Read Comaltepec Chinantec 2 Tesalonicenses 3 Bible Online

2 Tesalonicenses 3 - Comaltepec Chinantec bible

2 Tesalonicenses 3

¹Jo̱ lɨ˜ ngóoˊ cadséngˉguɨ fɨ́ɨˉɨ ꞌnʉ́ꞌˋ, dseaˋ rúꞌˋnaaꞌ, féengꞌ˜naꞌ Fidiéeˇ uíiꞌ˜ jneaꞌˆ e laco̱ꞌ jmɨnáˉguɨ niniꞌˉ júuˆ quiáꞌˉ Dseaˋ Jmáangˉ fɨˊ laꞌúngˉ fɨˊ jmɨgüíˋ. Jo̱guɨ féengꞌ˜naꞌ dseaˋ do cajo̱ e jaléngꞌˋ dseaˋ i̱ ninúˉ e júuˆ do niꞌímꞌˋbre e ngocángˋ dsíirˊ lɨ́ꞌˆ laco̱ꞌguɨ cajmeeˉ ꞌnʉ́ꞌˋ mɨ˜ canʉ́ʉˉnaꞌ júuˆ quiáꞌˉ Dseaˋ Jmáangˉ.

²Jo̱guɨ mɨ́ɨꞌ˜naꞌ Fidiéeˇ cajo̱ e laco̱ꞌ nileáiñˋ jneaꞌˆ jee˜ jaléngꞌˋ dseaˋ i̱ ꞌlɨngꞌˆ i̱ sooˋ dsíiˊ, co̱ꞌ jaˋ lajɨɨngˋ dseaˋ jáꞌˉ lɨ́ɨiñˋ júuˆ quiáꞌˉ Dseaˋ Jmáangˉ.

³Jo̱ dseángꞌˉ jmitib˜ Fidiéeˇ lají̱i̱ꞌ˜ júuˆ cuørˊ, jo̱ jmɨcó̱o̱ꞌ˜bɨr ꞌnʉ́ꞌˋ e jaˋ nijmɨtúngˆ óoˊnaꞌ lají̱i̱ꞌ˜ fɨˊ teáangˉnaꞌ có̱o̱ꞌ˜ Dseaˋ Jmáangˉ, jo̱guɨ nijmɨꞌǿiñꞌˋ ꞌnʉ́ꞌˋ e laco̱ꞌ jaˋ nijmɨgǿøngˋ fii˜ i̱ ꞌlɨngꞌˆ ꞌnʉ́ꞌˋ cajo̱.

⁴Jo̱guɨ nɨsɨtaˇ dsiˋnaaꞌ e Fíiˋnaaꞌ Dseaˋ Jmáangˉ nijmɨcó̱o̱ꞌr˜ ꞌnʉ́ꞌˋ e jmooˋbaꞌ jo̱guɨ e jméeˆbɨꞌ jaléꞌˋ e nɨcasíiꞌ˜naaꞌ ꞌnʉ́ꞌˋ do.

⁵Jo̱ mɨ́ɨꞌ˜naaꞌ Fíiˋnaaꞌ Dseaˋ Jmáangˉ e nicuǿꞌrˉ ꞌnʉ́ꞌˋ e líꞌˆnaꞌ jial tíiˊ ꞌneáangˋ Fidiéeˇ ꞌnʉ́ꞌˋ jo̱guɨ e nicuǿꞌrˉ ꞌnʉ́ꞌˋ bíˋ quiáꞌrˉ e nitéꞌˋnaꞌ e féngꞌˊ óoˊnaꞌ lají̱i̱ꞌ˜ fɨˊ teáangˉnaꞌ laco̱ꞌguɨ cateáꞌˉ Dseaˋ Jmáangˉ ꞌñiaꞌrˊ. La guíimˋbaꞌ ꞌnéˉ e jméˉ dseaˋ ta˜

