʉ́ˆ Simón có̱o̱ꞌ˜guɨ i̱ dseaˋ rúiñꞌˋ i̱ jaangˋguɨ do lají̱i̱ꞌ˜ júuˆ e quié̱e̱ˋ i̱ Yáˆ i̱ seengˋ fɨˊ Magdala, jo̱baꞌ dsifɨbˊ caꞌuøøiñˋ e cangolíiñˆ lajmɨnáˉ e fɨˊ lɨ˜ caꞌángˉ Jesús do.

⁴Jo̱ lajɨˋ huáamˉbre ngolíiñˉ cuí̱i̱rˋ, lɨfaꞌ i̱ jaangˋguɨ do jmɨnáˉguɨ cangórˉ laco̱ꞌ Tʉ́ˆ Simón, jo̱baꞌ jéengˊguɨbre caguiérˉ e fɨˊ lɨ˜ caꞌángˉ Jesús do.

⁵Jo̱ mɨ˜ caguiérˉ fɨˊ jo̱, dsifɨbˊ catúuiñˊ jo̱ cajǿørˉ fɨˊ dsíiˊ e tooˋ é̱e̱ˋ do, jo̱ cangárˉ e ꞌmɨꞌˊ e cabeangꞌˉ dseaˋ do e laco̱ꞌ mɨlɨ́ɨbˊ néeˊ, jo̱ lɨfaꞌ jaˋ caꞌírˉ e fɨˊ dsíiˊ tooˋ é̱e̱ˋ do.

⁶Jo̱ jiʉb˜ cøøngˋ lajo̱ caguiéˉ Tʉ́ˆ Simón, jo̱ condséebˊ caꞌírˉ e fɨˊ dsíiˊ tóˋ é̱e̱ˋ do mɨ˜ caguiérˉ, jo̱baꞌ cangáˉbre e ꞌmɨꞌˊ e cabeangꞌˉ dseaˋ do cajo̱ e laco̱ꞌ mɨlɨ́ɨbˊ néeˊ;

⁷jo̱guɨ cangáˉbɨr cajo̱ e dob ró̱o̱ˋ e ꞌmɨꞌˊ e calɨꞌíingˆ ta˜ e quiáꞌˉ cabéꞌˋ mogui˜ dseaˋ do, jo̱ cangárˉ e jaˋ ró̱o̱ˋ caꞌˊ laco̱ꞌ ró̱o̱ˋ e ꞌmɨꞌˊ e cabeangꞌˉ dseaˋ do, jo̱ tɨˊ doguɨjiʉb ró̱o̱ˋ e sɨbéengˋ caꞌˊ laco̱ꞌ ró̱o̱ˋ e jo̱.

⁸Jo̱ mɨ˜ cangɨ́ˋ jo̱, caꞌíˉ i̱ dseaˋ i̱ jaangˋguɨ do i̱ caguiéˉ laꞌuii˜ e fɨˊ tooˋ é̱e̱ˋ do, jo̱baꞌ cangáˉbre jaléꞌˋ e calɨ́ˉ e fɨˊ dsíiˊ tóˋ é̱e̱ˋ do, jo̱ dseángꞌˉ jábꞌˉ calɨ́iñˉ.

⁹Jo̱ dsʉꞌ i̱ dseaˋ gángˉ do dseángꞌˉ jaˋ mɨˊ cangámꞌˋbɨr laco̱ꞌ la féꞌˋ fɨˊ ni˜ jiˋ quiáꞌˉ Fidiéeˇ e cajmeꞌˊ dseaˋ malɨɨ˜guɨ eáangˊ lɨ˜ féꞌˋ e dseángꞌˉ sɨꞌíˆbaꞌ e nijí̱ꞌˊtu̱ Jesús.

