Read Contemporary Kirundi Bible Matayo 15 Bible Online

Matayo 15 - Contemporary Kirundi Bible bible

Matayo 15

¹Hanyuma Abafarisayo n’abigisha b’ivyagezwe bava i Yerusalemu baja iyo Yesu ari, baramubaza bati:

²“Ni kuki abigishwa bawe batubahiriza imigenzo ya ba sogokuruza? Ntibakaraba imbere yo gufungura!”

³Yesu arabishura ati: “None mwebwe ni kuki mutubahiriza ibwirizwa ry’Imana mwitwaje imigenzo yanyu?

⁴Kuko Imana yavuze iti: ‘Wubahe so na nyoko,’[27] yongerako iti: ‘Umuntu wese azovuma se canke nyina aze yicwe.’[28]

⁵Ariko mweho muvuga ko iyo umuntu avuze kw’ivyo yari gufashisha se canke nyina ari inyegu y’Imana

⁶ataba agikwiye kubibafashisha. Uko ni ko muhindura ijambo ry’Imana ubusa kubera imigenzo yanyu.

⁷Mwa ndyarya mwe, Yesaya yavuze ukuri igihe yabavugishwako ati:

⁸‘Aba bantu banyubahisha iminwa yabo, ariko imitima yabo iri kure yanje.

⁹Ukunsenga kwabo ntikugira ikimazi; inyigisho zabo ni amabwirizwa abantu bishingiye.’[29] ”

¹⁰Yesu aca ahamagara isinzi ry’abantu bari ngaho, arababwira ati: “Nimwumvirize kandi mutahure:

¹¹Icinjira mu kanwa k’umuntu, si co kimuhumanya. Ariko ikiva mu kanwa kiwe, ni co kimuhumanya.”

¹²Hanyuma abigishwa biwe baza aho ari, baramubaza bati: “Mbega urazi ko Abafarisayo bababaye bumvise ivyo uhejeje kuvuga?”

¹³Yesu arabishura ati: “Igiterwa cose Data wo mw’ijuru atateye kizorandurwa.

¹⁴Nimubihoze; ni impumyi zirongora izindi! Kandi iyo impumyi irongoye iyindi, zompi zigwa mu kinogo.”

¹⁵Petero aramubwira ati: “Dusigurire uwo mugani.”

¹⁶Yesu arababaza ati: “Namwe ntimurashobora gutahura?

¹⁷Ntimuzi ko ikintu cose cinjira mu kanwa kija mu nda hanyuma kigasohoka?

¹⁸Ariko igisohoka mu kanwa k’umuntu kiba kivuye mu mutima, kandi ni co kimuhumanya.

¹⁹Kuko mu mutima ari ho hava ivyiyumviro bibi: ubwicanyi, ubusambanyi, ivy’isoni nke, ubusuma, kubeshera abandi no kuvuga abandi nabi.

²⁰Ivyo ni vyo vyanduza umuntu. Ariko kurya udakaravye, ntibishobora kwanduza umuntu.”

²¹Yesu avuye ngaho, aja mu ntara ya Tiro na Sidoni.

²²Umunyakananikazi wo muri iyo ntara, aza aho ari atakamba ati: “Mwami, Mwana wa Dawidi, ngirira imbabazi! Umukobwa wanje aboshwe n’umudayimoni kandi aramubabaje cane!”

²³Ariko Yesu ntiyamwishura n’ijambo na rimwe. Abigishwa biwe baraza baramwinginga bati: “Mwirukane kuko aguma avugiriza induru inyuma yacu.”

²⁴Nuko Yesu abwira wa mugore ati: “Natumwe ku ntama zazimiye za Isirayeli gusa.”

²⁵Wa mugore aca araza apfukama imbere yiwe, aramubwira ati: “Mwami, ntabara!”

²⁶Yesu aramwishura ati: “Si vyiza gufata umukate w’abana ukawuterera imbwa.”

²⁷Na we aramwishura ati: “Ni vyo, Mwami, ariko n’imbwa na zo ziremerewe kurya utuvunguka dukoroka tuva ku meza za ba shebuja.”

²⁸Yesu aca aramubwira: “Mupfasoni, ufise ukwizera gukomeye! Ivyo usavye urabihawe.” Maze ako kanya nyene, umukobwa wiwe aca arakira.

²⁹Nuko Yesu ava ngaho, agendagenda ku nkengera y’ikiyaga Galilaya. Hanyuma aduga umusozi, yicaraho.

³⁰Maze abantu isinzi baza aho ari, bazanye abacumbagira, impumyi, ibimuga, ibiragi n’abandi barwayi benshi. Babashira imbere yiwe, na we arabakiza.

³¹Abantu baratangara cane babonye ibiragi bivuga, abacumbagira bagenda neza, ibimuga bimuguruka, n’impumyi zihumuka. Maze bahimbaza Imana ya Isirayeli.

³²Yesu ahamagara abigishwa biwe arababwira ati: “Aba bantu banteye ikigongwe. Tumaranye imisi itatu none raba nta vyokurya basigaranye. Ninabarungika bashonje, bahava bagwira isari mu nzira.”

³³Abigishwa biwe baramubaza bati: “None twokura hehe ivyokurya bikwiye abantu bangana gutya muri kano gahinga?”

³⁴Yesu arababaza ati: “Mufise imikate ingahe?” Nabo baramwishura bati: “Dufise imikate indwi hamwe n’udufi dukeya.”

³⁵Aca abwira abantu ngo bicare hasi.

³⁶Hanyuma afata ya mikate indwi na twa dufi, abishimira Imana, arabimanyagura, hanyuma abiha abigishwa biwe na bo babigaburira ba bantu.

³⁷Bose bararya barahaga, hanyuma abigishwa begeranya ibiseke indwi vyuzuye utumanyu twasigaye.

³⁸Abafunguye uwo musi bari ibihumbi bine, udashizemwo abagore n’abana.

³⁹Yesu amaze gusezera abantu, afata ubwato, aja mu ntara ya Magadani.