Read Contemporary Kirundi Bible Luka 1 Bible Online

Luka 1 - Contemporary Kirundi Bible bible

Luka 1

¹Abantu benshi baragerageje kwandika inkuru z’ivyabereye hagati muri twebwe,

²nk’uko twazishikirijwe n’abavyiboneye kuva bigitangura, ari na bo bamamaje Ubutumwa Bwiza.

³Ni co gituma nanje, maze gutohoza neza uko vyagenze vyose kuva mu ntango, nahisemwo kukwandikira inkuru y’ukuri kandi itomoye, nyakwubahwa Teyofilo,

⁴kugira ngo umenye udakekeranya ko inyigisho wakiriye ari iz’ukuri.

⁵Igihe Herode yari umwami w’i Yudaya, hari umuherezi yitwa Zakariya wo mu mugwi w’abaherezi bitirirwa Abiya. Umugore wiwe yitwa Elizabeti, na we akaba yakomoka mu muryango wa Aroni.

⁶Zakariya na Elizabeti bari abagororotsi imbere y’Imana, kandi bakurikiza ivyagezwe n’amabwirizwa vy’Umwami Imana ata co bahajije.

⁷Ariko nta mwana bari bafise, kuko Elizabeti atavyara, kandi bompi bari bashaje cane.

⁸Umusi umwe, Zakariya yariko arakora igikorwa ciwe c’ubuherezi mu ngoro y’Imana, kuko umugwi wiwe ari wo wari uramukiwe.

⁹Yari yatowe hakoreshejwe ubupfindo nk’uko umugenzo w’ubuherezi wabitegekanya mu guhitamwo uwinjira mu ngoro y’Umwami Imana guturira ibimota neza[1]

¹⁰Igihe co guturira ibimota neza kigeze, abari ngaho bose bariko basengera hanze.

¹¹Maze umumarayika w’Umwami Imana yiyereka Zakariya, ahagaze i buryo bw’igicaniro bacanirako ibimota neza.

¹²Zakariya amubonye afatwa n’ubwoba bwinshi.

¹³Ariko wa mumarayika aramubarira ati: “Zakariya we, ntutinye, kuko Imana yumvise ugusenga kwawe. Umugore wawe Elizabeti agiye kukuvyarira umwana w’umuhungu, na we uze umwite Yohana.

¹⁴Uwo mwana azogutera kunezerwa no guhimbarwa, kandi ivuka ryiwe rizonezereza benshi,

¹⁵kuko azoba uwuhambaye imbere y’Umwami Imana. Ntazokoza umuvinyu ku munwa canke ikindi kintu cose kiboreza, kandi azoba yuzuye Mpwemu Yera kuva akiri mu nda ya nyina.

¹⁶Azogarukana Abisirayeli benshi k’Uhoraho, Imana yabo.

¹⁷Azogendera imbere y’Umwami Imana afise impwemu n’ububasha nk’ivya Eliya, kugira ngo agarukane imitima y’abavyeyi ku bana babo, abatumvira Imana na bo abagarukane ku bwenge bw’abagororotsi; uko ni ko azotegurira abantu kwakira Umwami Imana.”

¹⁸Zakariya abaza uwo mumarayika ati: “Ivyo novyemezwa n’iki, ko nshaje kandi umugore wanje akaba ageze mu zabukuru?”

¹⁹Wa mumarayika aramwishura ati: “Ndi Gaburiyeli, kandi nama mpagaze imbere y’Imana. Ni yo yandungitse kukubwira iyi nkuru nziza.

²⁰Kuva ubu, ugiye kuba ikiragi, ntuzosubira kuvuga kugeza uwo mwana avutse, kuko utizeye ivyo nakubwiye. Kandi bizoshika igihe cavyo kigeze.”

²¹Mu gihe ivyo vyariko biraba, abantu bari hanze, bagumye barindiriye Zakariya bibaza igituma yatevye mu rusengero umwanya munini.

