Read Comaltepec Chinantec Apocalipsis (de Juan) 18 Bible Online

Apocalipsis (de Juan) 18 - Comaltepec Chinantec bible

Apocalipsis (de Juan) 18

¹Jo̱ mɨ˜ cangɨ́ˋ e jo̱ —jíngꞌˉ Juan— camánˉn jaangˋguɨ ángel i̱ jajgiáangˋ fɨˊ yʉ́ꞌˆ jmɨgüíˋ. Jo̱ eáamˊ ꞌgøngꞌˊ i̱ ángel do e quiʉꞌrˊ ta˜; jo̱ mɨ˜ tɨˊ lɨ˜ catɨsɨ́ɨiñꞌˇ fɨˊ ni˜ guóoꞌ˜ uǿˉ, dseángꞌˉ jloꞌˆ cajneáˉ có̱o̱ꞌ˜ lají̱i̱ꞌ˜ e jɨiñꞌˋ do.

²Jo̱ caféꞌrˋ có̱o̱ꞌ˜ júuˆ teáˋ lala:¡Lanab catɨ́ˋ íꞌˋ! ¡Lanab catɨ́ˋ íꞌˋ e dseángꞌˉ niꞌíingˉ e fɨɨˋ féꞌˋ e ꞌgøngꞌˊ eáangˊ e siiˋ Babilonia!¡Co̱ꞌ jmangꞌˉ jaléngꞌˋ i̱ ꞌlɨmꞌˆbingꞌ i̱ seengˋ do jmɨɨ˜ na, jo̱ jmangꞌˉ jaléꞌˋ e ꞌlɨꞌˆbaꞌ jmóorˋ, jo̱guɨ lɨ́ɨˊ lafaꞌ ꞌnʉ́ʉˊ fɨˊ lɨ˜ seángꞌˋ jaléngꞌˋ i̱ ꞌlɨngꞌˆ;jo̱ e fɨɨˋ jo̱ lɨ́ɨˊ cajo̱ lafaꞌ sɨɨˉ jaléngꞌˋ i̱ ꞌníꞌˋ níiˉ i̱ jmóoˋ jmangꞌˉ e jaˋ dseengˋ!

³Co̱ꞌ lajɨɨmˋ dseaˋ i̱ seengˋ fɨˊ laꞌúngˉ fɨˊ jmɨgüíˋ nɨcadseáˋ íimˊbre có̱o̱ꞌ˜ e lafaꞌ méeˊ e jmóoˋ e éeˋ dseaˋ dseeˉ e ꞌléerˊ có̱o̱ꞌ˜ dseañʉꞌˋ dseamɨ́ˋ i̱ o̱ꞌ quiáꞌrˉ;jo̱guɨ jaléngꞌˋ dseata˜ dseaˋ féngꞌˊ i̱ quiʉꞌˊ ta˜ fɨˊ jmɨgüíˋ nɨcaꞌéeˋbre dseeˉ cajo̱ có̱o̱ꞌ˜ i̱ dseamɨ́ˋ i̱ ꞌlɨngꞌˆ do.Jo̱guɨ jaléngꞌˋ dseaˋ i̱ seengˋ fɨˊ ni˜ guóoꞌ˜ uǿˉ jmɨgüíˋ i̱ jmóoˋ ta˜ ꞌnɨ́ɨˋ jo̱guɨ ta˜ láaˊ, eáamˊ nicalɨseáˋ cuuˉ quiáꞌrˉ laꞌeáangˊ có̱o̱ꞌ˜ jaléꞌˋ e nɨcalɨ́ꞌrˉ lajeeˇ e nɨcajméerˋ jaléꞌˋ ta˜ e ꞌléeˊ do.

⁴Jo̱ ngɨ́ˋ jo̱ canúˉu co̱o̱ˋguɨ luu˜ e jáaˊ fɨˊ yʉ́ꞌˆ jmɨgüíˋ, jo̱ lalab cajíngꞌˉ e do:Uøøngˋnaꞌ e fɨˊ jee˜ fɨɨˋ na, ꞌnʉ́ꞌˋ dseaˋ lɨ́ɨngˊnaꞌ dseaˋ quiéˉe, jo̱ lajo̱baꞌ jaˋ nibeáangꞌ˜ dseeˉ yaang˜naꞌ e nijméeˆnaꞌ ta˜ ꞌléeˊ, jo̱ lajo̱bɨ cajo̱ jaˋ nitɨ́ngˉnaꞌ jaléꞌˋ iihuɨ́ɨˊ e catɨ́ɨngˉ jaléngꞌˋ i̱ dseaˋ seengˋ e fɨˊ fɨɨˋ jo̱.

