Read Contemporary Kirundi Bible Matayo 22 Bible Online

Matayo 22 - Contemporary Kirundi Bible bible

Matayo 22

¹Yesu yongera kuvugana na bo mu migani, ababwira ati:

²“Ubwami bw’ijuru bugereranywa n’umusi mukuru w’ubukwe umwami yateguriye umuhungu wiwe.

³Igihe co kuzimana abatumire gishitse, atuma abakozi biwe guhamagara abatumiwe, ariko banka kuza.

⁴Hanyuma arungika abandi bakozi, ababwira ati: ‘Nimugende mubwire abatumiwe ko nateguye amazimano: nabaze impfizi hamwe n’ibindi bitungwa binuze, kandi ibintu vyose biteguye neza. Mubabwire baze ku mazimano y’ubukwe!’

⁵Ariko, habura n’umwe avyitaho, bose bigira mu vyabo, umwe mw’itongo, uwundi mu bucuruzi,

⁶abandi na bo bafata abakozi biwe barabakubagura, hanyuma barabica.

⁷Maze umwami araraka cane, aca arungika ingabo ziwe kwica izo nkozi z’ibibi, bongera batongoza umuriro igisagara cazo.

⁸Hanyuma abwira abakozi biwe ati: ‘Amazimano y’ubukwe yateguwe, ariko abo natumiye nta n’umwe agomba kuza.

⁹None rero nimugende mu mabarabara no mu mayirabiri, mutumire umuntu wese muhasanga.’

¹⁰Nuko, abo bakozi baragenda begeranya abantu bose bahuye, ababi n’abeza, hanyuma inzu y’ubukwe yuzura abashitsi.

¹¹Ariko umwami yinjiye kuraba abatumire, abonamwo umuntu atambaye impuzu y’ubukwe.

¹²Aramubaza ati: ‘Mugenzi, winjiye gute hano kandi utambaye impuzu y’ubukwe?’ Uwo muntu ntiyashobora kuronka ico yishura.

¹³Umwami aca abwira abakozi biwe ati: ‘Nimumubohe amaboko n’amaguru, mumuterere hanze mu mwijima, ahazoba amarira no guhekenya amenyo kubera umubabaro.’

¹⁴Burya abatumiwe ni benshi, ariko abatoranijwe ni bake.”

¹⁵Hanyuma Abafarisayo barakorana barondera ingene bomutegera ku majambo avuga.

¹⁶Barungika bamwe mu bigishwa babo bari kumwe n’abashigikiye Herode Antipa. Baramubwira bati: “Mwigisha, turazi ko utunganye, kandi ko wigisha inzira ihimbara Imana mu kuri kwose. Ntuhengamira ku ruhande na rumwe kuko utarobanura abantu ufatiye ku cubahiro cabo.

¹⁷None rero tubwire ico wiyumvira: Mbega ivyagezwe vyacu biratwemerera gutanga ikori rya Kayisari, canke ntibibitwemerera?”

¹⁸Ariko kuko Yesu yari azi intumbero mbi bafise, ababwira ati: “Mwa ndyarya mwe, ni iki gituma muntega imitego?

¹⁹Nyereka igiceri mukoresha mu kuriha ikori.” Bamuzanira idenariyo, igiceri c’Abaroma,

²⁰aca arababaza ati: “Iyi shusho n’ibi vyandiko biriko ni ivya nde?”

²¹Baramwishura bati: “Ni ivya Kayisari.” Aca ababwira ati: “Nuko rero ivya Kayisari nimubihe Kayisari, ivy’Imana na vyo mubihe Imana.”

²²Bumvise ivyo barajorerwa cane, baca bamusiga ngaho baragenda.

²³Uwo musi nyene, Abasadukayo, ari bo batemera ivy’izuka ry’abapfuye, baza aho ari, baramubaza bati:

²⁴“Mwigisha, Mose yavuze ko umugabo apfuye adasize abana, uwo bavukana ategerezwa gucura umupfakazi wiwe kugira ngo aronkere uruvyaro uwo yapfuye.

²⁵Rero, harigeze kuba hagati muri twebwe abavukana indwi. Mukuru muri bo ararongora, ariko apfa atavyaye; maze murumunawe arongora uwo mupfakazi.

²⁶Uwa kabiri na we nyene apfa atavyaye, n’uwugira gatatu bigenda gutyo kugeza ku wugira indwi.

²⁷Mu nyuma na wa mugore arapfa.

²⁸None ku musi w’izuka, uwo mugore azoba uwa nde ko bose babaye abagabo biwe?”

²⁹Yesu arabishura ati: “Mwarazimiye kuko mudatahura ico Ivyanditswe vyera bivuga, ntimumenye n’ubushobozi bw’Imana.

³⁰Ku musi w’izuka abantu ntibazorongora canke ngo barongorwe, bazoba bameze nk’abamarayika bo mw’ijuru.

³¹Ku bijanye n’izuka ry’abapfuye, mbega Nta ho murasoma mu Vyanditswe ingene Imana yavuze iti:

³²‘Ndi Imana ya Aburahamu, ya Isaka na Yakobo?’[47] Erega si Imana y’abapfuye, ni Imana y’abazima.”

³³Abantu bumvise ivyo baca batangazwa n’inyigisho ziwe.

³⁴Abafarisayo bumvise ko Yesu yajoreje Abasadukayo, baca barakorana.

³⁵Umwe muri bo w’umwigisha w’ivyagezwe, agerageza kumutega umutego, amubaza ati:

³⁶“Mwigisha, ibwirizwa riruta ayandi mu Vyagezwe ni irihe?”

³⁷Yesu aramwishura ati: “ ‘Ukundishe Uhoraho Imana yawe umutima wawe wose, n’ubugingo bwawe bwose, n’ubwenge bwawe bwose.’[48]

³⁸Iryo ni ryo bwirizwa rya mbere kandi riruta ayandi.

³⁹Irya kabiri na ryo risa n’iryo: ‘Ukunde mugenzawe nk’uko wikunda.’[49]

⁴⁰Ivyagezwe vya Mose n’ivyanditswe n’abavugishwa vyose bishingiye kuri ayo mabwirizwa abiri.”

⁴¹Abafarisayo bakoranye, Yesu arababaza ati:

⁴²“Mbega mwibaza iki ku vyerekeye Kristo? Ni umwana wa nde?” Baramwishura bati: “Ni umwana wa Dawidi.”

⁴³Arababwira ati: “None bishoboka gute ngo Dawidi, avugishijwe na Mpwemu, amwite Umwami? Kuko yavuze ati:

⁴⁴‘Uhoraho yabwiye Umwami wanje ati: Icara i buryo bwanje kugeza abansi bawe bose ndabashize musi y’ibirenge vyawe.’[50]

⁴⁵None nimba Dawidi amwita Umwami, yoba umwana wiwe gute?”

⁴⁶Nta n’umwe yashoboye gukura ururimi mu kanwa ngo amwishure, kandi kuva uwo musi, nta n’uwongeye kwubahuka kumubaza ikibazo.