Read Contemporary Zulu Bible 2024 KwabaseFilipi 4 Bible Online

KwabaseFilipi 4 - Contemporary Zulu Bible 2024 bible

KwabaseFilipi 4

¹Ngakho-ke, bazalwane bami abathandekayo nabalangazelelwayo, intokozo yami nomqhele wami, yimani niqinile kanjalo eNkosini, bathandwa bami.

²Ngiyamncenga u-Evodiya noSintike ukuba babe nhliziyonye eNkosini.

³Ngiyakuncenga-ke nawe sithandwa sami esiqotho, ukuthi usize labo besifazane abashikashikeka kanye nami evangelini, kanye noKlemente, nezinye izisebenzi kanye nami, abamagama abo asencwadini yokuphila.

⁴Jabulani eNkosini njalonjalo; ngiyaphinda ngithi: Jabulani.

⁵Ukulinganisela kwenu makwaziwe yibo bonke abantu. INkosi iseduze.

⁶Ningakhathazeki ngalutho; kodwa kukho konke izicelo zenu mazaziwe nguNkulunkulu ngokukhuleka nokunxusa kanye nokubonga.

⁷Ukuthula kukaNkulunkulu okudlula ukuqonda konke kuyakulondoloza izinhliziyo zenu nemicabango yenu kuKristu Jesu.

⁸Elokugcina, bazalwane, konke okuyiqiniso, konke okuhle, konke okulungileyo, konke okuhlanzekileyo, konke okuthandekayo, konke okutusekayo; uma kukhona okuhle, noma kukhona ukubongwa, zindlani ngalezizinto.

⁹Enikufundile, nakwamukela, nakuzwa, nakubona kimi, kwenzeni; khona uNkulunkulu wokuthula uyakuba nani.

¹⁰Kepha ngathokoza kakhulu eNkosini, ngokuba manje senize navuselela ukunginakekela kwenu; enanaka ngakho, kepha anibanga nathuba.

¹¹Akusikho ukuthi ngikhuluma ngokuswela, ngokuba mina ngifundile ukwaneliseka kunoma yisiphi isimo engikuso.

¹²Ngiyakwazi nokuba phansi, ngiyakwazi nokubusa; kukho konke nasezintweni zonke ngifundisiwe kokubili ukusutha nokulamba, nokubusa nokuswela.

¹³Ngingakwenza konke ngaye ongiqinisayo.

¹⁴Nokho nenze kahle ngokuhlanganyela nami osizini lwami.

¹⁵Nani-ke nina baseFilipi niyazi ukuthi ekuqaleni kwevangeli, ekusukeni kwami eMakedoniya, akukho bandla elahlanganyela nami endabeni yokupha nokwamukela, kuphela nina nodwa.

¹⁶Ngokuba naseThesalonika nathumela kanye nakabili ekusweleni kwami.

¹⁷Kungesikho ukuthi ngifuna ukuphiwa, kodwa ngifuna isithelo esingavama esibalweni senu.

¹⁸Kepha nginakho konke, ngiyachichima, sengamukele ku-Ephafrodithu izinto ezavela kini, iphunga elimnandi, nomhlatshelo owamukelekayo, othokozisayo kuNkulunkulu.

¹⁹Kodwa uNkulunkulu wami uzakugcwalisa ukuswela konke kwenu njengokwengcebo yakhe enkazimulweni kuKristu Jesu.

²⁰Makube kuNkulunkulu uBaba wethu inkazimulo kuze kube phakade naphakade. Amen.

²¹Khonzani kubo bonke abangcwele abakuKristu Jesu. Abazalwane abanami bayakhonza kini.

²²Bayakhonza kini bonke abangcwele, ikakhulu abendlu kaKesari.

²³Umusa weNkosi yethu uJesu Kristu mawube nani nonke. Amen. (KwabaseFiliphi ilotshwa nguEphafrodithu eseRoma.)