⁵Dsʉco̱ꞌ lají̱i̱ꞌ˜ dseeˉ e nɨcaꞌéeˋ jaléngꞌˋ i̱ dseaˋ íˋ, dseángꞌˉ e ñíibˊ eáangˊ e tíiˊ cartɨ́ˋ yʉ́ꞌˆ jmɨgüíˋ.Jo̱ nɨtó̱o̱bˋ dsíiˊ Fidiéeˇ jaléꞌˋ dseeˉ e nɨcaꞌéeiñꞌˋ do, jo̱baꞌ lana nɨnéebˊ guiʉ́ˉ quiáꞌˉ Fidiéeˇ e nicuǿꞌˉreiñꞌ do iihuɨ́ɨˊ uíiꞌ˜ quiáꞌˉ jaléꞌˋ e jo̱.

⁶Jo̱ qui˜naꞌ quiáꞌˉ jaléngꞌˋ i̱ dseaˋ do laco̱ꞌguɨ írˋ nɨcajméerˋ có̱o̱ꞌ˜ dseaˋ jiéngꞌˋ,jo̱ cuǿøꞌ˜naꞌr tú̱ˉ ꞌléꞌˋguɨ iihuɨ́ɨˊ laco̱ꞌguɨ jí̱i̱ꞌ˜ e nɨcajméerˋ;jo̱ cáangꞌ˜naꞌ fɨˊ dsíiˊ cuéeꞌ˜ huɨ̱́ɨ̱ˊ tú̱ˉ ya̱ꞌˊguɨ iihuɨ́ɨˊ e lɨ́ɨˊ lafaꞌ méeˊ guíꞌˆ,jo̱ cuǿøꞌ˜naꞌr e jo̱ lɨ́ꞌˆ laco̱ꞌ jí̱i̱ꞌ˜ e nɨcacuøꞌrˊ dseaˋ jiéngꞌˋ lamɨ˜ jéengˊguɨ.

⁷Jo̱ jmeáangꞌ˜naꞌr gaˋ jo̱guɨ cuǿøꞌ˜naꞌr jaléꞌˋ iihuɨ́ɨˊ, dsʉco̱ꞌ lajo̱b calɨꞌiiñ˜ ꞌñiaꞌrˊ e cateáaiñˋ juguiʉ́ˉ fɨˊ jmɨgüíˋ e cajméerˋ ta˜ ꞌnɨ́ɨngˋ ꞌñiaꞌˊ jo̱guɨ e jmiféngꞌˊ ꞌñiaꞌrˊ; co̱ꞌ lalab féꞌrˋ e jmɨjløngꞌˆ ꞌñiaꞌrˊ:“Fɨˊ lab guiing˜ jnea˜ dseángꞌˉ laco̱ꞌ guiing˜ jaangˋ dseamɨ́ˋ niingˉ i̱ quiʉꞌˊ ta˜; co̱ꞌ jaˋ lɨ́ɨngˊ jnea˜ jaangˋ dseamɨ́ˋ i̱ ꞌnɨ́ɨˉ, jo̱ dseángꞌˉ jaˋ e fɨꞌíˆ nijáaˊ quiéˉe jí̱i̱ꞌ˜ co̱o̱ˋ.”

⁸Jo̱ uii˜ quiáꞌˉ jaléꞌˋ e jo̱, jo̱baꞌ eáamˊ huɨ́ɨngˊ nidsijéeˊ quiáꞌrˉ lajeeˇ ta˜jiʉ; co̱ꞌ eáamˊ niꞌíñꞌˋ iihuɨ́ɨˊ e cuꞌˋ jngaꞌˊ jo̱guɨ ninírˋ ooˉ jo̱guɨ eáamˊ nilíiñˉ fɨꞌíˆ jo̱guɨ nicámˋbre có̱o̱ꞌ˜ jɨˋ mɨ˜ nitɨ́ˉ íꞌˋ lajo̱,dsʉco̱ꞌ ꞌñiaꞌˊ Fíiˋnaaꞌ Fidiéeˇ dseaˋ ꞌgøngꞌˊ dseaˋ ñíingˊ fɨˊ laꞌúngˉ fɨˊ jmɨgüíˋ, íbˋ dseaˋ nɨcajíngꞌˉ e nidsingɨ́ɨngˉ i̱ dseamɨ́ˋ do lajo̱ uíiꞌ˜ jaléꞌˋ dseeˉ e nɨcaꞌéerˋ.

