Read Comaltepec Chinantec 1 Juan 4 Bible Online

1 Juan 4 - Comaltepec Chinantec bible

1 Juan 4

¹Jo̱baꞌ fɨ́ɨˉguɨ́ɨ ꞌnʉ́ꞌˋ, dseaˋ rúꞌˋnaaꞌ i̱ ꞌneáanˋn eáangˊ, jaˋ jáꞌˉ güɨlíingˋnaꞌ quiáꞌˉ jaléngꞌˋ dseaˋ i̱ féꞌˋ e laꞌeáangˊ có̱o̱ꞌ˜ Jmɨguíˋ quiáꞌˉ Fidiéeˇbaꞌ guiarˊ e júuˆ quiáꞌrˉ do, co̱ꞌ laꞌuii˜ jangꞌˉ cá̱ˆnaꞌ cuante su e júuˆ e guiaˊ i̱ dseaˋ do guiarˊ laꞌeáangˊ có̱o̱ꞌ˜ Jmɨguíˋ quiáꞌˉ Fidiéeˇ o̱si laꞌeáangˊ có̱o̱ꞌ˜ bíˋ quiáꞌˉ i̱ dseaˋ i̱ ꞌlɨngꞌˆ dob é. Co̱ꞌ fɨ́ɨmˊ dseaˋ nɨseeiñˋ lana e jmɨgóorˋ e féꞌrˋ cuaiñ˜ quiáꞌˉ Fidiéeˇ, dsʉꞌ o̱ꞌ jáꞌˉ e lajo̱.

²Jo̱ nilɨñíbˆ ꞌnʉ́ꞌˋ i̱˜ i̱ guiaˊ júuˆ laꞌeáangˊ có̱o̱ꞌ˜ Jmɨguíˋ quiáꞌˉ Fidiéeˇ: co̱ꞌ doñiˊ i̱i̱ˋ i̱ jíngꞌˉ e jáꞌˉbaꞌ cagüéngˉ Dseaˋ Jmáangˉ fɨˊ jmɨgüíˋ e lɨ́ɨiñˊ jaangˋ dseaˋ la jneaa˜aaꞌ, dseaˋ lɨ́ɨˊɨɨꞌ dseaˋ jmɨgüíˋ, jo̱baꞌ dseaˋ íbˋ i̱ guiaˊ júuˆ laꞌeáangˊ có̱o̱ꞌ˜ Jmɨguíˋ quiáꞌˉ Fidiéeˇ.

³Jo̱ doñiˊ i̱i̱ˋ i̱ féꞌˋ e jaˋ jáꞌˉ e Jesús cagüéiñˉ lajo̱, jo̱baꞌ i̱ dseaˋ íˋ jaˋ féꞌrˋ laꞌeáangˊ có̱o̱ꞌ˜ Jmɨguíˋ quiáꞌˉ Fidiéeˇ, dsʉco̱ꞌ féꞌrˋ laꞌeáangˊ có̱o̱ꞌ˜ jmɨguíˋ quiáꞌˉ i̱ ꞌlɨngꞌˆ i̱ ꞌníꞌˋ níiˉ quiáꞌˉ Dseaˋ Jmáangˉ. Co̱ꞌ nɨnʉ́ʉbˉ ꞌnʉ́ꞌˋ lamɨ˜ jéengˊguɨ e dseángꞌˉ nɨsɨꞌíˆ quijgeáamˋ bíˋ quiáꞌˉ i̱ dseaˋ i̱ ꞌlɨngꞌˆ do jee˜ dseaˋ jmɨgüíˋ, jo̱ latɨˊ lana, lab nɨquijgeáaiñˋ fɨˊ jmɨgüíˋ la.

⁴Dseaˋ rúꞌˋnaaꞌ i̱ lafaꞌ jó̱o̱ˋo̱, ꞌnʉ́ꞌˋ seengˋnaꞌ laꞌeáangˊ có̱o̱ꞌ˜ Jmɨguíˋ quiáꞌˉ Fidiéeˇ, jo̱baꞌ jaˋ mɨˊ calɨꞌˊ i̱ dseaˋ i̱ ngɨˊ ta˜ jmɨgóoˋ do faꞌ nɨcajmɨgǿøiñˋ ꞌnʉ́ꞌˋ; dsʉco̱ꞌ ꞌgøngꞌˊguɨ Jmɨguíˋ quiáꞌˉ Fidiéeˇ e seengˋ jee˜ ꞌnʉ́ꞌˋ laco̱ꞌguɨ bíˋ quiáꞌˉ i̱ dseaˋ i̱ ꞌlɨngꞌˆ i̱ quijgeáangˋ jee˜ dseaˋ i̱ jaˋ cuíingˋ Fidiéeˇ.

