Read Comaltepec Chinantec Santiago 4 Bible Online

Santiago 4 - Comaltepec Chinantec bible

Santiago 4

¹Jo̱ lalab fɨ́ɨˉguɨ́ɨ ꞌnʉ́ꞌˋ, dseaˋ rúꞌˋnaaꞌ dseaˋ quiáꞌˉ Dseaˋ Jmáangˉ: ¿Jie˜ fɨˊ lɨ˜ naangˋ uiing˜ jaléꞌˋ e jmiquíngꞌˉ óoˊnaꞌ jo̱guɨ jaléꞌˋ mɨ́ɨꞌ˜ e jmooˋnaꞌ laꞌóꞌˋ rúngꞌˋnaꞌ? Jo̱ jmooˋnaꞌ lajo̱ co̱ꞌ contøømˉ suungˋnaꞌ jaléꞌˋ e lɨ́ˋ óoˊnaꞌ fɨˊ jmɨgüíˋ la, jo̱guɨ jmangꞌˉ e gabˋ ɨˊ óoˊnaꞌ, ¿jáˆ jáꞌˉ?

²Co̱ꞌ mɨ˜ eeˋgo̱ iing˜naꞌ e seaˋ fɨˊ jmɨgüíˋ, jo̱ mɨ˜ líꞌˆnaꞌ e jaˋ cuǿøngˋ nilíꞌˋnaꞌ e jo̱, jo̱baꞌ jie˜ jaˋ nijngámꞌˆbaꞌ dseaˋ rúngꞌˋnaꞌ jóng. Jo̱guɨ eáamˊ dsihuɨ́ɨngˊnaꞌ mɨ˜ eeˋgo̱ seaˋ quiáꞌˉ dseaˋ rúngꞌˋnaꞌ, jo̱ dsʉco̱ꞌ jaˋ líꞌˋguɨꞌ e jo̱, jo̱baꞌ eáamˊ jmooˋnaꞌ ꞌniiˋ có̱o̱ꞌr˜, ¿jáˆ jáꞌˉ? Dsʉꞌ jaˋ mɨˊ calɨꞌˊnaꞌ jaléꞌˋ e iing˜naꞌ do co̱ꞌ jaˋ mɨˊ camɨ́ɨꞌ˜naꞌ Fidiéeˇ e nicuøꞌrˊ ꞌnʉ́ꞌˋ e jo̱.

³Jo̱ dsʉꞌ mɨ˜ mɨ́ɨꞌ˜naꞌre eeˋgo̱ iing˜naꞌ, jaˋ nicuǿꞌrˉ ꞌnʉ́ꞌˋ jaléꞌˋ e mɨ́ɨꞌ˜naꞌre do, dsʉco̱ꞌ mɨ́ɨꞌ˜naꞌr lají̱i̱ꞌ˜ e jaˋ dseengˋ e lɨco̱ꞌ jmiꞌiáangˋ óoˊnaꞌ yaam˜baꞌ.

⁴¡Dseaˋ ꞌlɨngꞌˆ ꞌnʉ́ꞌˋ, co̱ꞌ lɨ́ɨngˊnaꞌ dseaˋ i̱ tú̱ˉ ɨ̱́ꞌˉ! ¿Jáˆ ñíˆ ꞌnʉ́ꞌˋ e mɨ˜ iing˜naꞌ e jmiꞌiáangˋ óoˊnaꞌ có̱o̱ꞌ˜ lají̱i̱ꞌ˜ e seaˋ fɨˊ jmɨgüíˋ la, jo̱baꞌ ꞌníꞌˋ máamˊbaꞌ Fidiéeˇ jóng dseaˋ guiiñ˜ ñifɨ́ˉ? Co̱faꞌ lɨ́ꞌˆ doñiˊ i̱i̱ˋ dseaˋ i̱ iing˜ e nijmiꞌiáangˋ dsíirˊ có̱o̱ꞌ˜ lají̱i̱ꞌ˜ e seaˋ fɨˊ jmɨgüíˋ la, jo̱baꞌ niꞌuíiñˉ jóng jaangˋ dseaˋ i̱ ꞌníꞌˋ níingˉ Fidiéeˇ.

⁵Co̱ꞌ e lɨɨng˜ uiim˜baꞌ e tó̱o̱ˋ fɨˊ ni˜ jiˋ quiáꞌˉ Fidiéeˇ lala: “Fidiéeˇ dseángꞌˉ e lajamꞌˉbaꞌ eáangˊ ꞌneáaiñˋ jneaa˜aaꞌ, co̱ꞌ íˋbingꞌ cacuøꞌˊ lajaangˋ lajaangˋ jneaa˜aaꞌ e jmɨguíˋ có̱o̱ꞌ˜ e se̱e̱ˉnaaꞌ.”