⁹Jo̱ mɨ˜ cangɨ́ˋguɨ lajo̱, jaléngꞌˋ dseata˜ dseaˋ féngꞌˊ i̱ quiʉꞌˊ ta˜ i̱ cajméeˋ ta˜ ꞌléeˊ có̱o̱ꞌ˜ i̱ dseamɨ́ˋ do jo̱guɨ eáangˊ cajmiꞌiáangˋ dsíirˊ có̱o̱ꞌ˜ jaléꞌˋ e ꞌlɨꞌˆ e seaˋ quiáiñꞌˉ do, eáamˊ nijmérˉ fɨꞌíˆ jo̱guɨ ta˜ quɨꞌˊ mɨ˜ tɨˊ lɨ˜ ninírˋ jaléꞌˋ jmiñiˇ quiáꞌˉ mɨ˜ nɨcáiñꞌˋ do.

¹⁰Jo̱ dsʉꞌ huíimˉ niꞌnángˋ yaaiñ˜ quiáꞌˉ i̱ dseamɨ́ˋ do, co̱ꞌ ꞌgóꞌˋbre e ninírˋ lají̱i̱ꞌ˜ iihuɨ́ɨˊ e catɨ́ɨiñꞌˉ do. Jo̱guɨ yaam˜bɨ jaléngꞌˋ i̱ dseata˜ dseaˋ féngꞌˊ do féꞌrˋ lala:¡E ngɨ˜ fɨ́ɨbˆ ꞌnʉˋ! ¡E ngɨ˜ fɨ́ɨbˆ ꞌnʉˋ, fɨɨˋ féꞌˋ e laniingˉ ꞌgøngꞌˊ e siiˋ Babilonia!Dsʉco̱ꞌ co̱o̱ˋ lajeeˇ jali˜ lanab cagüeáˉ iihuɨ́ɨˊ quíiꞌˉ.

¹¹Jo̱guɨ jaléngꞌˋ dseaˋ i̱ seengˋ fɨˊ ni˜ guóoꞌ˜ uǿˉ jmɨgüíˋ i̱ jmóoˋ ta˜ láaˊ jo̱guɨ ta˜ ꞌnɨ́ɨˋ, eáamˊ fɨꞌíˆ nilíiñˉ co̱ꞌ carjɨˋ niquíꞌˉbre, dsʉco̱ꞌ joˋ jiéꞌˋ lɨ˜ seengˋguɨ i̱ nijméˉ ta˜ láaˊ jaléꞌˋ e iiñ˜ e nidsiꞌnɨɨ˜ quiáꞌrˉ do.

¹²Dsʉco̱ꞌ lamɨ˜ jéengˊguɨ eáangˊ cajméerˋ ta˜ ꞌnɨ́ɨˋ cunéeˇ có̱o̱ꞌ˜guɨ cuteeˋ lɨ́ꞌˆ lajaléꞌˋ cu̱u̱˜ jɨꞌˋ e jloꞌˆ e ꞌmoꞌˆ eáangˊ, jo̱guɨ ꞌnɨ́ɨrˋ jaléꞌˋ ꞌmɨꞌˊ jloꞌˆ e niguoꞌˆ eáangˊ jo̱guɨ ꞌmɨꞌˊ e niungꞌˋ có̱o̱ꞌ˜guɨ ꞌmɨꞌˊ e yʉ̱́ʉ̱ˉ e lɨ́ɨˊ có̱o̱ꞌ˜ layaang˜ ñiˊ e ꞌmoꞌˆ eáangˊ, jo̱ langɨ́ɨngˉ íimꞌ˜ jaléꞌˋ ꞌmaˋ e jmeafɨɨˋ, jo̱guɨ ꞌnɨ́ɨˋbɨr cajo̱ jaléꞌˋ e tɨˊ dsíiˊ dseaˋ e lɨ́ɨˊ có̱o̱ꞌ˜ yaang˜ maja̱˜ jaléngꞌˋ jóꞌˋ, jo̱ ꞌnɨ́ɨˋbɨr cajo̱ jaléꞌˋ e jmɨlɨɨiñ˜ có̱o̱ꞌ˜ yaang˜ jaléꞌˋ ꞌmaˋ e quíingˊ cuuˉ eáangˊ, jo̱ ꞌnɨ́ɨˋbɨr cajo̱ jaléꞌˋ ñíˆ bronce lɨ́ꞌˆ langɨ́ɨngˉ íingꞌ˜ cu̱u̱˜ e quíingˊ cuuˉ.