⁶Jo̱ síiꞌ˜guɨ́ɨꞌ ꞌnʉ́ꞌˋ, dseaˋ rúꞌˋnaaꞌ dseaˋ quiáꞌˉ Dseaˋ Jmáangˉ, laꞌeáangˊ có̱o̱ꞌ˜ júuˆ quiáꞌˉ Fíiˋnaaꞌ Dseaˋ Jmáangˉ, e jaˋ quɨngꞌˆ yaang˜naꞌ jee˜ jaléngꞌˋ dseaˋ quiáꞌˉ Dseaˋ Jmáangˉ i̱ jaˋ iing˜ jméˉ ta˜, co̱ꞌ i̱ dseaˋ íˋ jaˋ seeiñˋ cøøngˋ có̱o̱ꞌ˜ jaléꞌˋ júuˆ e casíiꞌ˜naaꞌ ꞌnʉ́ꞌˋ lamɨ˜ jéengˊguɨ.

⁷Co̱ꞌ nɨñíbˆ ꞌnʉ́ꞌˋ guiʉ́ˉ jial dseángꞌˉ ꞌnéˉ nilɨseengˋnaꞌ lɨ́ꞌˆ laco̱ꞌguɨ nɨcalɨsé̱ˋ jneaꞌˆ jee˜ ꞌnʉ́ꞌˋ; dsʉco̱ꞌ jmoobˉ jneaꞌˆ ta˜ lajeeˇ calɨsé̱ˋnaaꞌ jee˜ ꞌnʉ́ꞌˋ,

⁸jo̱ jí̱i̱ꞌ˜ co̱o̱ˋ néeꞌ˜ jaˋ camɨ́ˆnaaꞌ e niquiee˜naaꞌ quiáꞌˉ dseaˋ e jaˋ niquíˆnaaꞌ quiáꞌrˉ. Co̱ꞌ lɨ́ꞌˆ lɨˊ cajmɨꞌúungˋnaaꞌ e cajmóˆnaaꞌ ta˜ uǿøˋ jmɨ́ɨbˋ e laco̱ꞌ jaˋ cacuǿøꞌ˜naaꞌ iihuɨ́ɨˊ jí̱i̱ꞌ˜ jaangˋ ꞌnʉ́ꞌˋ.

⁹Dsʉꞌ o̱faꞌ jaˋ catɨ́ɨngˉnaaꞌ e nimɨ́ɨꞌ˜naaꞌ ꞌnʉ́ꞌˋ e nijmɨcó̱o̱ꞌˇnaꞌ jneaꞌˆ, co̱ꞌ lɨ́ꞌˆ lɨˊ calɨꞌii˜naaꞌ e niꞌéeˆnaaꞌ ꞌnʉ́ꞌˋ jial dseángꞌˉ ꞌnéˉ jméeˆnaꞌ tab˜.

¹⁰Co̱ꞌ mɨ˜ cataang˜ jneaꞌˆ jee˜ ꞌnʉ́ꞌˋ, cacuǿøˆbaaꞌ ꞌnʉ́ꞌˋ lají̱i̱ꞌ˜ e júuˆ la e féꞌˋ lala: Doñiˊ i̱i̱ˋ dseaˋ i̱ jaˋ iing˜ jméˉ ta˜, jaˋ cuǿꞌˆnaꞌr e nidǿꞌrˉ.

¹¹Dsʉꞌ lanaguɨ nɨcalɨneb˜ jneaꞌˆ e seemˋ ꞌnʉ́ꞌˋ e fɨ́ngꞌˉnaꞌ jméeˆnaꞌ ta˜, jo̱ lɨco̱ꞌ tɨˊ óoˊnaꞌ e quíingꞌ˜naꞌ lɨ˜ jaˋ catɨ́ɨmˉbaꞌ.

¹²Jo̱ jaléngꞌˋ i̱ dseaˋ íˋ nisíiꞌ˜naaꞌr, laꞌeáangˊ có̱o̱ꞌ˜ júuˆ quiáꞌˉ Fíiˋnaaꞌ Dseaˋ Jmáangˉ, e güɨjméeˋbre ta˜ laco̱ꞌ catɨ́ɨngˉ, jo̱ lajo̱baꞌ nilíꞌrˋ jaléꞌˋ e ꞌnérˉ lajeeˇ e taaiñ˜ fɨˊ jmɨgüíˋ la.