⁵Jo̱ jaléngꞌˋ i̱ dseaˋ i̱ ngɨˊ ta˜ jmɨgóoˋ do lɨ́ɨiñˊ dseaˋ i̱ jaˋ cuíingˋ Fidiéeˇ, jo̱guɨ féꞌrˋ quiáꞌˉ lají̱i̱ꞌ˜ e iaꞌˊ e lɨgøøngˋ dseaˋ e seaˋ fɨˊ jmɨgüíˋ la, jo̱baꞌ jaléngꞌˋguɨ dseaˋ i̱ jaˋ cuíingˋ Fidiéeˇ tɨbˊ dsíirˊ núurˋ e júuˆ jo̱.

⁶Dsʉꞌ jneaa˜guɨ́ɨꞌ, dseaˋ quiáꞌˉ Fidiéebˇ lɨ́ɨˊɨɨꞌ, jo̱baꞌ doñiˊ i̱i̱ˋ dseaˋ i̱ cuíingˋ Fidiéeˇ tɨbˊ dsíirˊ núurˋ júuˆ quíˉiiꞌ. Jo̱guɨ i̱ dseaˋ i̱ jaˋ cuíingˋ Fidiéeˇ jaˋ jíiꞌr˜ júuˆ quíˉiiꞌ. Jo̱ jo̱b lɨ˜ lɨne˜naaꞌ i̱˜ i̱ dseaˋ i̱ féꞌˋ laꞌeáangˊ có̱o̱ꞌ˜ Jmɨguíˋ quiáꞌˉ Fidiéeˇ jo̱guɨ i̱˜ i̱ féꞌˋ laꞌeáangˊ có̱o̱ꞌ˜ bíˋ quiáꞌˉ i̱ dseaˋ i̱ ꞌlɨngꞌˆ do. Jaangˋ i̱ ꞌnéebˋ lɨ́ɨngˊ Fidiéeˇ

⁷Jo̱ fɨ́ɨˉguɨ́ɨ ꞌnʉ́ꞌˋ, dseaˋ rúꞌˋnaaꞌ i̱ ꞌneáanˋn eáangˊ, e dseángꞌˉ ꞌnéˉ e nijmiꞌneáangˋnaaꞌ dseaˋ rúꞌˋnaaꞌ, dsʉco̱ꞌ lajo̱b cangɨ́ɨngˋnaaꞌ cacuøꞌˊ Fidiéeˇ jneaa˜aaꞌ. Jo̱ jalémꞌˋ dseaˋ i̱ jmiꞌneáangˋ rúngꞌˋ, dseángꞌˉ jáꞌˉbaꞌ nɨcuíimˋbre Fidiéeˇ, jo̱baꞌ jó̱o̱ˊ dseaˋ dob nɨlɨ́ɨiñˊ.

⁸Co̱ꞌ doñiˊ i̱i̱ˋ i̱ jaˋ jmiꞌneáangˋ rúngꞌˋ, jo̱baꞌ jaˋ mɨˊ calɨcuíiñˋ Fidiéeˇ, co̱ꞌ jí̱i̱ꞌ˜ dseaˋ íbˋ dseaˋ lɨ́ɨiñˊ jaangˋ i̱ ꞌnéeˋ.

⁹Jo̱guɨ laco̱ꞌ nilɨlíꞌˆnaaꞌ jial tíiˊ ꞌneáaiñˋ jneaa˜aaꞌ, jo̱baꞌ Fidiéeˇ casíiñˋ i̱ Jó̱o̱rˊ camɨ́ɨngꞌ˜ do fɨˊ jmɨgüíˋ la e laco̱ꞌ laꞌeáangˊ írˋ, cøømˋ nilɨse̱e̱ˉnaaꞌ có̱o̱ꞌ˜ Fidiéeˇ lata˜.

