Read Contemporary Zulu Bible 2024 1 kwabaseThesalonika 4 Bible Online

1 kwabaseThesalonika 4 - Contemporary Zulu Bible 2024 bible

1 kwabaseThesalonika 4

¹Ngakho siyanincenga, bazalwane, siyaniyala ngeNkosi uJesu ukuba njengalokho nakwamukela kithi ukuthi nifanele ukuhamba nokumthokozisa kanjani uNkulunkulu, nivame kakhulu kanjalo.

²Ngokuba niyayazi imiyalo esaninika yona ngeNkosi uJesu.

³Ngokuba lokhu kuyintando kaNkulunkulu, ukungcweliswa kwenu, ukuba nidede ebufebeni;

⁴ukuze yilowo nalowo kini azi ukuthi angasiphatha kanjani isitsha sakhe ngobungcwele nangodumo;

⁵kungabi ngenkanuko, njengabezizwe abangamazi uNkulunkulu;

⁶ukuze kungabi khona oweqa umfowabo kunoma iyiphi indaba, ngokuba iNkosi ingumphindiseli wakho konke lokho, njengalokho sanixwayisa futhi safakaza.

⁷Ngoba uNkulunkulu kasibizelanga ekungcoleni, kodwa ebungcweleni.

⁸Ngakho-ke owalayo akali umuntu, kepha wala uNkulunkulu osinikile noMoya wakhe oNgcwele.

⁹Kepha maqondana nothando lobuzalwane anidingi ukuba nginilobele, ngokuba nina uqobo ningabafundiswe nguNkulunkulu ukuba nithandane.

¹⁰Nempela niyakwenza lokho kubo bonke abazalwane kulo lonke elaseMakedoniya;

¹¹nokuba nikhuthalele ukuthula, nenze izindaba zenu, nokusebenza ngezandla zenu, njengalokho saniyala;

¹²ukuze nihambe ngokufaneleyo kwabangaphandle, ningasweli lutho.

¹³Kepha angithandi, bazalwane, ukuba ningabi nakwazi ngabalalayo, ukuze ningadabuki njengabanye abangenathemba.

¹⁴Ngokuba uma sikholwa ukuthi uJesu wafa wabuye wavuka, ngokunjalo-ke nalabo abalele kuJesu uNkulunkulu uyobaletha kanye naye.

¹⁵Ngokuba lokhu sikusho kini ngezwi leNkosi ukuthi thina esisekhona esisasele ekufikeni kweNkosi asiyikubandulela abaleleyo.

¹⁶Ngokuba iNkosi uqobo iyakwehla ezulwini ngokumemeza, ngezwi lengelosi enkulu, nangecilongo likaNkulunkulu, nabafileyo kuKristu bayakuvuka kuqala;

¹⁷Khona thina esisekhona sisasele siyakuhlwithwa kanye nabo emafwini, sihlangabeze iNkosi emoyeni; kanjalo siyakuba neNkosi njalo.

¹⁸Ngakho duduzanani ngalawamazwi.