Read Contemporary Kirundi Bible Yohana 10 Bible Online

Yohana 10 - Contemporary Kirundi Bible bible

Yohana 10

¹Ndababwire ukuri, umuntu wese yinjira adaciye mu muryango w’uruhongore rw’intama, ariko akuririra ahandi, uwo ni igisuma kandi ni umwambuzi.

²Uwinjira aciye mw’irembo ni we mwungere w’intama.

³Umurinzi w’irembo aramwugururira, kandi intama zirumva ijwi ryiwe. Ahamagara intama ziwe mu mazina yazo, akaziturutsa.

⁴Amaze kuzisohora zose, azija imbere, na zo zikamukurikira kuko zizi ijwi ryiwe.

⁵Ntizishobora gukurikira uwo zitazi, ahubwo ziramuhunga kuko zitazi ijwi ryiwe.

⁶Ivyo Yesu yabibabwiye mu mugani, kandi abamwumviriza ntibashoboye gutahura ico ashatse kuvuga.

⁷Nuko Yesu yongera kubabwira ati: “Ndababwire ukuri, ni jewe rembo ry’intama.

⁸Abanyitangiye imbere bose bari ibisuma n’abambuzi, ariko intama ntizabumvirije.

⁹Ni jewe rembo; umuntu wese yinjiye aciye muri jewe azokizwa. Azokwinjira, asohoke kandi aronke ikimutunga.

¹⁰Igisuma ntikizanwa n’ikindi atari ukwiba, ukwica no gutikiza; ariko jewe naje kugira ngo intama zigire ubugingo, kandi zibugire busagutse.

¹¹Jewe ndi umwungere mwiza. Umwungere mwiza yitangira intama ziwe.

¹²Umucangero arahunga iyo abonye ibingira rije. Arata intama agahunga kuko atari umwungere wazo kandi intama zitari iziwe, maze rya bingira rikitera mu ntama rikazishwiragiza.

¹³Umucangero arahunga kuko akorera amahera kandi atababaye intama.

¹⁴Jewe ndi umwungere mwiza; ndazi intama zanje kandi na zo ziranzi,

¹⁵nk’uko Data anzi nanje nkamumenya. Ni co gituma ntanga ubugingo bwanje ku bwazo.

¹⁶Ndafise n’izindi ntama zitari muri uru ruhongore. Na zo ntegerezwa kuzizana. Zizokwumva ijwi ryanje, maze habe umukuku umwe n’umwungere umwe.

¹⁷Igituma Data ankunda ni uko ntanga ubuzima bwanje kugira ngo nzosubire kubwakira.

¹⁸Nta muntu n’umwe ashobora kubunyaka, ndabutanga ari uko ndabishatse. Mfise ubushobozi bwo kubutanga n’ubwo kubwakira gushasha. Iki ni co Data yantegetse gukora.”

¹⁹Abayuda bumvise ayo majambo, baca basubira gucanamwo.

²⁰Benshi muri bo bavuga bati: “Aboshwe n’umudayimoni kandi arasara. Ni kuki mumwumviriza?”

²¹Ariko abandi bavuga bati: “Aya majambo si ay’umuntu aboshwe n’umudayimoni. Mbega umudayimoni yohumura amaso y’impumyi?”

²²Ico gihe i Yerusalemu hariko habera imisi mikuru yo kwibuka ishikirizwa ry’urusengero, kandi hari mu gihe c’imbeho nyinshi cane.

²³Yesu ariko aragendagenda mu rusengero mw’ibaraza rya Salomo,

²⁴Abayuda bari aho baramukikuza, bamubaza bati: “Uzodutomorera ryari? Nimba uri Kristo, bitubwire neza.”

²⁵Yesu arabishura ati: “Narabibabwiye ariko ntimwanyizera. Ikibishingira intahe ni ibikorwa nkora mw’izina rya Data,

²⁶ariko ntimwizera kuko mutari abo mu ntama zanje.

²⁷Intama zanje zumva ijwi ryanje; ndazizi na zo zirankurikira.

²⁸Nanje ndaziha ubugingo budashira, kandi ntizizokwigera zipfa. Nta n’umwe ashobora kuzinkura mu kuboko.

²⁹Data yazimpaye aruta bose; nta muntu n’umwe ashobora kuzikura mu kuboko kwa Data.

³⁰Kandi twe na Data turi umwe.”

³¹Nuko Abayuda bongera gutora amabuye ngo bayamutere,

³²ariko Yesu arababwira ati: “Ko nakoreye imbere yanyu ibikorwa vyiza vyinshi ndabitumwe na Data, none ni ikihe muri ivyo gitumye mugomba kuntera amabuye?”

³³Baramwishura bati: “Ntitugomba kugutera amabuye kubera igikorwa ciza, ahubwo tuguhora gutuka Imana; kuko uri umuntu asanzwe, ariko ukigira Imana!”

³⁴Yesu arabishura ati: “Mbega mu vyagezwe vyanyu, ntihanditswe ko Imana yavuze iti: ‘Navuze ko muri imana’[9]?

³⁵Murazi ko ata gishobora guhindura Ivyanditswe. None nimba ababwiwe iryo jambo biswe ‘imana,’

³⁶none vyocura iki ku wo Data yatoranije nk’uwiwe bwite hanyuma akamurungika kw’isi? Ni kuki munyagiriza ko ntutse Imana, mvuze nti: ‘Ndi Umwana w’Imana’?

³⁷Nimba ntakora ibikorwa vya Data, ntimunyizere!

³⁸Ariko nimba nkora ibikorwa vya Data, naho mutonyizera jewe, nimwizere ibikorwa nkora, kugira ngo mumenye kandi mutahure ko Data ari muri jewe nanje nkaba muri we.”

³⁹Nuko bagerageza kumufata kandi, ariko arabacika.

⁴⁰Yesu aca asubira hakurya ya Yorodani mu kibanza Yohana yabatirizamwo mu misi ya mbere, ahamara igihe.

⁴¹Abantu benshi baza aho ari, baravuga bati: “Naho Yohana ata gitangaza yakoze, ivyo yavuze vyose kuri uwu muntu vyari ukuri.”

⁴²Maze benshi mu bari aho bizera Yesu.