Read Contemporary Kirundi Bible Luka 23 Bible Online

Luka 23 - Contemporary Kirundi Bible bible

Luka 23

¹Nuko abari mu nama bose bavira hasi rimwe bamujana kwa Pilato,

²batangura kumurega bavuga bati: “Uwu muntu twasanze ariko aragumura abantu bo mu bwoko bwacu, ababuza gutanga ikori rya Kayisari, kandi yigira Kristo, umwami.”

³Pilato aca abaza Yesu ati: “Woba uri umwami w’Abayuda?” Yesu aramwishura ati: “Uvuze ukuri.”

⁴Pilato aca abarira abakuru b’abaherezi n’isinzi ry’abantu bari aho bose ati: “Uwu muntu simbona ikimwagira.”

⁵Ariko barushiriza kuvuga bati: “Agumura abantu i Yudaya hose biciye mu nyigisho ziwe. Yatanguriye i Galilaya none raba ashitse n’ino i Yerusalemu.”

⁶Pilato avyumvise aca abaza ati: “Uwu muntu ava i Galilaya?”

⁷Yumvise ko Yesu atwarwa mu ntara ya Herode Antipa, aca aramumurungikira, kandi ico gihe Herode yari i Yerusalemu.

⁸Herode abonye Yesu, aranezerwa cane kuko yari amaze igihe kirekire yipfuza kumubona. Yari yarumvise ivyiwe, maze yipfuza kumubona akora igitangaza.

⁹Nuko abaza Yesu ibibazo vyinshi ariko ntiyishura na kimwe.

¹⁰Abakuru b’aherezi n’abigisha b’ivyagezwe bari bahagaze ngaho, bamwagiriza bashimitse.

¹¹Herode n’abasoda biwe baca batangura kumushinyagurira no kumucokora. Baca bamwambika impuzu y’ubwami, baramurungika asubira kwa Pilato.

¹²Kuva uwo musi Herode na Pilato baca baba abagenzi, kuko imbere y’aho bari abansi.

¹³Pilato aca akoranya abakuru b’abaherezi, abatware n’abari aho bose,

¹⁴ababwira ati: “Mwanzaniye uwu muntu muvuga ko yateye imigumuko, ariko namusambishirije imbere yanyu, nta caha camwagiriye.

¹⁵Ndetse na Herode nta co yamwagirije kuko mwiboneye ko yamudusubije. Nta co yakoze cotuma yicwa.

¹⁶Ndamukubitisha gusa, hanyuma ndamurekure.” [

¹⁷Igihe cose kuri Pasika, Pilato yama abarekurira imbohe imwe.][31]

¹⁸Ariko bose basemerera icarimwe bati “Uwo muntu nabambwe, uturekurire Baraba.”

¹⁹(Uwo Baraba yari yatawe mw’ibohero yagirizwa umugumuko wari wabaye mu gisagara hamwe n’ubwicanyi.)

²⁰Kubera ko Pilato yagomba kurekura Yesu, yongera avugana n’iryo sinzi ry’abantu.

²¹Ariko bo barushiriza gusemerera bati: “Nabambwe! Nabambwe!”

²²Yongera kubabaza ubwa gatatu ati: “None ni ikihe caha yakoze? Nta kintu na kimwe nabonye yakoze cotuma yicwa. Ariko ndamutanga bamutonagure gusa, hanyuma ndamurekure.”

²³Noneho baca bashira urwamo hejuru basaba ko Yesu abambwa, gushika aho Pilato arengerwa,

²⁴aca abemerera ico bamusavye.

²⁵Nuko aca arekura wa mugabo yari apfunzwe yagirizwa imigumuko n’ubwicanyi, uwo bari basavye ko yobarekurira, hanyuma abaha Yesu ngo bamukoze ico bashaka.

²⁶Abasoda batwaye Yesu kumubamba bafata Simoni w’i Kurene, yari avuye mu mirima, baca bamukorera umusaraba, agendera inyuma ya Yesu.

²⁷Maze abantu isinzi baramukurikira, harimwo n’abagore bagenda baramuririra baboroga.

²⁸Yesu arahindukira arababarira ati: “Bakobwa b’i Yerusalemu, nta co mundirira. Nimwiririre mwebwe, muririre n’abana banyu.

²⁹Kuko igihe kigiye gushika, aho abantu bazovuga bati: ‘Hahiriwe abagore batigeze bavyara, n’inda zitigeze zibungenga, hamwe n’amabere atigeze yonsa.’