¹³Jo̱guɨ jmóorˋ ta˜ ꞌnɨ́ɨˋ langɨ́ɨngˉ íingꞌ˜ jaléꞌˋ ooˋ quiáꞌˉ jmiñiˇ jo̱guɨ jaléꞌˋ jmɨɨˋ jmeafɨɨˋ, jo̱ ꞌnɨ́ɨˋbɨr cajo̱ langɨ́ɨngˉ íingꞌ˜ jaléꞌˋ méeˊ có̱o̱ꞌ˜guɨ jaléꞌˋ aceite jo̱guɨ fɨ˜ cuɨꞌieeˋ, lɨ́ꞌˆ langɨ́ɨngˉ íingꞌ˜ jaléꞌˋ fɨ˜. Jo̱ ꞌnɨ́ɨmˋbɨr cajo̱ jaléngꞌˋ jóꞌˋ i̱ cá̱ˋ lee˜ có̱o̱ꞌ˜guɨ jaléngꞌˋ joꞌseꞌˋ jo̱guɨ jaléngꞌˋ cuea˜ có̱o̱ꞌ˜guɨ jaléꞌˋ carreta e jñʉˊreꞌ, jo̱ cajméeˋbɨr cajo̱ ta˜ ꞌnɨ́ɨngˋ la quie̱ˊguɨ jaléngꞌˋ dseaˋ i̱ jmóoˋ ta˜ táꞌˉ jmóoˋ e jaˋ eeˋ ꞌléeiñꞌ˜ jí̱i̱ꞌ˜ capíꞌˆ.

¹⁴Jo̱ jaléngꞌˋ i̱ dseaˋ íˋ, lalab nisɨ́ꞌrˋ e fɨɨˋ féꞌˋ do:Lajɨˋ e jloꞌˆ e lamɨ˜ seaˋ quíiꞌˉ do, lajɨˋ e jo̱ nɨsɨꞌíimˆ quíiꞌˉ lana.Jo̱guɨ lajɨˋ cuuˉ quíiꞌˉ có̱o̱ꞌ˜guɨ jaléꞌˋ e sɨꞌíˆ óoꞌ˜ fɨˊ jmɨgüíˋ nɨsɨꞌíimˆ quíiꞌˉ cajo̱.Jo̱ joˋ tó̱o̱ˋ jmɨɨ˜ faꞌ e nitíingꞌ˜tu̱ꞌ jaléꞌˋ e jo̱.

¹⁵Jo̱ jaléngꞌˋ dseaˋ i̱ cajméeˋ ta˜ ꞌnɨ́ɨˋ jo̱guɨ ta˜ láaˊ jaléꞌˋ e jo̱, jo̱guɨ e caꞌuíiñˉ dseaˋ seaˋ cuuˉ laꞌeáangˊ e fɨɨˋ féꞌˋ do, jaléngꞌˋ íbˋ i̱ nijmihuíingˉ yaang˜ dsʉꞌ uíiꞌ˜ e ꞌgóꞌrˋ lají̱i̱ꞌ˜ iihuɨ́ɨˊ e jǿørˉ do. Jo̱ ie˜ jo̱b eáamˊ nijmérˉ ta˜ quɨꞌˊ jo̱guɨ ta˜ jmijiuungˇ dsíiˊ,

¹⁶jo̱ lalab niféꞌrˋ ie˜ jo̱:¡E ngɨ˜ fɨ́ɨbˆ ꞌnʉˋ, e ngɨ˜ fɨ́ɨbˆ ꞌnʉˋ, fɨɨˋ féꞌˋ laniingˉ ꞌgøngꞌˊ e siiˋ Babilonia!Co̱ꞌ lamɨ˜ jéengˊguɨ lɨnꞌˊ lafaꞌ jaangˋ dseamɨ́ˋ i̱ quiꞌˊ ꞌmɨꞌˊ niguoꞌˆ e jloꞌˆ eáangˊ,jo̱guɨ i̱ quiꞌˊ cajo̱ ꞌmɨꞌˊ e niungꞌˋ jo̱guɨ e yʉ̱́ʉ̱ˉ jo̱guɨ i̱ síngꞌˋ ꞌñiaꞌˊ jloꞌˆ e quie̱rˊ jaléꞌˋ cunéeˇ có̱o̱ꞌ˜guɨ jaléꞌˋ cu̱u̱˜ jíingˋ jɨꞌˋ jloꞌˆ e quíingˊ cuuˉ eáangˊ.

