Read Contemporary Kirundi Bible 1 Tesalonike 5 Bible Online

1 Tesalonike 5 - Contemporary Kirundi Bible bible

1 Tesalonike 5

¹Bene Data, ku bijanye n’imisi n’ibihe ivyo bizoshikirako, ntitwari dukwiye no kurinda kubibandikira,

²kuko musanzwe muzi neza ko umusi Umwami wacu azogarukirako uzoshika nk’igisuma mw’ijoro.

³Igihe abantu bazoba bavuga bati: “Ni amahoro, nta nkomanzi,” ni ho ugutikizwa kuzobashikako giturumbuka, kurya umugore yibungenze afatwa n’ibise, kandi ntawuzorokoka.

⁴Ariko mweho bene Data, kuko mutari mu mwijima, uwo musi ntuzobashikako giturumbuka nk’igisuma.

⁵Mwese muri abana b’umuco n’abana b’umurango. Ntituri ab’ijoro, kandi ntituri ab’umwijima.

⁶Ni co gituma tudakwiye kwifata nk’abandi basinziriye. Twame turi maso, twirinde akaborerwe.

⁷Kuko abaryama baryama mw’ijoro, kandi n’ababorerwa baborerwa mw’ijoro.

⁸Ariko ko turi ab’umurango, muze tugendane ubwenge, twambaye ukwizera n’urukundo nk’icuma gikingira igikiriza, n’ivyizigiro vy’agakiza nk’inkofero y’icuma.

⁹Kuko Imana itadushiriyeho kuzorakirwa na yo, ariko yadushiriyeho kuronka agakiza mu Mwami wacu Yesu Kristo.

¹⁰Yaradupfiriye kugira ngo ni yaza, twoba twarapfuye canke twoba tukiriho, tuzobane na we ibihe vyose.

¹¹None rero muremeshanye mwongere mukuzanye, nk’uko musanzwe muriko murabikora.

¹²Bene Data, turabinginze ngo mwubahe abakorera muri mwebwe, babarongoye mu gikorwa c’Umwami, kandi babarongora mu vy’Impwemu.

¹³Mububahe n’imitima yanyu yose mu rukundo ku bw’igikorwa cabo. Mubane amahoro.

¹⁴Kandi, turabinginze bene Data ngo muhanure ibinebwe, muremeshe abadendebukiwe, mufashe abanyantegenke, mwihanganirane.

¹⁵Mwirinde ntihagire uwusubiza inabi mugenziwe, ariko mugiriranire ubugwaneza muri mwebwe no ku bandi.

¹⁶Mwame munezerewe ibihe vyose

¹⁷Musenge ubudahumeka.

¹⁸Mwame mushima Imana mu bibashikira vyose kuko ari kwo gushaka kw’Imana kuri mwebwe abari muri Kristo Yesu.

¹⁹Ntimukazimye Mpwemu Yera.

²⁰Ntimugakengere ubuvugishwa,

²¹ariko mubusuzume bwose, hanyuma mwumire ku vyiza.

²²Mwirinde ikibi cose.

²³Imana yo nyene, yo Mana y’amahoro, ibandanye ibeza; kandi impwemu, imishaha n’imibiri vyanyu bizosangwe bitagira agasembwa ku musi w’ukuza kw’Umwami wacu Yesu Kristo.

²⁴Iyabahamagaye ni iyo kwizigirwa, no kubishitsa izobishitsa.

²⁵Bene Data, mudusengere.

²⁶Muturamukirize bene Data bose n’ukugumbirana kwera.

²⁷Ndabingingiye imbere y’Umwami ngo iri kete rizosomerwe bene Data bose.

²⁸Ubuntu bw’Umwami wacu Yesu Kristo bubane namwe.