⁶Dsʉꞌ eáamˊ jmɨcó̱o̱ꞌ˜ dseaˋ do jneaa˜aaꞌ, co̱ꞌ dsíngꞌˉ guiúiñˉ có̱o̱ꞌ˜ jneaa˜aaꞌ, dseaˋ jaˋ catɨ́ɨˉnaaꞌ lajo̱, co̱ꞌ lalab féꞌˋ fɨˊ ni˜ jiˋ quiáꞌrˉ: “Dseángꞌˉ teábˋ séeˋ Fidiéeˇ quiáꞌˉ jaléngꞌˋ dseaˋ i̱ jmɨcǿøngꞌ˜ yaang˜, dsʉꞌ eáamˊ guiʉ́ˉ jmɨcó̱o̱ꞌr˜ jaléngꞌˋ dseaˋ i̱ jaˋ jmóoˋ lajo̱ co̱ꞌ ñiˊbre e ꞌnéˉ e nijmɨcó̱o̱ꞌ˜ Fidiéeˇ quiáꞌrˉ.”

⁷Jo̱baꞌ jáangꞌ˜ yaang˜naꞌ fɨˊ jaguóˋ Fidiéeˇ, jo̱guɨ jaˋ cuøꞌˊnaꞌ fɨˊ yaang˜naꞌ e jmijíingˆnaꞌ i̱ fii˜ i̱ ꞌlɨngꞌˆ, jo̱ lajo̱baꞌ i̱ do nidsihuíiñˉ fɨˊ lɨ˜ seengˋnaꞌ.

⁸Güɨquiéengˊguɨꞌ fɨˊ quiniˇ Fidiéeˇ, jo̱ dseaˋ do nijaquiéengˊguɨr fɨˊ quiníˆnaꞌ cajo̱. Jo̱guɨ jaléngꞌˋ ꞌnʉ́ꞌˋ, dseaˋ dseeˉ dseaˋ quiˊ, tʉ́ʉˊnaꞌ jaléꞌˋ e jaˋ dseengˋ e jmooˋnaꞌ, jo̱ jmɨsɨ́ɨngˆnaꞌ jaléꞌˋ e gaˋ e ɨˊ óoˊnaꞌ, co̱ꞌ jaléngꞌˋ ꞌnʉ́ꞌˋ lɨ́ɨngˊnaꞌ dseaˋ i̱ tú̱ˉ neáangˊ dsíiˊ, dsʉco̱ꞌ iing˜naꞌ teáangˉnaꞌ fɨˊ guiʉ́ˉ có̱o̱ꞌ˜ Dseaˋ Jmáangˉ jo̱guɨ iim˜bɨꞌ cajo̱ e jméeˆnaꞌ jaléꞌˋ e gaˋ e seaˋ fɨˊ jmɨgüíˋ la.

⁹Quíiꞌ˜naꞌ, jo̱guɨ jméeˆnaꞌ e lɨ́ɨngˉnaꞌ fɨꞌíˆ quiáꞌˉ jaléꞌˋ dseeˉ e nɨcaꞌeeˉnaꞌ do. Jo̱guɨ jaˋ dseengˋ fɨng song ningɨ́ɨˆnaꞌ uíiꞌ˜ quiáꞌˉ jaléꞌˋ e dseeˉ jo̱, co̱ꞌ ꞌnéˉ e quɨꞌˆbaꞌ uíiꞌ˜ quiáꞌˉ e dseeˉ quíiˆnaꞌ do. Jo̱guɨ fɨng song e iáangˋ óoˊnaꞌ có̱o̱ꞌ˜ jaléꞌˋ dseeˉ quíiˆnaꞌ e nɨcarøøngˋnaꞌ do, jo̱baꞌ ꞌnéˉ e nilíingˉnaꞌ e fɨꞌíbˆ jóng uíiꞌ˜ quiáꞌˉ jaléꞌˋ e jo̱.

¹⁰Jo̱guɨ mɨ˜ líꞌˋnaꞌ e røøngˋnaꞌ dseeˉ, jo̱baꞌ ꞌnéˉ e jaˋ nijmɨráangˉ yaang˜naꞌ fɨˊ quiniˇ Fidiéeˇ, jo̱ lajo̱baꞌ dseaˋ do nijmɨcó̱o̱ꞌr˜ ꞌnʉ́ꞌˋ e seengˋnaꞌ cøøngˋ có̱o̱ꞌr˜. Jaˋ cuǿꞌˆnaꞌ dseeˉ jaléngꞌˋ dseaˋ rúngꞌˋnaꞌ

¹¹Dseaˋ rúꞌˋnaaꞌ dseaˋ quiáꞌˉ Dseaˋ Jmáangˉ, jaˋ fóꞌˋnaꞌ gaˋ uii˜ quiáꞌˉ jaléngꞌˋ dseaˋ rúngꞌˋnaꞌ. Dsʉco̱ꞌ i̱ dseaˋ i̱ féꞌˋ gaˋ uii˜ quiáꞌˉ dseaˋ rúngꞌˋ o̱si cuøꞌˊreiñꞌ dseeˉ é, jo̱baꞌ lɨ́ɨˊ laco̱ꞌ e féꞌrˋ gaˋ uii˜ quiáꞌˉ júuˆ quiáꞌˉ Fidiéeˇ jóng, jo̱ o̱ꞌguɨ jmitir˜ lají̱i̱ꞌ˜ e júuˆ quiáꞌˉ dseaˋ do. Co̱ꞌ jaléngꞌˋ i̱ dseaˋ i̱ jaˋ jmɨꞌgóˋ jaléꞌˋ e júuˆ do, jo̱baꞌ lɨ́ɨˊ laco̱ꞌ gabˋ nɨféꞌrˋ uii˜ quiáꞌˉ e júuˆ jo̱ e lafaꞌ e nijmérˉ nʉ́ʉꞌr˜ e jo̱ laco̱ꞌ sɨꞌíˆ.

