Read Contemporary Kirundi Bible Roma 9 Bible Online

Roma 9 - Contemporary Kirundi Bible bible

Roma 9

¹Mvuga ukuri nk’uwa Kristo simbesha; ijwi ryo mu mutima wanje na Mpwemu Yera biranshingira intahe:

²umutima wanje wuzuye intuntu n’umubabaro udahera

³ku bwa benewacu b’Abayuda. Nopfuma mba ikivume ngatandukana na Kristo, nimba ivyo vyotuma abo mu bwoko bwanje bakizwa.

⁴Abo mvuga ni Abisirayeli: Imana yabagize abana bayo, ibahishurira ubwiza bwayo, igiriranira amasezerano na bo, ibaha n’ivyagezwe vyayo. Yabahaye kandi ibakwe ryo kuyisenga ibaha n’amasezerano yayo.

⁵Ba sekuruza babo ni Abaheburayo ba rurangiranwa; mu buryo bw’umubiri, Yesu Kristo ubwiwe akomoka muri ubwo bwoko kandi uwo ni we Mana iri hejuru ya vyose, akwiye gushimwa ibihe vyose. Amen.

⁶Ivyo ntibisigura ko ivyo Imana yasezeraniye Abisirayeli vyabaye impfagusa. Haba na mba! Kuko abavukiye mw’ihanga rya Isirayeli bose si Abisirayeli.

⁷Kandi abakomoka kuri Aburahamu bose, ntibaca baba uruvyaro rwiwe nyakuri. Kuko Ivyanditswe Vyera bivuga ngo: “Uruvyaro nagusezeraniye uzoruronka biciye muri Isaka.”[17]

⁸Ibi bisigura ko abavutse mu buryo bw’umubiri atari bo bana b’Imana, ahubwo abavutse mu buryo bw’isezerano ni bo bana ba Aburahamu.

⁹Imana ni yo yatanze isezerano iravuga iti: “Umwaka ugeze aha uwu ugeze, nzogaruka kandi Sara azoba afise umwana w’umuhungu.”[18]

¹⁰Uwo mwana ni sogokuruza wacu Isaka. Igihe yarongora Rebeka yamuvyayeko abana babiri b’amahasa.

¹¹Ariko imbere y’uko bavuka, batarakora ikibi canke iciza, aronka ijambo rivuye ku Mana. Iryo jambo ryavuga ko Imana itoranya abantu ikurikije intumbero yayo, itaravye ibikorwa vyabo.

¹²Yamubwiye iti: “Bukuru azokorera Butoyi.”[19] Ivyo yabivuze imbere y’uko bavuka;

¹³nk’uko Ivyanditswe Vyera bivuga ngo: “Nahisemwo gukunda Yakobo, ndamurutisha Esawu.”[20]

¹⁴None ivyo bivuga ko Imana irenganya? Haba na mba!

¹⁵Kuko Imana yabariye Mose iti: “Nzogirira imbabazi uwo nzozigirira, kandi nzogirira impuhwe uwo nzozigirira.”[21]

¹⁶Nuko rero, ni Imana ihitamwo uwo igirira imbabazi. Ntidushobora kubihitamwo canke ngo tubikorere.

¹⁷Kuko Ivyanditswe Vyera biravuga kuri Farawo, umwami wa Egiputa ngo: “Naguhisemwo kugira ngo nerekanire kuri wewe ubushobozi bwanje kandi kugira ngo izina ryanje rimenyekane kw’isi yose.”[22]

¹⁸Nuko rero, Imana ihitamwo kwerekana imbabazi zayo ku bo igomba kuzerekanirako, kandi igahitamwo gukomantaza imitima y’abo igomvye.

¹⁹Urashobora kuvuga uti: “Nimba ibintu bimeze gutyo, ni kuki Imana ivuga ko abantu batayumvira? Mbega ni nde ashobora kwanka ugushaka kwayo?”

²⁰Ariko none uri nde wewe ngo uharirize Imana? Mbega ikibumbano cobwira uwakibumvye kiti: “Ni kuki wambumvye gutya?”[23]

²¹Mbega umubumvyi ntafise uburenganzira bwo kubumba mw’ibumba rimwe inkono ishobora gukoreshwa ivy’iteka, n’iyindi igenewe ibikorwa bisanzwe?

²²N’Imana na yo, naho ifise uburenganzira bwo kwerekana uburake n’ubushobozi bwayo, irihanganira cane abantu bategerezwa kurandurwa n’uburake bwayo.

²³Ivyo ibikora kugira ngo ubutunzi bw’ubwiza bwayo burushirize gukayanganira abo yerekanirako imbabazi zayo, bateguriwe ubwo bwiza kuva kera.

²⁴Kandi natwe turi muri abo yatoranije, bamwe ibakuye mu Bayuda abandi ibakuye mu Banyamahanga.

²⁵Imana yaravugishije Hoseya ku vyerekeye abanyamahanga iti: “Abantu batahora ari abantu banje, nzobita abantu banje; kandi abo ntahora nkunda, nzobakunda”[24];

²⁶mbere, “Mu kibanza babwiriwemwo ngo: ‘Ntimuri abantu banje,’[25] ni ho bazobwirirwa ngo: ‘Muri abana b’Imana nzima.’ ”

²⁷Ku vyerekeye Isirayeli, Yesaya yarasemereye aravuga ati: “Naho Abisirayeli ari benshi bangana n’umusenyi wo kw’isesero ry’ikiyaga, bakeya gusa ni bo bazorokoka.

²⁸Kuko Uhoraho azoshitsa kuri iyi si ivyo yavuze avyuzuze rwose kandi ningoga.”[26]

²⁹Kandi ivyo Yesaya yari yarabivugishijwe imbere y’aho ati: “Iyo Uhoraho Mushoboravyose atadusigariza abadukomokako bakeya; tuba twararanduwe nk’ab’i Sodomu, tuba twaraherengetejwe nk’ab’i Gomora.”[27]

³⁰Mbega ivyo bisigura iki? Bivuga ko Abanyamahanga batigeze barondera ukugororoka, bakuronse baguhawe n’ukwizera.

³¹Ariko Abisirayeli bagerageje cane kwemerwa n’Imana mu gukurikiza ivyagezwe, ntibigeze babishikako.

³²Ni kuki bitashoboka? Kuko baguma barondera kwemerwa n’Imana mu kugerageza kwumvira ivyagezwe aho kwizera Imana. Uko ni ko batsitaye kuri rya buye ritsitaza,

³³iryo Ivyanditswe Vyera bivugako ngo: “Ehe ndashira i Siyoni ibuye ritsitaza, n’urutare rugwisha. Ariko uwumwizera ntazokwigera amaramara.”[28]