¹⁰Jo̱ mɨ˜ cangɨ́ˋ jo̱, caquɨmꞌˉtu̱ i̱ dseaˋ quiáꞌˉ Jesús i̱ gángˉ do fɨˊ quiáꞌrˉ. Mɨ˜ cajmijnéengˋ ꞌñiaꞌˊ Jesús fɨˊ quiniˇ Yáˆ i̱ seengˋ fɨˊ Magdala

¹¹Jo̱ mɨ˜ caguiéˉtu̱ Yáˆ e fɨˊ lɨ˜ caꞌángˉ Jesús, jo̱baꞌ dob caje̱rˊ quɨꞌrˊ fɨˊ caluuˇ e tooˋ é̱e̱ˋ do. Jo̱ lajeeˇ siñꞌˊ quɨꞌrˊ dob catúuiñˊ e laco̱ꞌ nijǿørˉ e fɨˊ dsíiˊ tóˋ é̱e̱ˋ do,

¹²jo̱baꞌ cangárˉ e neáangˊ gángˉ ángeles i̱ quiꞌˊ ꞌmɨꞌˊ téˋ e fɨˊ dsíiˊ tóˋ é̱e̱ˋ do, jo̱ jaaiñꞌˋ do guiiñ˜ lɨ˜ catɨro̱o̱ˇ mogui˜ Jesús jo̱guɨ jaaiñꞌˋ do guiiñ˜ fɨˊ lɨ˜ canéˉ tɨɨˉ dseaˋ do.

¹³Jo̱ i̱ ángeles do cajmɨngɨ́ꞌrˉ i̱ dseamɨ́ˋ do jo̱ casɨ́ꞌˉreiñꞌ: —Janúꞌˋ, dseamɨ́ˋ, ¿jialɨꞌˊ sinꞌˊ quɨꞌˋ? Jo̱baꞌ cañíiˋ i̱ dseamɨ́ˋ do quiáꞌˉ i̱ ángeles do jo̱ casɨ́ꞌˉreiñꞌ: —Quɨ́ꞌˋɨ dsʉco̱ꞌ jaˋ ñiiˉ i̱i̱ˋ nɨnicaguíingˋ Fíiˋi i̱ caꞌáangˉ dseaˋ e fɨˊ dsíiˊ tóˋ na, jo̱ jaˋ ñiiˉ jie˜ nɨcangojéeiñˋ lana.

¹⁴Jo̱ jo̱bɨ lɨco̱ꞌ nɨcatóꞌˊ e jíñꞌˉ e jo̱ mɨ˜ tɨˊ lɨ˜ cajingꞌˊ ꞌñiaꞌrˊ, jo̱ cangáiñˉ Jesús e dob nɨsingꞌˊ dseaˋ do cáaiñˋ, jo̱ dsʉꞌ jí̱i̱ꞌ˜ jaˋ ñirˊ e íbˋ dseaˋ do.

¹⁵Jo̱baꞌ cajíngꞌˉ Jesús casɨ́ꞌrˉ i̱ dseamɨ́ˋ do lala: —Janúꞌˋ, dseamɨ́ˋ, ¿jialɨꞌˊ sinꞌˊ quɨꞌˋ? ¿I̱˜ sinꞌˊ ꞌnánꞌˋ lana? Dsʉꞌ i̱ dseamɨ́ˋ do ɨˊ dsíirˊ e i̱ dseaˋ i̱ jmóoˋ íˆ e dsíiˊ iáˋ dob i̱ singꞌˊ sɨ́ɨngˋ có̱o̱ꞌr˜ do, jo̱baꞌ lalab casɨ́ꞌrˉ dseaˋ do: —Janúꞌˋ, é̱e̱ˊ, song ꞌnʉbˋ nɨcaguiinꞌ˜ i̱ Fíiˋi do, jo̱baꞌ iin˜n jméeꞌ˜ jnea˜ júuˆ jie˜ fɨˊ lɨ˜ nɨcaguijéenꞌˋre, jo̱baꞌ fɨˊ jo̱b niꞌnénꞌˆnre.

¹⁶Jo̱baꞌ cañíiˋ Jesús quiáꞌˉ i̱ dseamɨ́ˋ do lala jo̱ casɨ́ꞌˉreiñꞌ: —¡Yáˆ! Jo̱baꞌ cajingꞌˊ ꞌñiaꞌˊ i̱ Yáˆ do jo̱ cajíñꞌˉ có̱o̱ꞌ˜ jmíiˊ hebreo lala: —¡Rabuni! —e guǿngꞌˋ tɨfaꞌˊ.