¹⁷¡Dsʉꞌ co̱o̱ˋ lajeeˇ jali˜ lanab caꞌíngˉ lajaléꞌˋ e seaˋ quíiꞌˉ! Jo̱ jaléngꞌˋ i̱ dseaˋ i̱ jmóoˋ ta˜ quie̱ˊ jaléꞌˋ móoˊ có̱o̱ꞌ˜guɨ jaléngꞌˋ dseaˋ i̱ jmóoˋ ta˜ có̱o̱ꞌ˜ e móoˊ do co̱lɨɨng˜ có̱o̱ꞌ˜ jaléngꞌˋ dseaˋ i̱ teáangꞌ˜ dsíiˊ móoˊ do cajo̱ i̱ ngɨˊ fɨˊ la fɨˊ na có̱o̱ꞌ˜guɨ jaléngꞌˋ dseaˋ i̱ jmóoˋ ta˜ caguieeˉguɨ fɨˊ ni˜ jmɨñíꞌˆ, jaléngꞌˋ íˋ caꞌnáamˉ yaaiñ˜ quiáꞌˉ e fɨɨˋ jo̱.

¹⁸Jo̱ mɨ˜ tɨˊ lɨ˜ cangárˉ jmiñiˇ quiáꞌˉ e nɨcooˋ e fɨɨˋ do, jo̱ lalab canaaiñˋ féꞌrˋ e teáˋ eáangˊ: —Jí̱i̱ꞌ˜ co̱o̱ˋ ya̱ꞌˊ jaˋ mɨˊ calɨseáˋ co̱o̱ˋ fɨɨˋ e laniingˉ ꞌgøngꞌˊ e cǿøngˋ røøˋ có̱o̱ꞌ˜ e fɨɨˋ Babilonia do.

¹⁹Jo̱ canaaiñˋ jgiéerˉ ꞌleeˋ fɨˊ moguir˜, jo̱ canaaiñˋ quɨꞌrˊ dseángꞌˉ e lɨjiuung˜ dsíirˊ jo̱ lalab féꞌrˋ:¡E ngɨ˜ fɨ́ɨbˆ ꞌnʉˋ, e ngɨ˜ fɨ́ɨbˆ ꞌnʉˋ, fɨɨˋ féꞌˋ e laniingˉ ꞌgøngꞌˊ!Co̱ꞌ fɨˊ nab lɨ˜ caꞌuíingˉ dseaˋ seaˋ cuuˉ jaléngꞌˋ dseaˋ i̱ lɨ́ɨngˊ fii˜ jaléꞌˋ móoˊ.¡Dsʉꞌ lanaguɨ náng co̱o̱ˋ lajeeˇ jalib˜ nɨcaꞌíngˉ lajɨˋ e jo̱!

²⁰Jo̱ jaléngꞌˋ ꞌnʉ́ꞌˋ, dseaˋ seengˋnaꞌ fɨˊ ñifɨ́ˉ, eáangˊ jmiꞌiáangˋ óoˊnaꞌ co̱lɨɨng˜ có̱o̱ꞌ˜ jaléngꞌˋ dseaˋ i̱ caféꞌˋ cuaiñ˜ quiáꞌˉ Fidiéeˇ malɨɨ˜guɨ eáangˊ jo̱guɨ co̱lɨɨng˜ có̱o̱ꞌ˜ jaléngꞌˋ dseaˋ quiáꞌˉ Fidiéeˇ jo̱guɨ có̱o̱ꞌ˜ jaléngꞌˋ dseaˋ apóoˆ i̱ siꞌíingˆ e niꞌˊ júuˆ quiáꞌˉ Dseaˋ Jmáangˉ;jo̱ jmiꞌiáangˋ óoˊnaꞌ jóng uii˜ e nɨcacuøˊ Fidiéeˇ iihuɨ́ɨˊ laco̱ꞌ catɨ́ɨngˉ jaléngꞌˋ i̱ dseaˋ seengˋ e fɨˊ fɨɨˋ féꞌˋ do i̱ eáangˊ cajmeángꞌˋ ꞌnʉ́ꞌˋ gaˋ.

