Read Cuiba Lucas 17 Bible Online

Lucas 17 - Cuiba bible

Lucas 17

¹Jesús namchi pijimonaetha, jeye: “Barapo nacuathepiwi ataya xeineiba po jiwi pecana exanaexaetsi xua ichamonae cana exana xua barapo jiwi abe peexanae cuiru coyene peexaneibinexa xua daxota jopa nejume cowʉnteibiyo. Ichitha pebin tsocuae xua bapon cana exana, xua ichʉn cana exanatsi, xua ichʉn abe peexanaewa tsane.

²Metha jame wʉnae tsipae xua barapo pebin pin iboto wisi cʉtsipatsi pin mar mentha barapo iboto cayawa cabutabachipatsino. Tsipei jopa wʉnae tsipae xua bapon cana exana xua ichamonae abe peexanae xuiru coyene exana pomonae cataunxuae aena nejume cowʉnta.

³¡Dota pam, xua jopa bara paichim tsane! “Icha ichʉn pon irʉ pejume cowʉntsindʉ, icha bapon pacata abe exana, bapon baxua yabara patsipaebare. Icha icha jʉntʉ coyene paca tsita xeinaena peauraxae xua pacata exana, bapoxonae pacui yabara jʉntemainare pocotsiwa bapon pacata exana.

⁴Bequein bara bapon abe pacata exana, siete po cuiyobe xua cae matacabitha, yawa paca tsipaeba siete po jumeyobe, bapon jeye: ‘Maisa auran tsocuae xua abe pacata exanatsi, equeicha jopa pacata abe exanae tsainchi’, jei pon abe exana. Daxota paca jeichi xua nantawenona peyabara jʉntemainaewa baxua xua po coyene bapon pacata abe exana”, jei Jesús. Meje yabara poxonae Jesús yabara paeba xua pin pejume cowʉntsi coyenewa

⁵Jesús pon Pecanamataxeinaein jiwi, equeicha pia peitorobiwi baraichi, jeye: —Pana cana exande xua bichocono pata jume cowʉntsiwa beyacaincha xua anoxuae, jei barapomonae.

⁶Nexata Jesús pia peitorobiwi jume nota, jeye: —Icha paxeinaetsipame xua be peya pejume cowʉntsi coyenewiyo xua bequein icha mostaza xutiyo jʉta ichi xua tsica xutiyo ichitha bara paca itacʉpa xua naewatha painya nejeiwa: ‘Ee, naewa jinya coutha natabʉ jonde yawa pin mar mene beya equeicha uncuare’, painya nejeiwa. Bapoxonae barapo nae jopa bayatha tsipae poxonae pajam tsipae baxua, jei Jesús. Meje yabara poxonae Jesús paeba xua pocotsiwa jiwi bewa exanae pocotsiwa pentacaponaein itoroba

⁷Equeicha Jesús namchi, jeye: “Metha ba paxam jiwana caein xeina pia petanacuichinchi pon penacuichin bapon ira cacobauya, mataʉta vaca yapu capopona. Bapoxonae bapon pon penacuichin wexua wenawirena, bo benawirena. Pon paxam jiwana caein metha bapon jopa jei tsipae: ‘Anetha, jondena matha xaema’, jopa jei tsipae bapon.

⁸Jame bapon jei tsipae: ‘Pexaewa netsiʉpain exanare. Inta carena tsaibinde pexaewa pexaethopaewatha poxonae xunaecan. Bapoxonae cotacaya bexa nabanare’, jei tsipae pon paxam jiwana.

⁹Pon penacuichin jopa jei tsipaetsi: ‘Jaco xua taneyawenaewam’, jopa jei tsipae pon paxam jiwana. Tsipei saya taexanatsi xua bapon peitorobixae.

¹⁰Icha pon petanacuichin ichi xua taexana peitorobixaetsi pia pentacaponaein, paxam bara jʉta paichinde. Poxonae pawetame pocotsiwa Nacom paca itoroba, pajande: ‘Paxan pata nebusi cui tataewimonae pan xuano pata pecui pawi pan, tsipei saya paexanan xua pocotsiwa bewa paexanaein’, pajande”, jei Jesús. Meje yabara poxonae Jesús axaibi exana diez poyobe pebiwi, pomonae peperʉ sawichimonae

¹¹Poxonae Jesús cataunxuae ecapona Jerusalén tomara beya nexa, Samaria nacua iya pona yawa Galilea nacua iya pona.