¹⁷Jo̱baꞌ cañíiˋtu̱ Jesús quiáꞌˉ i̱ dseamɨ́ˋ do jo̱ casɨ́ꞌˉreiñꞌ: —Jaˋ güɨ́nꞌˋ jnea˜, co̱ꞌ nabɨ jaˋ mɨˊ cají̱ꞌˋtu̱ rúꞌˋnaaꞌ có̱o̱ꞌ˜ Tiquiéˆe. Jo̱baꞌ fɨ́ɨˉɨ ꞌnʉˋ lana e niguønꞌˆ güɨjméeꞌ˜ júuˆ jaléngꞌˋ dseaˋ i̱ nɨlɨ́ɨngˊ laco̱ꞌ rúnꞌˋn e nijmijíngꞌˊtu̱ rúꞌˋnaaꞌ có̱o̱ꞌ˜ i̱ lɨ́ɨngˊ Tiquiéˆe jo̱guɨ íˋbɨ i̱ lɨ́ɨngˊ Tiquíiˆnaꞌ cajo̱, jo̱ íbˋ Fidiéeˇ quiéˉe jo̱guɨ íbˋ Fidiéeˇ quíiˉnaꞌ cajo̱.

¹⁸Jo̱ mɨ˜ cangɨ́ˋ jo̱, cangámꞌˉ i̱ Yáˆ i̱ seengˋ fɨˊ Magdala do jo̱ cangojmeáaꞌ˜bre júuˆ jaléngꞌˋ i̱ dseaˋ quiáꞌˉ Jesús do e nɨcangámˉbre dseaˋ do jo̱guɨ casɨ́ꞌˉbɨreiñꞌ cajo̱ jaléꞌˋ e júuˆ e caꞌíñꞌˋ quiáꞌˉ dseaˋ do. Mɨ˜ cajmijnéengˋ ꞌñiaꞌˊ Jesús fɨˊ quiniˇ dseaˋ quiáꞌrˉ

¹⁹Jo̱ mɨ˜ caꞌíˉ nʉʉˋ ꞌñiaꞌˊ ie˜ jmɨɨ˜ jo̱, e jmɨɨ˜ laꞌuii˜ quiáꞌˉ semaan˜ do, jo̱ ie˜ jo̱ nɨnicasɨtɨ́ɨngˊ rúngꞌˋ i̱ dseaˋ quiáꞌˉ Jesús do fɨˊ co̱o̱ˋ dsíiˊ ꞌnʉ́ʉˊ lɨ˜ jnɨˊ røøˋ, co̱ꞌ ꞌgǿmꞌˋbre jaléngꞌˋ dseaˋ góorˋ dseaˋ Israel fɨng song calɨlíꞌˆ íˋ e nɨseángꞌˋtu̱ rúngꞌˋ i̱ dseaˋ do caléꞌˋ catú̱ˉ. Jo̱ lajeeˇ neáangˊ i̱ dseaˋ do, jo̱b mɨ˜ tɨˊ lɨ˜ caꞌíˉ Jesús fɨˊ jo̱, jo̱ casíngꞌˋ ꞌñiaꞌrˊ guiáꞌˆ jóoˋ e lɨ˜ neáangˊ i̱ dseaˋ quiáꞌrˉ do, jo̱ lalab caféngꞌˊneiñꞌ do jo̱ casɨ́ꞌˉreiñꞌ: —¡Güɨlɨseemˋbaꞌ juguiʉ́ˉ júuˆ røøˋ!

²⁰Jo̱ mɨ˜ cangɨ́ˋ e cajíngꞌˉ Jesús e júuˆ na, jo̱baꞌ canaaiñˋ eꞌrˊ i̱ dseaˋ quiáꞌrˉ do fɨˊ lɨ˜ cacuɨ́ꞌˋ guotɨɨrˉ có̱o̱ꞌ˜guɨ moꞌuǿørˊ. Jo̱baꞌ i̱ dseaˋ quiáꞌrˉ do eáamˊ calɨꞌiáangˋ dsíirˊ mɨ˜ cangángˉtu̱r i̱ Fiir˜ do.