²¹Jo̱ mɨ˜ cangɨ́ˋ jo̱, jaangˋ ángel i̱ ꞌgøngꞌˊ eáangˊ caséerˋ co̱o̱ˋ cu̱u̱˜ ꞌlooˋ e lɨ́ɨˊ laco̱ꞌguɨ la lɨ́ɨˊ e cu̱u̱˜ tóoˋ quiáꞌˉ lɨ˜ dsirˊ mɨcuɨꞌieeˋ, jo̱ e cu̱u̱˜ ꞌlooˋ do cabírˋ fɨˊ dsíiˊ jmɨñíꞌˆ, jo̱ lalab cajíñꞌˉ mɨ˜ cabíˋreꞌ do:Jo̱ ꞌnʉˋ, fɨɨˋ féꞌˋ e laniingˉ ꞌgøngꞌˊ e siiˋ Babilonia, lanab nibíinꞌ˜ é̱ꞌˋ jmɨɨˋ cajo̱ lɨ́ꞌˆ laco̱ꞌguɨ cabíˋ e cu̱u̱˜ ꞌlooˋ do,jo̱ joˋ tó̱o̱ˋ jmɨɨ˜ faꞌ e i̱i̱ˋ niníingˉguɨ ꞌnʉˋ.

²²Jo̱guɨ jaléꞌˋ lúuˊ e bóꞌˋ jaléngꞌˋ dseaˋ fɨˊ jee˜ fɨɨˋ na, faꞌ jaléꞌˋ lúuˊ e siiˋ arpa có̱o̱ꞌ˜guɨ jaléꞌˋ lúuˊ táˋ jo̱guɨ jaléꞌˋ lúuˊ trompéꞌˆ, joˋ tó̱o̱ˋ jmɨɨ˜ faꞌ e ninʉ́ꞌˋguɨ e niꞌi̱i̱˜ jaléꞌˋ e jo̱.Jo̱ ie˜ jo̱ joˋ nijnéngˋguɨ jí̱i̱ꞌ˜ camɨ́ɨngꞌ˜ dseaˋ i̱ jmóoˋ ta˜, o̱ꞌguɨ e i̱i̱ˉ e cu̱u̱˜ ꞌlooˋ do ninʉ́ꞌˋguɨ fɨˊ quiníꞌˆ cajo̱.

²³Jo̱guɨ joˋ nilɨjneáˋguɨ jí̱i̱ꞌ˜ co̱o̱ˋ jɨˋ fɨˊ quíiꞌˉ, o̱ꞌguɨ ninʉ́ꞌˋguɨ cajo̱ jaléꞌˋ juguiʉ́ˉ júuˆ jloꞌˆ quiáꞌˉ jial mɨ˜ cúngꞌˋ dseaˋ guóorˋ fɨˊ quiníꞌˆ.Jo̱ jaléngꞌˋ dseaˋ i̱ calɨséngˋ fɨˊ na i̱ cajméeˋ ta˜ láaˊ jo̱guɨ ta˜ ꞌnɨ́ɨˋ, íbˋ dseaˋ i̱ lamɨ˜ lɨ́ɨngˊ i̱ laniingˉ eáangˊ fɨˊ jmɨgüíˋ.Jo̱ ꞌnʉbˋ dseaˋ i̱ cajméeˋ ta˜ jmɨgǿøngˋ jaléngꞌˋ dseaˋ jmɨgüíˋ e cajmɨgǿøngˋre có̱o̱ꞌ˜ jaléꞌˋ ta˜ dseaˋ láangˋ quíiꞌˉ.

²⁴Jo̱guɨ e fɨˊ fɨɨˋ nab cajo̱ lɨ˜ nɨcajnéngˉ jmɨꞌøøngˉ jaléngꞌˋ yʉ́ʉꞌ˜ dseaˋ cǿøngꞌ˜ i̱ caféꞌˋ cuaiñ˜ quiáꞌˉ Fidiéeˇ malɨɨ˜guɨ eáangˊ, lɨ́ꞌˆ lajaléngꞌˋ i̱ lɨ́ɨngˊ dseaˋ quiáꞌˉ Fidiéeˇ jo̱guɨ lɨ́ꞌˆ lajaléngꞌˋ dseaˋ i̱ cajúngˉ i̱ cajngaꞌˊ dseaˋ quiáꞌˉ fɨˊ ni˜ guóoꞌ˜ uǿˉ jmɨgüíˋ.