¹⁰Jo̱ lajo̱b lɨne˜naaꞌ jial tíiˊ ꞌneáangˋ Fidiéeˇ jneaa˜aaꞌ; dsʉꞌ jneaa˜aaꞌ jaˋ cajmiꞌneáangˋnaaꞌ dseaˋ do laꞌuii˜, co̱ꞌ íˋbre dseaˋ cajmiꞌneáaiñˋ jneaa˜aaꞌ laꞌuii˜, jo̱ uiing˜ lajo̱baꞌ casíiñˋ i̱ Jó̱o̱rˊ i̱ cajúngˉ fɨˊ dseꞌˋ crúuˆ do e laco̱ꞌ caꞌíngˉ dseeˉ quíˉiiꞌ.

¹¹Jo̱baꞌ fǿnꞌˋtú̱u̱ ꞌnʉ́ꞌˋ, dseaˋ rúꞌˋnaaꞌ i̱ ꞌneáanˋn eáangˊ, e laco̱ꞌ nɨcajmiꞌneáangˋ Fidiéeˇ jneaa˜aaꞌ, lajo̱b cajo̱ jneaa˜aaꞌ ꞌnéˉ nijmiꞌneáangˋnaaꞌ dseaˋ rúꞌˋnaaꞌ.

¹²Dsʉꞌ e jáꞌˉ, jí̱i̱ꞌ˜ jaangˋ dseaˋ jaˋ quɨ́ɨꞌr˜ jmɨɨ˜ níiñˉ Fidiéeˇ dseángꞌˉ lana, jo̱ dsʉꞌ song jmiꞌneáangˋnaaꞌ rúꞌˋnaaꞌ, jo̱baꞌ seemˋ Fidiéeˇ có̱o̱ꞌ˜ jneaa˜aaꞌ contøøngˉ, jo̱guɨ dseaˋ do jmiꞌneáamˋbre jneaa˜aaꞌ laco̱ꞌ sɨꞌíˆ.

¹³Jo̱ ne˜baaꞌ røøˋ e cøømˋ se̱e̱ˉnaaꞌ có̱o̱ꞌ˜ Fidiéeˇ jo̱guɨ dseaˋ do cøømˋ seeiñˋ có̱o̱ꞌ˜ jneaa˜aaꞌ contøøngˉ laꞌeáangˊ có̱o̱ꞌ˜ Jmɨguíˋ quiáꞌrˉ e nɨcangɨ́ɨngˋnaaꞌ.

¹⁴Jo̱ co̱ꞌ jneaꞌˆ dseángꞌˉ nɨcane˜baaꞌ, jo̱baꞌ cuǿøngˋ feˇeeꞌ e jáꞌˉ e Tiquíˆiiꞌ Fidiéeˇ casíiñˋ Jó̱o̱rˊ Dseaˋ Jmáangˉ fɨˊ jmɨgüíˋ la e laco̱ꞌ nileáiñˉ dseaˋ jmɨgüíˋ jee˜ dseeˉ quiáiñꞌˉ.

¹⁵Jo̱guɨ doñiˊ i̱i̱ˋ i̱ jábꞌˉ lɨ́ɨngˋ jo̱guɨ féꞌrˋ e jáꞌˉbaꞌ e Jesús lɨ́ɨiñˊ i̱ Jó̱o̱ˊ Fidiéeˇ camɨ́ɨngꞌ˜ i̱ cagüéngˉ fɨˊ jmɨgüíˋ la, jo̱baꞌ i̱ dseaˋ íˋ cøømˋ seeiñˋ có̱o̱ꞌ˜ Fidiéeˇ, jo̱guɨ Fidiéeˇ cøømˋ seeiñˋ có̱o̱ꞌ˜ dseaˋ do cajo̱.

¹⁶Jo̱ co̱ꞌ lajo̱b lɨ́ɨˊ, jo̱baꞌ dseángꞌˉ nɨcalɨne˜baaꞌ jo̱guɨ jábꞌˉ lɨ́ɨˋɨɨꞌ cajo̱, e eáamˊ jmiꞌneáangˋ Fidiéeˇ jneaa˜aaꞌ. Jo̱guɨ co̱ꞌ jábꞌˉ e dseaˋ do lɨ́ɨiñˊ jaangˋ i̱ ꞌnéeˋ quíˉiiꞌ, jo̱baꞌ doñiˊ i̱i̱ˋ dseaˋ i̱ seengˋ i̱ jmiꞌneáangˋ rúngꞌˋ, seemˋbre cøøngˋ có̱o̱ꞌ˜ Fidiéeˇ jo̱guɨ Fidiéeˇ seemˋbre cøøngˋ có̱o̱ꞌ˜ dseaˋ do cajo̱.