³⁰Hanyuma ‘bazobwira imisozi bati: “Tugweko!”[32] n’imitumba bati: “Tunyegeze!” ’

³¹Kuko nimba bagiriye gutya igiti kibisi, mbega icumye co bizokigendera gute?”

³²Kandi hariho n’abandi bagabo babiri b’inkozi z’ikibi, na bo bajanwa kwicirwa hamwe na Yesu.

³³Babashikanye ahantu hitwa Nyagihanga, abasoda baca baramubamba, ari kumwe na za nkozi z’ikibi, umwe i buryo uwundi i bubamfu bwiwe.

³⁴Maze Yesu aravuga ati: “Data, bababarire, kuko ntibazi ico bariko barakora.” Maze bagabura impuzu za Yesu hakoreshejwe ubufindo.

³⁵Abantu isinzi bari aho babiraba; abakuru b’Abayuda na bo bamucokora, bavuga bati: “Yakijije abandi, niyikize na we turabe, ko yigira ngo ni Kristo, Uwatoranijwe n’Imana.”

³⁶N’abasoda baraza baramushinyagurira, bamuha inkarisha kugira ngo anywe,

³⁷bamubwira bati: “Nimba uri umwami w’Abayuda, niwikize turabe!”

³⁸Baca bamanika icandiko hejuru yiwe kivuga ngo: UWU NI UMWAMI W’ABAYUDA.

³⁹Umwe muri za nkozi z’ikibi zibambanywe na we aramutuka ati: “Ko uri Kristo, niwikize hanyuma udukize natwe.”

⁴⁰Ariko mugenziwe aramukankamira avuga ati: “Mbega wewe ntutinya n’Imana kandi waciriwe urubanza rumwe n’urwiwe?

⁴¹Twebwe twahaniwe ikiri ukuri, kuko turiko twishura ibihwanye n’ivyo twakoze. Ariko uwu we nta kibi na kimwe yakoze.”

⁴²Aca avuga ati: “Yesu, uranyibuka niwagaruka mu Bwami bwawe.”

⁴³Yesu aramwishura ati: “Ndakubwire ukuri, uno musi nyene uraza kubana nanje muri paradizo.”

⁴⁴Hari nk’isaha zitandatu z’umurango, maze umwijima utwikira igihugu cose gushika isaha icenda,

⁴⁵kuko izuba ryari ryazimye. Maze igitambara co mu rusengero na co gitabukamwo kabiri.

⁴⁶Yesu aca arasemerera n’ijwi rirenga ati: “Data, mu biganza vyawe ni ho nshize impwemu yanje.” Ahejeje kuvuga ivyo, aca aracikana.

⁴⁷Umusoda mukuru w’Umuroma yari aho abonye ibibaye, aca ashima Imana avuga ati: “Ni ukuri, uwu muntu yari intungane.”

⁴⁸Rya sinzi ry’abantu bari bakoraniye aho baje gushengerera ibiriko biraba babonye ibibaye, basubira inyuma buzuye umubabaro, bishishitira.

⁴⁹Ariko abari bazi Yesu, harimwo na ba bagore bari bamukurikiye kuva i Galilaya, bagumye bahagaze aho bakurikiranira kure ivyariko biraba.

⁵⁰Hari umugabo yitwa Yosefu, yari mu bagize inama nkuru y’abatwara ubwoko bw’Abayuda, akaba yari umuntu mwiza kandi w’intungane.

⁵¹Ntiyari ashigikiye abandi mu ngingo zose bafashe n’ivyo bakoze. Yava mu gisagara c’Abayuda citwa Arimataya, kandi yari yiteze ukuza kw’Ubwami bw’Imana.

⁵²Nuko aja kwa Pilato, amusaba ikiziga ca Yesu.

⁵³Hanyuma akimanura ku musaraba, akizingira mu gitambara cera, aca agishira mu mva nshasha yimbwe mu gitandara, itari bwigere ihambwamwo umuntu na rimwe.

⁵⁴Ivyo vyabaye ari ku musi wo kwitegurira Isabato, kandi yagira itangure.

⁵⁵Nuko ba bagore bavana na Yesu i Galilaya, bakurikira Yosefu, barabona ya mva, babona n’ukuntu ikiziga ca Yesu kiryamitsweyo.

⁵⁶Baca basubira i muhira bategura ibimota neza n’amavuta yo gusiga ikiziga. Ariko Isabato igeze bararuhuka kugira bubahirize icagezwe.