²²Ariko asohotse, ntiyashobora kuvugana na bo. Abantu baca batahura ko hari ivyo yerekewe mu rusengero, kuko yabavugisha akoresheje ibimenyetso vy’amaboko, ntavuge.

²³Ikiringo c’ibikorwa vyiwe vy’ubuherezi kirangiye, asubira i muhira.

²⁴Haheze imisi, umugore wiwe Elizabeti asama inda, aca amara amezi atanu ataja ahabona. Aravuga ati:

²⁵“Ehe ivyiza Umwami Imana yankoreye! Muri iki gihe, yangiriye ubuntu ankurako ibiteterwe mu bantu.”

²⁶Elizabeti amaze amezi atandatu yibungenze, Imana irungika umumarayika Gaburiyeli mu gisagara c’i Galilaya citwa Nazareti,

²⁷ku nkumi yitwa Mariya yari ikowe n’umusore yitwa Yosefu, wo mu muryango wa Dawidi.

²⁸Uwo mumarayika yinjira aho Mariya ari, amubwira ati: “Nezerwa! Umwami Imana akugiriye ubuntu, kandi ari kumwe na we.”

²⁹Mariya aterwa ubwoba bwinshi n’ayo majambo, yibaza ico iyo ndamukanyo isigura.

³⁰Ariko wa mumarayika aramuhumuriza ati: “Ntutinye, Mariya, kuko ugiriwe ubuntu n’Imana.

³¹Raba ugiye gusama inda, maze uvyare umwana w’umuhungu, kandi uze umwite Yesu.

³²Azoba uwuhambaye, kandi azokwitwa Umwana w’Iyisumbavyose. Umwami Imana azomuha intebe y’inganji ya sekuruza Dawidi,

³³kandi azoganza inzu ya Yakobo ibihe bidashira; Ubwami bwiwe ntibuzogira iherezo.”

³⁴Mariya abaza uwo mumarayika ati: “Ivyo vyoshoboka bite, ko ntarigera ndyamana n’umugabo?”

³⁵Na we aramwishura ati: “Mpwemu Yera azokuzako, ububasha bw’Iyisumbavyose bugutwikire. Ni co gituma umwana azovuka azoba uwera, yitwe Umwana w’Imana.

³⁶Mbere na Elizabeti incuti yawe agiye kuvyara umwana mu myaka yiwe y’ubusaza. Uwahora yitwa ingumba, uku ni ukwezi kugira gatandatu yibungenze,

³⁷kuko ata jambo Imana ivuze ribura ububasha.”

³⁸Mariya aramwishura ati: “Jewe ndi umusavyikazi w’Umwami Imana, nibimbere nk’uko ubivuze.” Wa mumarayika aca amusiga aho arigira.

³⁹Muri iyo misi, Mariya aritegura, aduga yihuta mu misozi, aja mu gisagara ca Yuda.

⁴⁰Ashitse kwa Zakariya, aramutsa umugore wiwe Elizabeti.

⁴¹Na we yumvise indamukanyo ya Mariya, umwana yari mu nda yiwe ariginagura. Elizabeti aca yuzuzwa Mpwemu Yera,

⁴²avuga n’ijwi rirenga ati: “Urahezagiwe mu bandi bagore bose, n’umwana ari mu nda yawe arahezagiwe.

⁴³Mbega nari iki kugira ngo nyina w’Umwami wanje angendere?

⁴⁴Nabaye ncumva indamukanyo yawe, umwana ari mu nda aca ariginagura kubera umunezero.

⁴⁵Urahiriwe kuko wizeye ko ivyo Umwami Imana yavuze bizoshika.”

⁴⁶Mariya aravuga ati: “Ubugingo bwanje burahimbaza Umwami Imana,

⁴⁷kandi impwemu yanje inezererewe Imana yo Mukiza wanje,

⁴⁸kuko yibutse umusavyikazi wayo muto. Uhereye ubu abantu bose bazonyita umuhirwe,

⁴⁹kuko Inyenkomezi yankoreye ibihambaye, izina ryayo ni iryera.