¹²Poxonae Jesús tsica tomariyotha patopa, diez poyobe pebiwi pata Jesús pia xantha tatsi. Barapo diez poyobe peperʉ sawichimonae, ichitha barapomonae Jesús tajʉ wetaeumendenatsi.

¹³Barapomonae wawai, jeye: —Jesús, pon Patatanecuidubim, pana neyabara najʉntʉ coyene xeinare jinya pata tana neyawenaenexam, jei barapo peperʉ sawichimonae.

¹⁴Poxonae Jesús tane barapomonae, Jesús barai, jeye: —Paponare sacerdotemonaetha painya nepaca cataenexa, jei Jesús. Poxonae cataunxuae namtotha enapona, bapoxonae barapomonae perʉ jume tsʉrʉcʉpae xua peperʉ sawiwatsi barapomonae.

¹⁵Barapo diez poyobe jiwana caein, poxonae bapon taeba xua axaibi tsʉrʉcʉpae, bapoxonae Jesús beya pona, xua caibeya pona, yawa jume daunweya Nacom wʉnae jaintatsi.

¹⁶Barapon pentabocototha uncua Jesús peitabaratha tatsi. Yawa irabe taeuncuareca xua Jesús pejacobinexatsi. Barapo pebin apara pon seicaya Samaria nacuapin.

¹⁷Nexata Jesús namchi, jeye: —¿Diez poyobe itara axaibi exanan? ¿Incane dapo nueve poyobe jane?

¹⁸Bapon apara penanapaincha jinompaewi jiwanapin. Yawa cou compa caiberena pia wʉnae jainchichi Nacom, jei Jesús.

¹⁹Nexata Jesús equeicha pebin baraichi, jeye: —Nontaponde pondeno, bayatha axaibim tana neyabara jume cowʉntsixaemxae xua bara tana neitacʉpaewa xua axaibi tacaexanaewatsi, jei Jesús. Meje yabara poxonae Jesús yabara paeba po coyene xua poxonae Nacom itorobiya ewatsina jiwi

²⁰Fariseomonae Jesús yainyabatsi namchi, jeye: —¿Eta poxonae Nacom itorobina pon peitapetsinxae pata tanecapanenebiwa exanaenexa, xuano xua itorobiya pata taneewatsiwa? jeichichi barapomonae Jesús. Jesús jume nota, jeye: —Poxonae Nacom itorobiya ewatsina jiwi, barapo coyene jiwi jopa itacʉpaetsi xua petaewa baxua.

²¹Daxota jiwi jopa jei tsane: ‘Baraxote bayatha patope’, jopa jei tsane. Mataʉtano jopa jei tsane ‘Xoteiche bayatha patope’, jopa jei tsane. Tsipei apara po coyene xua Nacom itorobiya ewatsina jiwi barapo coyene patopa jiwitha. Daxota Nacom jʉntʉ coyene itorobiya ewatsina jiwi pomonae pejume cowʉntsiwixaetsi Nacom, jei Jesús.

²²Nexata Jesús barai pijimonae, jeye: —Matacabin othopaena po matacabintha poxonae paichichipame xua painya tana netaewam xua ponxaein Nacom Tananeitapetsin xuano xua muxuna bepataebenaename caentacabi xua barapo matacabin jiwana. Dapo jumetha jopa painya nepaca itacʉpaewa tsane xua painya tana netaewam tsane xuano xua caentacabi xua barapo matacabin jiwana.

²³Ichamonae paca jei tsane: ‘Baraxote bayatha patopa bapon’, paca jei tsane. Ichacuitha paca jei tsane: ‘Baraxoteicha bayatha patopa bapon’, paca jei tsane, ichitha jopa paponaeinde bara beya yawa jopa pajume cowʉntsinde.

²⁴Icha yamʉxʉ ichi xua jemeicha yacoicha uncueica, xua coicha nayotaxuba itabocototha, barichi tsane po matacabitha poxonae patopeicaein ponxaein Nacom Tananeitapetsin.

²⁵Ichitha copiya nantawenona xua neperaxa jʉbina ichamonae. Yawa neitawetsinano pomonae xua anoxuae jinompa.

