Read Contemporary Kirundi Bible Luka 24 Bible Online

Luka 24 - Contemporary Kirundi Bible bible

Luka 24

¹Ku musi wa mbere utangura indwi, hakiri kare mu gitondo, ba bagore bafata vya bimota neza bari bateguye, baja ku mva.

²Bahashitse, basanga ikibuye cari cugaye imva catembagajwe,

³hanyuma barinjira, ariko ikiziga c’Umwami Yesu ntibakibona.

⁴Bakizazaniwe haca haboneka abagabo babiri bambaye impuzu zica ibibatsi, bahagarara i ruhande yabo.

⁵Ba bagore bagira ubwoba bwinshi, bakubita ibipfukamiro hasi barunama, ariko ba bagabo barababwira bati: “Ni kuki muronderera umuntu muzima mu bapfuye?

⁶Ntari hano, yazutse. Nimwibuke ivyo yababwiye akiri kumwe namwe i Galilaya,

⁷ati: ‘Umwana w’Umuntu azotabwa mu maboko y’abanyavyaha, bamubambe ku musaraba. Ariko ku musi ugira gatatu azozuka mu bapfuye.’ ”

⁸Nuko baca baribuka amajambo yavuze.

⁹Bagarutse bavuye ku mva, bashika babarira bamwe cumi n’umwe n’abandi bose ivyabaye vyose.

¹⁰Abo bagore bagiye kubwira intumwa ivyabaye bari Mariya Magadalena, Yowana, na Mariya nyina wa Yakobo, n’abandi bagore bari kumwe na bo.

¹¹Ariko intumwa ntizavyemera kuko ivyo abo bagore bavuga vyasa n’imigani kuri bo.

¹²Ariko Petero we arahaguruka agenda yiruka aja ku mva. Ashitseyo, arunama araba mu mva, abona vya bitambara vyera gusa, aca asubira inyuma yibaza ivyabaye.

¹³Kuri uwo musi nyene, abigishwa babiri ba Yesu bariko baja mu gisagara citwa Emawusi kiri nko ku birometero cumi na bibiri uvuye i Yerusalemu,

¹⁴bagenda baganira ku vyabaye vyose.

¹⁵Bakiriko baraganira bahanahana ivyiyumviro, Yesu aca arabegera ajana na bo.

¹⁶Ariko amaso yabo anyegezwa uwo ari we, ntibamumenya.

¹⁷Yesu arababaza ati: “Ivyo mugenda muraganira ni ibiki?” Nuko baca barahagarara, bijiriwe cane.

¹⁸Umwe muri bo yitwa Kirewofasi aca amubaza ati: “Ni wewe wenyene waje i Yerusalemu utamenye ivyahabereye muri iyi misi?”

¹⁹Na we arababaza ati: “Ni ibiki vyabaye?” Baramwishura bati: “Ni ivya Yesu w’i Nazareti. Yari umuvugishwa n’Imana, yuzuye ubushobozi mu vyo yavuga no mu vyo yakora, imbere y’Imana n’imbere y’abantu.

²⁰Abakuru b’abaherezi n’abatware bacu baramutanze ngo acirwe urubanza rwo gupfa, maze baramubamba,

²¹natwe twari twizeye ko ari we yocunguye Abisirayeli. Kandi uwu ni umusi ugira gatatu ivyo bibaye.

²²Ikigeretseko, hari abagore bo muri twebwe badutangaje. Bagiye ku mva uno musi mu gitondo,

²³ariko ntibabona ikiziga ciwe. Baje batubwira ko abamarayika babiyeretse, bababwira ko ari muzima.

²⁴Bamwe mu bagenzi bacu bagiye ku mva babisanga nk’uko ba bagore babivuze, ariko we ntibamubonye.”

²⁵Yesu aca ababwira ati: “Yemwe bantu b’ubwenge buke mwe! Birabagora kwizera mu mitima yanyu ivyo abavugishwa n’Imana bavuze.