²¹Jo̱ mɨ˜ cangɨ́ˋ jo̱, lalab cajíngꞌˉtu̱ Jesús casɨ́ꞌrˉ i̱ dseaˋ quiáꞌrˉ do: —¡Güɨlɨseemˋbaꞌ juguiʉ́ˉ júuˆ røøˋ! Jo̱ lɨ́ꞌˆ laco̱ꞌguɨ Tiquíˆiiꞌ casíiñˋ jnea˜ fɨˊ jmɨgüíˋ la, jo̱baꞌ lajo̱b cajo̱ jnea˜ nisɨ́ɨnˆn ꞌnʉ́ꞌˋ fɨˊ jmɨgüíˋ la.

²²Jo̱ mɨ˜ cangɨ́ˋ jo̱, cajiʉ́ʉrˉ fɨˊ lɨ˜ neáangˊ i̱ dseaˋ quiáꞌrˉ do jo̱ casɨ́ꞌˉreiñꞌ: —Íingꞌ˜naꞌ Jmɨguíˋ quiáꞌˉ Fidiéeˇ.

²³Jo̱guɨ doñiˊ i̱i̱ˋ dseaˋ i̱ niꞌíingˇnaꞌ dseeˉ quiáꞌˉ, jo̱baꞌ niꞌíimˉ dseeˉ quiáꞌˉ i̱ dseaˋ íˋ; jo̱guɨ doñiˊ i̱i̱ˋ dseaˋ i̱ jaˋ niꞌíingˇnaꞌ dseeˉ quiáꞌˉ, jo̱baꞌ jaˋ niꞌíingˉ dseeˉ quiáꞌˉ i̱ dseaˋ íˋ cajo̱. Mɨ˜ jáꞌˉ calɨ́ngˉ Móˆ e cají̱ꞌˊtu̱ Jesús

²⁴Jo̱ jaangˋ dseaˋ guitúungˋ quiáꞌˉ Jesús i̱ siiˋ Móˆ dseaˋ suung˜, íbˋ i̱ jaˋ seengˋ ie˜ lamɨ˜ cajmijnéengˋ ꞌñiaꞌˊ Jesús jee˜ i̱ dseaˋ quiáꞌrˉ do.

²⁵Jo̱ mɨ˜ cangɨ́ˋ jo̱, lalab casɨ́ꞌˉ i̱ dseaˋ caguiaangˉ do Móˆ jo̱ cajíñꞌˉ: —Nɨcaneem˜baaꞌ Fíiˋnaaꞌ. Jo̱ dsʉꞌ Móˆ lalab cañíirˋ quiáꞌˉ i̱ dseaˋ rúiñꞌˋ do jo̱ casɨ́ꞌˉreiñꞌ: —Jaˋ jáꞌˉ nilíinˋn e fóꞌˋnaꞌ na song jaˋ nimoo˜o guóorˋ lɨ˜ caꞌiáˉ mɨ́ꞌˆ clavo, jo̱guɨ song jaˋ nijnúuˆu niguóoˋo lacaangˋ lɨ˜ sɨcuɨ́ꞌˋ quiáꞌrˉ, jo̱guɨ song jaˋ nigüɨ́ꞌˆɨ moꞌuǿørˊ e lɨ˜ caꞌiáˉ ñisʉ̱ꞌˋ.

²⁶Jo̱ mɨ˜ cangɨ́ˋ jñiáˉ jmɨɨ˜ lajo̱, caseángꞌˋtu̱ rúngꞌˋ i̱ dseaˋ quiáꞌˉ Jesús do caléꞌˋ catú̱ˉ fɨˊ co̱o̱ˋ sɨnʉ́ʉˆ lɨ˜ sɨjnɨˊ røøˋ, jo̱ ie˜ jo̱ quíimꞌ˜ Móˆ có̱o̱ꞌ˜ i̱ dseaˋ rúiñꞌˋ caguiaangˉguɨ do. Jo̱ lajeeˇ jo̱b caꞌíˉtu̱ Jesús fɨˊ dsíiˊ sɨnʉ́ʉˆ e lɨ˜ neáaiñꞌˊ do jo̱ casíngꞌˋtu̱ ꞌñiaꞌrˊ guiáꞌˆ jóoˋ, jo̱ lalab caféngꞌˊtu̱reiñꞌ do jo̱ cajíñꞌˉ: —¡Güɨlɨseemˋbaꞌ juguiʉ́ˉ júuˆ røøˋ!