²⁶Icha matha ichi poxonae Noé caena bayatha popona jiwi jopa tsaqueinaeyo xua Nacom pin awʉbo exanaena methaunxuae. Saya barompaya icha jʉntʉ cuitha jinompa daxota jiwi werapa. Barichi jʉta ichi tsane poxonae patopeicaein barapo cae pin nacuathe xua ponxaein Nacom Tananeitapetsin. Poxonae patopeicaein jiwi jopa tsaqueinae tsane xua Nacom werapa exanaena barapo jiwi pomonae jopa pejume cowʉntsiyoxaetsi.

²⁷Pomonae jinompa poxonae Noé popona, barapomonae jʉntema nabaneiba, yawa apeiba, yawa apeiba yawa jiwitha jijinapona yawa pexantixi jitha dodoubapona, beya yantacabi othopa poxonae po matacabitha Noé pin jera naetha joniya. Bapoxonae pin ema mʉ jopa. Daxita Noé wepu bunothopatsi pomonae jinompa poxonae Noé popona.

²⁸Barichirʉ jiwi pocotsiwa ichamonae exana poxonae ichʉn pebin popona pon pewʉn Lot. Barapomonae nabaneiba, yawa apeiba, yawa comaqueiba, yawa caenaeteiba, yawa pexaewa ʉbeiba, yawa bomʉxʉn acabeiba.

²⁹Poxonae bapon Lot Sodoma tomara wenaetabiya, barapoxonae iso itere mʉ, mʉ othopeica tomaratha, yawa pocotsiwa be ibo pʉrʉ baxua itaboco weothopeicano xua bichocono atou. Daxita Sodoma tomarapiwi werapa.

³⁰Icha Sodoma tomaratha ichi xua jemeicha iso itere mʉ, mʉ othopeica yawa xua jemeicha ibo pʉrʉ itaboco weothopeica, bara jʉta ichin tsane jemeicha patopeicaein ponxaein Nacom Tananeitapetsin poxonae jiwi tsita naitʉtsin.

³¹“Barapo matacabitha icha ichʉn bo matatupatha uncua, barapon jopa bewa botha joniyae tsane xua penotsiwa tsane pocotsiwa tabobeinchi bomʉxʉ tututha. Irʉ pon pabitha popona jopa bewa caibeya ponae tsane botha, saya jame nainya benaetsiricuaena.

³²Pacui yabara nanta xeinare Lot piseuri tatsi xua tʉpa poxonae jopa nainya naetsiricuaeyo piawan caibe pesiwa necoyaexae.

³³Pon naantobeya nata exana pocotsiwa bapon ichichipa, bapon jopa xeinaeyo peajʉntʉyapusʉwa po peajʉntʉyapusʉwa ataya tsiteca xua Nacom pia nacua beicha. Ichitha pon neantobeya inta exana pocotsiwa ichichipan bapon xeinaena peajʉntʉyapusʉwa, po peajʉntʉyapusʉwa ataya tsiteca xua Nacom pia nacua beicha.

³⁴“Paca tsipaebatsi po mataqueitha patopaein, ainya pebinbe ponbe xua nanta jʉpaya maitecabe, caein matatsunpin pichina, pon pejume cowʉntsixae Nacom. Ichʉn saya cuenta ponaeinchi jopa pejume cowʉntsiyoxae Nacom.

³⁵Irʉrʉ ainya yabʉyobe nacuara yacatoyorobauyaenabe, ichowa matatsunpin pichina pejume cowʉntsixae Nacom. Ichowa saya cuenta ponaeinchi jopa pejume cowʉntsixae Nacom.

³⁶Irʉrʉ ainya pebinbe nacuara nacuitauyaenabe pabitha, ichʉn matatsunpin pichina, ichʉn saya cuenta ponaeinchi”, jei Jesús.

³⁷Poxonae baxua Jesús pijimonae jume tainchi, Jesús yainyabatsi jeichichi, jeye: —Pata Tanecanamataxeinaem, ¿exota metha baxua exanaena? jeichichi pijimonae. Jesús pijimonae jume nota pecayabara jʉta pepaebi diwesiyotha, jeye: —Quequeremonae ba nacaetuta ichaxota baurin boca. Bara jʉta paichim tsane paxam pomonae tana nejume cowʉntsi jiwi pam pana newʉnae ewatsiname po mataqueitha patopeicaein, barapo mataqueitha panacaetutsiname, jei Jesús.