⁵⁰Igirira imbabazi abayubaha, uko uruganwe rukurikirana n’urundi.

⁵¹Ukuboko kwayo kwakoze ivy’inkomezi; yashwiragije abishira hejuru mu mitima yabo.

⁵²Yakuye abatware ku ntebe z’inganji, ishira hejuru abaciye bugufi.

⁵³Yahagije ivyiza abashonje, yirukana abatunzi bagenda imbokoboko.

⁵⁴Yatabaye umusavyi wayo Isirayeli, yibuka kugirira imbabazi

⁵⁵Aburahamu n’uruvyaro rwiwe ibihe vyose, nk’uko yari yarabisezeraniye ba sogokuruza.”

⁵⁶Nuko Mariya amarana na Elizabeti amezi nk’atatu, araheza arataha.

⁵⁷Igihe ciwe co kwibaruka kigeze, Elizabeti yibaruka umwana w’umuhungu.

⁵⁸Incuti n’ababanyi bumvise ko Umwami Imana yamugiriye ubuntu, banezeranwa na we.

⁵⁹Umwana amaze imisi umunani, bamujana kumukeba[2]. Bagira bamwite izina rya se Zakariya,

⁶⁰nyina arahakana, avuga ati: “Oya, izina ryiwe ni Yohana.”

⁶¹Na bo baramubwira bati: “None ko ata n’umwe wo mu muryango wanyu yitwa iryo zina!”

⁶²Baca babaza se bakoresheje ibimenyetso ngo ababwire izina ashaka ko bita umwana wiwe.

⁶³Zakariya aca asaba ico kwandikako, yandika ati: “Izina ryiwe ni Yohana.” Bose baratangara.

⁶⁴Ubwo nyene akanwa kiwe gaca karuguruka, ururimi ruragoboroka, aca atangura kuvuga ahimbaza Imana.

⁶⁵Abari aho bose bafatwa n’ubwoba, kandi iyo nkuru yamamara mu misozi yose y’i Yudaya.

⁶⁶Abavyumva bose vyabatera kwibaza mu mitima bati: “None uwo mwana azoba umuntu ki?” Kuko ubushobozi bw’Umwami Imana bwari kuri we.

⁶⁷Se Zakariya, yuzuye Mpwemu Yera, atangura kuvugishwa ati:

⁶⁸“Amashimwe ni ay’Umwami, Imana ya Isirayeli, kuko yaje gutabara no gucungura abantu bayo.

⁶⁹Iduhagurukirije Umukiza ahambaye mu nzu ya Dawidi, umusavyi wayo

⁷⁰(nk’uko yabisezeranye kera ikoresheje abavugishwa bayo bera),

⁷¹izodukiza abansi bacu, iturokore no mu maboko y’abatwanka.

⁷²Yagiriye imbabazi ba sogokuruza, yibuka isezerano ryiwe ryera,

⁷³ari yo ndahiro yarahiye sogokuruza Aburahamu;

⁷⁴ko azodukiza agahahazo k’abansi bacu, akadushoboza kumukorera ata bwoba,

⁷⁵mu kwera no mu kuyigororokera imisi yose yo kubaho kwacu.

⁷⁶Kandi nawe, mwana wanje, uzokwitwa uwuvugishwa n’Iyisumbavyose, kuko uzokwitangira imbere Umwami Imana, ukamutegurira inzira.

⁷⁷Uzokwigisha abantu biwe inzira y’agakiza kava mu guharirwa ivyaha vyabo.

⁷⁸Ku bw’imbabazi nyinshi z’Imana yacu, umuco w’igitondo ugiye kuturasira uvuye mw’ijuru,

⁷⁹kugira ngo uboneshereze abari mu mwijima n’abari mu gitutu c’urupfu, wongere urongorere intambuko zacu mu nzira y’amahoro.”

⁸⁰Uwo mwana arakura, arakomera mu mpwemu, aba mu bugaragwa gushika igihe yiyerekeye Abisirayeli.