²⁷Jo̱ mɨ˜ cangɨ́ˋ jo̱, lalab casɨ́ꞌˉ Jesús i̱ Móˆ do jo̱ cajíñꞌˉ: —Jǿøˉ guóoˋo, jo̱guɨ jnúuˉ niguóoꞌˋ lɨ˜ sɨcuɨ́ꞌˋ quiéˉe la, jo̱guɨ jnúuˉ niguóoꞌˋ e lɨ˜ sɨcuɨ́ꞌˋ moꞌuøøˉ la cajo̱. Jaˋ jmooꞌˋ e jaˋ jáꞌˉ lɨ́ɨnꞌˋ jo̱ jáꞌˉ güɨlíinꞌˋ lana. ¡Jnea˜bɨ la!

²⁸Jo̱ mɨ˜ canúuˉ Móˆ e jo̱, jo̱baꞌ cañíirˋ quiáꞌˉ Jesús jo̱ cajíñꞌˉ: —¡Dseángꞌˉ e jáꞌˉ e ꞌnʉbˋ Fíiˋi jo̱guɨ ꞌnʉbˋ Fidiéeˇ quiéˉe cajo̱!

²⁹Jo̱baꞌ cañíiˋtu̱ Jesús quiáꞌˉ Móˆ jo̱ casɨ́ꞌrˉ dseaˋ do jo̱ cajíñꞌˉ: —¿Su carˋ cañinꞌˊ jnea˜, jo̱guɨbaꞌ jáꞌˉ calɨ́nꞌˉ e nɨcají̱bꞌˊtú̱u̱? Dsʉꞌ juguiʉ́ˉguɨ quiáꞌˉ i̱ dseaˋ i̱ jáꞌˉ calɨ́ngˉ e nɨcají̱bꞌˊtú̱u̱ e jí̱i̱ꞌ˜ jaˋ mɨˊ cangáamˋbɨr jnea˜. E uiing˜ e cajmeꞌˊ Juan e jiˋ la

³⁰Jo̱ lajeeˇ cateáangˉ Jesús fɨˊ jmɨgüíˋ la, jmiguiʉbˊ jaléꞌˋ e li˜ e quɨ́ɨꞌr˜ jmɨɨ˜ cajméerˋ fɨˊ quiniˇ jaléngꞌˋ dseaˋ guitúungˋ quiáꞌrˉ, jo̱ dsʉꞌ jmiguiʉˊbɨ jaléꞌˋ e jo̱ jaˋ sɨlɨ́ɨˋ e fɨˊ ni˜ jiˋ la.

³¹Jo̱ dsʉꞌ lají̱i̱ꞌ˜ e sɨlɨ́ɨˋ e fɨˊ ni˜ jiˋ la nɨcalɨ́ˉ e lɨ́ꞌˆ laco̱ꞌ jáꞌˉ nilíingˋ jaléngꞌˋ dseaˋ e dseángꞌˉ Jesús lɨ́ɨiñˊ i̱ Dseaˋ Jmáangˉ i̱ nicá̱ˋ nifɨˊ quiáꞌˉ dseaˋ Israel jo̱guɨ i̱ lɨ́ɨngˊ i̱ Jó̱o̱ˊ Fidiéeˇ i̱ camɨ́ɨngꞌ˜ do, jo̱ lajo̱baꞌ jaléngꞌˋ dseaˋ i̱ jáꞌˉ nilíingˋ júuˆ quiáꞌˉ dseaˋ do quɨ́ꞌˉ jmɨɨ˜ e nilɨseeiñˋ cøøngˋ có̱o̱ꞌ˜ Fidiéeˇ lata˜.