¹⁷Jo̱ co̱ꞌ nɨsɨtabˇ dsiˋnaaꞌ e jmiꞌneáamˋ Fidiéeˇ jneaa˜aaꞌ laco̱ꞌ sɨꞌíˆ, jo̱baꞌ joˋ ꞌnéˉ jmóˆnaaꞌ ꞌgóꞌˋnaaꞌ mɨ˜ nitɨ́ˉ íꞌˋ e niquidsiˊ Fidiéeˇ íꞌˋ quiáꞌˉ jaléꞌˋ dseeˉ quiáꞌˉ dseaˋ, co̱ꞌ laco̱ꞌguɨ lɨ́ɨngˊ Dseaˋ Jmáangˉ ꞌñiaꞌrˊ, lajo̱b lɨ́ɨˊ jneaa˜aaꞌ fɨˊ jmɨgüíˋ la cajo̱.

¹⁸Jo̱ song se̱e̱ˉbaaꞌ e Fidiéeˇ jmiꞌneáaiñˋ jneaa˜aaꞌ, jo̱baꞌ jaˋ ꞌgóꞌˋnaaꞌ fɨˊ quiniˇ dseaˋ do mɨ˜ niquidsirˊ íꞌˋ quíˉiiꞌ. Jo̱ co̱ꞌ dseángꞌˉ laco̱ꞌ sɨꞌíbˆ jmiꞌneáangˋ dseaˋ do jneaa˜aaꞌ, jo̱baꞌ jgiéemˉ e ꞌgóꞌˋnaaꞌ do. Jo̱ song i̱i̱ˋ jneaa˜aaꞌ jáaˊ quíˉiiꞌ e ꞌgóꞌˋnaaꞌ, dsʉꞌ e jo̱ lɨ́ɨˊ uii˜ quiáꞌˉ jaléꞌˋ dseeˉ e ꞌnéˉ quíˆbaaꞌ. Jo̱baꞌ song eáangˊ líꞌˆnaaꞌ e ꞌgóꞌˋnaaꞌ, jo̱baꞌ jaˋ mɨˊ calɨta˜ dsiˋnaaꞌ e ꞌneáamˋ Fidiéeˇ jneaa˜aaꞌ dseángꞌˉ laco̱ꞌ sɨꞌíˆ.

¹⁹Jo̱ co̱ꞌ Fidiéebˇ dseaˋ laꞌuii˜ cajmiꞌneáaiñˋ jneaa˜aaꞌ, jo̱baꞌ jmiꞌneáamˋbaaꞌ dseaˋ rúꞌˋnaaꞌ jo̱guɨ jmiꞌneáamˋbaaꞌ Fidiéeˇ cajo̱.

²⁰Jo̱ song seengˋ dseaˋ i̱ jíngꞌˉ e jáꞌˉbaꞌ ꞌneáaiñˋ Fidiéeˇ, jo̱ dsʉꞌ lajeeˇ jo̱ ta˜ ꞌníꞌˋ níingˉ jaléngꞌˋ dseaˋ rúmꞌˋ jmóorˋ, jo̱baꞌ i̱ dseaˋ íˋ lɨ́ɨiñˊ jaangˋ i̱ adseaamˋ. Co̱ꞌ song jaangˋ dseaˋ jaˋ jmiꞌneáaiñˋ dseaˋ rúiñꞌˋ i̱ níiñˉ contøøngˉ, jo̱baꞌ jaˋ quɨ́ɨꞌr˜ jmɨɨ˜ nijmiꞌneáaiñˋ Fidiéeˇ, co̱ꞌ dseaˋ doguɨ jaˋ mɨˊ cangáaiñˋ jí̱i̱ꞌ˜ co̱o̱ˋ néeꞌ˜.

²¹Jo̱ ꞌñiabꞌˊ Dseaˋ Jmáangˉ cajíñꞌˉ e júuˆ quiáꞌˉ Fidiéeˇ e ꞌnéˉ lɨti˜ na: “Doñiˊ i̱i̱ˋ dseaˋ i̱ jmiꞌneáangˋ Fidiéeˇ, lajo̱b ꞌnéˉ jmiꞌneáaiñˋ dseaˋ rúiñꞌˋ cajo̱.”