Read Contemporary Kirundi Bible Mariko 3 Bible Online

Mariko 3 - Contemporary Kirundi Bible bible

Mariko 3

¹Ikindi gihe Yesu yinjira mw’isinagogi ahasanga umuntu akongataye ukuboko.

²Bamwe mu bari aho bamuhanga amaso ngo barabe ko amukiza, kuko bashaka ico bafatirako kugira ngo bamwagirize ko yakoze ku musi w’Isabato kandi kizira.

³Yesu abwira wa muntu akongataye ukuboko ati: “Haguruka uhagarare hano imbere y’ishengero.”

⁴Arababaza ati: “Mbega ni igiki cemewe gukorwa ku musi w’Isabato: Gukora iciza canke gukora ikibi? Gukiza umuntu canke kumwaka ubugingo?” Ntihagira uwumwishura.

⁵Nuko Yesu abitegereza ashavuye, kandi ababajwe cane n’uko imitima yabo ikomantaye. Nuko abwira wa muntu ati: “Gorora ukuboko kwawe.” Akugoroye guca kurakira.

⁶Abafarisayo baca baragenda baja inama n’abayoboke ba Herode, barondera ingene bokwica Yesu.

⁷Yesu n’abigishwa biwe bava aho hantu baja ku kiyaga c’i Galilaya, maze abantu benshi baramukurikira bavuye i Galilaya, i Yudaya,

⁸i Yerusalemu, muri Idumaya, hakurya y’uruzi Yorodani no mu micungararo y’intara za Tiro na Sidoni. Abo bose bamukurikiye kuko bumvise ibitangaza yakoze.

⁹Nuko abwira abigishwa biwe ngo bamutegurire ubwato kugira ngo abantu ntibamusite,

¹⁰kuko yari yakijije abantu benshi bituma abarwaye bandi barondera kumukorako.

¹¹Abantu baboshwe n’impwemu mbi bamukubise ijisho, izo mpwemu mbi zaca zibakubita hasi zigasemerera ziti: “Uri Umwana w’Imana!”

¹²Ariko we yaca azikankamira ngo zihore, ntizisubire kuvuga uwo ari we.

¹³Hanyuma Yesu aduga ku musozi ahamagara abo ashaka, na bo baza aho ari.

¹⁴Maze atoranyamwo cumi na babiri, abita intumwa, kugira ngo babane na we yongere abatume kuvuga Ubutumwa Bwiza;

¹⁵abaha n’ububasha bwo kwirukana abadayimoni.

¹⁶Aya ni yo mazina y’abo cumi na babiri yatoranije: Simoni (uwo yise Petero);

¹⁷Yakobo na Yohana bene Zebedayo (na bo abita Bowanerige, bisigura ngo abana b’inkuba);

¹⁸Andereya, Filipo, Baruteremi, Matayo, Toma, Yakobo mwene Alufayo, Tadeyo, Simoni Umuzelote,

¹⁹na Yuda Isikariyote, ari we yahavuye amugurisha.

²⁰Hanyuma Yesu aja i muhira, maze abantu benshi basubira gukoranira aho ari, ku buryo we n’abigishwa biwe bitashoboka ko bafungura.

²¹Abo mu muryango wiwe bavyumvise, baja kumufata, kuko bivuga bati: “Yasaze.”

²²Abigisha b’ivyagezwe bari baje bava i Yerusalemu bavuga bati: “Akoreshwa n’ububasha bwa Beyelizebuli! Umukuru w’abadayimoni ni we amushoboza kwirukana abadayimoni.”

²³Yesu arabahamagara ababwira mu migani ati: “Mbega Satani yokwirukana Satani gute?

²⁴Iyo ubwami bwiciyemwo ibice, buba bugiye gusenyuka.

²⁵Kandi iyo umuryango wiciyemwo ibice, ntushobora kurama.

²⁶Iyo Satani yigwanije akicamwo ibice, ntashobora guhagarara, ivyiwe biba biheze.

²⁷Nta muntu yokwinjira mu nzu y’umunyenkomezi ngo amunyage ivyo atunze atabanje kumuboha. Aho ni ho honyene ashobora kumunyaga ivyiwe.

²⁸Ndababwire ukuri, ivyaha vyose abana b’abantu bakora n’ibitutsi vyose batuka Imana barashobora kubibabarirwa.

²⁹Ariko umuntu wese atuka Mpwemu Yera ntazokwigera abibabarirwa, icaha ciwe kizohoraho ibihe bidashira.”

³⁰Ivyo yabivuze kuko bariko bavuga ngo arimwo impwemu mbi.

³¹Bene nyina ba Yesu na nyina baraza bahagarara hanze, batuma umuntu kumuhamagara.

³²Abantu bari bamukikije baramubwira bati: “Nyoko na bene nyoko bari hanze kandi barakurondera.”

³³Arababaza ati: “Mama ni nde kandi bene mama ni ba nde?”

³⁴Nuko yeraguza mu bari bamukikije, avuga ati: “Aba ni bo mama kandi ni bo bene mama.

³⁵Uwukora ivyo Imana ishaka wese ni we mwene mama kandi ni we mama.”