¹³Jo̱baꞌ fɨ́ɨˉguɨ́ɨ ꞌnʉ́ꞌˋ, dseaˋ rúꞌˋnaaꞌ dseaˋ quiáꞌˉ Dseaˋ Jmáangˉ, jie˜ mɨˊ tʉ́ˋnaꞌ e jmooˋnaꞌ e guiʉ́ˉ lɨ́ꞌˆ laco̱ꞌguɨ jí̱i̱ꞌ˜ fɨˊ nɨteáangˉnaꞌ.

¹⁴Jo̱guɨ song seengˋ jaangˋ lajeeˇ ꞌnʉ́ꞌˋ i̱ jaˋ nʉ́ʉꞌ˜ lají̱i̱ꞌ˜ júuˆ e féꞌˋ jneaꞌˆ e fɨˊ ni˜ jiˋ la, jo̱baꞌ quie̱ˋnaꞌ cuente røøˋ i̱˜ íˋ jo̱ joˋ sɨcøøngˆguɨ yaang˜naꞌ có̱o̱ꞌr˜, jo̱ lajo̱b i̱ dseaˋ íˋ nilíˋ ɨꞌˋ lɨ́ɨiñˉ quiáꞌˉ jaléꞌˋ e jmóorˋ do.

¹⁵Dsʉꞌ o̱ꞌ uíiꞌ˜ jo̱ ꞌníꞌˋ nimáang˜naꞌre cajo̱, co̱ꞌ lɨ́ꞌˆ lɨˊ ꞌnéˉ føngꞌˆnaꞌr jial laco̱ꞌ catɨ́ɨngˉ e nilɨseemˋbre lɨ́ꞌˆ laco̱ꞌguɨ la catɨ́ɨngˉ e føngꞌˆnaꞌ jaangˋguɨ dseaˋ rúngꞌˋnaꞌ dseaˋ quiáꞌˉ Dseaˋ Jmáangˉ. Júuˆ lɨ˜ cadséngˉ quiáꞌˉ Paaˉ e catɨ́ɨngˉ dseaˋ seengˋ fɨˊ Tesalónica

¹⁶Jo̱ ꞌñiaꞌˊ Fidiéeˇ i̱ cuøˊ juguiʉ́ˉ júuˆ røøˋ güɨjméeˋbre lajo̱ có̱o̱ꞌ˜ ꞌnʉ́ꞌˋ contøøngˉ có̱o̱ꞌ˜ doñiˊ eeˋgo̱ jmooˋnaꞌ; jo̱guɨ güɨlɨseemˋ dseaˋ do contøøngˉ có̱o̱ꞌ˜ ꞌnʉ́ꞌˋ cajo̱.

¹⁷Jnea˜ Paaˉ jmoꞌˊo e júuˆ guicó̱o̱ꞌˇ e catɨ́ɨngˉ ꞌnʉ́ꞌˋ la có̱o̱ꞌ˜ layaang˜ guóoˋo. Jo̱ jí̱i̱ꞌ˜ lanabaꞌ e tɨ́ɨnˋn jmóoˋo có̱o̱ꞌ˜ jaléꞌˋ jiˋ quiéˉe caguieeˉguɨ cajo̱ e laco̱ꞌ lɨñiˊ dseaˋ e jneab˜ dseaˋ jmoꞌˊo.

¹⁸Jo̱ güɨꞌíibˋ Fíiˋnaaꞌ Dseaˋ Jmáangˉ güeaꞌˆ quiáꞌrˉ fɨˊ jee˜ ꞌnʉ́ꞌˋ lajaléngꞌˋnaꞌ. Jo̱ lanab jí̱i̱ꞌ˜ féꞌˋ jiˋ tɨ́ˋ tú̱ˉ quiáꞌˉ Paaˉ e catɨ́ɨngˉ jaléngꞌˋ dseaˋ quiáꞌˉ Dseaˋ Jmáangˉ i̱ seengˋ fɨˊ Tesalónica.