Read Contemporary Kirundi Bible 2 Korinto 3 Bible Online

2 Korinto 3 - Contemporary Kirundi Bible bible

2 Korinto 3

¹Mbega dusubiriye gutangura kwihayagiza? Canke dukeneye amakete yo kuduhayagiza mwandikirwa canke mwandika, nk’uko bamwe bayakenera?

²Ni mwebwe nyene makete yacu yanditswe mu mitima yacu, ayo bose basoma bakayatahura.

³Muragaragaza ko muri ikete ryanditswe na Kristo, ryavuye mu gikorwa cacu, ritanditswe n’irangi ry’ikaramu, ariko ryanditswe na Mpwemu w’Imana nzima, atari ku bisate vy’amabuye ariko ku bisate vy’imitima y’abantu.

⁴Ivyo turabizi neza kubera ukwizigira Imana guhambaye dufise muri Kristo.

⁵Ntitwibaza ko dushoboye gukora ikintu na kimwe ku bw’inkomezi zacu, ariko Imana ni yo idushoboza gukora vyose.

⁶Ni yo yatugize abakozi b’isezerano rishasha, isezerano ritavuye ku vyagezwe ariko rivuye kuri Mpwemu; kuko ivyagezwe birica ariko Mpwemu atanga ubugingo.

⁷Igihe ivyagezwe vyandikwa ku bisate vy’amabuye indome ku yindi, ubwiza bw’Imana bwaciye bukayangana. Mu maso ha Mose harakayanganye gushika aho Abisirayeli batashobora kumuraba mu maso, ariko ukwo gukayangana kwari ukw’akanya gato. Nimba rero ivyagezwe bikora igikorwa co kuzanira abantu urupfu vyazananye n’ubwiza bungana gutyo,

⁸mbega igikorwa ca Mpwemu Yera ntikizorushiriza kugira ubwiza burengeje?

⁹Nimba igikorwa cadutsindisha cari cisakaje ubwiza, mbega igikorwa kituzanira ukugororoka ntikizorushiriza kwambara ubwiza?

¹⁰Twovuga mbere ko imbere y’ubwo bwiza butangaje, ubwiza bwo hambere budasubira no kuboneka.

¹¹Kandi nimba ivya kera bihera vyari vyuzuye ubwiza, mbega ibishasha bizohoraho ntibizorushiriza kugira ubwiza burengeje?

¹²Ko dufise ivyo vyizigiro, dufise ugushira amanga.

¹³Ntitumeze nka Mose yahisha mu maso hiwe n’igitambara kugira ngo Abisirayeli ntibabone ukwo gukayangana, kandi kwari ukw’akanya gato.

¹⁴Ariko ubwenge bwabo bwarimwo umwiza, kuko gushika n’ubu ico gitambara kibagumako iyo basoma ivy’isezerano rya kera. Nticigeze kibakurwako, kuko muri Kristo ari ho gikurirwaho.

¹⁵No gushika uno musi, iyo basomye ivyagezwe vya Mose, ico gitambara kiguma gipfutse imitima yabo, bituma badatahura.

¹⁶Ariko hagize uwuza ku Mwami Yesu, ca gitambara kimukurwako.

¹⁷Umwami ni we Mpwemu, kandi aho Mpwemu w’Imana ari haba umwidegemvyo.

¹⁸Natwe abakuweko ico gitambara, tugaragaza ubwiza bw’Umwami wacu, kandi tukaba turiko turahindurwa ngo duse na we, tuva mu bwiza tuja mu bundi, na bwo bukaba buva ku Mwami wacu, na we akaba ari we Mpwemu.