Read Contemporary Zulu Bible 2024 Kwabase-Efesu 5 Bible Online

Kwabase-Efesu 5 - Contemporary Zulu Bible 2024 bible

Kwabase-Efesu 5

¹Ngakho yibani ngabalingisa uNkulunkulu njengabantwana abathandekayo;

²nihambe othandweni, njengalokho noKristu wasithanda, wazinikela ngenxa yethu, abe ngumnikelo nomhlatshelo kuNkulunkulu, abe yiphunga elimnandi.

³Kepha ubufebe, nakho konke ukungcola, noma isangabe, makungaphathwa nakanye phakathi kwenu, njengokuba kufanele abangcwele;

⁴namanyala, nenkulumo yobuwula, nokuntela, okuyizinto ezingafanele, kepha kunalokho ukubonga.

⁵Ngokuba niyakwazi lokhu, ukuthi akukho sifebe, noma ongcolileyo, noma onesangabe ongokhonza izithombe, onefa embusweni kaKristu noNkulunkulu.

⁶Makungabikho onikhohlisayo ngamazwi ayize, ngokuba ngenxa yalezo zinto ulaka lukaNkulunkulu lwehlela phezu kwabantwana bokungalaleli.

⁷Ngakho-ke ningabi ngabahlanganyeli nabo.

⁸Ngokuba nanikade nibubumnyama, kepha manje ningukukhanya eNkosini; hambani njengabantwana bokukhanya;

⁹(Ngokuba isithelo sikaMoya sikubo bonke ubuhle nokulunga neqiniso;)

¹⁰nihlola ukuthi kuyini okwamukelekayo eNkosini.

¹¹Futhi ningabi nenhlanganyelo nemisebenzi yobumnyama engatheli, kodwa kunalokho niyisole.

¹²Ngoba izinto ezenziwa yibo ekusithekeni kulihlazo lokukhuluma.

¹³Kodwa konke okusolwayo kubonakaliswa ngukukhanya, ngoba konke okubonakaliswayo kungukukhanya.

¹⁴Ngakho uthi: Vuka wena oleleyo, uvuke kwabafileyo, uKristu uzakukukhanyisa.

¹⁵Ngakho bhekisisani ukuthi nihamba kanjani, kungabi njengeziwula kodwa njengabahlakaniphileyo;

¹⁶nithengisise isikhathi, ngokuba izinsuku zimbi.

¹⁷Ngakho ningabi ngabangahlakaniphileyo, kodwa niqonde okuyintando yeNkosi.

¹⁸Futhi ningadakwa yiwayini, lapho kukhona ukuganga; kodwa gcwaliswani ngoMoya;

¹⁹nikhulumisana ngamahubo, nangezihlabelelo, nangamaculo okomoya, nihlabelele, nihubele eNkosini enhliziyweni yenu;

²⁰nimbonga njalo uNkulunkulu uBaba ngakho konke egameni leNkosi yethu uJesu Kristu;

²¹nizithoba omunye komunye ngokwesaba uNkulunkulu.

²²Bafazi, thobelani amadoda enu kungathi kukuyo iNkosi.

²³Ngokuba indoda iyinhloko yomfazi, njengokuba noKristu eyinhloko yebandla, yena engumsindisi womzimba.

²⁴Ngakho-ke njengokuba ibandla lithobela uKristu, kanjalo nabafazi mabathobele amadoda abo kukho konke.

²⁵Madoda, thandani omkenu, njengalokho noKristu walithanda ibandla, wazinikela ngenxa yalo;

²⁶ukuze alingcwelise, alihlambulule ngesigezo samanzi ngezwi;

²⁷ukuze azimise phambi kwakhe ibandla elinenkazimulo, elingenasisihla, noma umbimbi, nanto enjalo; kodwa ukuthi libe ngcwele njalo lingelasici.

²⁸Kanjalo amadoda afanele ukuthanda omkawo njengemizimba yawo. Othanda umkakhe uzithanda yena.

²⁹Ngokuba akakho owake wazonda eyakhe inyama; kodwa uyayondla futhi ayinakekele, njengoba nje neNkosi ibandla.

³⁰Ngokuba singamalungu omzimba wakhe, awenyama yakhe, singamathambo akhe.

³¹Ngalokho indoda iyakushiya uyise nonina, inamathele kumkayo, futhi labo ababili bayakuba nyamanye.

³²Le yimfihlakalo enkulu, kepha ngikhuluma ngoKristu nebandla.

³³Nokho-ke yilowo nalowo kini makathande umkakhe njengalokhu ezithanda yena; nomfazi makahloniphe indoda yakhe.