Read Contemporary Kirundi Bible 1 Korinto 10 Bible Online

1 Korinto 10 - Contemporary Kirundi Bible bible

1 Korinto 10

¹Bene Data, singomba ko mwibagira ko ba sogokuruza mu bugaragwa bagendera musi y’igicu, kandi ko bose bajabutse baciye mu kiyaga.

²Muri ico gicu no muri ico kiyaga, bose babatiririjwe kuba abigishwa ba Mose.

³Bose bariye ivyokurya bimwe vy’impwemu,

⁴banywa no ku kinyobwa kimwe c’impwemu; kuko banyoye ku gitandara c’impwemu cabaherekeza, ico gitandara na co cari Yesu Kristo ubwiwe.

⁵Ariko benshi muri bo ntibanezereye Imana, kuko imivyimba yabo yandagaye mu bugaragwa.

⁶Ivyo vyose vyabaye ngo bitubere akarorero kugira ngo imitima yacu ntiyipfuze gukora ivyaha nk’uko babigize.

⁷Ntimugasenge ibigirwamana nk’uko bamwe muri bo babisenze, nk’uko handitswe ngo: “Baricaye bararya, baranywa, hanyuma barahaguruka barinezereza.”[10]

⁸Ntituje mu busambanyi nk’uko bamwe muri bo babigize, maze ku musi umwe gusa hagapfa abantu ibihumbi mirongo ibiri na bitatu.

⁹Ntitugerageze Kristo nk’uko bamwe babigize bakamarwa n’inzoka.

¹⁰Kandi ntimukidodombe nk’uko bamwe babigize, maze bakicwa n’umumarayika muranduzi.

¹¹Ivyo vyashitse kugira ngo bitubere akarorero ko kutuburira, twebwe abo mu gihe ca nyuma.

¹²Nuko rero uwibaza ko ahagaze, yiyubare ntagwe.

¹³Nta kibagerageza cabashikiye kidashikira abandi. Kandi Imana ni iyo kwizigirwa, ntizobareka ngo mugeragezwe n’ivyo mudashobora kwihanganira. Mu gihe co kugeragezwa, izobacira inzira kugira ngo mushobore kuvyihanganira.

¹⁴None rero abo nkunda, mwirinde gusenga ibigirwamana.

¹⁵Ndababwira nk’abafise ugutahura. Nimurabe mwebwe nyene ko ivyo ndababwira atari ukuri.

¹⁶Iyo tunywera ku gikombe Imana yahezagiye, mbega ntituba dusangiye ku maraso ya Kristo? Iyo tumanyura umukate, ntituba dusangiye ku mubiri wa Kristo?

¹⁷Iyo dusangiye ku mukate umwe tuba tubaye umubiri umwe n’aho turi benshi.

¹⁸Nimurabe Abisirayeli: mbega abarya ivyashikanywe ntibaba bifatanirije hamwe ku gicaniro?

¹⁹Mbega ngomvye kuvuga ko ivyashikaniwe ibigirwamana canke ibigirwamana ubwavyo ata co bimaze?

²⁰Haba na mba. Ivyashikaniwe ibigirwamana biba vyashikaniwe abadayimoni, ari na co gituma ntashaka ko musangira n’abadayimoni.

²¹Ntimushobora kunywera ku gikombe c’Umwami hanyuma ngo mwongere munywere ku gikombe c’abadayimoni. Ntimushobora kurira ku meza y’Umwami hanyuma ngo mwongere murire ku meza y’abadayimoni.

²²Mbega mugomba tuvyure ishari ry’Umwami? Mwibaza ko tumusumvya inguvu?

²³Muvuga muti: “Vyose turavyemerewe,” yamara si vyose bigira ikimazi. Muvuga muti: “Vyose turavyemerewe,” yamara si vyose vyubaka.

²⁴Ntihakagire uwurondera ineza yiwe gusa, ariko twiteho no kugirira abandi neza.

²⁵Muze murye inyama izo ari zo zose zashowe mu kaguriro, ata co murinze kuzibazako,

²⁶kuko “isi ari iy’Umwami Imana, n’ibiri muri yo vyose.”[11]

²⁷Uwutizera niyagutumira iwe gufungura ukagenda, uzofungure ivyo akuzimanye vyose ata co urinze kuvyibazako.

²⁸Ariko niyakubwira ati: “Ibi vyashikaniwe ibigirwamana,” ntuzobirye ku bw’ineza y’uwo munyantegenke yabikubwiye, kugira ngo ntagire ijwi rimwagiriza mu mutima.

²⁹Nta co bitwaye kuri mwebwe, ariko hari ico vyica kuri uwo yabibabwiye. Umwidegemvyo wanje ntukwiye kuba igitsitaza ku bandi.

³⁰Iyo ndabiriyeko nshimira Imana, kubera iki abantu bancira imanza kuri ivyo vyokurya nashimiye Imana?

³¹Nuko rero iyo murya canke munywa, canke mukora ikindi kintu cose, mubikore muhesha Imana icubahiro.

³²Ntihakagire uwo mutsitaza, yaba Umuyuda canke Umugiriki, canke abo mw’ishengero ry’Imana.

³³Na jewe ngerageza kunezereza bose mu vyo nkora vyose. Simpfa gukora ibimpimbara, ariko nkora ibihimbara abandi kugira benshi bashike ku gakiza.