²⁶Mbega Kristo ntiyategerezwa kubabazwa gutyo imbere y’uko yinjira mu bwiza bwiwe?”

²⁷Nuko ahera ku vyanditswe na Mose n’abavugishwa bose, abasigurira ico Ivyanditswe bimuvugako.

²⁸Bagira bashike mu gisagara bari bagiyemwo, Yesu amera nk’uwushaka kubandanya.

²⁹Ariko baramwinginga cane bati: “Gumana natwe kuko buriko burira, kandi umusi ugeze kure.” Nuko Yesu agumana na bo.

³⁰Bicaye bagira bafungure, Yesu afata umukate, awushimira Imana, arawumanyagura, arawubahereza.

³¹Amaso yabo aca aruguruka, baramumenya, ariko aca arakamangana, ntibasubira kumubona.

³²Baca batangura kubazanya bati: “Mbega imitima yacu ntiyariko iragurugumba igihe yariko aravugana natwe mu nzira, adusigurira Ivyanditswe?”

³³Ubwo nyene baca barahaguruka basubira i Yerusalemu. Bashitseyo, basanga bamwe cumi n’umwe n’abari kumwe na bo bakoraniye hamwe,

³⁴bariko bavuga bati: “Ni ukuri Umwami yazutse, kandi yiyeretse Simoni.”

³⁵Maze abo bigishwa babiri na bo babiganira ivyabaye mu nzira bariko baragenda, n’ukuntu bamumenye amaze kumanyagura umukate.

³⁶Bakiriko barababwira ivyabaye, Yesu araza ahagarara hagati yabo, arababwira ati: “Amahoro abane namwe!”

³⁷Baterwa n’ubwoba bwinshi kuko bibaza ko babonye umuzimu.

³⁸Yesu arababaza ati: “Ni kuki mufise ubwoba no gukekeranya mu mitima yanyu?

³⁹Ehe nimurabe ibiganza n’ibirenge vyanje. Ni jewe nyene. Nimunkoreko maze mumenye ko ntari umuzimu, kuko umuzimu utagira inyama n’amagufa nk’ivyo mumbonana.”

⁴⁰Ahejeje kuvuga ivyo, abereka ibiganza n’ibirenge vyiwe.

⁴¹Bakizazaniwe kubera umunezero n’ugutangara kwinshi, arababaza ati: “Nta vyokurya mufise?”

⁴²Nuko bamuzanira ikimanyu c’ifi yokeje,

⁴³na we arayakira, ayirira imbere yabo.

⁴⁴Aca ababarira ati: “Ibi ni vyo nari narababwiye nkiri kumwe namwe, ko ivyanditswe kuri jewe vyose mu Vyagezwe ya Mose, mu vyanditswe n’abavugishwa n’Imana no muri Zaburi, bitegerezwa gushika.”

⁴⁵Aca abugurura ubwenge kugira ngo batahure Ivyanditswe.

⁴⁶Arababwira ati: “Handitswe ngo ‘Kristo azobabazwa, apfe, hanyuma azuke mu bapfuye ku musi ugira gatatu,

⁴⁷kandi ubutumwa bw’ukwihana n’uguharirwa ivyaha buzovugwa mw’izina ryiwe mu mahanga yose, uhereye i Yerusalemu.’

⁴⁸Namwe muri ivyabona vyo gushingira intahe ivyo.

⁴⁹Ehe ngiye kubarungikira ingabire Data yasezeranye, ariko mugume mu gisagara gushika muhawe ubushobozi buvuye mw’ijuru.”

⁵⁰Maze Yesu aca abajana inyuma y’igisagara, hafi y’i Betaniya, aramvura amaboko arabahezagira.

⁵¹Akiriko arabahezagira, aca abavamwo, aduzwa mw’ijuru.

⁵²Baca barapfukama baramusenga, hanyuma basubira i Yerusalemu buzuye umunezero mwinshi.

⁵³Imisi yose bama mu rusengero, bahimbaza Imana.