¹²Jo̱ jaamˋ dseaˋ féngꞌˊ seengˋ, jo̱ íbˋ i̱ cacuøˊ e júuˆ do. Jo̱guɨ íˋbɨ cajo̱ i̱ tɨɨngˋ quidsiˊ íꞌˋ røøˋ quiáꞌˉ dseaˋ, jo̱ lají̱i̱ꞌ˜ íˋbɨ cajo̱ dseaˋ i̱ tɨɨngˋ láangˋ dseaˋ jmɨgüíˋ jee˜ jaléꞌˋ dseeˉ quiáiñꞌˉ o̱si cuøꞌrˊ dseaˋ iihuɨ́ɨˊ laco̱ꞌ catɨ́ɨngˉ é uíiꞌ˜ quiáꞌˉ jaléꞌˋ e jo̱. Jo̱guɨ ꞌnʉˋ, ¿i̱˜ lɨ́ɨnꞌˉ e lɨnꞌˊ e seaˋ fɨˊ e nicuǿꞌˆ dseaˋ rúngꞌˋ dseeˉ? Jaˋ ne˜naaꞌ e˜ nidsijéeˊ dsaꞌóˋ iéeˊ

¹³Jo̱guɨ lana, dseaˋ rúꞌˋnaaꞌ dseaˋ quiáꞌˉ Dseaˋ Jmáangˉ, nʉ́ʉˉnaꞌ jaléꞌˋ e nifɨ́ɨˆɨ ꞌnʉ́ꞌˋ la, jaléngꞌˋ ꞌnʉ́ꞌˋ, dseaˋ jmɨcǿøngꞌ˜ yaang˜naꞌ e fóꞌˋnaꞌ lala: “Dsaꞌóˋ iéeˊ nidséˆnaaꞌ fɨˊ fɨɨˋ la o̱si fɨˊ fɨɨˋ do é, jo̱ fɨˊ jo̱b nitaang˜naaꞌ co̱o̱ˋ ji̱i̱ˋ e jmóˆnaaꞌ ta˜ lɨꞌˋ cuuˉ.”

¹⁴Jo̱ ¿jialɨꞌˊ ɨˊ óoˊnaꞌ lajo̱?, co̱ꞌ jí̱i̱ꞌ˜ jaˋ mɨˊ ñíˆbɨꞌ e˜ nidsingɨ́ɨngˉnaꞌ lɨ˜ dsaꞌóˋ lɨ˜ iéeˊ. Co̱ꞌ ꞌnʉ́ꞌˋ lɨ́ɨngˊnaꞌ lafaꞌ jníiˊ tiiˋ, co̱ꞌ e jo̱baꞌ e jnéengˋ jí̱i̱ꞌ˜ lajeeˇ cateáˋ jo̱ niꞌíimˉ jóng.

¹⁵Jo̱baꞌ jaˋ dseengˋ e foꞌˆnaꞌ lajo̱, dsʉꞌ lalabaꞌ e catɨ́ɨngˉ e nifoꞌˆnaꞌ: “Song cuøˊ Fidiéeˇ fɨˊ lajo̱ e se̱e̱ˉguɨ́ɨꞌ fɨˊ jmɨgüíˋ la, jo̱baꞌ nilíˋ jaléꞌˋ e ꞌnéˉ líˋ jóng.”

¹⁶Dsʉꞌ ꞌnʉ́ꞌˋguɨ lɨ́ꞌˉ rɨquɨbꞌˊ ɨˊ óoˊnaꞌ, jo̱baꞌ eáamˊ jmɨcǿøngꞌ˜ yaang˜naꞌ có̱o̱ꞌ˜ jaléꞌˋ e fóꞌˋnaꞌ e nijméeˆnaꞌ. ¿Su jaˋ ñíˆnaꞌ e mɨ˜ jmooˋnaꞌ e jmɨcǿøngꞌ˜ yaang˜naꞌ lajo̱, gabˋ lɨ́ɨˊ?

¹⁷Jo̱ ꞌnéˉ e tó̱o̱ˋ óoˊnaꞌ e la cajo̱: Song ñibˊ jaangˋ dseaˋ jaléꞌˋ e guiʉ́ˉ e ꞌnéˉ jmérˉ, jo̱ dsʉꞌ song jaˋguɨ jmitir˜ jaléꞌˋ e jo̱, jo̱baꞌ jmɨrǿmˋ dseeˉ ꞌñiaꞌrˊ jóng.